www.liveinternet.ru сӑнӳкерчӗкӗ

Николай Лукиянов художника «Чӑваш Республикин тава тивӗҫлӗ художникӗ» ят панӑ. Хушӑва республика Элтеперӗ паян, чӳк уйӑхӗн 20-мӗшӗнче, алӑ пуснӑ.

Николай Михайлович 1957 ҫулхи кӑрлач уйӑхӗн 3-мӗшӗнче Елчӗк районӗнчи Энтепе ялӗнче ҫуралнӑ. 1977 ҫулта Йошкар-Олари ӳнер училищинчен вӗренсе тухсан тӗрлӗ ҫӗрте художник-оформительте, ҫурт-йӗр дизайнерӗнче тӑрӑшнӑ. 1980 ҫултанпа вӑл Патӑрьелте ӗҫлесе пурӑнать.

cheb-centr.soc.cap.ru сӑнӳкерчӗкӗ

Нумаях пулмасть Шупашкарта пурӑнакан Зинаида Котова 85 ҫул тултарнӑ. Ҫав ятпа ӑна хулари халӑхӑн социаллӑ ыйтӑвӗсене тивӗҫтеркен комплекслӑ центрӑн пай пуҫлӑхӗ Александра Смиирнова саламланӑ.

«Ватӑ ҫынна паян пирӗн центрӑн социаллӑ ӗҫченӗ пӑхса пулӑшать. Анчах вӑл ачи-пӑчин пархатарне те курать. Зинаида Макаровнӑпа юнашар — унӑн ачисем, мӑнукӗсемпе мӑнукӗсен ачисем. Ватта хисепленӗренех ӗнтӗ вӗсем социаллӑ ӗҫчен пулӑшӑвӗпе усӑ кураҫҫӗ, юратнӑ ҫыннин пурнӑҫне ҫӑмӑллатма тӑрӑшаҫҫӗ», — каласа кӑтартнӑ Александра Львовна социаллӗ центрӑн пресс-службине.

Зинаида Макаровна Дон ҫинчи Ростовра ҫуралнӑ, Шупашкара мӑшӑрӗпе 1977 ҫулта куҫса килнӗ.

«Контактра» халӑх тетелӗнчи сӑн

Улатӑр хулинче пурӑнакан Наталья Бажанова илемлӗ пуканесем ӑсталать. Ку чун киленӗҫӗпе вӑл кӑҫал кӑсӑкланма тытӑннӑ.

Унччен Наталья 11 ҫул шкулта ачасене истори предметне вӗрентнӗ. Анчах ӑна алӑ ӗҫӗ ытларах илӗртнӗ-тӗр – Наталья пуканесем ӑсталама тытӑннӑ.

Унӑн кашни пукани хӑйне евӗр пулса тухать. Натальйӑн ӗҫӗсене куравсенче, ярмӑрккӑсенче кӑна мар, уйрӑм ҫынсен коллекцийӗсенче те курма пулать.

«Контактри» сӑн

Светлана Орешкинӑн алли чӑн та ылтӑн. Вӑл чӑвашсен пуҫа тӑхӑнмалли наци хатӗрӗсене тӗлӗнмелле илемлӗ ӑсталать.

Ку ӗҫ пӗрре те ҫӑмӑл мар. Хатӗрсене вӑл вӗтӗ шӑрҫаран ӑсталать. Светлана юрлас-ташлас енӗпе те пултаруллӑ. Вӑл «Уяв» ансамбльте юрлать.

«Контактра» халӑх тетелӗнчи сӑн

И.Я.Яковлев ячӗллӗ Чӑваш патшалӑх педагогика университечӗн студентки «КазанДА» конкурсра ҫӗнтернӗ. Тӳрех палӑртса хӑварар: ку конкурс Хусанта иртнӗ, унта ачасемпе ҫамрӑксем хӑйсен пултарулӑхӗпе паллаштараҫҫӗ.

И.Я.Яковлев ячӗллӗ Чӑваш патшалӑх педагогика университечӗн 4-мӗш курс студентки Алсу Сафиуллина I степенлӗ лауреат пулса тӑнӑ. Вӑл «Вокал. Соло. Эстрада юрри» номинацире мала тухнӑ.

Чӑваш патшалӑх оперӑпа балет театрӗн сӑнӳкерчӗкӗ

Паян, чӳк уйӑхӗн 18-мӗшӗнче, Чӑваш патшалӑх оперӑпа балет театрӗн вокал енӗпе ӗҫлекен педагог-репетиторӗ, Раҫҫей тата чӑваш халӑх артисчӗ, профессор, Анатолий Канюка 85 ҫул тултарнӑ.

Анатолий Романовичӑн ӳнерти ҫулӗ 1975 ҫулта пуҫланнӑ. Ун чухне вӑл Инҫет Хӗвелтухӑҫӗнчи ӳнерӗн педагогика институтӗнчен вӗренсе тухнӑ. Ҫавӑн хыҫҫӑн ӑна Чӑваш патшалӑх оперӑпа балет театрӗн опера труппине йышӑннӑ.

Анатолий Канюка Чӑваш Енӗн опера сценин чи паллӑ тенорӗсенчен пӗри шутланать.

Татьяна Молокова архивӗнчи сӑн

Чӑваш наци телерадиокомпанийӗ валли тинех директор тупнӑ. Ку должноҫе Татьяна Молокова йышӑннӑ. Хушӑва паян республика премьерӗ Сергей Артамонов алӑ пуснӑ.

Татьяна Кирилловна – 51 ҫулта. Вӑл И.Н.Ульянов ячӗллӗ ЧПУн филологи факультетне пӗтернӗ. Журналист карьерине 1996 ҫулта «Чувашское агентство сообщений» ЗАОра пуҫланӑ. Кайран «Вырӑнти телевиденире», «Канал 5 плюсра», «Советская Чувашия» хаҫатра ӗҫленӗ. Чӑваш наци телерадиокомпанийӗнче 2012 ҫултанпа ӗҫлет.

Сӑмах май, НТРКн ҫулталӑк ҫурӑ ӗнтӗ директор пулман. Унччен ку должноҫре Алексей Гурьянов ӗҫленӗ. Халӗ вӑл – цифра аталанӑвӗн министрӗн ҫумӗ.

Культура министерствин сӑнӳкерчӗкӗ

Раҫҫейри художниксен союзӗн пайташне Сергей Плешкова «Чӑваш Республикин культурӑн тава тивӗҫлӗ художникӗ» ят панӑ.

Сергей Плешков Шупашкарта 1955 ҫулта ҫуралнӑ. Вӑл – скульптор-анималист. Богородскри техника училищинчен вӗренсе тухнӑ. 1979 ҫулта Чӑваш Енри художниксен союзӗн художество фондӗнче художник-оформительте ӗҫлеме пуҫланӑ. Тӗрлӗ конкурса хутшӑннӑ, хӑйӗн ӗҫӗсен куравне те йӗркеленӗ.

Чӑваш академи драма театрӗн сӑнӳкерчӗкӗ

Паян Чӑваш академи драма театрӑн ӗҫченӗсем СССР халӑх артисткин Вера Кузьминан асӑну палӑкӗ патӗнче пуҫтарӑннӑ. Аса илтерер: Вера Кузьминична Тӑвай районӗнчи Енӗш Нӑрваш ялӗнче 1923 ҫулхи чӳк уйӑхӗн 16-мӗшӗнче ҫуралнӑ.

Сумлӑран та сумлӑ сцена ӑстине асра тытнине палӑртса пухӑннӑ вӗсем. Театр халӑх тетелӗнчи хӑйӗн пабликӗнче пӗлтернӗ тӑрӑх, «сцена ҫинчи мӑнаҫлӑ рольсемшӗн, пурнӑҫри ырӑ кӑмӑлшӑн тав туса» вил тӑпри ҫине чӗрӗ чечек хунӑ.

«Вера Кузьмина ӗмӗрлӗхех пирӗн асра, пирӗн театрӑн чунӗнче…», – теҫҫӗ театрта.

Чӑваш драма театрӗн сӑнӳкерчӗкӗ

Чӑваш патшалӑх академи драма театрӗн ӳнер пайӗн ертӳҫи Марина Николаева «Завпосты театра Будущего» программӑпа вӗренме пуҫлӗ.

Культура учрежденийӗнче хыпарланӑ тӑрӑх, Марина Порфирьевна чӳк уйӑхӗн 17-мӗшӗнчен пуҫласа ҫурла уйӑхӗн 20-мӗшӗччен ҫӗршывӑн чи сумлӑ специалисчӗсемпе пӗрле театра малалла аталантарас мелсене тӗпчеме пултарӗ.

Проекта пурнӑҫа кӗртекенни – пултарулӑх индустрийӗсен «Меганом» академийӗ. Вӗрентӗве «Таврида.АРТ» фестиваль ирттернӗ май йӗркелӗҫ.

Вӗренӳ тӑватӑ пайран тӑрӗ, ун вӑхӑтӗнче ӑсталӑх сехечӗсем, практикумсем пулӗҫ.