«Контактри» сӑн

Ҫӗнӗ Шупашкар хулинче пурӑнакан 89 ҫулти Антонина Южакова Андрей Малахов патне ҫыру ҫырса янӑ. Кӗҫех хурав килнӗ, ӑна «Россия 1» телеканалпа пыракан «Песни от всей души» кӑларӑма йыхравланӑ.

Нумаях пулмасть кӑларӑм эфира тухнӑ. Студире Антонина Ивановна Андрей Малахова ӗмӗрӗпех хӑй пухса пынӑ грампластинкӑсене парнеленӗ. Кайран пурте пӗрле «Старый клен» юрра шӑрантарнӑ.

Кинемей 89 ҫулта та аптӑрамасть, питӗ хастар: спутник хулари Тӗлӗнтермӗш ӗҫсем тӑвакан Сӑваплӑ Николай храмне пулӑшать. Вӑл ырӑлӑх ватӑлманнине, унӑн кашни ҫынра пурӑнмаллине ӗненент вӑл.

cap.ru сайтри сӑн

Пӑрачкав округӗнчи Напольное ялӗнче пурӑнакан Татьяна Михайловна Клюковкина 100 ҫулхи юбилейне уявланӑ. Унӑн пурнӑҫӗ ҫӑмӑл килмен, хура-шурне чӑтса ирттерме тивнӗ.

Пилӗк ҫулта чухне вӑл хытӑ чирленӗ, хӑлхи илтме пӑрахнӑ. Анчах ку ӑна ҫапса хуҫман. Татьяна 15 ҫулта чухне Тӑван ҫӗршывӑн Аслӑ вӑрҫи пуҫланнӑ. 1941 ҫулхи кӗркунне вӑл ашшӗпе тата тӑванӗпе пӗрле станок умне тӑнӑ, Сӑр хӳтӗлев чиккисене тума хутшӑннӑ.

Татьяна Михайловна пурнӑҫ тӑршшӗпех «Туслӑх» колхозра уй-хир бригадинче тӑрӑшнӑ. Унӑн хӑйӗн ачисем ҫук, вӑл хӑйӗн пӗтӗм юратӑвне тӑванӗсене парнеленӗ. Малтан ашшӗ-амӑшне пӑхса пурӑннӑ, кайран шӑллӗн ҫемйине пулӑшнӑ. Халӗ вӗсем ашшӗ-амӑшӗн ҫуртӗнче шӑллӗн ҫемйипе пӗрле пурӑнаҫҫӗ, Иван Михайлович унӑн тӗрекӗ пулса тӑнӑ.

Вӑрӑм пурнӑҫлӑ кинемее влаҫ представителӗсем саламланӑ. Вӗсем юбиляра вӑрҫӑ ҫулӗсенче тата мирлӗ вӑхӑтра пурнӑҫланӑ ӗҫӗсемшӗн тав сӑмахӗсем каласа ҫирӗп сывлӑх суннӑ.

Чӑваш академи драма театрӗн сӑнӳкерчӗкӗ

Паян, ҫӗртме уйӑхӗн 9-мӗшӗнче, Никифор Мранькка чӑваш ҫыравҫи ҫуралнӑранпа 125 ҫул ҫитнӗ.

Вӑл Куславкка районӗнчи Пилешкассинче ҫуралнӑ. Чиркӳпе прихут шкулӗнче вӗренсе тухнӑ хыҫҫӑн тӗрлӗ ӗҫре тӑрӑшнӑ, ҫав шутра матрос та, вӑрман тиекен те пулнӑ.

1925 ҫулхи пуш уйӑхӗнче ӑна вырӑнти ял совечӗн председательне лартнӑ, тепӗр ҫулхи ҫу уйӑхӗнче Чӑваш АССР халӑх комиссариачӗн коллеги пайташӗ пулма шаннӑ.

1931 ҫулта вӑл Мускаври кинематографистсен институтӗнчи киносценаристсен ҫулталӑклӑх курсӗнчен вӗренсе тухнӑ. 1938 ҫулччен «Чӑвашкинора» сценарист пулнӑ. Унсӑр пуҫне вӑл 1933–1938 ҫулсенче «Союзкинохроникӑн» чӑваш студийӗн директорӗнче тӑрӑшнӑ. 1938–1942 ҫулсенче «Ленин ялавӗпе» хаҫат редакторӗнче тимленӗ. 1942 ҫулта вӑл Хӗрлӗ ҫарта политика ӗҫченӗ пулнӑ.

Вӑрҫӑ хыҫҫӑн Куславкка районӗнче партин райкомӗнче агитаципе пропаганда пайӗн заведующийӗнче, райӗҫтӑвкомра культура учрежденийӗсен пайӗн заведующийӗнче тӑрӑшнӑ.

Никифор Мранькка 1973 ҫулхи нарӑс уйӑхӗн 20-мӗшӗнче вилнӗ. Ӑна Куславккара пытарнӑ.

Унӑн уйрӑмах паллӑ хайлавӗ — нумай томлӑ «Ӗмӗр сакки сарлака» романӗ. Асӑннӑ роман тӑрӑх Чӑваш академи драма театрӗнче спектакль те лартнӑ.

Малалла...

«Контактри» сӑн

Чӑваш патшалӑх пукане театрӗн артисчӗ Артем Барабанов ТНТ каналпа кӑтартакан «СашаТаня» камитлӗ сериалта ӳкерӗннӗ.

Пирӗн ентеше 10-мӗш сезонри 26-мӗш серири эпизодри рольте курма пулать. Палӑртса хӑварар: Артем Шупашкар хулинче пурӑнать, Чӑваш патшалӑх пукане театрӗнче 10 ҫул ӗҫлет. Ку таранччен вӑл 30 ытла роле калӑпланӑ. Куракансем ӑна ытларах «Карлсон», «Муму» тата «Ночь перед Рождеством» спектакльсенчи рольсем тӑрӑх пӗлеҫҫӗ.

Вӑхӑтӑн-вӑхӑтӑн Артем Мускава ӳкерӗнме ҫӳрет. Халӗ ав унӑн фильмографийӗнче Раҫҫейре пысӑк рейтинг ҫӗнсе илнӗ проектсенчен пӗри пур.

"Правда ПФО" сайтран илнӗ

Шупашкар хула мэрӗн ҫумӗ пулнӑ Алексей Маклыгин Чӗмпӗрте ӗҫлеме тытӑннӑ. Вӑл унта «Ульяновскэнерго» акционерсен обществин генеральнӑй директорӗ пулса тӑнӑ. Унта вӑл «Трансэнергопром» компанирен куҫса кайнӑ.

Алексей Маклыгин кӑҫалхи ҫуркунне «Трансэнергопром» тулли мар яваплӑ обществӑра аппарат ертӳҫи — гендиректорӑн ҫумӗ пулса тӑрӑшма пуҫланӑ.

Шупашкар хула администрацийӗн пуҫлӑхӗн ҫумӗ пулса вӑл 2009 ҫулта ӗҫлеме пуҫланӑ, 2020 ҫулта «Шупашкар электричество сечӗсем» предприятие куҫнӑ.

Кирилл Степанов архивӗнчи сӑн

Элӗк округӗнчи ҫамрӑк фермер, 22 ҫулти Кирилл Степанов, каллех федераци каналӗнчи каларӑмра ӳкерӗннӗ. Хальхинче — «Раҫҫей 1» телеканалпа пыракан «В кругу друзей» (чӑв. «Туссен хушшинче») кӑларӑмра.

Ӳкерӳ ушкӑнӗ Чӑваш Енре пулнӑ, Элӗк округне Кирилл Степанов хуҫалӑхне кайса ӳкернӗ. Кӑларӑмра хальхи ҫамрӑк фермерӑн кулленхи пурнӑҫне кӑтартнӑ.

Сӑмах май, Кирилл ача чухне программист пулма ӗмӗтленнӗ. Анчах хула ун валли маррине ӑнланнӑ. Халӗ вӑл пысӑк хуҫалӑх тытса пырать, унта кӑрккасем, павлинсем, страуссем, качакасем, чӑхсем, сыснасем, Пашка ятлӑ лаша, Яша ятлӑ така, Маша ятлӑ сурӑх тата ыттисем пур.

"Урал сасси" хаҫат халӑх тетелӗнче вырнаҫтарнӑ сӑнӳкерчӗка

Ҫу уйӑхӗн 29-мӗшенче Пушкӑртстанри Пелепей тӑрӑхӗнчи Слакпуҫ ялӗнче чӑваш литература классикне, вилӗмсӗр «Нарспи» авторне Кӗҫтенттин Иванова халалласа «Санӑн ятупа мӑнаҫланатпӑр» уяв иртнӗ.

Вырӑнти «Урал сасси» хаҫат халӑх тетелӗнчи хайӗн пабликӗнче хыпарланӑ тӑрӑх, унта Мускаври, Чӑваш Енпе Тутарстан республикисенчи, Чӗмпӗр облаҫӗнчи сумлӑ хӑнасем хутшӑнаҫҫӗ. Вӗсен йышӗнче - Раҫҫей Геройӗ, Раҫҫейри чӑвашсен наципе культура автономин председателӗ Николай Гаврилов генерал-лейтенант, Мускавра 1980 ҫулта иртнӗ Олимп вӑййисен призерӗ, ирӗклӗ майпа кӗрешессипе СССР спорт мастерӗ Сергей Корнилаев тата ыттисем те пулнӑ.

Леонид Черкесов страницинчен илнӗ сӑнӳкерчӗк

И.Н.Ульянов ячӗллӗ Чӑваш патшалӑх университечӗн ректорӗ Андрей Александров нумаях пулмасть 60 ҫул тултарнӑ. Ҫав ятпа ӑна, Чӑваш Енӗн Патшалӑх Канашӗн депутачӗ пулнӑ май, парламентӑн черетлӗ, 43-мӗш сессийӗнче, саламланӑ. Кун пирки чӑваш парламенчӗн спикерӗ Леонид Черкесов халӑх тетелӗнчи хӑйӗн страницинче хыпарланӑ.

Андрей Юрьевич Адыгей автономи облаҫӗн тӗп хулинче 1966 ҫулти ҫу уйӑхӗн 21-мӗшӗнче Майкоп хулинче ҫуралнӑ. Вӑл – ученӑй-экономист, правовед, историк. Унӑн ашшӗ-амӑшӗ Чӑваш Енрен. Ашшӗ Шупашкар районӗнчи Паҫпак ялӗнче ҫуралнӑ, амӑшӗ – Советски поселокӗнче.

Андрей Александров, сӑмах май каласан, иртнӗ ҫул уйӑхсерен вӑтамран ҫур миллиона яхӑн тенкӗ ӗҫлесе илнӗ. Тӗрӗсрех каласан, 486 пин тенкӗ.

culture.cap.ru сӑнӳкерчӗкӗ

Паян, ҫу уйӑхӗн 28-мӗшӗнче, Чӑваш Енре артистпа сывпуллашнӑ. Сергей Баранов — Чӑваш Республикин тава тивӗҫлӗ артисчӗ, вӑл Шупашкарти музыка училищинче преподаватель пулса тӑрӑшнӑ.

Сергей Алексеевич — пысӑк шайри профессионал музыкант пулнӑ, хӑйӗн ҫак ӑсталӑхне ҫамрӑксене панӑ. Сергей Баранов училищӗре преподавательте тӑрӑшнӑ май пултаруллӑ музыкантсен темиҫе ӑрӑвне вӗрентсе кӑларнӑ.

Хисеплӗ артистпа сывпуллашма унӑн ӗҫтешӗсем, тӑванӗсем, вӗренекенӗсем пынӑ.

https://max.ru/progorod21/AZ5tUDukSBU каналтан илнӗ сӑнӳкерчӗк

Чӑваш Енри апат-ҫимӗҫ ӑсти Пӗрремӗш канал кӑларӑмӗнче ӳкерӗннӗ. Унта вӑл епле лекнине пӗлместпӗр те, анчах телекӑларӑмра вӑл квас ҫинчен каласа панӑ.

Сӑмах Евгений Шуваев пирки пырать. Вӑл Пӗрремӗш каналпа кӑтартакан «Жить здорово» (16+) телекӑларӑма хутшӑннӑ. Унта сывлӑхпа ҫыхӑннӑ тӗрлӗ темӑна сӳтсе явнӑ, ҫав шутра квас пирки те калаҫнӑ.

Евгений Атӑлҫи тӑрӑхӗсенчи халӑхсен йӑлана кӗнӗ ӗҫми — квас — ҫинчен каласа кӑтартнӑ. Унӑн Кубань тӑрӑхӗнчи тата Питӗр хулинчи ӗҫтешӗсем — хӗрлӗ кӑшман тата лимон квасӗ пирки.