Чӑваш Ен илемлӗ вырӑнсемпе пуян. Вӗсем хушшинче ятарласа хӳтӗлемелли ҫутҫанталӑк вырӑнӗсем те пур. Вӗсенчен пӗринче, «Присурский» заповедникра, хур-кӑвакал йышне шутланӑ.
Шывра ишекен кайӑк йышне заповедникра ҫулсерен палӑртаҫҫӗ. Ҫав ӗҫе кайӑксем йӑвана ларса чӗпӗ епле кӑларнине пӗлес тӗллевпе йӗркелеҫҫӗ. Чи малтанах кайӑк кӑвакал чӗпписене шута илеҫҫӗ.
Заповедникӑн Улатӑрти вӑрманӗсенче кӑвакал чӗпӗ кӑлармалли вырӑн йышлах мар. Ҫавна май кӑвакалсем заповедникӑн Сӑр тӑрӑхӗнчи кӳллисене кӑмӑллаҫҫӗ. Кайӑк кӑвакалӑн хӑш-пӗр ӑрачӗ пусма кашни ҫулах лармасть. Хур-кӑвакал кӑҫал чӗпӗ кӑлараслӑхӗн кӑтартӑвне «Присурский» заповедник орнитолгӗсем вӑтам тесе пӗтӗмлетнӗ.
Ҫурла уйӑхӗн 2-мӗшӗ тӗлне илсен пирӗн республикӑра кӑшӑлвирус диагнозӗллӗ тата тепӗр икӗ ҫын вилнӗ. Ҫапла вара ҫулталӑк пуҫланнӑранпа 56 ҫын пурнӑҫӗ татӑлнӑ. Цифрӑсене федерацин информаци центрӗ пӗлтернӗ.
Иртсе кайнӑ талӑкра Чӑваш Енре кӑшӑлвируспа чирлисене тата тепӗр 37 тӗслӗх шута илнӗ. Ҫулталӑк пуҫланнӑранпа ку амакпа 6 811 ҫын чирленӗ. Сывалнисем – 3 857 ҫын, вӗсенчен 65-шӗ юлашки талӑкра сывалнӑ.
Хальхи вӑхӑтра пирӗн республикӑра кӑшӑлвируспа 2 898 ҫын чирлет. Чир сарӑлнин индексӗ – 0,97.
Сӑмах май каласан, Раҫҫей ӗнертенпе тӑватӑ ҫӗршывпа: Турципе, Великобританипе, Абхазипе тата Танзанипе – хӑйӗн чиккине уҫрӗ. Турцие, Великобритание тата Танзание самолетсем вӗҫме тытӑнчӗҫ. Ют ҫӗршывран килекенсен килтен тухмасӑр ик эрне ларма тивмӗ.
Чӑваш Енре пурӑнакан кӑшӑлвирус диагнозӗллӗ тата тепӗр виҫӗ ҫын вилнӗ. Паян республикӑн Сывлӑх сыхлав министерстви официаллӑ статистикӑна пӗлтернӗ. Пурнӑҫран уйрӑлакансем хӑш тӑрӑхран тата вӗсем миҫерине, ытти мӗнле амакпа нушаланнине ҫырман. Ун пеккине тахҫанах хыпарлама пӑрахрӗҫ. Апла пӗлтерни вилнисен тӑванӗсене хурлантарать тесе шухӑшлаҫҫӗ.
Пандеми пуҫланнӑранпа пирӗн тӑрӑхра кӑшӑлвирус диагнозӗллӗ 54 ҫын пурнӑҫран уйрӑлнӑ. Иртсе кайнӑ талӑкра тата тепӗр 40 ҫын чирлине шута илнӗ. Ҫулталӑк пуҫланнӑранпа 6 734 ҫын чирленӗ.
Сывалнисен йышӗ – 3 725, ҫав шутран 45 ҫын юлашки талӑкра сывалнӑ. Хальхи вӑхӑтра 2 955 ҫын сывалнӑ.
Чир сарӑлнин индексӗ текен кӑтарту та пур тухтӑрсен. Пирӗн республикӑра ҫав цифра – 0,98.
Кӑшӑлвируспа чирлекенсене тата тепӗр 44 ҫын чирленӗ. Ҫулталӑк пуҫланнӑранпа пирӗн республикӑра 6 653 ҫын ҫак амакпа чирленӗ. Ку цифрӑна Чӑваш Ен Сывлӑх сыхлав министерствинче паян пӗлтернӗ.
Эпидемиологи тапхӑрӗ пуҫланнӑранпа 3 647 ҫын сывалнӑ, ҫав шутра 31 ҫын — юлашки тапхӑрта. Хальхи вӑхӑтра Чӑваш Енре 2 955 ҫын чирлет.
Юлашки тапхӑрта, тавах Турра, вилекен пулман. Аса илтерер: ҫулталӑк пуҫланнӑранпа кӑшӑлвирус диагнозӗллӗ 51 ҫын вилнӗ. Хурлӑхлӑ ҫавӑн пек тӗслӗхе юлашкинчен утӑ уйӑхӗн 24-мӗшӗнче шута илнӗ.
Роспотребнадзорӑн Чӑваш Енри управленийӗнче пӗлтернӗ тӑрӑх, утӑ уйӑхӗн 28-мӗшӗ тӗлне кӑшӑлвирусран 136 188 тест тунӑ, ҫав шутра иртнӗ талӑкра – 1 069 тест.
Кӑҫалхи пӗрремӗш ҫур ҫулта пирӗн республикӑра пневмонипе 6 556 ҫын чирленӗ. Пӗлтӗрхи ҫав вӑхӑтрипе танлаштарсан ҫакӑ 2,1 хут ӳснӗ, ытти ҫулсенчи вӑтам кӑтартуринчен 2,5 хут нумайланнӑ. Ҫак цифрӑсене Роспотребнадзорӑн Чӑваш Енри управленийӗ пӗлтернӗ.
Вирус пуҫарнӑ пневмонипе 1 351 ҫын чирленӗ. Бактери пневмонийӗ 1 902 пациента ҫакланнӑ.
Ҫӗртме уйӑхӗнче пневмонипе пӗлтӗрхи ҫав уйӑхринчен 5,7 хут ытларах чирленӗ. Кӑшӑлвируса пула пуҫланнӑ пневмонипе чирлекенсем Шупашкар, Ҫӗнӗ Шупашкар, Канаш, Ҫӗмӗрле хулисенче, Шупашкар, Ҫӗрпӳ, Етӗрне, Хӗрлӗ Чутай, Вӑрнар, Комсомольски, Елчӗк, Вӑрмар, Канаш, Тӑвай районӗсенче уйрӑмах нумай шута илнӗ.
Ҫӗртме уйӑхӗнче Чӑваш Енре вируслӑ ӳпке шыҫҫипе 2254 ҫын чирленӗ. Кун пирки Роспотребнадзорӑн Чӑваш Енри управленийӗн ертӳҫи Надежда Луговская пӗлтернӗ.
Чирленисен 33,2 проценчӗн сӑлтавӗ кӑшӑлвирус пулнӑ. Ытти тӗслӗхре чир урӑх вируса пула аталаннӑ. Надежда Луговская пӗлтернӗ тӑрӑх, халӗ ӳпке шыҫҫипе чирлекенсем кӑштах сахалланнӑ. ОРВИпе тата гриппа чирлекенсен йышӗ те чакса пырать-мӗн. Ҫӗртме уйӑхӗнче пӗр эрнере 4 пин ытла ҫын чирленӗ тӗк утӑ уйӑхӗн 13-19-мӗшӗсенче – 2906 ҫын.
Кӑшӑлвирусран сывалнисем – 34845 ҫын. Анчах Луговская ку хисеп тӗрӗс пулнинче иккӗленет. Кунсерен 20-30 ҫын сывалать, статистикӑна стационартан киле кайнисем ҫеҫ кӗреҫҫӗ, килте сипленсе сывалнисем вара – ҫук.
Чӑваш Енре кӑшӑлвирус сарӑлнине хирӗҫ йышӑннӑ чару мерисен иккӗмӗш тапхӑрне куҫасси пирки калаҫаҫҫӗ-ха. Ҫав вӑхӑтрах ҫак вируспа чирлекенсем ҫав-ҫавах йышлӑ.
Официаллӑ статистикӑна ӗненсен, иртсе кайнӑ талӑкра пирӗн республикӑра кӑшӑлвирус диагнозне тата тепӗр 44 ҫынӑнне шута илнӗ. COVID-19 диагнозне пӗтӗмпе 6484 тӗслӗх тупса палӑртнӑ. Сӑмах май каласан, социаллӑ учрежденисенче те пысӑк йышпа чирлекенсем пур. Аса илтерер: Кӳкеҫри ваттисемпе сусӑрсен ҫуртӗнче 22 ҫын кӑшӑлвируспа чирленӗ, ҫав шутра 11 ҫын – ваттисен ҫуртӗнче ӗҫлекенсем.
3516 ҫын сывалнӑ, ҫав шутран 31-шӗ – юлашки тапхӑрта.
Кӑшӑлвирус 51 ҫыннӑн пурнӑҫне татнӑ. Юлашки талӑкра вилнисене шута илмен.
Республикӑри пысӑк аслӑ шкулсенчен пӗринче, И.Н. Ульянов ячӗллӗ Чӑваш патшалӑх университетӗнче, йышӑну кампанийӗ ҫӗртме уйӑхӗн 20-мӗшӗнче пуҫланнӑ. Унчченхи ҫулсенчипе танлаштарсан хутсен икӗ мелпе йышӑнаҫҫӗ — Абитуриентӑн уйрӑм пӳлӗмӗ тата почта ҫыхӑнӑвӗн операторӗсем урлӑ.
Йышӑну комиссийӗнче 50 ытла ҫын ӗҫлет. Вӗсем ҫамрӑксен, вӗсен ашшӗ-амӑшӗн ыйтӑвӗсене йышӑнаҫҫӗ, пӑхса тухса хуравлаҫҫӗ. Кунсерен 1500 ытла шӑнкӑрав йышӑнаҫҫӗ.
Аслӑ шклута бакалавриат шайӗпе 1325 бюджет вырӑнӗ пӑхса хӑварнӑ.
Утӑ уйӑхӗн 20-мӗшӗ тӗлне 3400 ытла заявлени илнӗ. Абитуриентсем уйрӑмах суйлакан енсем ҫаксем: «Сиплев ӗҫӗ», «Педиатри», «Стоматологи», «Фармация», «Юриспруденци», «Экономика», «Строительство».
Техника факультечӗсенче 766 хысна вырӑнӗ пӑхса хӑварнӑ. Унта электроэнергетика тата электротехника, информатика и шутлав техники, радиоэлектроника тата автоматика, управлени тата социаллӑ технологи, машиностроени пӗлӗвне илме пулать.
Кӑшӑлвирус инфекцийӗ алхасма пуҫланӑранпа пирӗн республикӑра ҫак амак 6 пин те 216 ҫынна ернӗ. Ку вӑл, тӳрех палӑртар, – официаллӑ статистика.
Иртсе кайнӑ талӑкра республикӑра 30 ҫын сывалнӑ. Ҫулталӑк пуҫланнӑранпа пирӗн тӑрӑхра пӗтӗмпе 3 пин те 364 пациент сывалнӑ.
Кӑшӑлвирус теме пуҫласаӗах пӗр ҫын чирлесен те сисчӗвленсе йышӑнатчӗҫ, вӑл ӑҫтан пулнине тата епле майпа чир ертнине пӗлесшӗн ҫунатчӗҫ. Халӗ хӑнӑхма пуҫларӑмӑр курӑнать.
Утӑ уйӑхӗн 19-мӗшӗ тӗлне илсен кӑшӑлвируспа чирлисене Чӑваш Енре тата тепӗр 52 ҫынна тупса палӑртнӑ.
Кӑшӑлвирус диагнозне палӑртнисем хушшинче вилекенсем те пур. Иртсе кайнӑ талӑкра тата тепӗр ҫыннӑн пурнӑҫӗ татӑлнӑ. Ҫапла вара пирӗн республикӑра кӑшӑлвирус диагнозӗллӗ 49 ҫын пурнӑҫран уйрӑлнӑ.
Паян Чӑваш Енре кӑшӑлвирус сарӑлнине хирӗҫ ӗҫлекен оперативлӑ штабӑн ларӑвӗ иртнӗ. Республикӑн сывлӑх сыхлав министрӗ Владимир Степанов пӗлтернӗ тӑрӑх, ӳпкене искусствӑлла майпа сывлаттаракан аппаратпа 23 пациента ҫыхӑнтарнӑ. Министр каланӑ тӑрӑх, ун пек аппаратсем пульницӑсенче ҫителӗклех. COVID-19 чирӗллисем валли республикӑра 1955 койка пӑхса хӑварнӑ.
Чирлекенсен шучӗ Шупашкарпа Ҫӗнӗ Шупашкарта ӳснине пӗлтернӗ. Чирлисенчен 42 проценчӗ – Шупашкарта пурӑнакансем. Юлашки эрнере ку цифра тата ӳснӗ, 52-64 процента ҫитнӗ. Унсӑр пуҫне республикӑри 14 районта чирлисем йышлӑ. Ҫавна май республика чару мерисене пӑрахӑҫлама хатӗр мар.
Чирлекенсенчен ытларахӑшӗ – 50-59 тата 40-49 ҫулсенчи ҫынсем.
⠀
-2.7 °C