tver.kp.ru сайтри сӑн

Кӑрлачӑн 1-мӗшӗнчен Раҫҫейре шурӑ эрех, коньяк тата бренди хакӗсем ӳсӗҫ. Тепӗр тесен, вӗсен хакне кашни ҫулах хӑпартаҫҫӗ.

РФ Финанс министерстви пӗлтернӗ тӑрӑх, шурӑ эрех 281 тенкӗ тӑрӗ (261 тенкӗ пулнӑ). Бренди 348 тенкӗрен 375-е ҫитӗ. Халӗ чи йӳнӗ коньяк 480 тенкӗ тӑрать пулсан ҫитес ҫул 517 тенкӗ пулӗ. Ку хаксем - ҫур литршӑн.

Сӑмах май, 2020 ҫулта чи йӳнӗ шурӑ эрех 215 тенкӗ тӑнӑ.

Кайсын Кулиев

Иртнӗ эрне вӗҫӗнче Кабарда-Балкар Республикинче балкар халӑхӗн тӗнчипе паллӑ поэчӗ, СССР Патшалӑх премийӗн лауреачӗ Кайсын Шуваевич Кулиев ҫуралнӑранпа 105 ҫул ҫитнине анлӑн паллӑ тунӑ. Поэзипе туслӑх уявне Мускавран, Алтайран, Чӑваш Енрен, Тутарстанран, Пушкӑртстанран, Казахстанран, Кӑркӑстанран, Ставрополь облаҫӗнчен ятарласа килнӗ паллӑ сӑвӑҫсем хутшӑннӑ. Вӗсен йышӗнче — чӑваш халӑх поэчӗ, Халӑхсем хушшинчи Ҫеҫпӗл Мишши ячӗллӗ преми лауреачӗ Валери Туркай та пулнӑ.

Кайсын Кулиевӑн шӑпи-кунҫулӗ Чӑваш Енӗн тӗп хулипе Шупашкарпа тӳрремӗнех ҫыхӑннӑ: Тӑван ҫӗршывӑн Аслӑ вӑрҫинче вӑл Орел патӗнче пынӑ хаяр ҫапӑҫусенчен пӗринче питӗ йывӑр аманнӑ хыҫҫӑн вӑл Шупашкарти эвакогоспитальсенчен пӗринче сипленнӗ, сывлӑхне ҫирӗплетнӗ, кунтах пултаруллӑ поэт сӑвӑ хыҫҫӑн сӑвӑ ҫырнӑ. Ку ҫурта юлашки ҫулсенче паттӑр салтак-сӑвӑҫа халалланӑ асӑну хӑми илем кӳрет.

2012 ҫулта Шупашкарта Кайсын Кулиев сӑввисен Валери Туркай чӑвашла куҫарнӑ сӑввисен «Тӗнчене курсамӑр ыр куҫсемпе» ятлӑ пуххи кун ҫути курнӑ.

"Россия 1" телеканалпа пыракан "Привет, Андрей!" телекӑларӑма Чӑваш Ен ҫынни хутшӑннӑ. Паян экран ҫинче Етӗрне районӗнче ҫуралса ӳснӗ Ирина Шоркинӑна курма май пулнӑ.

Хальхи вӑхӑтра вӑл Мускаври "Москонцертра" ӗҫлет. Ирина Шоркина эфирта ашшӗн юратнӑ юррине, чӑвашлине, юрланӑ. Станислав Садальский вӑл хитре юрланине палӑртса "Чӑваш Ен кеверӗ" тенӗ.

Юрӑҫ Етӗрне районӗнчи хурамалсене, ентешӗсене, пысӑк салам каланӑ.

vk.com сайтри сӑн

Мускавра Ҫӗнӗ ҫул чӑрӑшне вырнаҫтарнӑ. Ӑна виҫҫӗмӗш ҫул ӗнтӗ Чӑваш Енри ҫынсем лартаҫҫӗ.

Ку ӗҫе хутшӑнакансем - Етӗрне районӗн арҫыннисем: Иван Жержен, Алексей Баклаков, Сергей Мурзин, Алексей Мурзин, Павел Пугачев, Сергей, Владимир тата Станислав Мокеевсем. Тепри Шупашкартан: Павел Павлов.

Кӑҫал каснӑ чӑрӑш 95 ҫулта. Вӑл 27 метр ҫӳллӗш.

t.me/Chuv_today сӑнӳкерчӗкӗ

Шупашкар хулинчи педагог телевӑйӑсенчен пӗринче ҫӗнтернӗ.

«Мир» телеканалпа каҫсерен кӑтартакан «Игра в кино» кӑларӑма Шупашкарти Александра Иванова хутшӑннӑ. Унта вӑл ҫӗнтерме пултарнӑ. Александра Иванова хӑш шкулта ӗҫленине пӗлеймерӗмӗр, пӗр предложенирен тӑракан кӗске хыпарта ун пирки палӑртса хӑварман.

2019 ҫулта асӑннӑ вӑййа Ҫӗнӗ Шупашкарти Марина Лебедева хутшӑннӑ. Вӑл унта 47 пин тенкӗ выляса илнӗ. Маринӑпа ун чухне Сергей ятлӑ йӗрке хуралҫи тата Елена ятлӑ фитнес-тренер тупӑшнӑ.

cap.ru сӑнӳкерчӗкӗ

ЧР Ял хуҫалӑх министерстви ҫӗршывӑн тӗп хулинче "Мускав ярмӑркки" лапамра хамӑр регионти ял хуҫалӑх продукцине сутмалли павильон уҫасшӑн. Халӗ кун пирки мускавсемпе калаҫаҫҫӗ.

Павильона "Верхние Лихоборы" метро станцийӗн районӗнчи ҫуртра вырнаҫтарасшӑн. "Мускав ярмӑркки" патшалӑх учрежденийӗ унта 14 суту-илӳ вырӑнӗ, холодильниксемпе тарасасем хатӗрленӗ.

Чӑваш Енри ял хуҫалӑх продукцине сутакан павильон Ҫӗнӗ ҫул тӗлне ӗҫлесе кайма пултарать. Малтан унта нумай вӑхӑт упранакан ҫимӗҫсене сутма палӑртнӑ. Халӑх нумай туянсан кӗске вӑхӑт упранаканнисене те сутасшӑн.

Аса илӳ

1994-мӗш ҫулхи раштав уйӑхӗн 11-мӗшӗнче ирхине Раҫҫей телевиденийӗн ҫӑлтӑрӗ Светлана Сорокина трагедиллӗ сасӑпа пӗлтерчӗ: Раҫсей ҫарӗсем Чечняна кӗнӗ. Ку хӑрушӑ вӑрҫа пуҫлани палӑртрӗ… Историре ку Пӗрремӗш (Раҫҫей) – Чечен вӑрҫи (кампани) 1994–1996 палӑртса юлнӑ. Официаллӑ, Раҫҫей правительстви ҫак вӑрҫӑ «Операции по восстановлению конституционного порядка в Чечне 1994-1996 годов», или «Вооружённый конфликт в Чеченской Республике и на прилегающих к ней территориях РФ» палӑртнӑ. (Википеди)

Эпӗ хӑрушӑ пӗлтерӳ илтсен, кулянтӑм: мӗнле пирӗн Раҫҫей халӑхӗн малтанхи шанчӑкӗ, перремӗш демократиллӗ Раҫҫей Президенчӗ Борис Ельцин ҫакна хушнӑ?! Ҫак вӑхӑтра унӑн политикӑллӑ, юридици, ҫар таврашӗ ҫакна хушма ӑна хистенӗ.

Шупашкарти Шахрай визичӗ

Вӑрҫӑ умӗн РФ Правительстви пуҫлӑхӗн ҫумӗ Сергей Шахрай Шупашкара килсе ҫитрӗ. Влаҫ ҫынсемпе курнаҫнӑ. Тата чӑваш гуманитари ученӑйсем, интеллигенцийӗ, обществӑллӑ деятӗлӗсем ЧПГӑИ залӗнче тӗлпулса кӗске калаҫнӑ. Мӗнле чӑваш активисчӗсем шухӑшлаҫҫӗ тесе.

Малалла...

vk.com/vnukunuk видеовӗнчен илнӗ скриншот

«Внукунук – философия добра» (чӑв. Внукунук — ырӑ философийӗ) проект хастарӗсем Ҫӗрпӳ районӗнчи пӗр ялта пурӑнакан Слава ятлӑ мучие пӗр машина вутӑ илсе килсе панӑ.

Проект хастарӗсем — ҫамрӑксем. Вӗсем ырӑ ӗҫе 2020 ҫулта медиа-проект евӗр пуҫарса янӑ. Ӑна йӗркелесе янӑ Лена ятлӑ хӗр малтан хӑйӗн укҫипе ҫынсене пулӑшнӑ, анчах кайран укҫа хӗсӗнсе ҫитнӗ. Кӑҫал проекта ҫӗнӗрен ӗҫлеттерсе янӑ. Маттур ҫамрӑксем ҫӗршыв тӑрӑх ҫӳресе пӗччен ватӑсене тупаҫҫӗ, вӗсен нуши-терчӗпе кӑсӑкланаҫҫӗ, ырӑ ӗҫпе пулӑшма тӑрӑшаҫҫӗ. Хастарсене ырӑ кӑмӑллӑ ытти ҫын та тӗрев кӳрет.

Ҫӗрпӳ районӗнчи пӗр ялта пурӑнакан Слава ятлӑ мучин килне газ кӗртмен, унӑн вутти те сахалланса юлнӑ. Хӗрсем ӑна пӗр машина вутӑ тата тутлӑ апат-ҫимӗҫ илсе килсе панӑ.

Хамӑрӑн Telegram-ри каналта эпир ыйтӑм ирттертӗмӗр: ЖКХ хакӗсем мӗнле сӑлтава пула ӗнер ӳснине халӑхран ыйтрӑмӑр.

Аса илтеретпӗр: раштавӑн 1-мӗшӗнчен пуҫласа ҫутӑшӑн, газшӑн, шывшӑн тата ытти кил-ҫурт таврашӗнчи тӑкакшӑн хаксене хӑпартнӑ. Унччен маларах хаксем нумай пулмасть, утӑ уйӑхӗнче кӑнаҫ ӳснӗччӗ. Пилӗк уйӑх иртнӗ хыҫҫӑн хаксене каллех хӑпартма йышӑннӑ.

Пирӗн ыйтӑма хутшӑнакансенчен ытларах пайӗ ку йышӑнӑва ҫӗршыври инфляцие пула тунӑ тесе шутлать, ҫавӑн пекех «халӑхран укҫа ытларах сӑптӑрас кӑмӑлран» тата «бюджетра укҫа ҫитменнипе» вариантсене суйлакансем пур. Кӑмӑл пур пулсан хӑвӑр шухӑшӑра эсир те пирӗн ыйтӑмра палӑртма пултаратӑр.

"Осторожно, Москва" сайтри сӑн

22 ҫулти Чӑваш Ен хӗрӗ, Мускавра пурӑнаканскер, лотерейӑра 56 миллион тенкӗ илнӗ. Кун пирки РИА Новости пӗлтерет.

Екатерина Чучелина Мускаври пӗр аслӑ шкулта вӗренет. Нумаях пулмасть вӑл занятире ларнӑ чухне онлайн мелпе темиҫе лотерея билечӗ туяннӑ. Унта задани ҫапларах: пӗтӗм хисепе пӗлмелле е пӗрне те пӗлмелле мар. Екатерина нихӑшне те тӗрӗс тупайман. Ҫапла вӑл 56 миллион тенкӗ выляса илнӗ.

Екатерина ку укҫапа пурӑнмалли ҫурт-йӗр туянасшӑн. Унтан автошкулта вӗренесшӗн.