Ҫулталӑк пуҫланнӑранпа пирӗн республикӑра 7550 ача ҫуралнӑ. Кун пирки Юстици енӗпе ӗҫлекен комитет пӗлтернӗ.
Кӑҫал ҫуралнӑ пепкесенчен 140-шӗ йӗкӗреш, 3-шӗ – виҫӗреш. Виҫӗрешсем пурте Шупашкарта ҫут тӗнчене килнӗ.
Маларах эпир кӑҫалхи ҫичӗ уйӑхра пирӗн республикӑра 6536 ача ҫуралнӑ, ҫав шутра – 3367 арҫын ачапа 3169 хӗрача тесе Чӑваш халӑх сайчӗ пӗлтернӗччӗ. Аса илтерер: ҫав вӑхӑтра ҫуралнисенчен 35 проценчӗ, е 2276-шӗ, – ҫемьери пӗрремӗш ача, ҫемьери иккӗмӗш ача – 2371, врҫҫӗмӗш ача – 1405, тӑваттӑмӗш е ун хыҫҫӑнхисем – 475.
Ку ҫулталӑк кӑларса тӑратнӑ чи пысӑк хӑрушлӑх вӑл, паллах, COVID-19 кӑшӑлвирус. Унӑн витӗмне пула тӗнче экономики ҫеҫ мар, нефть хакӗ те чакрӗ, ҫынсен пурнӑҫ йӗрки йӑлт арпашӑнса кайрӗ.
Чи малтанах, республикӑра пӗр ҫын та чирлемен чухне, ҫак кӑшӑлвирус питӗ хӑрататчӗ. Пӗрремӗш чирлисене тупнӑ чухне халӑх питӗ тӗлӗнетчӗ — анализ кӑшӑлвирус пуррине палӑртнӑ пулсан ма вара ӑна республикӑна илсе килмелле-ха? тесе ыйтатчӗ. Ним явапӗ те ҫук тесе вӑрҫатчӗҫ ҫав ҫынсене. Уйрӑмах Мари Эле пирӗн республика урлӑ каҫнӑ пӗр хӗрарӑма астӑвасса ятлатчӗҫ.
Чире сарас мар тесе уйӑх ытла халӑх килте ларчӗ. Ресторансемпе кафесене хупса лартрӗҫ... Ӗҫлеме чарнине пула чылай предприниматель шар курчӗ. Юрать-ха каярах вӗсене майӗпен уҫӑлма ирӗк пачӗҫ, анчах хӑшӗ-пӗри халь те ӗҫе пуҫлаймасть. Калӑпӑр, чӑваш эстрада юрӑҫисем пысӑк шар курчӗҫ — хӗлренпе вӗсем пӗр концерт та ирттермен. Ҫак сӑлтава пулах ман укҫа конверчӗсем те сутӑнма пӑрахрӗҫ...
Тем каласан та COVID-19 хӑратакан пулӑм.
Статистикӑна пӑхас пулсан ку чир сана ҫакланмӗ тесе шухӑшлама пулать.
Чӑваш Ен кӑшӑлвируспа ҫыхӑннӑ чару мерисен виҫҫӗмӗш тапхӑрне куҫассине эпир маларах пӗлтернӗччӗ. Ҫав вӑхӑтрах ку вируспа чирлекенсем тупӑнсах тӑраҫҫӗ. Ҫурла уйӑхӗн 29-мӗшӗ тӗлне пирӗн республикӑра кӑшӑлвируспа тата тепӗр 31 ҫын чирленине шута илнӗ. Кун пирки стопкоронавирус.рф сайт пӗлтернӗ.
Иррсе кайнӑ талӑкра COVID-19 диагнозӗллӗ 27 ҫын чиртен сывалнӑ.
Кӑшӑлвирус пандемийӗ пуҫланнӑранпа пирӗн тӑрӑхра ерекен ҫак чир 7 713 ҫынна лекнӗ.
Иртсе кайнӑ талӑкра вилекенсем пулман. Пӗтӗмпе 70 ҫын вилнине Чӑваш халӑх сайчӗ ӗнер хыпарланӑччӗ.
«Мир квартир» портал специалисчӗсем ҫурт-йӗр тара илме мӗн хака ларнине тишкернӗ. Хваттер тара илейменнисем пӳлӗм суйлаҫҫӗ. Вӑтамран илсен, хак 1,5 процент ӳснӗ.
Хаксем ҫулталӑк пуҫланнӑранпа ҫӗршывӑн 39 пысӑк хулинче ӳснӗ, 31 хулара чакнӑ.
Севастопольте, сӑмахран, пӳлӗм тара илме халӗ 24,1 процент хаклӑрах ларать, Барнаулта – 18%, Пензӑра – 15%, Волгоградра – 14,2%, Мурманскра – 12,3%, Сочире – 12,1%, Якутскра – 12,1%, Белгородра – 9%, Аҫтӑрханта – 8,8%.
Хаксем Магнитогорскра хак 19,3 процент йӳнелнӗ, Тольяттире –13,4%, Краснодарта – 8,5%, Тверьте – 8% , Чуллӑ Ҫырта –7,7%, Шупашкарта – 7,3%, Хусанта – 5,2%. Мускавра 6,5 процент йӳнелнӗ, Мускав облаҫӗнче – 6,5%, Питӗрте – 4,6%.
Раҫҫей почтин Чӑваш Енри управленийӗ 5 ҫӗнӗ автомобильпе пуянланнӑ. Вӗсен марки — «LADA Largus». Ҫулталӑк вӗҫлениччен тата тепӗр 14 автомобиль илсе килӗҫ.
Раҫҫей почтин Чӑваш Енри уйрӑмӗнче хальхи вӑхӑтра – 117 транспорт, ҫав шутран 8-шӗ курьер службине тивӗҫтерет. Почта машинисен пӗтӗмӗшле маршручӗ 12 пин те 500 метрпа танлашать.
Халӗ илсе килне пилӗк автомобильтен иккӗшне курьер службине уйӑрса парӗҫ, виҫҫӗшӗ почта турттаракан хаҫат-журналпа ытти япалана Шупашкарта пӗр вырӑнта тепӗр ҫӗре илсе ҫитерӗ. Автомобильсене 750 килограмм таран тиеме пулать. Вӗсене маякпа, сиренӑпа тата сигнализаципе тивӗҫтернӗ.
Чӑваш Ен Сывлӑх сыхлав министерствинче санитари ыйтӑвӗсемпе тата эпидемие хирӗҫ ӗҫлекен комиссин ларӑвӗ иртнӗ. Ӑна сывлӑх сыхлав министрӗн пӗрремӗш ҫумӗ Алексей Кизилов ертсе пынӑ. Ларӑва Роспотребнадзорӑн республикӑри управленийӗн специалисчӗсем хутшӑннӑ.
Кӑҫал пирӗн республикӑра пурӑнакансенчен 60 процентран кая мар йышне грипран прививка тума палӑртнӑ. Чир хӑвӑрт ерес хӑрушлӑх пур ҫынсене илсен вакцинаци кӑтартӑвӗ 75 процентран кая мар пулмалла.
Эпидемиологи тапхӑрӗнче тухтӑрсен пульницӑри амбулатори тата стационар уйрӑмӗсенче ҫеҫ мар, ҫынсем патне киле ҫитсе те пулӑшмалла. Вируса хирӗҫ препаратсене те пульницӑсен ҫителӗклӗ хатӗрлесе хумалла. Хушма койка фончӗ уҫма та хатӗр тӑмалла.
Специалистсем Раҫҫейри хӑш регионта ипотека илекенсем йышлине тишкернӗ. Ҫурт-йӗре банк панӑ кивҫен укҫапа туянакансем Югра тата Тӗмен тӑрӑхӗсенче нумай. Ҫапла пӗтӗмлетнӗ «Новости» Раҫҫейӗн информаци агентстви. Асӑннӑ МИХӑн эксперчӗсем кредит рынокне тишкернӗ. Вӗсем 2019 ҫулхи утӑ уйӑхӗн 1-мӗшӗнчен пуҫласа кӑҫалхи утӑ уйӑхӗн пуҫламӑшӗчченхи лару-тӑрӑва тишкернӗ.
Ямал тӑрӑхӗнче кашни пин ҫынран вӑтӑрӑшӗ ипотека илнӗ. Ку вӑл ҫӗршыври вӑтам кӑтартуран 1,8 хут пысӑкрах. Тӗмен облаҫӗпе Югра та кӳршӗллӗ Ямалтан нумай юлмаҫҫӗ. Унта пин ҫын пуҫне 27,6 тата 27,4 ҫын ипотека илнӗ.
Чӑваш Ен, Пушкӑртстан, Архангельск, Магадан тата Ҫӗнҫӗпӗр облаҫӗсем, Удмурт Республики тата Пермь тӑрӑхӗнче пурӑнакансем те ҫурт-йӗр условине ипотека пулӑшнипе лайӑхлатаҫҫӗ. Унта пин ҫын пуҫне 25 кредитран пуҫласа 23,4 кредит таран тивет.
Ҫурла уйӑхӗн ҫурри тӗлне илсен пирӗн республикӑра 23 ача чӳречерен ӳкнӗ. Шел те, 4 ача ӗмӗрлӗхе куҫ хупнӑ.
Ҫул-йӗр ҫинчи инкеке лекнипе те пӗчӗккисен кун-ҫулӗ татӑлать. Ун пеккине пирӗн тӑрӑхра 2 тӗслӗхе шута илнӗ.
Ӑшӑ ҫанталӑкра пирӗнтен кашниех шыв-шур хӗрне туртӑнать. Ача-пӑча пушшех те. 4 ача шыва путса вилнӗ.
Тепӗр хӑрушӑ инкек — пушар. «Хӗрлӗ автан» никама та, ниме те шеллемест. Кун пек инкекре 3 ача пурнӑҫӗ сарӑмсӑр татӑлнӑ.
Чукун ҫул урлӑ каҫнӑ чух та асӑрханмалла. Пирӗн республикӑра ачасемпе кӑҫал хальлӗхе ун пек пӑтӑрмах пулса иртмен.
Кӑшӑлвируспа чирлекенсен шучӗ пирӗн республикӑра 7,5 пинрен иртнӗ. Ҫав шутран 82 проценчӗ сывалнӑ.
Паян ир тӗлне пирӗн республикӑра 7516 ҫын кӑшӑлвируспа чирленине шута илнӗ. Ку вӑл – официаллӑ статистика. Маларах асӑннӑ 7,5 пин ытла тӗслӗхрен 35 ҫынна вирус иртнӗ талӑкра ернӗ.
6196 ҫын сывалнӑ. Ҫав йышран 27 ҫын иртсе кайнӑ талӑкра сипленнӗ.
Кӑшӑлвирус пандемийӗ пуҫланнӑранпа COVID-19 68 пациент пурнӑҫне татнӑ. Ку вируса пула юлашки талӑкра никам та вилмен.
Аса илтерер: пирӗн республикӑра пысӑк суту-илӳ центрӗсене тата аттракционсене уҫма ирӗк панӑ.
Ӗҫе кайса суранланакансен йышӗ пирӗн республикӑра кӑҫалхи кӑрлач-утӑ уйӑхӗсенче уйӑхӗсенче чакнӑ. Чӑваш Ен Ӗҫ тата социаллӑ хӳтлӗх министерстви пӗлтернӗ тӑрӑх, суранланакансен шучӗ пӗлтӗрхи танлаштаруллӑ тапхӑртинчен 9,5 процент сахалрах.
Кӑҫалхи ҫичӗ уйӑхра 105 ҫын ӗҫе кайсан шар курнӑ, 66-шӗ ҫӑмӑллӑн суранланнӑ, 22-ӗшӗ— йывӑр, 17-шӗ вилнӗ. Пӗлтӗрхи ҫичӗ уйӑхра 116 ҫын аманнӑ. Кӑҫал шар курнисенчен 71-шӗ — арҫынсем, 34-шӗ — хӗрарӑмсем.
Инкексем ҫӳллӗшӗнчен ӳкнипе (34 тӗслӗх, е 32,4 процент), япала пырса ҫапӑннипе е машина пырса кӗнипе (24 тӗслӗх, е 22,9 процент), ҫул-йӗр ҫинчи пӑтармахсемпе (11 тӗслӗх, е 10,5 процент) тата ытти сӑлтавпа пулнӑ.
+18.3 °C