Юлашки вӑхӑтра юр нумай ҫурӗ. Халӗ ҫанталӑк кӑшт тӑхтав илнӗ – кӑштах сивӗтнӗ, ҫил лӑпланнӑ.

Канмалли кунсенче кӑштах юр ҫӑвӗ, вырӑнӑн-вырӑнӑн тӗтре карса илӗ. Кӑнтӑрла 1-6 градус сивӗ тӑрӗ. Тунтикун хӗвел тухӗ. Ытларикун ҫил вӑйланӗ, термометр 0 градус кӑтартӗ, юр ҫума тытӑнӗ. Ҫитес эрнере хӑш-пӗр кунра йӗпе юр ҫӑвӗ.

Нарӑсӑн пӗрремӗш шӑматкунӗ те юрлӑ пулӗ. Синоптиксем пӗлтернӗ тӑрӑх, темиҫе циклон та пулӗ, ҫавӑнпа юрпа кӗрешме хатӗрленмелле.

forum.na-svyazi.ru сайтри сӑн

«Хута каякан микрорайонсене чӑвашла ят панине ырлатӑр-и?» - «Уҫӑ хула» порталта ҫакнашкал сасӑлав иртет.

«Шупашкарти ҫӗнӗ виҫӗ микрорайона чӑвашла ят пама ыйтатӑп. Тӗслӗхрен «Сан», «Туй», «Тухья», - тесе ҫырнӑ пӗр хӗрарӑм Шупашкар хула администрацине янӑ ҫырура.

Вӑл ҫакӑ чӑваш чӗлхине аталанма май парать тесе шутлать. Ҫавӑнпа Элтепере, Ял хуҫалӑх, Экономика, Культура, Вӗренӳ министерствине пулӑшма ыйтнӑ.

Сӑмах май, Шупашкарта пӗр чӑвашла ятлӑ микрорайон пур. Вӑл – «Ялав».

forum.na-svyazi.ru сайтри сӑн

Кӑрлач уйӑхӗн 16-22-мӗшӗсенче апат-ҫимӗҫ хакӗ мӗнле улшӑннине Чӑвашстат тишкернӗ. Чи хӑвӑрт йӳнелекен 5 ҫимӗҫ списокӗнче ҫӑмарта пӗрремӗш вырӑн йышӑннӑ.

Хӑяр хакӗ 3,86 процент чакнӑ, помидор 3,68 процент йӳнелнӗ. Хӗрлӗ кӑшман хакӗ 2,62 процент чакнӑ, пӗҫернӗ кӑлпасси – 2,59 процент. Банан тата ҫӗрулми кӑшт хакланнӑ.

Сӑмах май, пӗлтӗр Чӑваш Енре ҫӑмарта 81 процент хакланнӑ, пахча-ҫимӗҫ – 28 процент, чӑх какайӗ – 21 процент.

ШӖМ тунӑ сӑн

Ҫулталӑк пуҫламӑшӗнче Шупашкарти Максим Горький палӑкӗ ҫине такамсем ӳкернине асӑрханӑ. Ҫакна полицие те пӗлтернӗ, ҫынсем сӑн ӳкерсе тӗнче тетелне те вырнаҫтарнӑ.

Вырӑнти влаҫ палӑка икӗ хутчен тасатнӑ, анчах ун ҫине каллех такамсем ҫырса хунӑ.

Ҫак ӗҫе 9-ти тата 10 ҫулти хӗрачасем тунине палӑртнӑ. Вӗсем «шӗвӗ юр» спрейпа усӑ курса палӑк ҫине салам сӑмахӗ тата ятсем ҫырнӑ. Куншӑн вӗсен ашшӗ-амӑшӗ тӗлӗшпе административлӑ ӗҫ пуҫарнӑ.

Чӑваш Енре «Архивы Чувашской Республики» (чӑв. Чӑваш Республикин архивӗсем) информаци тытӑмӗ туса хума йышӑннӑ.

Республикӑн Министрсен Кабинечӗн йышӑнӑвӗнче асӑннӑ тытӑм пирки калакан йӗркене ҫирӗплетнӗ. Правительство йышӑнӑвне пурнӑҫа кӗртессишӗн Чӑваш Енӗн Культура, наци ӗҫӗсен тата архив ӗҫӗн министерстви яваплӑ пулӗ.

vk.com/chuv_kray сайтри сӑн

Канаш муниципаллӑ округӗнчи Ҫӗнӗ Мами ялӗнче ҫуралнӑ Анастасия Федорова 102 ҫул тултарнӑ.

Анастасия Никитична Тӑван ҫӗршывӑн Аслӑ вӑрҫи вӑхӑтӗнче Хусан хӳтӗлев чиккине чавнӑ, Иваново облаҫӗнче торф кӑларнӑ, вӑрман касма та кайнӑ. 1951 ҫулта вӑл качча тухнӑ, мӑшӑрӗпе тӑватӑ хӗр ӳстернӗ. Халӗ кинемей мӑнукӗн ҫемйипе пурӑнать. Вӑл – ӗҫ ветеранӗ, тыл ӗҫченӗ. Анастасия Никитична шкул пӗтерсен ӗмӗр тӑршшӗпех «Ворошилов» колхозра ӗҫленӗ.

"Подслушано Аликово" пабликири сӑн

Тӗнче тетелӗнче Элӗк округӗнчи Ман Вылӑра ҫынна масар ҫине ҫунапа сӗтӗрнине кӑтартакан сӑнӳкерчӗк анлӑ сарӑлнӑ. Ҫула мӗншӗн хырман? Прокуратура тӗрӗсленӗ.

Пӗр ҫемьере ватӑ арҫын чирлесе выртнӑ хыҫҫӑн вилнӗ. Вӑл нумай ҫул трактористра ӗҫленӗ. Ҫав кун шӑпах юр нумай ҫунӑ. Тӑванӗсем ҫул хырма ыйтса вырӑнти администрацие шӑнкаравланӑ. Малтан лешсем шантарнӑ. Кайран пуҫлӑх телефона тытма пӑрахнӑ.

Прокуратура палӑртнӑ тӑрӑх, администраци ҫын пытарнине пӗлнӗ. Анчах ҫул хырас тесе ним те туман. Ведомство Элӗк округӗн администрацийӗ тӗлӗшпе представлени ҫырнӑ.

cap.ru сайтри сӑн

Кӑҫал Чӑваш Енре - Экологи тата ҫутҫанталӑкпа перекетлӗ усӑ курассин ҫулталӑкӗ. Ӑна ЧР Элтеперӗн Олег Николаевӑн хушӑвӗпе килӗшӳллӗн ҫирӗплетнӗ.

Ҫулталӑка официаллӑ майпа уҫасси йӑлана кӗнӗ. Экологи ҫулне кӑрлач уйӑхӗн 26-мӗшӗнче, ыран, уҫма палӑртнӑ. Мероприяти Чӑваш патшалӑх филармонийӗнче иртӗ.

Унта влаҫ органӗсенче ӗҫлекенсем, общество ӗҫӗсене хастар хутшӑнакансем, шкул лесничествине хутшӑнакансем, педагогсем, наставниксем, ӑсчахсем, экологсем, вӑрманҫӑсем хутшӑнӗҫ.

ШӖМ тунӑ сӑн

Паян ирхине Шупашкарти Граждан тата Чернышевский урамӗсем хӗресленнӗ вырӑнта авари пулнӑ: троллейбус, маршрутка тата автобус ҫапӑннӑ.

Автобус – 37-мӗш маршрутпа ҫӳрекенскер, маршрутка – 234-мӗш. Троллейбусра пассажирсем пулман. Халӗ ӗҫ-пуҫа уҫӑмлатаҫҫӗ.

Ҫӗнӗ Шупашкарта вара 11 сехет те 10 минутра Совет тата Пионер урамӗсем хӗресленнӗ вырӑнта авари пулнӑ. «Ладӑпа» «Мерседес» ҫапӑнсан 3 ҫын аманнӑ.

cap.ru сӑнӳкерчӗкӗ

Чӑваш Енре хысна тытӑмӗнче ӗҫлекенсен шалӑвӗ кӑҫалхи кӑрлач уйӑхӗн 1-мӗшӗнчен 8,5 процент ӳсӗ. Ку вӑл медицинӑра, педагогикӑра, социаллӑ тата ытти ҫавӑн йышши сферӑра ӗҫлекен 70,5 пин ҫынна пырса тивӗ.

Йышӑнӑва республикӑн Правительстви ӗнер, кӑрлач уйӑхӗн 24-мӗшӗнче, ҫирӗплетнӗ.

Индексаци валли укҫана республика бюджетӗнче пӑхса хӑванӑ. Вырӑнти хӑй тытӑмлӑх органӗсен те ҫывӑх вӑхӑтра ҫавӑн пек ятарлӑ йышӑнусем тумалла.