cap.ru сӑнӳкерчӗкӗ

Республикӑра медиахолдинг тӑвасшӑн. Ҫавна май ЧР Элтеперӗ Олег Николаев ӑна туса хурас енӗпе ӗҫлекен ушкӑн йӗркелесси пирки хушу алӑ пуснӑ. Ӑна экономика министрӗ Дмитрий Краснов ертсе пырӗ. Унӑн ҫумӗ Элтепер администрацийӗн ертӳҫи Вячеслав Борисов пулӗ.

Ӗҫлӗ ушкӑнра - 8 ҫын. Ҫав шутра "Чӑваш Ен" ИПК директорӗ Алексей Ключников та пур. Аса илтерер: республикӑра медиахолдинг тӑвасси пирки ун чухне цифра министрӗ пулнӑ Кристина Майнина калаҫу тапратнӑ.

chuvbook.ru сӑнӳкерчӗкӗ

Чӑваш кӗнеке издательствинче «Вера Кузьмина» кӗнеке-альбом кӑларма хатӗрленеҫҫӗ. Ӑна СССР халӑх артисткин Вера Кузьминан (1923–2021) пурнӑҫӗпе пултарулӑхне халаллӗҫ.

Чӑваш театрне юратакансем Вера Кузьминана чунтан сума сунӑ. Теприсем ӑна курасшӑнах театра спектакль курма ҫӳренӗ. Ҫирӗп кӑмӑллӑ та йывӑрлӑхра авӑнман-хуҫӑлман хӗрарӑм сӑнарӗсем самай калӑпланӑ вӑл. Пур роле те ӗнентерӳллӗ, чунпа пырса тивмелле вылянӑ.

Кӗнекере сцена ӑстин тӗрлӗ ҫулӗсенчи сӑнӳкерчӗкӗсем, артисткӑран илнӗ интервьюсем, статьясемпе рецензисем пулӗҫ.

К.В. Иванов ячӗллӗ Чӑваш патшалӑх академи драма театрӗнче ӗҫленӗ Вера Кузьминана халалланӑ кӗнеке-альбома хатӗрлессипе С.В. Журавлев фотограф, Чӑваш кӗнеке издательствин ӗҫченӗ В.В. Степанов тата Вера Кузьминан ывӑлӗ А.П. Хузанкай тӑрӑшаҫҫӗ.

Халӑх тетелӗнчи Ольга Туркай страницинчен илнӗ сӑнӳкерчӗк

Чӑваш Енӗн Наци вулавӑшӗнче «Песни мудрости народов Поволжья» (чӑв. Атӑлҫи тӑрӑхӗнчи халӑхсен ӑс-хакӑл юррисем) курав ӗҫлет. Ӑна халӑх юрӑҫи тата чӑваш фольклорне пухнӑ Гаврил Фёдоров ҫуралнӑранпа кӑҫалхи пуш уйӑхӗн 29-мӗшӗнче 135 ҫул ҫитнине халалланӑ.

Халӑх тетелӗнчи хӑйӗн страницинче Ольга Туркай радиожурналист пӗлтернӗ тӑрӑх, курав ҫинчен вулавӑшӑн «Вулав центрӗ» секторӗн заведующийӗ Светлана Гордеева хавхаланса та кӑсӑклантарса ямалла каласа кӑтартнӑ.

Кӑҫалхи ака уйӑхӗнче вулавӑшра «Гаврил Федоров. Несӗлсен сасси» ятпа халӑх вокалӗн ӑсталӑх сехечӗ иртнӗччӗ.

Халӑх тетелӗнчи Игорь Алексеев страницинчен илнӗ сӑнӳкерчӗк

Чӑваш чӗлхин «Хавал» ҫуллахи университечӗ (хастарсем ҫапла ят панӑ. Ытти ҫул уйлӑх текенччӗ) хӑйӗн ӗҫне вӗҫленӗ. Кӑҫал вӑл 13-мӗш хут иртрӗ.

Чӑваш хастарӗсем хальхинче Етӗрне районӗнчи «Сӑр шурӑмпуҫӗ» кану базинче пухӑннӑ. Университет утӑ уйӑхӗн 9-мӗшӗнчен пуҫласа ӗҫленӗ.

«Хавал лагерь вӗҫленчӗ. Пиллӗк кун хушши тем те тунӑ, тем те пӗлнӗ. Ыран ирхине киле таврӑнатӑп. Паллах, тепӗр ҫулта та Хавала пыратӑп. Хавалтан лайӑхрах нимӗн ҫук!» — хыпарланӑ халӑх ушкӑнӗнчи хӑйӗн страницинче Игорь Алексеев.

polsov.com сайтри сӑн

Шупашкарти 41 ҫулти хӗрарӑм кредитсем илсе тултарса вӗсене ултавҫа куҫарса панӑ. Хӑйне шӑнман пӑр ҫине лартса янине вӑл кайран кӑна ӑнланнӑ.

Ку уйӑх пуҫламӑшӗнче ун патне «банкӑн пулӑшу службин ӗҫченӗ» тесе паллаштарнӑ ҫын шӑнкӑравланӑ. Хайхискер пӗлтернӗ тӑрӑх, унӑн счетне ҫӗмӗрнӗ, такамсем ун ячӗпе кредит илесшӗн. Хӗрарӑм счета блокировка тума ыйтнӑ. Лешӗ хирӗҫленӗ, ку пулӑшмассине ӑнлантарса мӗн тумаллине каласа пынӑ. Кайран хӑйсемпе «йӗрке хуралҫи» тесе паллаштарнӑ ҫынсенчен те шӑнкӑравсем килме пуҫланӑ.

Шупашкар хӗрарӑмӗ аферистсем каланипе темиҫе банкра кредит илнӗ. Укҫана вӑл тӗрлӗ счет ҫине куҫарнӑ. Ҫапла вӑл 3 миллион та 450 пин тенкӗ ултавҫӑсене панӑ. Хӑйне улталанине хӗрарӑм укҫа пӗтсен, кредит пама пӑрахсан кӑна ӑнланнӑ.

"Лиза Алерт" архивӗнчи сӑн

Йӗпреҫре пурӑнакан Виталий Геннадьевич Кириллова шыраҫҫӗ. Вӑл ҫӗртме уйӑхӗн 23-мӗшӗнченпе киле таврӑнман.

50 ҫулти арҫын 165 сантиметр ҫӳллӗш, хыткан кӗлеткеллӗ. Куҫӗ кӑвак, ҫӳҫӗ ҫырӑ. Килтен тухса кайнӑ чухне мӗн тӑхӑнни паллӑ мар.

Виталий Кириллов пирки мӗн те пулин пӗлетӗр тӗк ҫак номерсемпе шӑнкӑравлама ыйтаҫҫӗ: 8(800)700-54-52 е 112.

Халӑх тетелӗнчи «Урал сасси» хаҫат страницинчен илнӗ сӑнӳкерчӗк

Пушкӑртстанри Ҫтерлӗ тӑрӑхне чӑваш блогерӗ Константин Доброхотов пырса ҫитнӗ. Кун пирки «Урал сасси» хаҫатра ӗнер, утӑ уйӑхӗн 13-мӗшӗнче, пӗлтернӗ.

«Паян Ҫтерлӗ районӗнчи Косяковка ял библиотеки чӑваш халӑх культурине, чӗлхине аталантарассишӗн тӑрӑшакан паллӑ блогера Константин Доброхотова кӗтсе илчӗ», — хыпарланӑ аякри йӑхташӑмӑрсем.

Хаҫатӑн сайтӗнче ҫырнӑ тӑрӑх, «Шупашкар хӑнине «Шуратӑл» литпӗрлешӳ ҫитӗнӗвӗсем ҫинчен Геннадий Челпир ҫыравҫӑ, Ҫтерлӗ хулинчи 6-мӗш вулавӑшӑн ӗҫӗ-хӗлӗ пирки Валентина Зорина каласа панӑ. Ҫавӑн пекех Константин Доброхотов К.В. Иванов палӑкӗ патне ҫитсе пуҫ тайнӑ, Тӑван ҫӗршывӑн Аслӑ вӑрҫин ветеранӗпе 102 ҫулхи Николай Михайлович Ефимовпа курса калаҫнӑ, сюжетсем ӳкернӗ».

Халӑх тетелӗнчи Марина Карягина страницинчен илнӗ сӑнӳкерчӗк

Марина Карягина тележурналист, поэт тата драматург Азири ҫыравҫӑсене хаклассине эпир унччен пӗлтернӗччӗ. Аса илтерер: вӑл «Литературная Азия» (чӑв. Литература Азийӗ) конкурса тӑратнӑ ӗҫсене хаклакан жюри членӗ пулнӑ.

Халӗ Марина Карягина халӑх тетелӗнчи хӑйӗн страницинче ҫапларах хыпарланӑ: «Казахстанран хыпар ҫитрӗ: литература конкурсне пӗтӗмлетнӗ! Чӑваш ҫӗнтерӳҫисем хушшинче паллӑ авторсем те, хальлӗхе паллӑ маррисем те пур. Пирӗннисен ӗҫӗсене виҫҫӗн хакларӑмӑр: эпӗ (тӗп тӳре), жюри пайташӗсем — Виталий Родионов филологи докторӗ, Надежда Сельверстрова сӑвӑҫ. Хутшӑнакан йышлӑ пулмарӗ пулин те, хамӑр пуррине пӗлтертӗмӗр — ҫак паха!»

Сӑвӑ ҫыракан чӑваш ҫыравҫисенчен Гран-прие Галина Матвеева тивӗҫнӗ, пӗрремӗш вырӑна Любовь Фёдорова тухнӑ, иккӗмӗшне — Валентина Семёнова, виҫҫӗмӗшне — Николай Ишентей. Прозаисенчен Гран-припе Пётр Кудрявцева хавхалантарнӑ. Пӗрремӗш вырӑнта — Елена Алексеева, иккӗмӗшӗнче — Аркадий Русаков.

Ку эрнере ҫанталӑк нормӑран 5-7 градус сивӗрех тӑчӗ. Ӗнер кӑштах ӑшӑтрӗ. Паян тата ӑшӑрах пулӗ.

Синоптиксем пӗлтернӗ тӑрӑх, шӑматкун термометр 21-26 градус кӑтартӗ. Ҫил тӳлек вӗрӗ. Ҫак кун ҫутҫанталӑкпа киленме васкӑр. Мӗншӗн тесен вырсарникун каллех уҫӑлтарӗ, 15-20 градус кӑна ӑшӑ пулӗ, вырӑнӑн-вырӑнӑн ҫумӑр ҫӑвӗ.

Тунтикун ҫулла таврӑнӗ, 20-25 градус ӑшӑ пулӗ. Ҫитес эрнере канмалли кунсем тӗлне каллех ҫумӑр ҫукалӗ, сивӗтӗ. Малтанлӑха пӗлтернӗ тӑрӑх, утӑ уйӑхӗ вӗҫлениччен 30 градуслӑ шӑрӑх пулмӗ.

Николай Емельянов

Йӑлана кӗнӗ тӑрӑх, Шупашкар хулин ҫуралнӑ кунӗ умӗн хисеплӗ ҫынна суйлӗҫ. «Уҫӑ хула» порталта сасӑлав ҫурлан 1-мӗшӗччен пырӗ. Кӑҫал 7 кандидат тупӑшӗ.

1. 2002-2010 ҫулсенче Шупашкар мэрӗ пулнӑ Николай Емельянов.

2. Шупашкарти коопераци институчӗн ветерансен канашӗн председателӗ Миранда Кольцова.

3. Ҫӗнӗ Лапсарти «Акаци» культура ҫурчӗн директорӗ Ольга Курганская.

4. Чӑваш Енри ӳнерҫӗсен пӗрлӗхӗн председателӗ Владимир Нагорнов.

5. Шупашкарти централизациленӗ клуб тытӑмӗн Халӑх академи камера хорӗн ертӳҫи Нина Пирогова.

6. Шупашкарти В.И.Чапаев ячӗллӗ производство пӗрлешӗвӗн тӗп директорӗ Михаил Резников.

7. Шупашкарти С.М.Максимов ячӗллӗ ача-пӑча музыка шкулӗн флейта класӗн преподавателӗ Анжелика Сидорова.

Аса илтерер: пӗлтӗр Шупашкар хулин хисеплӗ ҫыннин ятне Шупашкарти 1-мӗш ҫӑкӑр савучӗн тӗп директорӗ Елена Бадаева тивӗҫнӗ.