"Чеб.ру" сайтри сӑн

Кӑҫал Шупашкарта чечексен фестивалӗ пӗрремӗш хут иртӗ. Ӑна Анне палӑкӗ ҫывӑхӗнче йӗркелӗҫ.

Фестивальте Шупашкара илем кӳрекен организацисем тата питомниксем арт-объектсемпе, чечекрен ӑсталанӑ кӳлепесемпе паллаштарӗҫ. Унта флористика вӑрттӑнлӑхӗсемпе паллаштарӗҫ, кӑшӑлсем тума вӗрентӗҫ. Ҫавӑн пекех ӳкерчӗксен, сӑн ӳкерчӗксен куравӗ ӗҫлӗ. Пултарулӑх коллективӗсем вара юрӑ-ташӑпа савӑнтарӗҫ.

stop-klopu.com сайтри сӑн

Россельхознадзор ӗҫченӗсем уй-хире тӗрӗслесех тӑраҫҫӗ. Культурӑсене сӑтӑрҫӑсем сиен тумаҫҫӗ-и?

Ведомство палӑртнӑ тӑрӑх, хӑш-пӗр ҫӗрте уй-хире сӑтӑрҫӑсем тапӑннӑ. Уйрӑмах – кӑнтӑр районӗсенче. Кӑҫал вӗсем уйрӑмах нумайланнине палӑртнӑ Мӗнпе ҫыхӑннӑ-ха ҫакӑ? Чи малтанах ҫуркунне ир килнипе. Ял хуҫалӑх ертӳҫисен айӑпӗ те пур. Чылайӑшӗ уй-хире сухаламасть. Сӑтӑрҫӑсенчен нумайӑшӗ вара тӑпрара ҫиелте пурӑнать, ҫаплах хӗл каҫать. Ҫӗре сухаламасан вара вӗсем пӗтмеҫҫӗ. Ҫитменнине, кӑҫал ҫӗр ытлах шӑнман.

«Пӗр тӑхтамасӑр им-ҫам сапмалла. Унсӑрӑн тухӑҫ туса илеймӗпӗр. Гербицидсемпе пӗрле чир-чӗре пӗтерме биологи тата хими препарачӗсемпе усӑ куратпӑр», - ҫапла пӗлтернӗ Россельхознадзор.

culture.cap.ru сӑнӳкерчӗкӗ

«Уяв» халӑх фольклор коллективӗ халӑх юррин пӗтӗм тӗнчери «Добровидение-2023» фестивальне хутшӑннӑ.

Фестиваль ҫулсерен Питӗрте иртет. Унта кӑҫал саккӑрмӗш хут пуҫтарӑннӑ.

Чӑваш ансамблӗ Питӗрте 3 кун пулнӑ хушӑра хӑйӗн пултарулӑхне кӑтартса пама та, хула илемӗпе киленсе ҫӳреме те, ҫӗнӗ коллективсемпе паллашма та ӗлкӗрнӗ.

«Играй, гармонь» телепроект ертӳҫисен — Заволокинсен — командин видеопроектӗнче ӳкерӗнни, фестивалӗн гала-концертне хутшӑнни те артистсен асӗнче тарӑн йӗр хӑварнӑ.

cap.ru сӑнӳкерчӗкӗ

Паян – Пӗтӗм тӗнчери юн паракансен кунӗ. ЧР Элтеперӗ Олег Николаев телеграм-каналӗнче пӗлтернӗ тӑрӑх, Чӑваш Енре ҫулсерен 9 пин ҫын донор пулса тӑрать.

Олег Алексеевич хӑй те донор, вӑл ҫынсен пурнӑҫне ҫӑлма пулӑшнӑшӑн хӗпӗртенине палӑртнӑ.

ЧР сывлӑх сыхлавӗн министрӗ Владимир Степанов пӗлтернӗ тӑрӑх, Чӑваш Енре хальхи вӑхӑтра 4,4 пин Хисеплӗ донор шутланать. Пӗлтӗр юпа уйӑхӗнче 4,3 Хисеплӗ донор пулнӑ.

Кам-ха вӑл – Хисеплӗ донор? Ҫак ята 40 хутчен юн панӑ ҫынсем тивӗҫеҫҫӗ. Вӗсене ҫулсерен укҫан хавхалантараҫҫӗ. Кӑҫал ку тӳлев 16,58 тенкӗпе танлашать.

cap.ru сайтри сӑн

Элӗк, Ҫӗмӗрле тат Ҫӗрпӳ районӗсенче кустӑрма ҫинчи автоклуб ӗҫлеме тытӑнӗ. Ӗнер вӗсен уҫҫисене тыттарнӑ.

Автоклубсене «Культура» наци проекчӗпе килӗшӳллӗн туяннӑ. Вӗсенче пуҫтарса сӳтмелли сцена, хывса тӑхӑнмалли пӳлӗм, сасӑ тата ҫутӑ хатӗр-хӗтӗрӗ, коллективри 15 ҫын валли вырӑн пур. Ҫавӑн пекех генератор ӗҫлет, вӑл автоклуба 4 сехет электроэнергипе тивӗҫтерме пултарать.

ЧР Культура министерстви шантарнӑ тӑрӑх, ҫакнашкал куҫса ҫӳрекен клубсем кашни районтах пулмалла.

culture.cap.ru сӑнӳкерчӗкӗ

Ҫӗртме уйӑхӗн 15-мӗшӗнче Чӑваш Енӗн Наци вулавӑшӗнче Чӑваш кӗнекин кунӗ пулӗ.

Ҫав куна 2021 ҫулта пӗрремӗш хут ирттернӗ. Ӑна 1769 ҫулта Питӗрте кун ҫути курнӑ «Сочинения, принадлежащие к грамматике чувашского языка» чӑваш чӗлхин пӗрремӗш пичет грамматикине халалланӑ.

Кӑларӑм чӑваш халӑхӗн культура тата ҫутӗҫ историйӗнче пӗлтерӗшлӗ вырӑн йышӑнса тӑнӑ. тӑчӗ. Вӑл Чулхула, Хусан тата Оренбург епархийӗсен ӑс-хакӑл училищисемпе семинарийӗсенче вӗренекен чӑвашсемпе вырӑссемшӗн пӗртен-пӗр вӗренӳ пособийӗ пулнӑ. Кӗнеке авторӗ — Чулхула епархийӗн чӑваш чӗлхи проповедникӗ, иерей Ермей Рожанский.

Виталий Родионов профессор шучӗпе, Ермей Рожанский ҫӗртме уйӑхӗнче ҫуралма пултарнӑ.

Мероприяти 13 сехетре пуҫланӗ.

Ҫак хӗрача – чӑн-чӑн маттур. Вӑл икӗ экзаменра 200 балл пухнӑ. Сӑмах Ҫӗнӗ Шупашкарти Виктория Котусенко пирки пырать. Вӑл химипе тата вырӑс чӗлхипе пулнӑ экзаменсенче ҫавӑн чухлӗ балл пухнӑ.

Республикипе илес тӗк, вырӑс чӗлхи экзаменӗнче 36 ҫамрӑк 100 балл пухнӑ. Вӗсен йышӗнче Шупашкартан, Ҫӗнӗ Шупашкартан, Канашран, Йӗпреҫрен, Вӑрмартан, Патӗрьелтен пур.

porezk.cap.ru сӑнӳкерчӗкӗ

Вилӗмсӗр Ҫеҫпӗл Мишши ҫуралнӑранпа 125 ҫул ҫитнине халалласа сӑвӑсен пуххине кӑларма хатӗрленеҫҫӗ. Ку яваплӑха канӑҫсӑр чунлӑ хальхи вӑхӑтри ҫыравҫӑ, поэт, публицист, журналист Лидия Филиппова хӑй ҫине илнӗ.

Вӑл, ентешӗ пекех хастар, ырӑ ӗҫе тӗплӗн, тепӗр чухне ҫеҫпӗлле хӗрӳлӗхпе пурнӑҫлаканскер, мухтавлӑ ентешӗн ятне-сумне асра тытассишӗн ҫине тӑрса талпӑнать. Асӑннӑ тӑрӑхри ениешлӗх хастарӗсем, ҫав шутра Лидия Филиппова та паллах, Канаш районӗнчи икӗ шкулта Ҫеҫпӗл парттисене те уҫнӑччӗ.

...Поэта халалланӑ сӑвӑ кӗнекине валли хайлавсене ҫӗртме уйӑхӗн 30-мӗшӗччен йышӑнӗҫ. Вӗсене lrigel@rambler.ru электрон почтӑпа ӑсатмалла. Чи лайӑххисене суйласа илсе кӗнеке пичетлесе кӑларӗҫ.

«Эревет» ансамбль. Ансамблӗн халӑх тетелӗнчи сӑнӳкерчӗк

Ҫӗртме уйӑхӗн 23-24-мӗшӗнче Чӑваш Енре «Раҫҫей ҫӑлкуҫӗсем» халӑх пултарулӑхӗн XXXI фестивалӗ иртӗ. Унта Раҫҫейӗн 13 регионӗнчи 14 пултарулӑх коллективӗ, пурӗ 200-е ҫын, хутшӑнӗ.

Фестивале Владимир, Иванов, Мускав, Чулхула, Омск, Свердлов, Тверь, Чӗмпӗр облаҫӗсенчи, Краснодар крайӗнчи, Пушкӑрт Республикинчи, Марий Элти, Тутарстанри артистсем килсе ҫитӗҫ.

Чӑваш Енрен фестивале 4 коллектив хутшӑнӗ: «Уяв» халӑх фольклор ансамблӗ, «Сувар» халӑх ташшин ансамблӗ, халӑх инструменчӗсен «Эревет» халӑх ансамблӗ, Шупашкарти Ф.П. Павлов ячӗллӗ музыка училищин «Янтал» студентсен фольклор ансамблӗ.

Фестивале ҫӗртме уйӑхӗн 23-мӗшӗнче 19 сехетре Шупашкарти Хӗрлӗ лапамра уҫӗҫ.

Дмитрий Пулатов телеграм-каналӗнчи сӑнӳкерчӗк

Республика кунӗнче Ҫӗнӗ Шупашкар сцени ҫинче Раҫҫей эстрада ҫӑлтӑрӗ юрлӗ. Кун пирки хула администрацийӗн пуҫлӑхӗ Дмитрий Пулатов пӗлтернӗ.

Ҫавӑн пекех хула ҫыннисене "Раҫҫей ҫӑлкуҫӗсем" фестивале, "Виҫӗ хӗвел" этно-фестивале хутшӑнакан пултарулӑх ушкӑнӗсем савӑнтарӗҫ. Уяв ташӑ каҫӗпе тата фейерверкпа вӗҫленӗ.

Сӑмах май, Химик кунӗнче Ҫӗнӗ Шупашкара "Уматурман" килнӗ. Кам килессине ун чухне уявчченех вӑрттӑнлӑхра тытнӑ. Хальхинче те хӑш юрӑҫ килессине пӗлтермен.