Чӑваш Республикин вӗренӱ институчӗ «Ҫӗнӗ ҫул саламӗ» акци ирттерессине пӗлтернӗ. Вӑл 2023 ҫулхи раштав уйӑхӗн 11-мӗшӗнче пуҫланнӑ, 2024 ҫулхи кӑрлач уйӑхӗн 7-мӗшӗччен пырӗ.

Йӗркелӳҫӗсем пӗлтернӗ тӑрӑх, акцие чӑвашла калаҫакан кирек кам та хутшӑнма пултарать: Ҫӗнӗ ҫул, Сурхури, хӗл ҫинчен сӑвӑ вуласа е юрӑ юрласа видео ҫине ӳкерсе илмелле е открытка хатӗрлемелле те #ҫӗнӗҫулсаламӗ хештегпа «Контактра» хутшӑну тетелӗнчи «Чӑваш чӗлхи – чӗкеҫ чӗлхи» (https://vk.com/club201526545) ушкӑна е Интернетри ытти хутшӑну тетелӗсене (социаллӑ сетьсене) вырнаҫтармалла. Видеоролика маларах палӑртнӑ адреспа лартсан кашни хутшӑнакана сертификат парса чыслӗҫ.

cap.ru cӑнӳкерчӗкӗ

Шупашкарти А.Г. Николаев ячӗллӗ аэропорта килес ҫул юсаса пӗтерӗҫ. Кун пирки Чӑваш Ен Элтеперӗ Олег Николаев ӗнер тӳрӗ эфир вӑхӑтӗнче пӗлтернӗ.

Аса илтерер: реконструкцие пуҫланӑ чухне ӗҫе кӑҫал вӗҫлессине палӑртнӑччӗ. Анчах кайран самана улшӑнса кайрӗ, пирӗн ҫӗршыв тӗлӗшпе тӗрлӗ санкци йышӑнчӗҫ.

«Юсава кӑҫал вӗҫлесшӗнччӗ. Анчах, пӗрремӗшӗнчен, санкци витӗмне пула оборудование тата документацие улӑштарма тиврӗ, иккӗмӗшӗнчен, ҫӗнӗрен туса лартма киввине юсассинчен ҫӑмӑлтарах», — тесе ӑнлантарнӑ Олег Николаев.

cheb-centr.soc.cap.ru сӑнӳкерчӗкӗ

Шупашкарта пурӑнакан Александра Пайзерова паян 100 ҫул тултарнӑ. Юбиляра республикӑ ӗҫ тата социаллӑ хӳтлӗх министрӗ Алёна Елизарова, Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗн директорӗн тивӗҫӗсене пурнӑҫлакан Аркадий Скворцов саламланӑ.

Александра Ивановна Шупашкар районӗнич Чулкасси ялӗнче ҫуралнӑ. Медицина тата суту-илӳпе экономика техникумӗсенче вӗреннӗ. Шупашкарти лавккасенче сутуҫӑра тата бухгалтерта ӗҫленӗ.

Паян кинемей хӗрӗпе пӗрле пурӑнать.

Алина Петрова страницинчен илнӗ сӑнӳкерчӗк

Ҫак эрнере Элӗк муниципаллӑ округӗнчи Чӑваш Сурӑмӗнче вӗренӳ отраслӗнчи тӳре-шара пуҫтарӑннӑ. Унта шкулсен директорӗсем, ача пахчисен заведующийӗсем, вӗренӳ пайӗн методисчӗсем пухӑннӑ.

Канашлу ирттернипе пӗрлех шкулти учительсен уҫӑ урокӗсенче пулнӑ.

«Эпир вара вӗсене тивӗҫлӗн кӗтсе илме тӑрӑшрӑмӑр, Ҫӗнӗ ҫул хавхаланӑвне те парнелес терӗмӗр. Ҫавӑнпах Хӗл Мучипе Юр пике хӑнасене парнесем парса савӑнтарчӗҫ», — тесе хыпарланӑ Чӑваш Сурӑм шкулӗнче ӗҫлекен Алина Петрова халӑх тетелӗнче.

Чӑваш Енӗн Наци вулавӑшӗнче нумаях пулмасть Любовь Фёдорова сӑвӑҫӑн ҫӗнӗ кӗнекине хӑталнӑ.

Чӑваш Енри профессионал писательсен союзӗн халӑх тетелӗнче Марина Карягинӑпа Екатерина Янгалакова телесюжечӗ тӑрӑх пӗлтернӗ тӑрӑх, «Ӑшӑх вырӑн ҫук тинӗсре» сӑвӑ пуххи — Любовь Фёдорован 9-мӗш кӗнеки.

Автор чӑваш литературинче иртнӗ ӗмӗрӗн 70-мӗш ҫулӗсенчех палӑрма пуҫланӑ иккен. Елчӗк районӗнчи (халӗ — муниципаллӑ округ) Энтепе хӗрӗ малтан тӑван тӑрӑхӗнче, унтан Шупашкарти шкулсенче чӑваш чӗлхипе литературине вӗрентнӗ. Виталий Родионов, Любовь Мартьянова, Раиса Сарпи, Юлия Силэм пек пултаруллӑ тантӑшӗсемпе, «ҫилҫунатҫӑсемпе» литература тӗнчине кӗнӗ.

Красноармейски (Трак ен) тӗп вулавӑшӗн пӳлӗмӗнче Нестер Янкас ячӗллӗ культурӑпа искусство тата литература пӗрлӗх правленийӗн черетлӗ анлӑ ларӑвӗ иртрӗ. Ӑна пӗрлӗхӗн правлени председателӗ Иван Прокопьев-Чураль ҫыравҫӑ ертсе пычӗ, иртсе пыракан 2023 ҫулта туса ирттернӗ ӗҫ-хӗле пӗтӗмлетрӗ.

Кунсӑр пуҫне пайташсем пӗрлӗх ертӳҫин ҫумӗн Виталий Михайлов-Чунтупайӑн пӗрлӗх фончӗн укҫи-тенки пирки тунӑ отчётне итлерӗҫ, Нестер Янкас ячӗллӗ премие илме тата пӗрлӗхӗн чыслав паллисене тивӗҫлӗ уйрӑм ҫынсен кандидатурисене пӑхса тухрӗҫ, Нестер Янкас ҫуралнӑранпа 115 ҫул ҫитнине тата пӗрлӗх 35 ҫул тултарнине чыслӑн кӗтсе илмелле терӗҫ. Клавдия Васильева, Леонид Антонов, Анатолий Алексеев, Георгий Ефимов-Тусли, Николай Никоноров, Владимир Константинов паянхи кун тухса тӑракан ҫивӗч ыйтусене ҫӗклерӗҫ.

Лару ӗҫне ЧНКан Красноармейски (Трак ен) тӑрӑхӗнчи уйрӑмӗн ертӳҫи Зинаида Михайлова хутшӑнчӗ. Вӑл вырӑнти уйрӑмпа Нестер Янкас пӗрлӗхӗ пӗрле йӗркелесе ирттерекен "Янкас вулавӗсем" наукӑпа таврапӗлӳ конференцийӗ пирки каларӗ, унӑн тематикипе паллаштарчӗ.

Тӑхӑрьял тӑрӑхӗн вӑтӑр виҫӗ паллӑ ҫыннине пӗлет чӑваш тӗнчи. Акӑ халӗ тепӗр писатель ячӗ хушӑнчӗ. Вӑл тахҫанах палӑрнӑ ҫыравҫӑ ӗнтӗ. Хусанти «Сувар» хаҫат редакторӗ пулнӑ журналист, ҫивӗч статьясен блогерӗ Константин Малышев.

Костя Малышев мана паянхи чӑваш литературин Пуҫламӑш тапхӑрне ҫаврӑнса пӑхтарать. Аса илнинчен, ачалӑха сӑнланинчен пуҫланӑ нумайӑшӗ литература ӗҫне. Чӗмпӗр чӑваш шкулӗ, Трубина Мархви, Хумма Ҫеменӗ, Карачӑм Харлампьев, Мария Ухсай ҫырнисем ӗмӗрлӗх палӑкӗсем пулса юлчӗҫ. Чалтан вӑрҫин хӑйӗн синкерлӗ ӑрӑвӗ пулчӗ. Ун ҫинчен те ачалӑх куҫӗ витӗр сахал мар ҫырӑнчӗ. Эпӗ чӑвашла вуланисенче вӑл вӑхӑтӑн тӗрӗсне ӑнланманнине мухтани кӳрентерчӗ. Вӑхӑт урапи пурне те пӗр касмасть ҫав! Халӗ чӑнлав (документлӑх) никӗсӗ вӑйланчӗ, илемлӗ хайлавсем тепӗр хут чӑн пуррипе никӗсленсе тухма пуҫларӗҫ. Вӗсенче самана сӑн-сӑпачӗ витӗмлӗрех палӑрать. Константин Малышев кӗнекинче ХХ ӗмӗрӗн 80-90-мӗш ҫулӗсем ытарлӑн та, тӳррӗн те тӗрӗс ӳкерӗнсе пичетленнӗ.

Унӑн «Ачалӑхӑм» калав кӗнеки Чӑваш кӗнеке кӑларӑшӗнче кӑҫал селӗм пахалӑхпа, хытӑ хуплашкапа, фотосӑнсемпе, 800 экземплярпа пичетленсе тухнӑ.

Малалла...

ШӖМ тунӑ сӑн

Паян, раштавӑн 22-мӗшӗнче, 10 сехет те 20 минутра Вӑрнар округӗнчи Кӑмпал ялӗ ҫывӑхӗнче водитель «Шевроле» машинӑпа кӗпер ҫинчен чӑмнӑ.

Малтанлӑха пӗлтернӗ тӑрӑх, арҫын руле итлеттереймен, кӗпер картине ҫӗмӗрсе 10 метр ҫӳллӗшӗнчен ӳкнӗ. 58 ҫулти водитель ӳсӗр пулни палӑрнӑ.

ҪҪХПИ ӗҫченӗсем авари вырӑнне васкавлӑ медпулӑшуран маларах килнӗ, тухтӑрсене чӗннӗ. Унтан вӗсем шурӑ халатлисене арҫынна лапчӑнса пӗтнӗ машинӑран кӑларма пулӑшнӑ.

Водитель чӗрӗ, вӑл суранланнӑ.

«Про Город» хаҫатран илнӗ сӑн

Паян 9 сехет те 50 минутра Шупашкарти Николаев урамӗнчи 2-мӗш ҫуртра пушар пулнӑ. Унта тӑваттӑмӗш хутри хваттер ҫуннӑ.

Ҫулӑма пушарнӑйсем хӑвӑртах сӳнтернӗ. «Про Город» хаҫата халӑх корреспонденчӗ пӗлтернӗ тӑрӑх, 10 сехет те 5 минутра «хӗрлӗ автан» ташлама чарӑннӑ. Кайран хваттертен ҫуннӑ сӗтел-пукана урамалла ывӑтнӑ.

Хальлӗхе инкекре ҫын пурнӑҫӗ татӑлни пирки пӗлтермен.

Юлашки икӗ кунра республикӑра сывлӑш температури климат норминчен 10 градус пӗчӗкрех пулнӑ. Ҫумӑр ҫунине пула юр хулӑнӑшӗ 8 сантиметр кӑна юлнӑ.

Шӑматкун термометр «минус» кӑтартма тытӑнӗ. Ҫапах юр мар, ҫумӑр ҫӑвӗ. Вырсарникун ҫил-тӑман вӗҫтерӗ. Ҫитес эрнере кашни кун тенӗ пек юр ҫукалӗ. Эппин, Ҫӗнӗ ҫул юрсӑр иртмӗ. Ҫитес эрнере 4-9 градус сивӗ тӑрӗ.

Ҫӗнӗ ҫул каҫхине 10-12 градус таран сивӗтӗ, ҫил лӑпланӗ. Кӑрлач пуҫламӑшӗнче юр ҫӑвӗ, ӑшӑтӗ.