cap.ru сӑнӳкерчӗкӗ

Ку шӑматкун, авӑнӑн 20-мӗшӗнче, «Нацисен кросӗ» пулӗ. Кӑҫал ӑна Ҫӗнтерӳ пулнӑранпа 80 ҫул ҫитнине тата Тӑван ҫӗршыв хӳтӗлевҫин ҫулталӑкне халалланӑ.

Йӑлана кӗнӗ тӑрӑх, Шупашкарта спорта юратакансем Мускав ҫыран хӗррине пухӑнӗҫ. Спорт уявӗ кашни муниципалитетрах иртӗ. Чи пӗчӗккисем 1 ҫухрӑм чупӗҫ, шкул ачисемпе студентсем – 4 ҫухрӑм. Спортсменсем вара 6, 8 е 12 ҫухрӑм суйлама пултарӗҫ.

Ку таранччен республикӑра «Нацисен кросне» 14 пин ҫын хутшӑнма заявка панӑ.

cap.ru сӑнӳкерчӗкӗ

Суйлав иртсе кайрӗ, ЧР Элтеперӗ малашне те Олег Николаев пулӗ. Инаугураци аванӑн 26-мӗшӗнче пулӗ.

Вӑл Чӑваш патшалӑх оперӑпа балет театрӗнче иртӗ. Ҫавна май ҫав кун кӑтартма палӑртнӑ спектакле аванӑн 30-мӗшӗ ҫине куҫарӗҫ. Ун чухне вӑл 15 сехетре пуҫланӗ.

Аса илтерер: суйлавра Олег Николаевшӑн суйлава пынисен 67,06 проценчӗ сасӑланӑ.

vk.com/chuvashvk ушкӑнран илнӗ скриншот

Муркаш районӗнчи Юнкӑри культура ҫуртӗнче купӑсҫӑ кирлӗ. Кун пирки халӑх тетелӗсенчен пӗринче Надежда Шандимирова пӗлтернӗ.

Чӑваш Енре «Земство культура ӗҫченӗ» программӑна хутшӑнакансем ӗҫе пуҫӑннӑ тесе хыпарланине курсан ҫав хӗрарӑм Юнкӑри культура ҫуртне ҫамрӑк культура ӗҫченне ярса парӗҫ-ши тесе ҫырнӑ.

«Ку ыйтӑва эп иртнӗ ҫулах хускатнӑччӗ. Пӗлтӗр те смотр вӑхӑтӗнче пирӗн купӑсҫӑна япӑх пулса кайрӗ. Ҫулӗ те пур, хӑлхи те, куҫӗ те витӗрех мар», — хыпарланӑ хӗрарӑм.

chrio.rchuv.ru сӑнӳкерчӗкӗ

Геннадий Волкова асӑнса регионсен шайӗнчи «Хавхалану» фестиваль-конкурс иртет. Вӑл Чӑваш Енӗн Вӗренӳ институчӗ пӗлтернӗ тӑрӑх, авӑн уйӑхӗн 16-мӗшӗнче пуҫланнӑ, вӑл юпа уйӑхӗн 31-мӗшӗнче вӗҫленӗ.

Ӑна И.Я. Яковлев ячӗллӗ Чӑваш патшалӑх педагогика университечӗпе, Чӑваш наци конгресӗпе, Шупашкар хулин мониторингпа вӗренӳ аталанӑвӗ центрӗпе тата Шупашкар хулин Г.Н. Волков Раҫҫей вӗренӳ академийӗн академикӗ ячӗллӗ уйрӑм предметсене тарӑннӑн вӗрентекен 62-мӗш пӗтӗмӗшле пӗлӳ паракан вӑтам шкулӗпе пӗрле йӗркеленӗ.

Фестиваль-конкурс тӗллевӗ – вӗренекенсене Раҫҫей вӗренӳ академийӗн сумлӑ академикӗн, публицист писателӗн, этнопедагогика никӗслевҫин Г.Н. Волковӑн пултарулӑх эткерне тӗпчесе сарасси, вӗренекенсемпе педагогсен пӗлӳпе ӑс-хакӑл пултарулӑхне вӑйлатасси, вӗсене пултарулӑхпа тӗпчев ӗҫне явӑҫтарасси, наци культурипе литературине тӗпе хурса вӗренекенсен этнокультура компетентлӑхне йӗркелесси, вӗренекенсемпе педагогсене хӑйсене аталантарма майсем туса парасси, ҫавӑн пекех халӑхсен хушшинчи хутшӑну культурине йӗркелесси.

chgign.ru сӑнӳкерчӗкӗ

Нумаях пулмасть Чӑваш Енӗн Наци вулавӑшӗнче «Ачасен чи ҫывӑх тусӗ» ятлӑ куҫса ҫӳрекен куравне йркеленӗ. Экспозицие Николай Ытарай ача-пӑча ҫыравҫин пурнӑҫӗпе тата пултарулахӗпе паллаштарас тӗллевпе йӗркеленӗ.

Мероприяти вӑхӑтӗнче тухса калаҫакансем хушшинче Чӑваш патшалӑх гуманитари ӑслӑлӑхӗсен институчӗн ӑслӑлӑх ӗҫченӗ Надежда Ефремова-Ильина та пулнӑ. Вӑл Н.В. Васильев (Ытарай) пурнӑҫӗпе пултарулӑхӗ ҫинчен каласа панӑ. Николай Ытарай пултаруллӑ ача-пӑча ҫыравҫи кӑна мар, тӑван халӑх сӑмахлӑхне ырми-канми пуҫтаракан пулни, Ытарай Тӗпчев институчӗн штатра тӑман ӗҫченӗ пулнӑ май комплекслӑ фольклор экспедицийӗсене тулай чӑвашӗсем патне тухса ҫӳрени ҫинчен каласа кӑтартнӑ. Кун пирки институтра пӗлтернӗ.

chgign.ru сӑнӳкерчӗкӗ

Чӑваш патшалӑх гуманитари ӑслӑлӑхӗсен институчӗн ӗҫченӗсем Алтайра «Алтай – прародина тюрков. К истории зарождения тюркской цивилизации» (чӑв. Алтай — тӗрӗксен тӑван ҫӗршывӗ. Тӗрӗк цивилизацийӗ пуҫланса кайнин историйӗ) ятпа иртекен II Пӗтӗм тӗнчери конференцие хутшӑннӑ.

Мероприяти авӑн уйӑхӗн 16-18-мӗшӗсенче иртнӗ. Ӑна славянсемпе тӗрӗксен тӗнчине, этносӗ пуҫланса кайнине халалланӑ. Унта Раҫҫейри, Беларуҫри, Венгринчи, Казахстанри, Кӑркӑстанри, Узбекистанри, Туркменистанри, Азербайджанри патшалӑх ӗҫченӗсем, историксем, тюркологсем, алтаистсем, археологсем, лингвистсем пырса ҫитнӗ. Чӑваш Енрен форума гуманитари ӑслӑлӑхӗн директорӗ, филологи наукисен докторӗ Юрий Исаев тата ӑслӑлах ӗҫченӗ, филологи наукисен кандидачӗ Эдуард Лебедев хутшӑннӑ.

chgign.ru сайтран илнӗ сӑнӳкерчӗк

Чӑваш патшалӑх гуманитари ӑслӑлӑхӗсен институчӗн ӗҫченӗ кӗслепе паллаштаракан кӗнеке хатӗрлесе кӑларнӑ.

«Кӗсле – музыкальный инструмент чувашского народа в истории и современной культуре» кӑларӑм авторӗ — искусствоведени докторӗ Михаил Кондратьев.

Ҫӗнӗ кӑларӑма 500 экземплярпа кун ҫути кӑтартнӑ. Кӗнекене социаллӑ пӗлтерӗшлӗ литературӑна пичетлеме федераци хыснинчен паракан субсиди укҫипе Чӑваш кӗнеке издательствинче пичетленӗ.

объясняем.рф сӑнӳкерчӗкӗ

Раҫҫей Президенчӗ Владимир Путин халӑхпа тӳрӗ лини ирттерӗ. Анчах ӑна пысӑк пресс-конференципе пӗрле ирттерӗҫ. Кун пирки ҫӗршыв ертӳҫин пресс-секретарӗ Дмитрий Песков пӗлтернӗ.

Кремль тӳрӗ лини ирттерме хатӗрленме пуҫланӑ. Ӑна кӑҫалхи раштав уйӑхӗнче йӗркелесе ирттерме палӑртаҫҫӗ.

chrio.rchuv.ru сӑнӳкерчӗкӗ

Республика шайӗнче иртнӗ професси ӑсталӑхӗн «2025 ҫулхи воспитатель» конкурс финалисчӗ Зинаида Павлова Раҫҫей шайӗнче иртекен конкурса тухса кайнӑ.

Пултарулӑх ӑмӑртӑвӗ Краснодар тӑрӑхӗнчи Геленджик хулинче пулӗ. Вӑл авӑн уйӑхӗн 22-28-мӗшӗсенче иртӗ.

Чӑваш Енӗн Вӗренӳ институчӗн сӑнӳкерчӗкӗ

Чӑваш Енӗн Вӗренӳ институчӗн педагогӗ Расима Гайнутдинова Ҫамрӑсен пӗтӗм тӗнчери фестивальне хутшӑнать.

Мероприяти Чулхулара иртет. Унта тӗнчен тӗрлӗ кӗтесӗнчи яш-кӗрӗмпе хӗрупраҫ пуҫтарӑннӑ. Ҫавӑнта Чӑваш Ен делегацийӗ хутшӑнать, ҫав шутра маларах эпир асӑнса хӑварнӑ Раисма та. Вӑл «Креативные индустрии и творчество» (чӑв. Креативлӑ индустрипе пултарулӑх) трека хутшӑнать. Ун вӑхӑтӗнче ӳнер ӗҫченӗсемпе тӗл пулусем иртеҫҫӗ.