ҪҪХПИ тунӑ сӑн

Ӗнер 10 сехет те 40 минутра Шӑмӑршӑ округӗнчи Палтиел ялӗ ҫывӑхӗнче аварире ҫын вилнӗ, тепӗр тӑваттӑн аманнӑ. Суранланнисен йышӗнче 3 ҫулти ача та пур.

Малтанлӑха пӗлтернӗ тӑрӑх, ВАЗ-2111 машина рулӗ умӗнче ларнӑ 67 ҫулти водитель ҫул хӗресленекен выранта иномаркӑна ирттерсе яман. «Шкода» рулӗ умӗнче 27 ҫулти арҫын ларнӑ. Икӗ машина ҫапӑнсан ВАЗ-2111 машина водителӗ вырӑнтах вилнӗ. Иномаркӑри тӑватӑ пассажира, ҫав шутра ачана та, пульницӑна илсе кайнӑ.

Елена Осипова страницинчен илнӗ сӑнӳкерчӗк

Шупашкарта пурӑнакан 7 ҫулти купӑсҫӑ Артем Осипов «Лучше всех!» телекӑларӑма хутшӑнассине Чӑваш халӑх сайчӗ унччен пӗлтернӗччӗ-ха. Аса илтерер: ачана пуш уйӑхӗнче ӳкернӗ. Кӑларӑм эфира ҫурла уйӑхен 24-мӗшӗнче тухнӑ.

Арҫын ачана виҫҫӗре чухнех музыка инструменчӗпе кӑсӑклантарса яма пултарнӑ аслисем. Ачан талпӑнӑвне кура амӑшӗ, Елена Осипова, ҫав енӗпе вӗрентес тенӗ.

"На связи" форумри сӑн

Аня Чижова ячӗллӗ фонд кӑҫал та авӑн уйӑхӗн 1-мӗшӗнче шкул ачисене акцие хутшӑнма чӗнет. Вӗрентекен валли класпа пӗр чечек ҫыххи илсе памалла та ытти укҫана нихӑҫан сипленмен ачасем валли ямалла. Фонд «Чечек вырӑнне - ачасем» акцие кӑҫалхипе саккӑрмӗш ҫул ирттерет.

Пӗлтӗр акци вӑхӑтӗнче 916 284 тенкӗ пуҫтарнӑ.Ку укҫа 26 ачана пулӑшма кайнӑ. Унта Мускаври, Мари Элти, Чӑваш Енри, Мускав ҫывӑхӗнчи шкулсем хутшӑннӑ. Спонсорсем те пулнӑ.

Кӑҫал акци вӑхӑтӗнче 2 миллион та 334 пин тенкӗ пухма палӑртнӑ. Ку укҫапа 94 ачана пулӑшасшӑн.

"Контактри" сӑн

Ҫӗнӗ Шупашкарти Анна Аветисян икӗ ҫул каялла ишме те пӗлмен, уҫӑ вырӑнти шывран питӗ хӑранӑ. Халӗ вара вӑл фитнес-джампинг енӗпе тренерта ӗҫлет.

Анна Турцире континентсен хушшинче Босфор юханшывӗ урлӑ ишес енӗпе иртнӗ ӑмӑртӑва хутшӑннӑ. Унта 2000 ытла спортсмен пулнӑ.

«Ҫын йӑлтах пултарать. Ӳссе ҫитсен те ишмешкӗн вӗренме, хӑрас туйӑма куҫран пӑхма пултарать. Хамӑн хӑрас туйӑма парӑнтарнӑшӑн савӑнатӑп. Финишри куҫҫуль - савӑнӑ куҫҫулӗ», - тенӗ Анна.

Шупашкарти медицина организацийӗнче ӗҫлекен 50 ҫулти хӗрарӑм хӑйӗн укҫине кӑна мар, тӑватӑ банкран тата тӑванӗсенчен кивҫен илнисене те ултавҫӑсене куҫарса панӑ. Пӗтӗмпе 9 миллион тенкӗ ытла.

Ун патне палламан ҫын шӑнкӑравланӑ. Вӑл Сывлӑх сыхлавӗн министерствин ӗҫченӗ-мӗн. Сасси те ун пекрех пулнипе хайхи хӗрарӑм ӗненнӗ. Вӑл кӗҫех ун патне йӗрке хуралӗнчен шӑнкӑравлассине пӗлтернӗ. Чӑнах та, шӑнкӑрав килнӗ. Такамсем ун ячӗпе кредит илме хӑтланаҫҫӗ тесе укҫана «хӑрушсӑр счет» ҫине куҫарма хушнӑ. Хӗрарӑм пӗр эрнере 9 миллион та 400 пин тенкӗ куҫарнӑ.

Тӑванӗсем вӑл кивҫен нумай ыйтнипе сисчӗвленнӗ, ывӑлне амӑшӗпе калаҫма сӗннӗ, мӗншӗн тесен хӑй хӗрарӑм хӑранипе ним те ӑнлантарайман. Ҫапла полицирен пулӑшу ыйтма тивнӗ.

chuvdram.ru сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗ черетлӗ, 107-мӗш, сезона «Салампи» спектакльпе уҫӗ. Кун пирки театр директорӗ Елена Николаева коллективпа ирттернӗ пухура пӗлтернӗ.

«Театр куракансене авӑн уйӑхӗн 10-мӗшӗнче йышӑнӗ. Ун чухне Чӑваш Енри театрпа культура учрежденийӗсем театрпа концерт сезонне уҫӗҫ.

Чӑваш драми авӑн уйӑхӗн 12-мӗшӗнче Наталия Сергеева режиссёр лартнӑ «Салампи» спектакле кӑтартӗ.

Юпа уйӑхӗнче кураканӑмӑрсене «Василисса» ӗҫе килсе курма йыхравлатпӑр. Унӑн режиссёрӗ — Тольятти хулинчи Алена Савельева.

Тӗп пулӑмсене вара пирӗн илемлӗх ертӳҫи, ятлӑ-сумлӑ режиссёр тата педагог, СССР халӑх артисчӗ Валерий Яковлев 85 ҫул тултарнине халаллӑпӑр», – тенӗ Елена Васильевна.

Ҫурла уйӑхӗнчи сивӗ те ҫумӑрлӑ ҫанталӑк тӑнӑ хыҫҫӑн хӗвел пӑхма тытӑнчӗ, ӑшӑтса ячӗ. Ку эрнере юнкун чи ӑшӑ кун пулӗ. Ун чухне 30 градус таран ӑшӑтӗ. Каҫхине кӑна ҫурҫӗр енчи округсенче сивӗ фрончӗ иртӗ. Ҫапах сивӗтсех пӑрахмӗ.

Кӗҫнерникун 25 градуса яхӑн ӑшӑ пулӗ. Кӑнтӑр енче шӑрӑх хуҫаланӗ-ха. Кӑштах пӗлӗтсем тухкалӗҫ, анчах ҫумӑр ҫумӗ ахӑртнех.

Эрнекунран каллех уяртӗ, кӑнтӑрласерен 21-26 градус ӑшӑ пулӗ, каҫсерен – 10-15 градус.

Малтанлӑха пӗлтернӗ тӑрӑх, кӗркунне пуҫламӑшӗнче ҫуллахи пек ӑшӑ ҫанталӑк пулӗ.

Ӗнер Шупашкарти кӳлмекре DАЙ ХАРD ҫурма марафон пулнӑ. Шел те, унтан инкек сиксе тухнӑ. 35 ҫулти фитнес-тренер Антон Краснов вилнӗ.

Спортсменсем 5, 10 тата 21,1 ҫухрӑма чупнӑ. Антон Краснов 21,1 ҫухрӑма малтисен йышӗнче парӑнтарнӑ. Анчах финиша ҫитсен ӳксе тӑнне ҫухатнӑ. Тухтӑрсем ӑна реанимаци тума хӑтланнӑ. Анчах май килмен, Антонӑн чӗри чарӑнса ларнӑ. Сӑмах май, вӑл фитнес-клубра тренерта ӗҫленӗ. Унӑн арӑмӗ тата пӗчӗк хӗрӗ тӑлӑха юлнӑ.

Антон Красновпа ыран Введени соборӗнче 11 сехет ҫурӑра сывпуллашӗҫ.

mintrud.cap.ru сӑнӳкерчӗкӗ

Чӑваш Енре кӗмӗл волонтёрсен конкурсӗ иртет. Ӑна республикӑн Ӗҫ тата социаллӑ хӳтлӗх министерстви йӗркеленӗ.

«Ҫӗнтерӳ волонтёрӗ» номинацие Раҫҫей ҫарне пулӑшакан, гуманитари пулӑшӑвӗ кӳрекен ватӑсем хутшӑнма пултараҫҫӗ.

«Волонтёр-наставник» номинацие — ачасене пӑхса пулӑшакансем, ватӑсене пулӑшу кӳрекенсем; «Эко-волонтёр» номинацие — ҫутҫанталӑка хӳтӗлессипе тӑрӑшакансем; «Социаллӑ экспреса» — тӗрлӗ мероприятие хастар хутшӑнакансем.

Документсене mintrud@cap.ru электрон адреспа ярса памалла. Вӗсене авӑн уйӑхӗн 23-мӗшӗччен йышӑнӗҫ.

Ҫӗнтерӳҫӗсене «Кӗмӗл Чун» республикӑри форумра чыслӗҫ.

forum.zarulem.ws порталтан илнӗ сӑнӳкерчӗк

Шӑматкун Ҫӗрпӳ хулинче виҫӗ ҫулти ача машина умне чупса тухнӑ. Пуҫне амантнӑ тесе шухӑшланӑран ӑна пульницӑна илсе кайнӑ.

Пӑтӑрмах хулари Терешкова урамӗнче, универмага хирӗ лапамра, 21 сехет те 20 минутра пулса иртнӗ. Машина парковкӑран хускалма пуҫланӑ, ҫав вӑхӑтра ун умне пӗчӗк ача чупса тухнӑ. Ҫав вӑхӑтра автомобиль пысӑк хӑвӑртлӑхпа кайман. Водитель урах пулнӑ.