Эрнере пилӗк кун ӗҫлекенсен хальхинче 3 кун канӗҫ: шӑматкун, вырсарникун тата тунтикун. Ку Пӗтӗм тӗнчери Хӗрарӑмсен кунӗ вырсарникуна лекнипе ҫыхӑннӑ.

РФ Ӗҫ кодексӗпе килӗшӳллӗн, уяв канмалли куна лексен вӑл ҫитес ӗҫ кунӗ ҫине куҫать. Ҫапла майпа саккунлӑ канмалли кун хальхинче тунтикун ҫине куҫать.

Ҫитес эрне вара кӗске пулӗ: ытларикун ӗҫе тухмалла, эрнекун – ку эрнери ӗҫлемелли юлашки кун. Ҫитес вӑрӑм канмалли кунсем вара ҫу уйӑхӗнче кӑна пулӗҫ. Ун чухне икӗ хутчен виҫшер кун канӑпӑр. Ку ҫу уйӑхӗн 1-мӗшӗпе тата Ҫӗнтерӳ кунӗпе ҫыхӑннӑ.

«Контактра» халӑх тетелӗнчи сӑн

Чӑваш Енри актер, Елчӗк районӗнчи Аслӑ Таяпа ялӗнче ҫуралса ӳснӗ Владимир Тяптушкин, паян Пӗрремӗш каналти «Доброе утро» кӑларӑма хутшӑннӑ. Вӑл тӳрӗ эфирта пулнӑ.

Владимир кӑларӑмра «Ландыши. Такая, нежная любовь» телесериала мӗнле ӳкерни, хӑйӗн Демьян сӑнарӗ мӗнле ҫурални пирки каласа кӑтартнӑ, кулиса хыҫӗнчи самантсене те аса илнӗ.

Палӑртса хӑварар: пӗлтӗр Владимир Тяптушкин «Кинопоиск» платформӑра «Ландыши. Такая, нежная любовь» сериалта Демьян рольне калӑпланӑшӑн ТОП-10 актерсен йышне кӗнӗ.

Эсир паян ирхине эфира курса ӗлкӗреймен-и? Ҫак каҫӑпа курма пултаратӑр: https://www.1tv.ru/shows/dobroe-utro/nashi-gosti/vladimir-tyaptushkin-o-filme-landyshi-dobroe-utro-fragment-vypuska-ot-02-03-2026.

gorod.lv сайтри сӑн

Кӗҫех Чӑваш Енре пурӑнакансем сайра тӗл пулакан астрономи пулӑмӗпе киленме пултарӗҫ.

Ыран, нарӑс уйӑхӗн 28-мӗшӗнче, 18 сехет те 40 минутра (Мускав сехечӗпе) тӳпере ултӑ планета пӗр рете тӑрӗҫ: Юпитер, Сатурн, Венера, Меркурий, Уран тата Нептун. Ҫакна асӑннӑ кунран пӗр-икӗ кун маларах е каярах курма пулать.

Ку пулӑма планетӑсен парачӗ теҫҫӗ. Чи ҫутти Венера пулӗ. Вӑл шурӑ тӗслӗ ҫутатӗ. Парада кӑшт кӑна тулса ҫитеймен Уйӑх та хутшанӗ. Вӑл Юпитерпа юнашар тӑрӗ.

Чи кирли – ҫанталӑк кӑна меллӗ пултӑр. Вара хӗвел ансан тепӗр 1-2 сехетренех ҫак илемпе киленӗпӗр!

Chat-GPT ӑсталанӑ ӳкерчӗк

Санкт-Петербургри Боготырский проспектӗнче халӑх ачана вилӗмрен ҫӑлса хӑварнӑ. Вуннӑмӗш хутран ӳкнӗ ҫулталӑк ҫурӑри ачана ҫынсем куртка сарса ҫӑлнӑ.

Ку пӑтӑрмах кӑнтӑрла пулса иртнӗ. Хваттерте ачан амӑшӗ тата унӑн пиччӗшӗ пулнӑ. Амӑшӗ кӗске вӑхӑта пӳлӗмрен тухнӑ пулнӑ, асли компьютерпа вылянӑ. Амӑшӗ таврӑнсан кӗҫӗн ывӑлне тупайман, чӳрече уҫӑлнине курсан, аялалла пӑхнӑ. Унта ҫынсем пуҫтарӑннине курсан хӑвӑрт урама чупса тухнӑ.

Васкавлӑ пулӑшу служби пӗлтернӗ тӑрӑх ҫурт патӗнчи ҫынсем ачана курсан нумай шухӑшласа тӑман, куртка хывса ӑна ӳкекен ача валли сарса хунӑ. Ача шӑпах ҫав куртка ҫине ӳкнӗ.

Санкт-Петербург прокуратура пӑтӑрмахпа ҫыхӑннӑ ӗҫ-пуҫа тӗрӗслет.

informpskov.ru сайтри сӑн

Чӑваш Енри сиренӑсем мӗнле ӗҫленине каллех тӗрӗслӗҫ. Хальхинче – пуш уйӑхӗн 4-мӗшӗнче.

Ҫак кун Раҫҫейри мӗнпур регионта сиренӑсене тӗрӗслӗҫ. Палӑртмалла: ку ӗҫе ҫӗршывра ҫулталӑкне икӗ хут – ҫуркунне тата кӗркунне – тӑваҫҫӗ, халӑха пӗлтермелли тытӑм тата громкоговорительсем мӗнле ӗҫленине тӗрӗслеҫҫӗ.

Пушӑн 4-мӗшӗнче сиренӑсем 10 сехет ҫурӑра тата 11 сехетре янӑрӗҫ. Ҫак сасса илтсен (тӗрӗслев мар пулсан) телевизор е радио ямалла, хыпарсене сӑнамалла. Эфирта кун пек чухне мӗн тумалли пирки пӗлтерме тивӗҫ.

Хальхинче вара – тӗрӗслев кӑна. Ҫавӑнпа лӑпкӑ пулма ыйтаҫҫӗ – ӗҫ вырӑнне пӑрахса каймалла мар.

«Ҫыхӑнура» порталти сӑн

Сочирен Шупашкара самолет иккӗмӗш талӑк ӗнтӗ вӗҫсе килеймест. Унӑн ӗнер, нарӑсӑн 23-мӗшӗнче, Адлертан кӑнтӑрла хыҫҫӑн 12:55 сехетре сывлӑша ҫӗкленмелле пулнӑ. Рейса паян каҫчен тытса тӑраҫҫӗ. Ҫапла хыпарланӑ «Ҫыхӑнура» порталта.

Хальхи вӑхӑтра электрон табло ҫинче самолет паян 21:35 сехетре вӗҫсе тухать тесе кӑтартнӑ. Сочири аэропортра 100 ытла самолет рейсне тытса чарнӑ. Ахӑртнех, ку беспилотниксем тапӑнас хӑрушлӑхпа ҫыхӑннӑ.

«Контактри» сӑн

Раҫҫейре, упӑшкипе арӑмӗ, Мускавран Владивостока ҫуран кайма тухнӑ. Ҫак канмалли кунсенче вӗсем Чӑваш Ене ҫитнӗ.

Пашӑпа Тома кӑрлачӑн 19-мӗшӗнче ҫула тухнӑ. Вӗсем 9500 ҫухрӑма ҫуранах утма палӑртнӑ, транспортпа усӑ курасшӑн мар. Канмалли кунсенче вӗсем Чӑваш Енре пулнӑ. Пашӑпа Тома пирӗн регион илемлӗ пулнине, халӑх тарават йышӑннине палӑртнӑ. Вӗсем хӑйсен ҫулҫӳревӗ пирки телеграм-каналӗнче каласа кӑтартаҫҫӗ.

Чӑваш Енрен тухсан малалла вӗсен ҫулӗ Владивосток еннелле выртнӑ. Унта вӗсем ҫулталӑк вӗҫлениччен ҫитме палӑртнӑ.

Пашӑпа Тома каланӑ тӑрӑх, вӗсем рекорд лартассишӗн мар, хӑйсене тӗрӗслессишӗн, ҫемйине ҫирӗплетессишӗн ҫула тухнӑ.

Ку эрнере канмалли кунсем 3 куна тӑсӑлӗҫ. Ку Тӑван ҫӗршыв хӳтӗлевҫин кунне уявланипе ҫыхӑннӑ.

Уяв тунтикуна лекет. Ҫавна май эрнере 5 кун ӗҫлекенсем шӑматкун, вырсарникун тата тунтикун канӗҫ. Ҫитес эрнере вара 4 кун кӑна ӗҫлеме тивӗ.

Сӑмах май, пуш уйӑхӗнче те 3 кун канмалли пулӗ. Ун чухне Пӗтӗм тӗнчери хӗрарӑмсен кунӗ ячӗпе пулӗ ку: пушӑн 7-9-мӗшӗсенче кантарӗҫ.

«Контактра» халӑх тетелӗнчи сӑн

Шупашкарти 54 ҫулти Евгения Меньшикова НТВ телеканалпа пыракан «Жди меня» кӑларӑма хутшӑннӑ. Ӑна пиччӗшӗ, Волгоград облаҫӗнчи Владимир Винокуров, шыраса тупнӑ.

Владимир 20 ҫул амӑшне шыранӑ. Вӑл ача ҫуртӗнче ӳснӗ, амӑшӗ ӑна унта хӑварнӑ. Кӑларӑм команди вара Евгенийӑна тупнӑ. Владимирпа иккӗшӗн пӗр амӑшӗ пулнине палӑртнӑ. Хӗрарӑм вӗсене тӗрлӗ ҫулта ача ҫуртне панӑ.

Евгенийӑпа Владимир пӗртӑвансем пулнине ДНК-тест ҫирӗплетнӗ.

sevastopol.spravedlivo.ru сайтри сӑн

Раҫҫейре «Амӑшӗн капиталӗ» программа пур. «Ашшӗн капиталӗ» программа та хута яма сӗннӗ

Унпа килӗшӳллӗн нумай ачаллӑ ашшӗсене 2 миллион тенкӗ парасшӑн. Общество палатин пайташӗсем ку темиҫе ача ҫитӗнтерекен ашшӗсемшӗн самай пысӑк пулӑшу пулнине палӑртаҫҫӗ. 2 млн тенке ҫемьере 3 е ытларах ача ҫуралсан парасшӑн.