vk.ru/gov_cap_ru сӑнӳкерчӗкӗ

Чӑваш Енри спортпа энергетика отраслӗн ветеранӗ Альберт Кудрявцев 90 ҫул тултарнӑ.

Альберт Васильевич Куславкка районӗнчи Кивӗ Тӗрлемес ялӗнче ҫуралнӑ. Вал ытти танташӗ пекех ачаллах колхозра ӗҫлеме пуҫланӑ. Ветеран ӗнентернӗ тӑрӑх, вуннӑрах сӳрелеме тата сухалама пуҫланӑ.

Альберт Васильевич Сартури ял хуҫалӑхӗн механизацийӗн институтӗнче вӗреннӗ. Ун чухне грекпа рим кӗрешӗвӗпе кӑсӑкланма пуҫланӑ. 1960 ҫулта вӑл СССР спорт мастерӗн ятне тивӗҫнӗ.

Альберт Васильевич Сарту тата Чулхала облаҫӗсенчи энергетика сечӗсен предприятийӗсен ертӳҫинче ӗҫленӗ.

Пулас машӑрӗпе, Неля Александровнӑпа, аслӑ шкулта вӗреннӗ чухне паллашнӑ. Ывӑлпа хӗр ҫуратса ӳстернӗ. Вӗсем те энергетика отрасльне суйласа илнӗ.

2006 ҫулта ҫемье тӑван тӑрӑхне куҫса килнӗ.

«Контактри» сӑн

Чӑваш Енре пурӑнакан арҫын телее хӳринчен тытасса шанса виҫӗ ҫул патшалӑх лотерейисене хутшӑннӑ. Тинех ӑна ӑннӑ! Пӗртен-пӗр туяннӑ билет ӑна 600 пин тенкӗ выляса илме пулӑшнӑ.

Андрей укҫа выляса илни пирки кӗтмен ҫӗртен пӗлнӗ: ун патне СМС-ҫыру килнӗ. «Ку пысӑк ҫӗнтерӳ пулнине тӳрех ӑнлантӑм», — тенӗ арҫын.

Андрей – строительствӑпа монтаж ӗҫӗсен мастерӗ. Килте те ӗҫлеме ӗлкӗрет: мӑшӑрӗпе пӗрле сыр пӗҫереҫҫӗ, ҫу, тӑпӑрчӑ тӑваҫҫӗ. Лотерейӑра выляса илнӗ укҫапа вӑл кӗҫӗн хӗрӗн хваттерӗнче юсав ӗҫӗсем тӑвасшӑн.

Пуш уйӑхӗн 27-мӗшӗнче Красноармейски тӑрӑхӗнчи Карайӗнчи культура ҫуртӗнче Николай Егоров художникӑн 80 ҫулхине уявлама пуҫтарӑннӑ.

Николай Григорьевич — Чӑваш Республикин халӑх художникӗ, Чӑваш Республикин тава тивӗҫлӗ художникӗ, Казах Республикин Асета Найманбаев ячӗллӗ патшалӑх премийӗн лауреачӗ, Нестер Янкас премийӗн лауреачӗ. Вӑл Ҫырмапуҫ ялӗнче ҫуралнӑ. Художник 80 ҫул тултарнӑ.

Юбиляра Красноармейски муниципалитет тӑрӑхӗн культура пайӗн пуҫлӑхӗ Анастасия Александрова, Карайӗнчи территори пайӗн пуҫлӑхӗ Геннадий Сверчков, «Трак ен» ентешлӗхӗн председателӗ Иван Архипов тата ыттисем саламланӑ. Вӗсем пурте художник пултарулӑхне пысӑка хурса хакланӑ, «чӑваш Левитанӗ» тесе ырлакан та пулнӑ.

chgign.ru сӑнӳкерчӗкӗ

Нумаях пулмасть И.Н. Ульянов ячӗллӗ Чӑваш патшалӑх университетӗнчи вырӑс тата чӑваш филологийӗн тата журналистика факультетӗнче «Филология: история и современность» (чӑв. Филологи: истори тата хальхи самана) пӗтӗм ҫӗршыври ӑслӑлӑхпа практика конференцийӗ иртнӗ. Ӑна асӑннӑ аслӑ шкулӑн филологи наукисен докторӗ, ЧПУн хисеплӗ профессорӗ Геннадий Корнилов 90 ҫул тултарнине халалланӑ.

Конференцие хутшӑнакансене тата ученӑя саламласа Чӑваш патшалӑх гуманитари ӑслӑлӑхӗсен институчӗн директорӗ Юрий Исаев тата ЧПУн эпир маларах асӑнса хӑварнӑ факультечӗн деканӗ Алена Иванова сӑмах илнӗ.

Геннадий Емельянович конференцие хӑй те хутшӑннӑ, вӑл «Полилоги о потамониме КАМА» темӑпа доклад туса панӑ.

«Контактри» сӑн

Патӑрьел районӗнчи Кӗҫӗн Шӑнкӑртам ялӗнче ҫуралса ӳснӗ Хайрикемель Салихова 101 ҫул тултарнӑ.

Хайрикемель Фасхетдиновна ҫак ялтах пурӑнать. Тӑван ҫӗршывӑн Аслӑ вӑрҫи вӑхӑтӗнче вӑл Улатӑр ҫывӑхӗнче окоп чавнӑ, вӑрман хатӗрленӗ, ҫулсем тунӑ ҫӗрте ӗҫленӗ. Унтан киле икӗ ҫултан тин таврӑннӑ, кайран качча кайнӑ. Вӑл тивӗҫлӗ канӑва тухичченех «Гвардеец» колхозра ӗҫленӗ. Мӑшӑрӗпе 2 хӗр ҫуратса ӳстернӗ.

Хайрикемель Фасхетдиновна ҫамрӑк чухне тӗрлеме, ҫыхма юратнӑ. Вӑл ҫыхнӑ япалсене кӳршӗ ял хӗрӗсем те тӑхӑнса ҫӳренӗ.

Кинемей вӑрӑм пурнӑҫ вӑрттӑнлӑхӗпе пайланнӑ: ҫывӑх ҫынсене юратмалла, кашни куншӑн савӑнмалла.

«Контактри» сӑн

Ҫӗнӗ Шупашкарта пурӑнакан Алексей Афанасьев 102 ҫул тултарнӑ. Вӑл – Ҫӗнӗ Шупашкарӑн хисеплӗ ҫынни.

Алексей Афанасьевич Шупашкар районӗнчи Йӑлӑмкасра ҫуралса ӳснӗ. Вӑл Тӑван ҫӗршывӑн Аслӑ вӑрҫине хутшӑннӑ. 1943 ҫулта Украина фронтӗнче ҫапӑҫнӑ чухне аманнӑ, урасӑр юлнӑ. Ун чухне 19 ҫулти каччӑ кӑна пулнӑ вӑл. Ҫапах хуҫӑлса ӳкмен. Ҫарти паттӑрлӑхшӑн ӑна Хӗрлӗ Ҫӑлтӑр орденӗпе, Жуков медалӗпе чысланӑ.

Тӑван ялне таврӑнсан Алексей Афанасьевич ентешӗсене яланах пулӑшма тӑрӑшнӑ, тимӗрпе питӗ ӑста ӗҫленӗ: кирек мӗнле япалана та юсама пултарнӑ.

Чӑваш академи драма театрӗн сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗнче Чӑваш Республикин тава тивӗҫлӗ артисчӗ Николай Гордеев ҫуралнӑранпа 65 ҫул ҫитнине халалласа асӑну каҫне пуҫтарӑннӑ.

Театрта пӗлтернӗ тӑрӑх, Николай Васильевича чысласа театрта ӑна хисеплекен куракансем, тӑванӗсем, ентешӗсем, пӗр сцена ҫине тухнӑ артистсем пухӑннӑ. Кун пирик культура учрежденийӗ халӑх тетелӗнчи хӑйӗн пабликӗнче паян пӗлтернӗ.

Асӑну каҫне хутшӑнакансем Николай Гордеев калӑпланӑ сӑнарсене аса илнӗ. Театрта ӗҫлеме пӑрахсан та вӑл сцена ҫине тухма пӑрахман — юрӑсем шӑрантарнӑ, пӗччен ҫеҫ мар, мӑшӑрӗпе, Любовь Гордеевӑпа та.

Асӑну каҫне пуҫтарӑннисем ҫав юрӑсене аса илнӗ, мӗншӗн тесен

Николайпа Любовь Гордеевсем пӗрле шӑрантарнӑ юрӑсем те янӑранӑ.

vk.ru/litmusey сӑнӳкерчӗкӗ

Паян, пуш уйӑхӗн 25-мӗшӗнче, чӑваш элемӗсен — гербпа ялавӑн — авторӗ Элли Юрьев ҫуралнӑранпа 90 ҫул ҫитнӗ.

XX ӗмӗрӗн иккӗмӗш ҫурринчи чӑваш ӳнерӗ ҫак ӑстапа нумай енлӗ ҫыхӑннӑ.

Чӑваш Енӗн пӗрремӗш геральдистне «вут-ҫулӑм чунлӑ ҫын» тесе каланӑ иккен. Ятарлӑ компьютер программисем ҫук чухнех вӑл хӑйӗн шрифчӗсене шухӑшласа кӑларнӑ, Чӑваш Енӗн пӗрремӗш космонавчӗ валли кӑкӑр ҫине хакламалли паллӑна ӳкернӗ, 400 ытла кӗнекене илемлетнӗ, Гагарин кӗперӗн чукун решеткин эрешне ӳкернӗ.

Пулас художник 1936 ҫулхи пуш уйӑхӗн 25-мӗшӗнче Красноармейски районӗнчи Кӗҫӗн Шетмӗ ялӗнче ҫуралнӑ. Шупашкарти ача-пӑча ӳнер шкулӗнче (1949-1951), Шупашкарти ӳнер училищинче (1951-1952), Тбилиссири патшалӑхӑн ӳнер академийӗнче (1958-1964) вӗреннӗ.

Чӑваш академи драма театрӗн сӑнӳкерчӗкӗ

К.В. Иванов ячӗллӗ Чӑваш академи драма театрӗнче ӗҫлекен Эмилия Назарова артисткӑна «Чӑваш Республикин тава тивӗҫлӗ артисчӗ» ята пама йышӑннӑ. Хушӑва Чӑваш Ен Элтеперӗ Олег Николаев ӗнер, пуш уйӑхӗн 23-мӗшӗнче, алӑ пуснӑ.

Эмилия Анатольевна 1987 ҫулхи ҫурла уйӑхӗн 12-мӗшӗнче Канаш районӗнчи Ухман ялӗнче ҫуралнӑ. 2007 ҫулта вӑл Канашри педагогика колледжӗнче вӗренсе тухнӑ, 2011 ҫулта — Чӑваш патшалӑх культурӑпа ӳнер институтӗнчен.

Театрта пӗлтернӗ тӑрӑх, актриса тӗрлӗ жанрпа ӑнӑҫлӑ ӗҫлет, камит-и е драма-и — пур сӑнара та ӗнентерӳллӗн калӑплама пултарать. Театр ӳнерӗн «Чӗнтӗрлӗ чаршав» республикӑрри конкурсӗнче Эмилия Назарова «Чи лайӑх хӗрарӑм ролӗ» номинацире темиҫе хутчен те лауреат ятне тивӗҫнӗ.

vk.com/philharmoniacheb сӑнӳкерчӗкӗ

Чӑваш Енӗн Элтеперӗн Олег Николаевӑн Хушӑвӗпе «Ҫавал» ансамбль артистне хисеплӗ ят панӑ. Пуш уйӑхӗн 23-мӗшӗнче алӑ пуснӑ 33-мӗш Хушура Александр Ильина «Чӑваш Республикин тава тивӗҫлӗ артисчӗ» ят парасси пирки сӑмах пырать.

Александр Николаевич пирки вӑл ӗҫлекен Чӑваш патшалӑх филармонийӗнче ансамблӗн ҫеҫ мар, коллективӑн та мӑнаҫлӑхӗ тесе пӗлтернӗ. «Тата тӗрӗсрех каласан, филармонин ҫеҫ мар, мӗнпур республикӑн», — ӑшшӑн палӑртнӑ культура учрежденийӗ халӑх тетелӗнчи хӑйӗн пабликӗнче.

Александр Ильин хӑйӗн ӑсталӑхӗпе фольклора паянхи ӑру патне ҫитерме пулӑшать ҫеҫ мар, ӑна упраса хӑварма та хӑйӗн тӳпине хывать. Куракансем ӑна яланах ӑшшӑн йышӑнаҫҫӗ, тӑвӑллӑн алӑ ҫупса тав тӑваҫҫӗ.