 Тӗнче тетелӗнче «Пӗтӗм Раҫҫейри 2010 ҫулхи халӑх ҫыравӗ» портал уҫӑлнӑ. Адресӗ — www.perepis-2010.ru. Тӗп страницӑра Раҫҫейӗн кашни ҫыннине чӗнсе каланӑ: «Ҫырав — ҫӗр-шывӑн коллективлӑ портречӗ. Сирӗнсӗр ку ӳкерчӗк тулли пулмасть. Ҫырава хутшӑнӑр, ку пачах йывӑр мар». Порталӑн тытӑмӗ питех те ансат, ҫавӑнпа тӗнче тетелне пуҫласа тухнӑскер те та ҫырав ҫинчен мӗн пӗлес килнине тупма пултарать. «Ҫӗнӗ хыпар» («Новости») рубрикӑри материалсем тӑтӑшах ҫӗнелсе тӑраҫҫӗ. Унсӑр пуҫне ҫыравӑн саккун никӗсӗ тата программи ҫинчен тулли информаци илме пулать, иртекен мероприятисен анонсӗпе отчечӗ, тӗрлӗ пулӑшу материалӗсем, Раҫҫейри тата СССРти халӑх ҫыравӗсен историйӗ ҫинчен калакан интереслӗ фактсем, ҫыравсен чикӗ леш енчи опычӗ вырӑн тупнӑ. «Ыйтусемпе хуравсем» рубрикӑра интернетпа усӑ куракансем ҫырав хучӗн содержанийӗпе малтанах паллашма, илнӗ кӑтартусен вӑрттӑнлӑхне сыхлани пирки пӗлме пултараҫҫӗ. «Ҫырав тата харпӑр хӑй хӑрушсӑрлӑхӗ» пайра ятарласа уйрӑм ҫын кӑтартӑвӗсем урӑх алла лекессинчен хӑрани вырӑнсӑр пулнине кӑтартнӑ. Кунтах ҫыравра час-часах тӗл пулакан ыйтусем ҫине хуравлаҫҫӗ: ҫырав мӗн тума кирлӗ, ӑна миҫе ҫултан ирттереҫҫӗ, ҫырав хучӗн анкетине тултарма мӗн чухлӗ вӑхӑт каять тата ыт. Хыпар ҫӑлкуҫӗ:
|
 Иванова Наталия Шупашкарта Вӗрентекенсен пӗлӗвне ӳстерекен институтра наци культурин «Туслӑх хӗлхемӗ» фестиваль иртрӗ. Унта тӗрлӗ район шайӗнче ҫӗнтерӳҫӗ ятне ҫӗнсе илнӗ 6-9 классенче вӗренекенсем хутшӑнчӗҫ. Ҫак фестивальте Красноармейски районӗнчи шкул ачисем те хӑйсен пултарулӑхне кӑтартрӗҫ. Фестиваль программипе килӗшӳллӗн вӗсем тӑватӑ ӑмӑртуран иккӗшӗнче тупӑшрӗҫ, малти вырӑнсене тивӗҫрӗҫ. «Чӑвашлӑх тӗнчи: тӗпчев ӗҫӗсен мультимедиллӗ презентацийӗ» конкурсра Красноармейскинчи пӗтӗмӗшле вӑтам пӗлӳ паракан иккӗмӗш шкулӗнче 9-б класра вӗренекен Алексей Михайлов «К.В.Ивановӑн «Нарспи» поэминчи ҫутҫанталӑк сӑнарӗ» темӑпа хатӗрленӗ ӗҫне хӳтӗлесе 2-мӗш вырӑн йышӑнма пултарчӗ. Вырӑс класӗнче чӑваш чӗлхипе литератури тата тӑван ен культури вӗренекен шкул ачисем хушшинче ирттернӗ «Ҫӑлтӑрчӑк» вӑйӑ-конкурсра вара Трак чӑваш-нимӗҫ гимназийӗн 9-меш класӗнче вӗренекен Иванова Наталия та 2-мӗш вырӑна тивӗҫнӗ. Саламлатпӑр! Хыпар ҫӑлкуҫӗ:
|
 Тӗмшер ялӗ картта ҫинче Паян, акан 13-мӗшӗнче, Тӗмшер тӗслӗх вулавӑшӗнче ачасем валли «Кайӑксене пулӑшасси — ырлӑх тӑвасси» викторина иртрӗ. Тӗмшерти тӗп пӗлӳ паракан шкул ачисем ҫак ӑмӑртӑва хаваспах хутшӑнчӗҫ. Ҫур кунӗсем ҫитнӗ хыҫҫӑн тавралӑх кайӑк-кӗшӗк юррипе тулнине пурте сисрӗҫ ӗнтӗ — унта та кунта вӗсен чӗвӗлти сассисем илтӗнеҫҫӗ. Вулавӑш ӗҫченӗсем ачасене вӗсем ҫинчен каласа пачӗҫ — шкултан килнӗ хӑнасем интересленсех итлерӗҫ: Куславкка тӑрӑхӗнче мӗнле кайӑк тӗл пулни пирки пурин те пӗлес килчӗ! Ыйтусем ҫине те хуравларӗҫ. Тӗслӗх вулавӑшӗн ӗҫченӗсем «Чи чаплӑ шӑнкӗрт вӗлли» ӑмӑртӑва ирттерме сӗнчӗҫ — ачасем ку сӗнӳпе килӗшрӗҫ, хутшӑнма шантарчӗҫ. Хыпар ҫӑлкуҫӗ:
|
 Кӗҫӗн Карачри ял кунӗ. 2009, ҫурла, 15 Иртнӗ кӗҫнерникун, акан 8-мӗшӗнче Куславкка районне кӗрекен Кӗҫен Карачпа Ҫатрӑк ял ҫыннисем пухӑнса кулленхи ыйтусене сӳтсе яврӗҫ. Пуху ялти Культура ҫурчӗ умӗнче иртрӗ. Пурӗ 43 ҫын килчӗ. Карач ял тӑрӑхӗнче ӗҫлекен Е. Плотникова ял ҫыннисен умне ҫак ыйтусене кӑларса тӑратрӗ: ● икӗ уйӑх хушшинче ялсенчи урамсене ҫӳп-ҫапран тасатасси, ӑпӑр-тапӑра пуҫтарса илсе тухасси; ● ҫӑвана тирпей кӳртесси; ● Йывӑҫ Кунне ирттересси; ● ҫурпа ҫу кунӗсенче пушартан сыхлас ӗҫе тӑвасси; ● йӗркене пӑснисене пӑхса тухасси; ● ҫитсе пыракан Пӗтӗм Раҫҫейри халӑх ҫыравӗ; ● 2010 ҫул валли кӗтӳҫсемпе ӗҫ килӗшӗвне хатӗрлесси тата ӑна ҫирӗплетесси.
Ял ҫыннисем шӑматкунлӑхсене (субботниксене) акан 17-мӗшӗнче тата 24-мӗшӗнче ирттерме килӗшрӗҫ. Пушартан сыхланмашкӑн кашни килте 200 литртан ытла шыв тытма калаҫса татӑлчӗҫ. Кӗтӳҫсемпе 2010 ҫул валли тунӑ килӗшӗве пӑхӑнма тата вӗсен ӗҫне тӗрӗслесе тӑма шантарчӗҫ.
Ҫакӑнпа пуху вӗҫленчӗ — ҫынсем килӗсене саланчӗҫ. Хыпар ҫӑлкуҫӗ:
|
 Мускавра Чӑваш патшалӑх университечӗн В.Г. Родионов профессор ертсе пыракан чӑваш тата танлаштаруллӑ литература пӗлӗвӗн кафедри «Альма матерта» пулса иртекен мероприятисенче кӑна мар, Раҫҫей шайӗнчи ӑслӑлӑх ыйтӑвӗсене шӗкӗлчес ӗҫре те хастар. Ку кафедра ӗҫченӗсем Ижевск, Саранск, Йошкар-Ола, Хусан, Ӗпхӳ, Мускав хулисенчи тӗрлӗ вузсемпе тачӑ ҫыхӑну йӗркеленӗ, пӗр-пӗрин патне ӑслӑлӑх конференцийӗсене тӑтӑш кайсах ҫӳреҫҫӗ. Тӗслӗхрен, пуш уйӑхӗн 25-27-мӗшӗсенче Ӗпхӳ хулинче Пӗтӗм тӗнчери пушкӑртсен III курултайне халалланӑ Пӗтӗм Раҫҫейри «Урал-Алтай: ӗмӗрсем урлӑ — пуласлӑха» ятлӑ IV наука конференцийӗ иртрӗ. Унта Г.А. Ермакова профессор «Г.Н. Айги как выразитель духовных ценностей чувашского этноса», И.Ю. Кириллова доцент «Проблемы историзма в чувашской драматургии» темӑсемпе тухса калаҫрӗҫ. Конференцире Урал-Алтай тӑрӑхӗнче пурӑнакан халӑхсен историне, чӗлхине, сӑмахлӑхне, йӑли-йӗркине тӗпчекен докладсем ытларах пулчӗҫ. Ҫавӑн пекех акан 2-мӗшӗнче Мускаври педагогика патшалӑх университетӗнче (МППУ) «Атӑлҫи халӑхӗсен филологи проблемисем» ятпа Пӗтӗм Раҫҫейри IV наукӑпа практика конференцийӗ иртрӗ. Хыпар ҫӑлкуҫӗ:
|
 Туссем, юлташсем, тӑванӑмӑрсем!
Ака уйӑхӗн 22-мӗшӗнче Чӗмпӗр хулинче йӗркеленнӗ «Уллах» ятлӑ чӑваш ҫамрӑкӗсен пӗрлӗхӗ пурне те ҫуралнӑ кун ячӗпе ирттерекен дискотекӑна чӗнет! Сирӗн кӑмӑлӑрсене ҫӗклеме ятарласа Шупашкартан Пётр Ермолаевпа Андрей Шадриков килеҫҫӗ!
Дискотека «Мambo» каҫхи клубра иртӗ. Пуҫламӑшӗ 20 сехетре!
Билет хакӗ: - малтан туянсан 150 тенкӗ; - кӗнӗ ҫӗртре 250 тенкӗпе туянма пулать. Билетсене ҫак адреспа туянма май пур: ● Радищев урамӗ, 57 ҫурт, «Раҫҫейри ҫамрӑксен пӗрлешӗвӗ» (чӑвашла ҫырман пулсан «Российский Союз Молодёжи» ята шырӑр) Унта ҫитме кансӗр пулсан 8-908-471-32-67 инҫесас номерӗ урлӑ та туянма пулать. |
 Смоленск облаҫӗнчи Ҫурҫӗр ҫар аэродромне аннӑ чухне Польша президенчӗн, Лех Качиньские илсе ҫӳрекен Ту-154 самолёт ҫӗр персе аннӑ. «Россия 24» инҫеканал 96 ҫын пурнӑҫӗ татӑлни пирки пӗлтерет, самолётра вӗҫнӗ ҫынсенчен пери те чӗрӗ юлман. Самолётра Лех Качиньский хӑй те пулнӑ, арӑмӗпе пӗрле. Унсӑр пуҫне ҫак катастрофӑра чылай паллӑ ҫынсен пурнӑҫӗ татӑлнӑ: Рышард Качоровский, Януш Куртыка, Славомир Скшипек тата ыттисем те. Вӗсем пурте Катыньте ирттерме палӑртнӑ асӑну мероприятине ҫул тытнӑ пулнӑ. Ҫак пӑтӑрмах пулса иртнӗ хыҫҫӑн Польша Министрӗсен Кабинечӗ пухӑнса президент ӗҫне тума Бронислав Коморовскине шанса панӑ. Хыпар ҫӑлкуҫӗ:
|
 Акан 8-мӗшӗнче Ҫеҫпӗл Мишши ячӗлл кил-йыш вулав центрӗнче «Нина Ермолаева ӗҫӗсенчи чёваш тӗррин вӑрттӑнлӑхӗсем» мастер-класс иртрӗ. Мероприятине «Тӗрӗ тӗнчи» клуб ӗҫлеме пуҫланӑранпа ҫулталӑк ҫитнине халалланӑ. Уява «Тӗрӗ тӗнчи» клуба ҫӳрекенсем: чӑваш тӗррипе кӑсӑкланакансем пуҫтарӑнчӗҫ. Чи малтанах Щетинина А.А. ертсе пыракан «Сывлӑм» ача-пӑча фольклор хӑйӗн юрри-ташшипе савӑнтарчӗ. Хыттӑн алӑ ҫупса тав турӗҫ куракансем ҫамрӑк артистсене. Малалла «Тӗрӗ тӗнчи» клуба ертсе пыракан Н. Кузнецова сӑмах илчӗ. Вӑл ҫулталӑк хушшинче клуба ҫӳрекенсем мӗнле ҫитӗнӳсем тунине каласа пачӗ. Клуб ӗҫӗ-хӗлӗпе: малашнехи плансемпе паллаштарчӗ. Халӑх ӑстисен ҫуртӗнче (Республиканский дом народного творчества) ӗҫлекен Романова С.В. методист вара клуб ӗҫне хак пачӗ. Надежда Кузнецовӑна чӑваш тӗррин асамлӑхӗпе ҫынсене паллаштарнӑшӑн тав турӗ: малашне те ӑнӑҫу сунса М. Симаковӑн «Чувашские узоры» ятлӑ кӗнекине парнелерӗ. Халӑх ӑсти Ермолаева калаҫӑва хӑй мӗнле тӗрлеме пуҫлани ҫинчен каласа панипе пуҫларӗ. Унӑн пӗррремӗш ӗҫӗ салфетка иккен. |
 Шупашкар ГЭСӗ Ӗнертен пуҫласа шыва пӗр шайра тытмашкӑн Шупашкар ГЭСӗ кунӗн-ҫӗрӗн ӗҫлӗ. Ейӗ вӑхӑтӗнче ятарлӑ комиссисем йӗркеленӗ — вӗсем ГЭСӑн ӗҫне сӑнасах тӑрӗҫ. Ятарлӑ вӗрентӳсем те ирттерме палӑртнӑ. Акан 6-мӗшӗнче ҫӳлти бьефри шыв шайӗ 63 метр та 17 см пулнӑ, аялти бьефри шыв шайӗ — 53,58 метр. Кун тӑршшӗпе ГЭС 10,1 млн. кВт·с электроэнерги панӑ. Вӑл кун ГЭС урлӑ ҫеккнутра 6480 м3 шыв юхса тухнӑ. Малтанхи кунпа танлаштарсан, 1230 м3 ытларах. Шупашкар ГЭСӗнче пурӗ 18 шыв агрегачӗ, вӗсен пӗтӗмӗшле хӑвачӗ 1404 МВт. Хальхи вӑхӑтра ГЭСри шыв 63 метр ҫӳллӗшӗнче тӑрать, проект тӑрӑх вара — 68 метр пулмалла. Хыпар ҫӑлкуҫӗ:
|
|
Ака уйӑхӗн 1-мӗшӗ ултав кунӗ пулсан та, Кивӗ Сӗнтӗр ҫыннисене хальхинче улталамарӗҫ. Тахҫантанпах кӗтнӗ маршрутлӑ автобус чӑннипех ял варрине ҫитсе чарӑнчӗ. Район центрӗнчен Кивӗ Сӗнтӗре ҫитме халӗ питех те меллӗ. Нумай ҫул ҫуран утса тертленнӗ хыҫҫӑн «Комсомольски — Кивӗ Сӗнтӗр — Хырай Ӗнел» маршрутпа автобус ҫула тухни ял ҫыннисемшӗн чӑн-чӑн уяв пекех. Ялти культура ӗҫченӗсем В.Ванюркин, Г.Ванюркина, Е.Костякова, ветерансен совечӗн председателӗ А.Петрова пухӑннӑ ҫынсемпе пӗрле пӗрремӗш автобуса юрӑ саламӗпе, ҫӑкӑр-тӑварпа кӗтсе илчӗҫ. Водительне вара ҫул ҫинче ӑнӑҫу, ырлӑх-сывлӑх сунчӗҫ. «Правда» ООО ертӳҫи К.Н.Кокшин та маршрута уҫнӑшӑн тав сӑмахӗ каларӗ. Хыпар ҫӑлкуҫӗ:
|
-1.7 °C