Юпа уйӑхӗн 26-мӗшӗнчен Шупашкарти аэропорт хӗллехи расписанипе ӗҫлеме пуҫлӗ. Мускава Шупашкартан кунне виҫӗ хутчен вӗҫме май килӗ. Икӗ рейса «Победа» авиакомпани пурнӑҫлӗ, теприне — «Аэрофлот».

Хӗллехи вӑхӑтра Шупашкартан самолётсем ҫавӑн пекех Питӗр, Сочи, Минеральные Воды тата Сургут хулисене вӗҫӗҫ.

kp.ru сайтри сӑн

Шупашкарти техникумра вӗренекен 18-ти студента палламан ҫынсем улталанӑ. Вӑл вӗсене ӗненсе ҫӗрле Хусана таксипе кайнӑ, банкомат урлӑ 600 пин тенкӗ куҫарса панӑ.

Ун патне «техникум администрацийӗнчен» шӑнкӑравланӑ, смспа килнӗ кода калама ыйтнӑ. Кӑшт вӑхӑт иртсен «Госуслуги» порталӗн ӗҫченӗ» унпа ҫыхӑннӑ. Вӑл ӑна хӑратса пӗтернӗ: унӑн даннӑйӗсене ют ҫынсем пӗлнӗ имӗш, ҫавна май ашшӗ-амӑшӗн укҫине такамсем вӑрлама пултараҫҫӗ. «Украина ҫарӗсене пулӑшнӑшӑн» мӗнле явап тыттарассине те аса илтернӗ.

Палламан ҫынсем кун пирки никама та шурлама хушман. Хӑраса ӳкнӗ студент ашшӗ-амӑшӗн пухнӑ укҫине илсе таксипе Хусана кайнӑ, унта ӑна банкомат урлӑ палламан ҫынсем пӗлтернӗ счет ҫине куҫарнӑ. Кун хыҫҫӑн та ултавҫӑсем хӑпман — кредит илме хушнӑ. Студент тинех хай ултавҫӑсен аллине лекнине ӑнланнӑ.

«Погода 21» сайтран илнӗ сӑн

Ӗнер республикӑн ҫурҫӗр-хӗвеланӑҫ тӑрӑхӗнче – Етӗрне, Хӗрлӗ Чутай, Муркаш, Шупашкар округӗсенче – юр ӳкнӗ. Халӗ пирӗн пата кӑнтӑр енчен циклон ҫывхарать.

Кӗҫӗр ҫумӑр ҫума тытӑнӗ, кӗҫнерникунччен чарӑнмӗ. Хальлӗхе юр ӳкмӗ. Анчах тӗтре карса илме пултарать.

Эрнекунпа шӑматкун кӑна ҫумӑр ҫумӗ. Анчах шӑматкун ҫил вӑйланӗ, каллех ҫумӑр илсе килӗ – вырсарникун ҫумӑр ҫума пуҫлӗ.

Инкеклӗ лару-тӑру министерстви тунӑ сӑн

Ӗнер, юпа уйӑхӗн 18-мӗшӗнче, Куславкка округӗнчи Ҫӳлти Улмалуй ялӗнче, 57-ри арҫын путса вилнӗ.

Ку инкек ял ҫывӑхӗнчи плотинӑра пулнӑ. Арҫыннӑн виллине ҫӑлавҫӑсем шыраса тупса ҫыран хӗррине илсе тухнӑ. Халӗ вӑл мӗнле сӑлтава пула путса вилнине уҫӑмлатаҫҫӗ.

Палӑртмалла: ҫулталӑк пуҫланнӑранпа республикӑра шыв ҫинче 26 инкек пулнӑ, вӗсенче 23 ҫын вилнӗ, ҫав шутран иккӗшӗ – ачасем.

Патшалӑх автоинспекцийӗ тунӑ сӑн

Ӗнер каҫхине, юпа уйӑхӗн 18-мӗшӗнче, М-7 ҫул ҫинче, Ҫӗрпӳ округӗнчи «Туҫи — Кивҫурткасси» патӗнче, пулнӑ аварире 2 ҫыннӑн пурнӑҫӗ татӑлнӑ.

Малтанлӑха палӑртнӑ тӑрӑх, «Хавал» водителӗ ҫул пӑрӑнӑшӗнче руле итлеттереймен. Машина кювета чӑмса ҫаврӑнса ӳкнӗ. Пӗр пассажир салонран тухса ӳкнӗ, вӑл ҫавӑнтах вилнӗ. Теприне больницӑна илсе кайма тухнӑ, анчах вӑл ҫул ҫинче сывлама пӑрахнӑ.

Водитель йывӑр суранланнӑ, ӑна Шупашкарти больницӑна илсе ҫитернӗ.

Чӑваш кӗнеке издательствин сӑнӳкерчӗкӗ

Чӑваш Енре юлашки ҫулсенче ирттерме тытӑннӑ «Чӑваш романӗ» конкурса пӗтӗмлетнӗ.

Чӑваш кӗнеке издательстви конкурса кӑҫалхипе виҫҫӗмӗш хут ирттерет. Хальхи пӗлтӗрхи раштав уйӑхӗн 14-мӗшӗнчен тытӑнса кӑҫалхи авӑн уйӑхӗн 30-мӗшӗччен пынӑ.

Романа сарма пулӑшас тӗллевпе ирттерекен конкурса пынӑ ӗҫсене пахаланӑ хыҫҫӑн тӳресем Анатолий Хмытӑн «Хазара» алҫырӑвне суйласа илнӗ. Вӑл ӗҫе кӗнеке издательстви ҫитес ҫул пичетлесе кӑларӗ.

Чӑваш академи драма театрӗн сӑнӳкерчӗкӗ

Чӳк уйӑхӗн 7-мӗшӗнче Чӑваш патшалӑх академи драма театрӗнче Валентина Ситова артисткӑн юбилей каҫӗ иртӗ.

Валентина Петровна — Раҫҫей тава тивӗҫлӗ артистки, Чӑваш халӑх артистки, Раҫҫей патшалӑх премийӗн лауреачӗ.

Пулас артистка 1960 ҫулхи авӑн уйӑхӗн 1-мӗшӗнче Патӑрьел районӗнчи Патӑрьелте ҫуралнӑ. Мускаври Щепкин ячӗллӗ театр училищинчен 1983 ҫулта вӗренсе тухнӑранпах театрта тӑрӑшать.

Юбилей каҫӗнче «Ай, мӑнтарӑн ҫил-тӑманӗ» спектакль кӑтартӗҫ.

vk.com/dramteatr21 сӑнӳкерчӗкӗ

«Культура.РФ» порталта чӑвашла спектакль курма май килӗ.

Юпа уйӑхӗн 26-мӗшӗнче, 18 сехетре «Пӗр уйӑх ҫеҫ пӗрле» драма кӑтартӗҫ. Ӑна culture.ru сайтра курма пулӗ.

«Ҫуллахи шӑрӑх, ялти шӑплӑх, юлхаввӑн та вӑраххӑн тӑсӑлакан вӑхӑт, вӑрӑм та кӑмӑллӑ калаҫусем тата... вӗресе тӑракан туйӑмсем, хӗрӳллӗ юрату... Чӗрене ҫунтаракан, кураканӑн чунне те хыпса илесле ытла та вӗри юрату!..» — ҫакӑн пек ҫырса кӑтартнӑ спектакль пирки культура учрежденийӗ халӑх тетелӗнчи хӑйӗн пабликӗнче.

Чӑваш академи драма театрӗн сӑнӳкерчӗкӗ

Чӑваш патшалӑх академи драма театрӗ пӗр билет туяннипех спектакль те пӑхма, театрпа паллаштаракан экскурсире пулса курма та май пурри пирки пӗлтерет.

«Пӗтӗм тӗнче – театр» экскурсипе пӗрле спектакль валли пӗр билет туянма пулать иккен.

«Юпа уйӑхӗн 24-мӗшӗнче сире чаршав хыҫӗнчи асамлӑ тӗнчене кӗрсе курма, бутафори, декораци, тумтир хатӗрлекен цехсенче пулма, залсене, тӗп сценӑна тӗрлӗ ҫӳллӗшрен пӑхса тӗлӗнме йыхравлатпӑр!

Экскурси хыҫҫӑн вара «Ҫимӗк каҫӗ» юрӑллӑ-ташӑллӑ камит пӑхса киленме май пур!» — хыпарланӑ культура учрежденийӗ халӑх тетелӗнчи хӑйӗн пабликӗнче.

контент21 видеовӗнчен илнӗ сӑнӳкерчӗк

Чӑваш патшалӑх юрӑпа ташӑ ансамблӗ Улӑпа ташӑра сӑнарлакан программа хатӗрлет.

«Сказ о земле чувашской» / «Чӑваш тӗнчи» ҫӗнӗ программа никӗсӗнче — тӑван халӑхӑмӑрӑн халапӗсенчи мӑнаҫлӑ паттӑр сӑнарӗ. Атӑл тепӗр енне пӗр утӑм тусах каҫма пултарнӑ ҫавскер, Аҫтахана та ҫӗнтернӗ.

Чӑваш патшалӑх юрӑпа ташӑ ансамблӗн балетмейстерӗ тата илемлӗх ертӳҫи Алексей Тимошенко ҫӗнӗ программӑна художниксемпе, писательсемпе тата композиторсемпе туслӑ ҫыхӑну тытса йӗркеленӗ.

Ҫӗнӗ концерт программи куракан патне юпа уйӑхӗн 21-мӗшӗнче ҫитӗ.