"Про Город" сайтӗнчи сӑн

Паян республикӑра аслатиллӗ ҫумӑр ҫурӗ. Хӑш-пӗр районта - вӑйлах.

Шупашкар районӗнчи Вашук ялӗнче 16 сехетре пӑр ҫунӑ. Етӗрне районӗнче те пӑр ӳкнӗ.

Аслатиллӗ ҫумӑр ҫунӑ вӑхӑтра, 16 сехетре, Шупашкар районӗнчи Кайри Ункӑпуҫ ялӗнче ҫурт ҫунма пуҫланӑ. Ҫулӑм пӳрте йӑлтах ярса илнӗ.

Муркаш районӗнчи Ильинкӑри юманшӑн сасӑлама ӗлкӗрӗр. Вӑл ҫурла уйӑхӗн 1-мӗшӗччен пырать.

Чӑваш Енри юман, 372 ҫул тултарнӑскер, «Раҫҫейри ҫулталӑк йывӑҫҫи» конкурса хутшӑнать. 2020 ҫулта вӑл иккӗмӗш вырӑн йышӑннӑ.

Кӑҫал пирӗн юман сасӑлавра хальлӗхе 3-мӗш вырӑнта пырать. Уншӑн 6 пин ытла ҫын сасӑланӑ. Пӗрремӗш вырӑнта – Белгород облаҫӗнчи юман, иккӗмӗш вырӑнта – Питӗрти йывӑҫ.

Ильинкӑри юманшӑн ҫак каҫӑпа сасӑлама пулать: https://rosdrevo.ru/.

cap.ru сайтри сӑн

Улатӑрти лесничествӑра тухнӑ пушара специалистсем 3 сехетрен сӳнтернӗ. Ҫулӑм 0,2 гектар ҫинче алхаснӑ.

Ҫӗртме уйӑхӗн 8-мӗшӗнче 12 сехет те 53 минутра видиомониторинг пулӑшнипе вӑрманта пушар тухнине асӑрханӑ. Ҫулӑм вӑрман ҫулӗ хӗрринче сарӑлма пуҫланӑ. Ҫавна май пушар мӗншӗн тухнине малтанлӑха пӗлтернӗ: пирус туртнине пула.

16 сехет те 5 минутра ҫулӑма сӳнтернӗ.

cap.ru сайтри сӑн

Чӑваш Ене кӗҫех тӑватӑ ҫӗнӗ автобус илсе килмелле. Вӗсем шкул ачисене илсе ҫӳремеллисем пулӗҫ.

ЧР Вӗренӳ министерстви пӗлтернӗ тӑрӑх, автобуссене ҫурла уйӑхӗн пуҫламӑшӗнче илсе ҫитермелле. ПАЗра 24 вырӑн пулӗ: 1 водитель, ачасене илсе ҫӳрекен 1 ҫын тата 22 ача валли.

Автобуссене туянма 15 миллион ытла тенкӗ уйӑрнӑ. Ку укҫа - республика хыснинчен. Кашни автобусрах ГЛОНАСС, тахографсем пур.

Красноармейски районӗнчи Тури Чуракасси ялӗнче ҫуралса ӳснӗ Владислав Павлова контр-адмирал ятне панӑ. Хушӑва РФ Президенчӗ Владимир Путин алӑ пуснӑ.

Вӑл Киеври аслӑ ҫарпа тинӗс политика училищинчен вӗренсе тухсан Лӑпкӑ океан флотӗнче ҫар тивӗҫне пурнӑҫланӑ. 2013 ҫулта 1 ранг капитанӗн ятне илнӗ. Кайран Ҫурҫӗр флочӗн командующийӗн ҫумӗ пулнӑ, тепӗр 2 ҫултан РФ Ҫар вӑйӗсен командующийӗн ҫарпа политика ӗҫӗ енӗпе ҫумӗ пулнӑ.

cultobzor.ru сӑнӳкерчӗкӗ

Чӑваш Ен Элтеперӗ Олег Николаев ял хуҫалӑх отраслӗнче тӑрӑшакансене сума сунӑ. Ҫӗртме уйӑхӗн 6-мӗшӗнче алӑ пуснӑ 70-мӗш номерлӗ хушура вӑл республикӑри тӗрлӗ отрасльте тӑрӑшакансене патшалӑх наградисемпе чыслама йышӑннӑ.

«Чӑваш Республикин ял хуҫалӑхӗн тава тивӗҫлӗ ӗҫченӗ» ята Муркаш тӑрӑхӗнчи Е. Андреев ячӗллӗ ӑратлӑ заводра ӗҫлекен Владимир Морозова тата Патӑрьел тӑрӑхӗнчи «Исток» агрофирмӑри Мария Яковлевӑна пама йышӑннӑ.

Владимир Ильич машинӑпа трактор мастерскойӗн заведующийӗнче тӑрӑшать, Мария Николаевна пӑру пӑхать.

cheb-centr.soc.cap.ru сӑнӳкерчӗкӗ

Паян, ҫӗртме уйӑхӗн 8-мӗшӗнче, пирӗн ҫӗршывра Социаллӑ ӗҫчен кунне уявлаҫҫӗ. Ҫав ятпа Чӑваш Ен Этеперӗ Олег Николаев та саламланӑ.

«Эсир пулӑшу кӗтекен ҫынсен чун-чӗрине ӑшӑ сӑмахпа ӑшӑтатӑр тата вӗсемшӗн ырми-канми тӑрӑ-ша­тӑр. Ырӑ кӑмӑл­лӑх, хӗрхенӳлӗх, ӑшӑ чунлӑх – сирӗн ӗҫӗре ҫак пахалӑхсемсӗр пурнӑҫлама та май ҫук.

Социаллӑ сферӑна аталантарасси, унти саккунсен никӗсне ҫирӗплетесси – патшалӑх политикин тӗп тӗллевӗ пулса тӑрать. Ачаллӑ ҫемьесене социаллӑ пулӑшу памалли ҫӗнӗ майсем ӗҫе кӗреҫҫӗ, вӗсене илсе тӑмалли йӗркесем палӑрмаллах ансатланаҫҫӗ», — тенӗ республика ертӳҫи.

Елена Нарпин страницинчен илнӗ сӑнӳкерчӗксем

«Савӑнмалли пурах. Елчӗк тӑрӑхӗнчи стеласем ҫине ялсен ячӗсене чӑвашла та, вырӑсла та ҫырса вырнаҫтарнӑ», — хавхаланса хыпарланӑ иртнӗ канмалли кунсенче тӑван тӑрӑхӗнче пулнӑ хыҫҫӑн И.Н. Ульянов ячӗллӗ Чӑваш патшалӑх университечӗн преподавателӗ тата ҫыравҫӑ Елена Нарпи халӑх тетелӗнчи хӑйӗн страницинче.

«Чӑвашла ял ятне пы-ысӑк сас паллисемпе ҫырни уйрӑмах кӑмӑла кайрӗ. Маттур ҫав ман ентешсем! Кунта Чӑвашла пурӑнни аякранах курӑнать. Раҫҫей нумай чӗлхеллӗ ҫӗршыв, ытти халӑхсене сума сӑвасси вара тӑван чӗлхене, культурӑна хакланинчен пуҫланать», — пӗтӗмлетнӗ Елчӗк чӑвашӗ.

www.nbchr.ru сӑнӳкерчӗкӗ

Ҫӗртме уйӑхӗн 1-мӗшӗнче Чӑваш Республикин Наци вулавӑшӗнче паллӑ прозаик, журналист, драматург, куҫаруҫӑ Ольга Туркайӑн пултарулӑх каҫӗ иртнӗ. Ӑна пултаруллӑ хӗрарӑмӑн ҫуралнӑ кунне халалланӑ. Ҫавӑн чухнех вулавӑшра авторӑн «Паянхи кун» кӗнекине хӑтланӑ.

Ольга Туркая саламлама тӳре-шара та пырса ҫитнӗ. «Пурнӑҫ йӗрки мӗнле пуласси пӗтӗмпех хамӑртан килет. Ольга Николаевна, эсир каялла ҫаврӑнса пӑхсан сирӗн ҫул илемлӗ те такӑр пулнине курма пулать, малашне те вӑл анлӑ та хитре, сарлака та чаплӑ пултӑр», – тесе саламланӑ, сӑмахран, Чӑваш Республикин Элтеперӗн Администрацийӗн Шалти политикин управленийӗн пай пуҫлӑхӗ Людмила Шурекова. Чӑваш Енӗн Патшалӑх Канашӗн секретариачӗн ертӳҫи Александр Магарин юбиляра Хисеп хучӗпе чысланӑ.

cheb-centr.soc.cap.ru/press-centr сӑнӳкерчӗкӗ

Чӑваш Енре пурӑнакан, пӗчӗк пенси илекен ҫынсене «Старость в радость» (чӑв. Ватлӑх савӑнмалӑх) ыркӑмӑллӑх фончӗ апат-ҫимӗҫ туянса панӑ.

Шупашкарта ун пек пулӑша хулари халӑха комплекслӑ соцаллӑ пулӑшу кӳрекен центр пулӑшӑвӗпе усӑ куракан 65 ҫын ватӑ тивӗҫнӗ. Вӗсен пенсийӗ пӗчӗк, вӑл уйӑхран уйӑха саплашкаласа пыма ҫеҫ ҫитет. Ватӑ ҫынсене «кӗмӗл» эмел туянма та нумай кирлӗ. Чирлӗ пулсан та, эмелсӗр пурӑнаймасан та пурте инвалид шутланмаҫҫӗ-ҫке. Апат-ҫимӗҫ те йӳнӗ мар, хваттер хакӗ те.

Ыркӑмӑллӑх фончӗ апат-ҫимӗҫ уйӑрса пани ватӑсемшӗн вӑхӑтлӑха та пулин кӑштах тӗкӗ пулса тӑрӗ.