9111.ru сайтри сӑн

Ҫӗмӗрлере пурӑнакан 71 ҫулти арҫынна тытса чарнӑ. Вӑл ҫын сывлӑхне йывӑр сиен кӳрсе асӑрханмасӑр вӗлернӗ тесе шутлаҫҫӗ.

Следстви пӗлтернӗ тӑрӑх, ҫӗртме уйӑхӗн 1-мӗшӗнче вӑл 35 ҫулти кӳршипе килӗнче пулнӑ. Хайхискерсем вак-тӗвекшӗн ҫапӑҫса кайнӑ. Кил хуҫи хӑнана тимӗр япалапа пуҫӗнчен ҫапнӑ. Лешӗ ҫавӑнтах вилнӗ.

Следстви пынӑ вӑхӑтра арҫынна хупса усрас ыйтӑва пӑхса тухаҫҫӗ.

Кӑҫал Республика кунӗнче фейерверксен фестивальне ирттерӗҫ. Кӑшӑлвирус пандемине пула "Асамат" фестиваль икӗ ҫул иртменччӗ.

Фестиваль яланхи пекех ҫӗртме уйӑхӗн 24-мӗшӗнче 23 сехетре пулӗ. Кӑҫал унта икӗ организаци кӑна хутшӑнма кӑмӑл тунӑ: Шупашкарти "Пирснаб-Поволжье" тата Алма-Атари "Номанд Арт Казахстан".

Палӑртса хӑварар: кӑҫал фестиваль 13-мӗш хут иртӗ.

goodfon.ruсайтри сӑн

Ҫулла, шел те, шывра путса вилекенсем нумай. Кӑҫал сезон пуҫланнӑранпа пӗрремӗш инкек пулнӑ ӗнтӗ.

Ҫӗртме уйӑхӗн 2-мӗшӗнче Вӑрмар районӗнчи Кӗлкеш ялӗ ҫывӑхӗнчи пӗвере 50 ҫулти арҫын путса вилнӗ. Унӑн кӗлеткине ял ҫыннисем туртса кӑларнӑ. Ҫав вӑхӑталла вӑл вилнӗ ӗнтӗ.

Малтанлӑха пӗлтернӗ тӑрӑх, арҫын пулӑ тытнӑ чухне хӑрушсӑрлӑх йӗркине пӑхӑнман.

cheb-centr.soc.cap.ru сӑнӳкерчӗкӗ

Чӑваш Енӗн тӗп хулинче «Эткер» ятлӑ ача-пӑча уйлӑхӗ уҫӑлнӑ. Вӑл Шупашкарти халӑха социаллӑ пулӑшу паракан комплекслӑ центрта ӗҫлет. Уйлӑхӑн пӗрремӗш сменинче йывӑр лару-тӑрури ҫемьесенчи 30 ача хӑйӗн сывлӑхне ҫирӗплетӗ.

Социаллӑ учрежденире пӗлтернӗ тӑрӑх, ҫӗртме уйӑхӗн 1-мӗшӗнче уҫӑлнӑ уйлӑхра ачасем кӑнтӑрла канаҫҫӗ. Тепӗр майлӑ каласан, ирпе килеҫҫӗ те куна вӗсем центрта ирттереҫҫӗ.

Ачасем валли аслисем кӑсӑклӑ тӗрлӗ программа хатӗрленӗ. Мероприятисен тӗп теми — чӑваш халӑхӗн мухтавлӑ историйӗпе тата ҫыннисемпе паллаштарасси. Ҫавна тӗрлӗ вӑйӑ, конкурс, тупмалли юмахсем урлӑ ачасем патне ҫитерӗҫ.

mupi.su сайтри сӑн

РФ вӗренӳпе ҫутӗҫ министрӗ иртнӗ уйӑхра Раҫҫейре хӗвеланӑҫ енчи пек вӗренӳ тытӑмӗ пулмассине пӗлтернӗ. Пачах пулмасть мар-ха. Ӗҫпе тивӗҫтерекенсен тата аслӑ шкулсен специалитета суйлама май пулӗ.

Аса илтерер: хӗвел тухӑҫӗнчи аслӑ шкулсенче икӗ шайпа вӗренеҫҫӗ - бакалавриат тата магистратура. Пирӗн ҫӗршывра та ку тытӑм ҫине куҫнӑ. Унччен вара специалитет пулнӑ.

Министр магистратурӑри ыйтусене те татса памалли пирки каланӑ. Унӑн шухӑшӗпе, ӑна ҫывӑх профильсен анчах суйламалла, диплом илессишӗн анчах вӗренмелле мар. Тӗслӗхрен, журналист магистратурӑна юриста вӗренме каять. «Ӑнланмалла мар: те журналист, те юрист вӑл», — тенӗ министр.

чувашинформ.рф сӑнӳкерчӗкӗ

Ҫӗртме уйӑхӗн 1-мӗшӗнчен Шупашкартан Хусана «Валдай-45Р» теплоход ҫӳреме тытӑннӑ. 45 вырӑнлӑскер пӗр хуларан теприне 3 сехетре илсе ҫитерет.

Шупашкартан теплоход ирхи 8 сехетре тухса каять, Хусантан пирӗн пата килме 16 сехетре тухать.

Ҫул укҫи — 600 тенкӗ. Ку вӑл — аслисемшӗн. 6 ҫултан пуҫласа 10 ҫул таранчченхи ачасемшӗн 300 тенкӗ тӳлемелле. 3 ҫултан кӗҫӗнреххисем тӳлевсӗр ҫӳреҫҫӗ, анчах шӑпӑрлансен ашшӗ-амӑшӗн чӗрҫи ҫинче ларса пымалла.

Билета Шупашкарти юханшыв порчӗн сайтӗнче ҫула тухиччен 2 сехет маларах онлайн мелпе туянма май пур.

natlitrf.ru сӑнӳкерчӗкӗ

Ҫӗртме уйӑхӗн 3-6-мӗшӗсенче Раҫҫей халӑхӗсен тӑван литературисен фестивалӗ иртӗ. Чӑвашсен «Хавал» ушкӑнӗ «Контактри» хӑйӗн пабликӗнче пӗлтернӗ тӑрӑх, унта чӑвашсем те хутшӑнӗҫ.

Мускаври фестивале Мальвина Петрова, Александр Блинов (Алпарух) хутшӑнӗҫ. Фестиваль Мускаври Хӗрлӗ тӳремре иртӗ.

Мальвина Петрова ҫӗртмен 3-мӗшӗнче 12 сехет те 15 минутра, ҫӗртмен 6-мӗшӗнче 12 сехет те 30 минутра сӑвӑ вулавӗсенче хутшӑнӗ.

Александр (Алпарух) Блинов ҫӗртмен 4-мӗшӗнче 12 сехетре чӑваш чӗлхи ҫинчен каласа парӗ.

Ҫӗртме уйӑхӗн 4-мӗшӗнче Аня Чижова ячӗллӗ фонд Шупашкарти Андриян Николаев ячӗллӗ паркра сывлӑх енчен хавшак ачасем тата вӗсен ашшӗ-амӑшӗ валли уяв ирттерме палӑртнӑ. Вӑл 11 сехетре пуҫланӗ.

Фонд "Тӗлӗнтермӗш кукӑль" конкурс ирттерӗ, парнесем парӗ. Ҫавӑн пекех пикник, ӑсталӑх класӗсем, квест пулӗҫ. Ачасемпе ашшӗ-амӑшӗ "Ковчег" зоокӗтесре пурӑнакан чӗрчунсене кӗрсе курӗҫ, вӗсене апат ҫитерӗҫ.

Уява 100 яхӑн ҫемье килмелле.

Палӑртса хӑварар: Аня Чижова ячӗллӗ фонд сипленмен чирсемпе нушаланакан ачасене пулӑшать.

Алёна Иванован сӑнӳкерчӗкӗсем

Чӑвашсем нумаях пулмасть Узбекистан ҫӗршывӗнче пулнӑ.

Чӑваш Енри вӗрентекенсем узбек учителӗсемпе шкул ачисем валли пӗр эрне хушши кунсерен тӗрлӗ мероприяти ирттернӗ, Раҫҫей ҫӗршывӗпе, Чӑваш Республикипе паллаштарнӑ, вырӑс тата чӑваш чӗлхи ҫинчен, пирӗн халӑхсен культури ҫинчен каласа панӑ.

Узбекистана 100 килограма яхӑн тӗрлӗ сувенирпа парне, кӗнекесем, дипломсемпе сертификатсем илсе кайнӑ.

Пӗр эрнере вӑтӑра яхӑн мероприяти ирттернӗ: ӑсталӑх сехечӗсем, квестсем, квизсем, лекцисем, куравсем.

vk.com ушкӑнри Елизавета Долгова страницинчен илнӗ сӑнӳкерчӗк

Ӗпхӳри чӑваш шкулӗ черетлӗ вӗренӳ ҫулне вӗҫленӗ.

«Иртсе каякан кашни ҫулах мӗнпе е пулин кӑсӑклӑ, асра юлать. Кӑҫалхи пирӗншӗн Павел Миронов вӗрентекен ҫуралнӑранпа 160 ҫул ҫитнипе паллӑ пулчӗ, — пӗлтернӗ асӑннӑ вырсарни шкулӗн директорӗ Иван Тарасов. — Вӑл Ӗпхӳре ӗҫлесе пурӑннӑ, революци умӗнхи саманара математика кӗнекисем хатӗрленӗ. Пирӗн шкул ун ячӗпе хисепленсе тӑрать».

Ачасемпе педагогсем ҫав куна тӗплӗн хатӗрленнӗ, концерт та лартса панӑ. Шкулта «Ҫамрӑк полиглот» предмета иккӗмӗш ҫул вӗрентекен Елена Едрёнкина ӑсталӑх сехечӗ ирттернӗ.