chgtrk.ru видеовӗнчен илнӗ сӑнӳкерчӗк

Шупашкарти кивӗ пӗр ҫуртра Николай Ашмарин ӑсчахӑн ал ҫырӑвӗсене тупнӑ. Кун пирки Чӑваш Енӗн патшалӑх телерадиокомпанийӗ пӗлтерет.

Николай Ашмарин — паллӑ лингвист, этнограф, 17 томлӑ чӑваш чӗлхи словарӗн авторӗ.

Хулари пасар урамӗнчи ҫурт унчченхиллех упранса юлнӑ. Унта ученӑй Шупашкара килсен чарӑнса тӑнӑ.

Ивановсем 2019 ҫулта ҫав ҫурта туяннӑ, кайран ӑна йӗркене кӗртме тытӑнсан мачча тӑрринче хутсемпе сӑнӳкерчӗксем, алырусем асӑрханӑ.

Хутсене ӗненсен, ҫуртӑн пӗрремӗш хуҫи сӑра вӗретекен завод директорӗ пулнӑ. Кайран ҫав ҫурта Емельян Захаров туяннӑ, вӑл Николай Ашмаринпа пӗр шухӑшлӑ ҫын пулнӑ.

100 ҫул ларакан йывӑҫ пӳртре Ашмарин Шупашкара килсен ларса ӗҫленӗ сӗтел те пур-мӗн.

culture.cap.ru сӑнӳкерчӗкӗ

Паян Юрий Суриков артиста юлашки ҫула ӑсатнӑ.

Юрий Константинович — Чӑваш Республикин тава тивӗҫлӗ артисчӗ. Вӑл 40 ҫул ытла Чӑваш патшалӑх юрӑпа ташӑ ансамблӗнче ӗҫленӗ. Пултаруллӑ музыкант тӗрлӗ стиле, оркестр вӑрттӑнлӑхне, контрабаспа калассин кӑткӑс техника мелӗсене тата аван ӑнланнӑ, бас-гитарӑпа каланӑ.

Вӑл концертпа хамӑр ҫӗршывӑн тӗрле кӗтесӗнче ҫеҫ мар, чикӗ леш енче те нумай хутчен пулнӑ.

Людмила Семенова-Ульянова страниц ен илнӗ сӑнӳкерчӗк

Ҫу уйӑхӗн 19-мӗшӗнче Шӑмӑршӑ шкулӗнче чӑваш халӑх писателӗ Илпек Микулайӗ ҫуралнӑранпа 110 ҫул ҫитнине халалласа асӑну урокӗсем ирттернӗ. Ку хыпара вырӑнти шкултан Людмила Семёнова-Ульянова пӗлтерет.

Ҫав кунах шкул ачисемпе вӗрентекенсем тата Шӑмӑршӑри таврапӗлӳҫӗсем паллӑ ҫыравҫӑн шкул картишӗнче вырнаҫнӑ бюсчӗ умне чечек ҫыххисем хунӑ.

Илпек Микулайӗ ҫинчен тӗплӗнрех Рувикин чӑваш уйрӑмӗнсе вуласа пӗлме пулать.

Комплекслӑ центр сӑнӳкерчӗкӗ

Шупашкар хулинчи халӑха социаллӑ пулӑшу паракан комплекслӑ центрта ватӑсене чӑваш классикӗ ҫинчен каласа кӑтартнӑ.

«Литература классикӗн классикӗ» литература сехетне Константин Иванов ҫуралнӑранпа 135 ҫул ҫитнине халалланӑ.

Литература сехетне хальхинче те М. Шумилов ячӗллӗ вулавӑш ӗҫченӗ

Наталья Хуморова йӗркеленӗ. Вӑл Константин Иванов ҫинчен кӑсӑклӑ нумай факт каласа кӑтартнӑ.

"Контактри" сӑн

7 ҫулти хӗрача дачӑран тухнӑ та ҫухалса кайнӑ. Вӑл 5 ҫухрӑм ытла утса тӗттӗмре трасса ҫине тухнӑ.

Хӗрачана Александр Семенов мӑшӑрӗпе асӑрханӑ. Вӗсем ун патне пынӑ.

Хӗрача ҫухалса кайнине, шӑннине, выҫӑ пулнине каланӑ. Семеновсем ачана машинӑна лартнӑ та полицие шӑнкӑравланӑ.

Полицейскисем Александр Семенова тав тунӑ.

«Контактри» сӑн

Раҫҫейри велоҫулҫӳревҫӗ Алексей Ильмухин Питӗртен Владивостока ҫитме палӑртнӑ. Унӑн 11 пин ҫухрӑма парӑнтармалла. Хӑйӗн ҫулҫӳревне вӑл Ҫӗнтерӳ пулнӑранпа 80 ҫул ҫитнине халалланӑ.

Ҫула май Алексей Чӑваш Ене кӗрсе тухнӑ. Ахальтен мар. Унӑн ашшӗ тата аслашшӗ – Улатӑр тӑрӑхӗнчи йӑхран.

Алексей Шупашкарта «Ӗҫ мухтавӗн хули» стела патӗнче чарӑнса сӑн ӳкерӗннӗ. Хостелта ҫӗр каҫнӑ хыҫҫӑн вӑл каллех ҫула тухнӑ: Урал, Ҫӗпӗр урлӑ — Инҫет Хӗвелтухӑҫне.

«Контактри» сӑн

Ҫӗрпӳ пульницинчи пайӑрка диагностикин уйрӑмӗн заведующийӗ Татьяна Смирнова опытлӑ рентгенолог кӑна мар. Вӑл – спортсмен та.

Татьяна 1996 ҫултах пӗрремӗш хут парашютпа сикнӗ. Ун чухне вӑл шкул ачи кӑна пулнӑ. Темиҫе ҫултан вӑл пушшех те хавхаланнӑ: машӑрӗ десантник-ҫке-ха. Ку таранччен вӑл парашютпа 27 хут сикнӗ.

Амансан та унӑн ӗмӗчӗ сӳнмен. Мӑшӑрӗ унӑн чун киленӗҫне ырлать кӑна. Вӗсем иккӗшӗ те парашют спорчӗн федерацийӗн пайташӗсем. Татьяна Смирновӑн тепӗр тӗллев пур: ҫитес ҫул вӑл татах парашютпа сикесшӗн.

culture.cap.ru сӑнӳкерчӗкӗ

Ҫу уйӑхӗн 15-мӗшӗнче Чӑваш Енӗн Культура институчӗн концерт залӗнче пултаруллӑ балетмейстерӑн, педагогӑн, Людмила Нянинӑн 85 ҫулхи юбилейне халалланӑ савӑнӑҫлӑ каҫ иртӗ.

Сцена ҫине Культура колледжӗн студенчӗсем, ача-пӑча ансамблӗсен воспитанникӗсем тухӗҫ. Вагаповсем, «Катюша» тата «Сарпике» халӑх ташшин коллективӗсем, Чӑваш патшалӑх юрӑпа ташӑ ансамблӗн артисчӗсем те пулӗҫ.

Пултарулӑх каҫӗ ӳнер ӗҫӗнче нумай ҫул тӑрӑшнӑ Людмила Нянинӑн хӑйне евӗрлӗ пултарулӑхӗпе паллаштарӗ.

Нянина Людмила Николаевна ҫинчен тӗплӗнрех Рувикин чӑваш уйрӑмӗнче вуласа пӗлме пулать.

Вера Иванова сӑнӳкерчӗкӗ

Паян, ҫу уйӑхӗн 11-мӗшӗнче, Шупашкарта пурӑнакан вӑрҫӑ ветеранӗ Агриппина Янович 100 ҫул тултарнӑ.

Элӗк районӗнчи Тури Татмӑш ялӗнче ҫуралса ӳснӗ пикене 1942 ҫулхи ҫуркунн ҫар ретне илнӗ. Медицина сестри пулса вӑл Мускавран Кенигсберга ҫитнӗ, Курск пӗкки патӗнчи хаяр ҫапӑҫӑва хутшӑннӑ.

Агриппина Алексеевна юнпа тӑпра хутӑшнӑ самантсем пирки нумай каласа кӑтартма пултарать. Темле хӑрушӑ вӑрҫӑра пулнӑ пулин те вӑл ӑшӑ кӑмӑлла та уҫӑ чунлӑ.

Кинемей ӗҫлеме ӳрӗк пулнӑран пӗлтӗр те дачӑра ҫу каҫнӑ.

Агриппина Алексеевнӑн нумай награда. Кӑҫал вара ӑна «Чӑваш Республикин хисепле гражданине» ят панӑ.

cheb-centr.soc.cap.ru сӑнӳкерчӗкӗ

Шупашкарта пурӑнакан 86 ҫулти Людмила Никифорова Мускаври Ҫӗнтерӳ парадне хутшӑнма Мускава кайнӑ.

Людмила Васильевна Ленинград хулинче ҫуралнӑ. Ачан ашшӗ, вӑрҫӑн малтанхи кунӗсенчех фронтра ҫапӑҫнӑскер, 1944 ҫулта вилнӗ, ҫемьене тӑлӑха хӑварнӑ. Людмила амӑшӗ ача садӗнче воспитательте ӗҫленӗ.

1943 ҫулта Ленинградра пурӑнакансене эвакуацилеме тытӑнсан Людмила Васильевнӑна амӑшӗпе пӗрле Чӑваш Енри Шӑмӑршӑна ӑсатнӑ. Ҫемье кунтах юлнӑ.

Людмила Васильевна икӗ ача — ывӑлпа хӗр — пӑхса ӳстернӗ, халӗ унӑн виҫӗ мӑнук пур.

Паян Шупашкар аэропортӗнче ӑна «Победа» авиакомпани Людмила Васильевнӑна ҫывхарса килекен Ҫӗнтерӳ кунӗпе саламланӑ май чечек ҫыххи парнеленӗ.