|
Персона
 cap.ru сӑнӳкерчӗкӗ Паян ЧР Элтеперӗ Олег Николаев ҫуралнӑ кунне паллӑ тӑвать. Вӑл паян 54 ҫул тултарнӑ. Олег Алексеевич Хӗрлӗ Чутай районӗнчи Чурпай ялӗнче ҫуралнӑ. 1985 ҫулта Шупашкарти строительство техникумӗнчен вӗренсе тухнӑ. Унтан И.Н.Ульянов ячӗллӗ Чӑваш патшалӑх университетне пӗтернӗ. 2015 ҫулта Чӑваш Ен Элтеперӗн суйлавне хутшӑннӑ. Ун чухне Михаил Игнатьева выляса ярса иккӗмӗш вырӑн йышӑннӑ. 2020 ҫулхи авӑн уйӑхӗнче ӑна официаллӑ майпа Чӑваш Енӗн Элтеперне ҫирӗплетнӗ. Ун чухне уншӑн республикӑра пурӑнакансен 75,63 проценчӗ сасӑланӑ. Хыпар ҫӑлкуҫӗ:
|
|
Чӑваш чӗлхи
 Википедин чӑваш уйрӑмӗнчи статьясен йышӗ ҫак кунсенче 52 пинрен иртрӗ. Хыпара ҫырнӑ чухне пӗтӗмӗшле статьясен шутне 52 023 тесе кӑтартать. Юлашки вӑхӑтра Википедире шаблонсене аталантараҫҫӗ (ку тӗлӗшпе тутар уйрӑмӗнчи Фархат Фаткуллин пулӑшать), Чӑваш Республикнчи ялсем пирки, тата вӗсенчен тухнӑ ҫыннисем ҫинчен ҫыраҫҫӗ. Фильмсем пирки, тӗрлӗ ӑслӑлӑхри статьясемпе те сахал мар пуянланать. Википедин чӑваш уйрӑмне Раҫҫейӗн инҫетри кӗтесӗсемпе ҫыхӑннӑ статьясем те кӗрсе пыраҫҫӗ. Тӗслӗхрен, нумай пулмасть Балкар драма театрӗ ҫинчен статья хатӗрленӗ. Чӑвашла уйрӑм 2004 ҫулта ӗҫлеме пуҫланӑ, 2005 ҫулта вара чӑннипе те аталанма пуҫланӑ. Хальхи вӑхӑтра Чӑваш Википелдийӗ кунсерен вуншар ытла статьяпа пуянланса пырать, кашни кун пилӗк ҫынран кая мар хутшӑнакан пӗр тӳрлетӳ те пулин тӑвать. Википедин чӑвашла уйрӑмӗ тӗрлӗ енлӗ статьясемпе пуян: кунта Чӑваш Республикинчи ял-хула пирки те, паллӑ ҫыннисем пирки те, ҫав вӑхӑтрах ӑслӑлӑхӑн тӗрлӗ пайӗсем ҫинчен те вуласа пӗлме пулать. Апла пулин те Википедин чӑваш уйрӑмне пуянлатмалли те чылай-ха. Калӑпӑр, республикӑри нумай ял пирки кӗскен кӑна ҫырнӑ. Хыпар ҫӑлкуҫӗ:
|
|
Сумлӑ сӑмах
Культура
Ҫак статья (Анатолий Юман сӑвӑҫ ӑна очерк тенӗ) пирки пуҫланнӑ калаҫӑва малалла тӑсма кирлине эпӗ вулакана систерсе хӑварнӑччӗ. Вӗҫӗ ҫукчӗ-ҫке-ха, «хӳрине» такам татса илнӗ (е ҫухатса хӑварнӑ). Машинкӑпа ҫапнӑ хыҫҫӑнхи виҫҫӗмӗш-тӑваттӑмӗш копийӗсем выртса юлман-ши? Ҫыравҫӑн еткерлӗхне Паянхи истори архивне панӑ, тен, ҫавӑнта «чакаланса» пӑхас? Ку архивра ӗҫлесе пӑхни пирки самай кӑсӑк статья ҫырма пулать, анчах унталла сулӑнасшӑн мар эпӗ. Кӗскен каласан, очеркӑн машинкӑпа ҫаптарнӑ копийӗсем тупӑнчӗҫ Уяр хучӗсем хушшинче, анчах эпир шыракан вӗҫӗ унта та ҫук. Ҫырнисен пуххин маларахри томне хатӗрленӗ чухне асӑрханӑччӗ, ҫыравҫӑн чылай хайлавӗсем кӗнекерен кӗнекене куҫса пыраҫҫӗ, автор вӗсене кӑшт-кашт якаткаласа та илет, сайра хутра ятне улӑштарать. Тӑваттӑмӗш тома кӗмелли ҫулҫӳрев очеркӗсене «кайран вулама» тесе уйӑрса хунӑччӗ. Ак япала, эпир шырани 1971 ҫулта тухнӑ «Телейлӗ Палюк» кӗнеке вӗҫне «Чӑвашкассинче» (ҫул ҫӳренӗ чух курнисенчен) ятпа хӗсӗнсе кӗнӗ иккен, «Иртнипе пулассире» вара Тӑванкасси ялӗ пирки сӑмах пырать. |
|
Хулара
 ШӖМ тунӑ сӑн Раштавӑн 7-мӗшӗнче ирхи 4 сехетре Патшалӑх автоинспекцийӗн инспекторӗсем Шупашкарта Вӑрнар ҫулӗпе пынӑ чухне ҫӑва патӗнче арҫын утнине асӑрханӑ. Мӗн туса ҫӳренӗ-ха вӑл тӗттӗмре масар ҫывӑхӗнче? Инспекторсем чарӑннӑ. Ҫак 32 ҫулти арҫын наркотик витӗмӗнче пулни палӑрнӑ. Ун ҫумӗнче 450 грамм наркотик тупнӑ. Вӑл ӑна тин кӑна вӑрттӑн вырӑнтан илнӗ. Ун ҫумӗнче тупнӑ наркотик - 1,3 миллион ытла тенкӗлӗх. Арҫын темиҫе уйӑх наркотик тутаннине каланӑ. Ун тӗлӗшпе пуҫиле ӗҫ пуҫарнӑ. Пысӑк виҫепе наркотик туяннӑшӑн 20 ҫул таран ирӗксӗр хӑварма пултараҫҫӗ. Хыпар ҫӑлкуҫӗ:
|
|
Ял хуҫалӑхӗ
 cap.ru сӑнӳкерчӗкӗ Ҫитес ҫул нарӑс уйӑхӗн 29-мӗшӗнчен пуҫласа пуш уйӑхӗн 1-мӗшӗччен Шупашкарта «Ҫӗрулми» курав иртӗ. Вӑл хальхинче Суту-илӳпе курав центрӗнче пулӗ. Пиллӗкмӗш хутра куравӑн ӗҫлӗ пайӗ иртӗ. Унта ӑслӑлӑхпа практика конференцийӗсем, ҫавра сӗтелсем иртӗҫ, вӗсенче ҫӗрулми ӳстерессипе ҫыхӑннӑ ыйтусене сӳтсе явӗҫ. Чи аялти хутра ҫӗрулми ярмӑркки пулӗ, унта вӑрлӑх ҫӗрулми туянма май килӗ. Хыпар ҫӑлкуҫӗ:
|
|
Пӑтӑрмахсем
 9111.ru сӑнӳкерчӗкӗ Пермь хулинче пурӑнакан арҫын Чӑваш Енри вилнӗ тусӗн банк карттипе усӑ курса пурӑннӑ. Чӳк уйӑхӗн пуҫламӑшӗнче Канашри 67 ҫулти хӗрарӑм вилнӗ ывӑлӗн банк картти ҫинчен 250 пин тенкӗ ҫухални ҫинче йӗрке хуралҫисене пӗлтернӗ. Карттӑ ҫинчи укҫапа лавккасенче тӳленӗ, банк картти ҫинчи укҫана та илнӗ. Укҫапа 2023 ҫулхи ҫӗртме уйӑхӗнчен пуҫласа чӳк уйӑхӗччен усӑ курса пурӑннӑ. Ҫавӑн пек хӑтлаканни Пермь тӑрӑхӗнче пурӑнакан 57 ҫулти арҫын пулнӑ. Вӑл вилнӗ Канаш ҫыннин тусӗ пулнӑ. Хыпар ҫӑлкуҫӗ:
|
|
Пӑтӑрмахсем
 t.me/chuvashia_sledcome каналтан илнӗ сӑнӳкерчӗк Муркаш муниципаллӑ районӗнчи пӗр ялта 24 ҫулти каччӑ тӑван ял ҫыннисене хӑратса пурӑннӑ. Мӑрсакасси каччи виҫӗ ҫынна вӗлерессипе хӑратнӑ, вӗсенчен укҫа тапӑннӑ. Кӑҫалхи пуш уйӑхӗнче вара вӑл 56-ри арҫынна килне кайса хӗнесе пӗтернӗ, Унтан ӑна ятарлӑ шӗвекпе сапнӑ та вӗлерессипе хӑратса чӗртсе янӑ. Ҫу уйӑхӗн 27-мӗшӗнче каччӑ каллех ҫав арҫын патне пырса кӗнӗ. Хытах хӗнесе пӗтернӗ хыҫҫӑн шар курни вилнӗ. Пуҫтах ҫав каччӑ кӑҫалхи пуш уйӑхӗнче тепӗр ҫынна хӑратса унтан укҫа тапӑнса пурӑннӑ, хӗненӗ. Лешӗ ӑна пурӗ 30 пин тенкӗ панӑ. Кунсӑр пуҫне каччӑ тепӗр ҫынна хӗненӗ. 24-ри каччӑ тӗлӗшпе пуҫарнӑ пуҫиле ӗҫе халӗ суда ярса панӑ. Хыпар ҫӑлкуҫӗ:
|
|
Вӗренӳ
 forum.na-svyazi.ru сӑнӳкерчӗкӗ Сӗнтӗрвӑрри хулинчи Коновалово микрорайонӗнче кӑҫалхи авӑн уйӑхӗн 1-мӗшӗнче ҫӗнӗ шкула савӑнӑҫлӑ лару-тӑрура уҫнӑ. Анчах ӑна раштав уйӑхӗн 2-мӗшӗнче хупса хунӑ. Мӗншӗн тесен шкулта пушар хӑрушсӑрлӑхӗпе ҫыхӑннӑ чылай кӑлтӑк тупӑннӑ. Тунтикунтан шкул каллех уҫӑлӗ. Кӑлтӑкӑн чылай пайне пӗтернӗ. Ҫавна ятарлӑ комисси тӗрӗсленӗ хыҫҫӑн палӑртнӑ. Хыпар ҫӑлкуҫӗ:
|
|
Персона
 culture.cap.ru сӑнӳкерчӗкӗ Раштав уйӑхӗн 7-мӗшӗнче РСФСР халӑх артистки Нина Григорьева 85 ҫул тултарни, ҫав кун театрта артисткӑн пултарулӑх каҫӗ иртни ҫинчен эпир пӗлтернӗччӗ. Юбилей каҫӗнче Нина Григорьева «Анне» спектакльти тӗп сӑнара калӑпланӑ. Ҫав каҫ артисткӑна саламлама пынисем хушшинче республикӑн культура министрӗ Светлана Каликова та пулнӑ. Чӑваш Енри Театр ӗҫченӗсен союзӗн председателӗ Сергей Павлов вара Нина Григорьева ҫав союза ертсе пынӑ ҫулсене аса илнӗ май вӑл вӑхӑтра 17 артиста хваттер илме пулӑшни ҫинчен палӑртса хӑварнӑ. Хыпар ҫӑлкуҫӗ:
|
|
Культура
 Чӑваш кӗнеке издательствинче «Чӗре тӗпӗнчи туйӑм» юрату хайлавӗсен сборникӗ пичетленсе тухнӑ. Издательствӑра пӗлтернӗ тӑрӑх, 2019 ҫулта «Кӗтмен юрату» коллективлӑ сборник пичетленсе тухнӑ-ха. Унта ҫамрӑк авторсен повеҫӗсемпе калавӗсем кӗнӗ. Кӑларӑм кӗске вӑхӑтрах саланса пӗтнӗ иккен. Ҫавна шута илсе издательство юрату хайлавӗсен тепӗр кӗнекине кӑларма йышӑннӑ. Кӑларӑма сакӑр прозаикӑн калавӗ-повеҫӗ кӗнӗ. Вӗсен шутӗнче — Владимир Степановӑн, Владислав Николаевӑн, Ольга Васильеван, Дмитрий Моисеевӑн, Ольга Австрийскаян, Константин Малышевӑн, ҫавӑн пекех Ольга Рубцовӑпа Татьяна Ишмуратован. Кӑларӑма Ольга Федорова пухса хатӗрленӗ. Тиражӗ – 1000 экземпляр. Хыпар ҫӑлкуҫӗ:
|
+0.3 °C
