cap.ru сайтри сӑн

Кӑҫал «Ҫӗрулми» курав нарӑсӑн 29-мӗшӗнче, пуш уйӑхӗн 1-мӗшӗнче иртессине пӗлтернӗччӗ. Аса илтерер: вӑл Шупашкарти суту-илӳпе курав центрӗнче пулӗ, унта вӑрлӑх ҫӗрулми сутӗҫ.

Кӑҫал курава ҫӗрулмин 18 сортне илсе килӗҫ: «Аван», «Бельмондо», «Бернина», «Верди», «Гала», «Гулливер», «Жуковский ранний», «Ирбитский», «Кармен», «Коломбо», «Королева Анна», «Легенда», «Метеор», «Ред Леди», «Ривьера», «Родриго», «Самбо», «Фламинго».

Ытти ҫулти пекех, ватӑсене, сусӑрсене тавара киле илсе ҫитерме нимеҫӗсем пулӑшӗҫ.

forum.na-svyazi.ru сайтри сӑн

Красноармейски округӗнчи «Кетра» савутра завхоз ҫине пушӑ поддон ӳкнӗ. Ку кӑрлач уйӑхӗн 2-мӗшӗнче пулнӑ. Ҫав вӑхӑтра завхоз савут территорийӗнче юр тасатнӑ.

Чӑваш Енри патшалӑх ӗҫ инспекцийӗ пӗлтернӗ тӑрӑх, суранланнӑ хӗрарӑма пульницӑна илсе кайнӑ. Ведомство ку инкеке малалла тӗпчӗ.

realty.rbc.ru сайтри сӑн

Кӑҫал Шупашкар хулин ҫуралнӑ кунне Раҫҫейӗн чечеклӗ карттине тӑваҫҫӗ. Тӗп хуламӑр 555 ҫул тултарӗ.

Карттӑна ҫу уйӑхӗнчех тума пуҫлӗҫ. Ун чухне чечек хунавӗсене лартма тытӑнӗҫ. Акцие ҫӗршыври тӗрлӗ регион хутшӑнӗ.

Чечексене, тӗрлӗ регионти питомникре ӳстернӗскере, кӳлмекре лартӗҫ. Хальлӗхе заявкӑсене йышӑнаҫҫӗ. Хула администрацийӗн пуҫлӑхӗ Денис Спирин пӗлтернӗ тӑрӑх, нарӑс вӗҫӗнче, пуш пуҫламӑшӗнче акцие миҫе регион хутшӑнни паллӑ пулӗ.

cheb-centr.soc.cap.ru сӑнӳкерчӗкӗ

Хӗрлӗ Чутай районӗнче ҫуралнӑ, мӗн ҫамрӑкранпа Шупашкарта пурӑнакан Галина Деомидова нумаях пулмасть 80 ҫул тултарнӑ.

Галина Кирилловна — тантӑшӗсемшӗн чӑн-чӑн тӗслӗх пулса тӑма тивӗҫ ҫын. Вӑл Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центра 10 ҫула ытла ҫӳрет. Унта кинемей тӗрлӗ спорт хусканӑвӗ тӑвакан ушкӑнпа занятисене хутшӑнать, алӑ ӗҫӗпе аппаланать. Унсӑр пуҫне вӑл Пукане тата Пантомима театрӗсенче вылять. Ыттисене мӗнпе те пулин пулӑшмалла пулсан Галина Деомидова малтисен йышӗнче.

«Социаллӑ центр мар пулсан эпӗ хама епле туяттӑм-ши — пӗлместӗп те. Кунта килсе ҫӳренӗрен ман кӑмӑл та лайӑх, хама аван туятӑп, пурнӑҫпа хавхаланса пурӑнатӑп», — хавасланса палӑртать юбиляр.

culture.cap.ru сӑнӳкерчӗкӗ

Чӑваш патшалӑх ҫамрӑксен театрӗнче Марина Карягина драматург пьесипе «Ҫӗн Кун Ачи» спектакль лартассипе Раҫҫей Федерацийӗн тата Калмӑк Республикин искусствӑсен тава тивӗҫлӗ ӗҫченӗ Борис Манджиев режиссёр тӑрӑшать.

Калмӑк режиссёрӗ Ҫеҫпӗл Мишшипе театр чӗлхи урлӑ паллаштарма тӗллев лартнӑ май Ҫеҫпӗл пурӑннӑ саманана сӑнарласшӑн.

«Ун чухнехи шухӑшсем паян та актуаллӑ. Хамӑр утӑмшӑн хамӑрӑн яваплӑ пумалла», — тесе шухӑшлать иккен асӑннӑ театрта виҫҫӗмӗш спектакль лартакан режиссёр.

«Ҫеҫпӗл Мишши хӑйӗн 22 ҫулӗнче туса ӗлкӗрнӗ ӗҫӗсемшӗн пирӗн ун умӗнче пуҫа таймалла. Унӑн кӗске кун-ҫулӗнче темӗн те пулнӑ. Вӑл хӑйне тӗпӗ-йӗрӗпе, мӗн юлмиччен ҫынсене панӑ. Вӑл утса тухнӑ кӑткӑс ҫула пурте тӳсеймӗ», — каласа кӑтартнӑ Борис Манджиев театр сайтӗнче вырнаҫтарнӑ интервьюра.

Чӑваш Енӗн Ӗҫ министерствин видеовӗнчен илнӗ сӑнӳкерчӗк

Нарӑс уйӑхӗн 9-мӗшӗнче Шупашкарта «Семья – это счастье» (чӑв. Ҫемье — вӑл телей) регионти форму иртӗ.

Унта Чӑваш Енре пурӑнакан, общество пурнӑҫӗнче хастар, пултаруллӑ та талпӑнуллӑ, ҫав шутра ятарлӑ ҫар операцине хутшӑнакансен ҫемьесенче пуӑнакансем те, хутшӑнӗҫ. Шупашкарти форума пурӗ 300 ҫемье килсе ҫитмелле.

Асӑннӑ 300 ҫемье шутӗнче Мускавра иртнӗ «Родные — Любимые» форума хутшӑнма тивӗҫ пулнӑ Семёновсем те пулӗҫ. Нумай ачаллӑ ҫак ҫемье чӑвашлӑха упрассипе те ҫине тӑрать.

bryansktoday.ru сайтри сӑн

Ҫӗмӗрлере пурӑнакан 46 ҫулти арҫын тупнӑ телефона пӗлӗшне парнеленӗ. Халӗ унӑн куншӑн явап тытмалла.

Ҫак арҫын кӑрлачӑн 1-мӗшӗнче лавккана кӗнӗ те 10 ҫулти ача манса хӑварнӑ телефона йӑтса тухнӑ.

Кайран 46-ри арҫын ҫак телефона пӗлӗшне парнеленӗ. Ӑна вӑл эрех ӗҫтернӗшӗн ҫапла тав тунӑ.

Арҫын айӑпне йышӑннӑ, телефона тавӑрса панӑ. Анчах унӑн пурпӗрех явап тытма тивӗ.

21.мвд.рф видеовӗнчен илнӗ сӑнӳкерчӗк

Ҫӗнӗ Шупашкарта пурӑнакан 86 ҫулти кинемей пакунлисенчен пулӑшу ыйтнӑ. Вӑл вӗсене каласа кӑтартнӑ тӑрӑх, ун патне палламан ҫын шӑнкӑравланӑ, хӑйӗнпе право хуралӗн тытӑмӗнче ӗҫлекен тесе паллаштарнӑ. Хайхискер кинемее алӑри укҫана банка илсе кайса тӗрӗслемелле тесе ӗнентернӗ.

Укҫа патне пӗр ҫамрӑк пынӑ. Ватӑ ҫын ӑна 340 пин тенке тыттарса янӑ. Укҫана каччӑн ултавҫӑсене куҫарса памалла пулнӑ. Анчах ҫапла тума май килмен. Кун хыҫҫӑн вӑл куратора шӑнкӑравласа пӗлтернӗ. Хайхискер каччӑ патне пултаруллӑ ӗҫчене ярса пама шантарнӑ. Каччӑ патне иккӗн пынӑ та укҫана илсе кайнӑ.

Ҫакӑн хыҫҫӑн каччӑ каллех куратор патне шӑнкӑравланӑ. Лешӗ ӑна полицие пӗлтерме сӗннӗ.

Халӗ 18 ҫулти каччӑ тӗлӗшпе пуҫиле ӗҫ пуҫарнӑ. Пакунлисем кинемее шар кӑтартнӑ ытти ҫынна та шыраҫҫӗ.

21.mchs.gov.ru сӑнӳкерчӗкӗ

Ҫӗнӗ Шупашкарта пӗр талӑкра икӗ хваттер алӑкне чӗртсе янӑ. Пушар пилӗк хутлӑ ҫуртсенче пулнӑ.

Нарӑс уйӑхӗн 5-мӗшӗнче, ирхи 5 сехетре, Семёнов урамӗнчи 39-мӗш ҫуртӑн 4-мӗш подъездӗнчи 5-мӗш хутри алӑка чӗтсе янӑ. Пушара ҫӑлавҫӑсем киличчен сӳнтерме ӗлкӗрнӗ. Ҫав кун каҫхи 17 сехет тӗлӗнче Терешкова урамӗнчи 7-мӗш ҫуртри алӑка чӗртсе янӑ.

Икӗ эрне каялла Шупашкарти нумай хваттерлӗ ҫуртсене чӗртсе янӑ. Ун чухне Лебедев урамӗнчи 3-мӗш ҫуррти хваттерсенчен пӗрин алӑкне тата Трактор тӑвакансен проспектӗнчи 48-мӗш ҫуртра урая шар кӑтартнӑ.

"Чеб.ру" сайтри сӑн

Шупашкарти «Садовый» микрорайонти шкул хӑҫан уҫӑлӗ? Прокуратура шкулӑн 99 проценчӗ хатӗр пулнине палӑртнӑ.

Ӑна хӑҫан хута ярасси паллӑ мар-ха, кирлӗ документсене хатӗрлеҫҫӗ, вӗренӳ пӳлӗмӗсене йӗркене кӗртеҫҫӗ, программӑсем вырнаҫтараҫҫӗ.

Аса илтерер: шкулта 1650 ача валли вырӑн пулӗ. Ӑна 2020 ҫулхи ҫурла уйӑхӗнче тума тытӑннӑ. Унтанпа виҫӗ подрядчик улшӑннӑ. Юлашки – «Чӑваш Енри ипотека корпорацийӗ».