Чӑваш Енӗн Наци вулавӑшӗнче чӑваш халӑх поэчӗн Ухсай Яккӑвӗн «Ҫырнисен пуххи = Собрание сочинений. Т. 8: Тӗрлӗрен» тата «Чӑваш дивизийӗ ҫинчен каласа паракан поэма = Поэма о чувашской дивизии» кӗнекисене хаклассине эпир унччен пӗлтернӗччӗ-ха.

Мероприятие писательсем, журналистсем, преподавательсем, литературоведсем, общество хастарӗсем тата студентсем хутшӑннӑ.

Ашшӗ ҫинчен ӑшшӑн аса илсе хӗрӗ, Ольга Яковлевна, хумханса каласа кӑтартнӑ. Унсар пуҫне вӑл маларах асӑннӑ икӗ кӑларӑма мӗншӗн кун ҫути кӑтартни ҫинчен ӑнлантарса панӑ.

Шупашкарта биспилотникрен шар курнӑ ҫуртра чӳречесем лартма тытӑннӑ. Кун пирки Шупашкар хулин пуҫлӑхӗн тивӗҫӗсене пурнӑҫлакан Станислав Трофимов хыпарланӑ.

Комисси хваттерсене ӗнер пӑхса тухнӑ: чӳречесене виҫнӗ, ӑҫта рама, ӑҫта кантӑк кӑна лартмаллине палӑртнӑ. Монтажниксем тӳрех ӗҫе пуҫӑннӑ. Чӳрече туса кӑларакан предприятире тӗп ӗҫе вӑхӑтлӑх чарса лартса ҫак ҫурт валли чӳречесем тума тытӑннӑ.

bbc.co.uk сайтри сӑн

Юстици ӗҫӗсен патшалӑх служби кӑҫал ашшӗ-амӑшӗ тин ҫуралнӑ ачисене ытларах мӗнле ят панине тишкернӗ: Чӑваш Енре Ева, Михаил ятлӑ ачасем ытларах ҫуралнӑ.

Ҫавӑн пекех хӗрачасен ТОП-5 йышне Анна, Виктория, София, Мария кӗнӗ. Арҫын ачасен ТОП-5 йышӗнче вара — Михаилсӑр пуҫне Матвей, Роман, Александр, Марк.

Палӑртмалла: кӑҫал нумайӑшӗ «Ача ҫурални» суперсервиспа усӑ курнӑ — йыш хушнисен 72 проценчӗ ун урлӑ регистраци тума заявлени панӑ. Питӗ меллӗ: ача ҫуралнине ӗнентерекен свидетельствӑна илес тесен кӑшт кӑна вӑхӑт ирттермелле.

cap.ru сайтри сӑн

Паян 15 сехет ҫурӑра Шупашкарта Халӑхсен туслӑхӗн ҫуртӗнче «Пӗрле тӑватпӑр» этномастерской уҫӑлать.

Унта хутшӑнакансем паян эрешсемпе паллашӗҫ, хӑйсен аллипе мӗн те пулин ӑсталӗҫ. «Йӑх паллисем» курав иртнине тата пуласлӑха ҫыхӑнтаракан кӗпер пулӗ. Унта хӑйне евӗр тутӑрсен тӗслӗхӗсем пулӗҫ, вӗсем — салтаксемпе рекрутсем валли сыхчӑ пек тӗрленисем.

cap.ru сайтри сӑн

Украина ҫарӗсен беспилотникӗсем Шупашкарти 12 хутлӑ ҫурт тӑррине сиенлетнӗ чухне икӗ ҫын аманни пирки пӗлтернӗччӗ. Вӗсем – амӑшӗпе ывӑлӗ.

Ӗнер пульницӑна вӗсем патне ЧР сывлӑх сыхлавӗн министрӗ килсе кайнӑ, амӑшӗпе ывӑлне мӗнле медпулӑшу кӳнине тӗрӗсленӗ. Ывӑлӗ вӑйлах аманман. Амӑшне вара операци тума тивнӗ.

Аса илтерер: чук уйӑхӗн 26-мӗшӗнче ҫур ҫӗр иртни 2-3 сехетре Шупашкара Украина беспилотникӗсем тапӑннӑ.

cap.ru сӑнӳкерчӗкӗ

Чӑваш академи драма театрӗнче шкул театрӗсен «АСАМ» фестивалӗн ҫӗнтерӳҫисене палӑртма йӗркелӳ комитечӗ пуҫтарӑннӑ. Кун пек фестиваль пирӗн республикӑра кӑҫалхипе виҫҫӗмӗш хут иртет.

Тӳресем асӑрханӑ тӑрӑх, театр ӳнерӗпе кӑсӑкланакансен йышӗ кӑҫал самай ӳснӗ. Фестивале хутшӑнакансем репертуара та тӗплӗнрех суйласа илнӗ, спектакльте вылякансене те.

Кӑҫалхи фестивале 309 вӗрену учрежденийӗ 310 ӗҫпе хутшӑннӑ. Сцена ҫине 4031 ача тухнӑ.

Кӗҫех кам ҫӗнтерни паллӑ пулӗ.

cap.ru сӑнӳкерчӗкӗ

Ӗнер, чӳк уйӑхӗн 26-мӗшӗнче, пирӗн республикӑра Чӑваш тӗррин кунне уявларӗҫ. Кӑҫал вӑл улттӑмӗш хутчен иртрӗ.

Тӗп мероприяти Шупашкарта, Чӑваш академи драма театрӗнче, пулнӑ. Унта пухӑннисене уявпа республика Элтеперӗ Олег Николаев саламланӑ.

Сумлӑ ытти хӑна та пулнӑ. Ҫав шутра — Раҫҫей Патшалӑх Канашӗн депутачӗ Алла Салаева, Чӑваш Енри хӗрарамсен канашӗн председателӗ Наталья Николаева, «Ӗҫлӗ Раҫҫей» общество организацийӗн республикӑри уйрӑмӗн ертӳҫи Алексей Ефимов.

Республикӑн культура министрӗ Светлана Каликова хӑнасене театрта ятарласа вырнаҫтарнӑ экспозиципе паллаштарнӑ. Унта пир тӗртмелли станок та, чӑваш тумне тӑхӑнтартнӑ манекенсем те, салтак тутри те тата ытти нумай япала пулнӑ.

vk.com/gov_cap_ru сӑнӳкерчӗкӗ

«Трактор тӑвакансен культура керменӗ» республикӑри халӑх пултарулӑхӗн ҫурчӗ «Дом культуры. Новый формат» (чӑв. Культура ҫурчӗ. Ҫӗнӗ формат) пӗтӗм Раҫҫейри конкурсра ҫӗнтернӗ.

Культура ҫурчӗ «Клуб йышши регион шайӗнчи культурӑпа кану учрежденийӗ пурнӑҫа кӗртнӗ проект» номинацире «Тӗрленӗ Раҫҫей» пӗтӗм Раҫҫейри фестиваль ирттернипе палӑрнӑ.

Ҫӗнтерӳҫӗсене Мускавра, Раҫҫейӗн Культура министерствин Пысӑк кинозалӗнче, чысланӑ.

Конкурса 72 регионтан 150 проектпа хутшӑннӑ. Вӗсенчен тӑххӑрӑшне суйласа илсе чысланӑ.

vk.com/gov_cap_ru сӑнӳкерчӗкӗ

Чӑваш Енри крадиологсем EKOS текен ҫӗнӗ меслетпе пуҫласа операци тунӑ.

Операци сӗтелӗ ҫине выртнӑ хӗрарӑм Шупашкартан. 79 ҫулти Галина чӗрепе юн тымарӗсен чирне пула сывлама йывӑррипе нушаланнӑ. Ӑна пӗрре сывлӑш ҫавӑрса илме тем тӑнӑ.

Республикӑн кардиологи диспансерӗн тухтӑрӗсем ватӑ ҫыннӑн юн ҫывӑрса ларнине ультросасӑпа катетер лартса уҫса янӑ. Ку операцие вӗсем Чӑваш Енре унччен усӑ курман ҫӗнӗ технологие тӗпе хурса пурнӑҫланӑ.

«Пурӑнма, сывлама май пурри чӑн телей», — чунтан тав тунӑ тухтӑрсене кинемей.

vk.com/gov_cap_ru сӑнӳкерчӗкӗ

Чӑваш Енре чи лайӑх муниципалитет служащине палӑртнӑ. Ку ята Шупашкар хулин администрацийӗн финанс управленийӗн пуҫлӑхӗ Надежда Куликова тивӗҫнӗ.

Надежда Глебовна конкурса «Современные формы представления проекта местного бюджета для граждан» проектпа хутшӑннӑ. «Ҫынсем валли хысна» проект Шупашкарта пурнӑҫа кӗме тытӑннӑ иккен. Хулари тӳре-шара ӗнентернӗ тӑрӑх, вӑл ҫынсене финанс енчен тавҫӑруллӑрах пулма май парать тата влаҫа халӑхпа уҫҫӑнрах ӗҫлеме хистет.