Чӑваш Енри писательсен союзӗн сӑнӳкерчӗкӗ

Ҫӗртме уйӑхӗн 23-мӗшӗнче Чӑваш Енӗн Наци вулавӑшӗнче Никифор Мранькка ҫыравҫӑ ҫуралнӑранпа 125 ҫул ҫитнине асра тытса пуҫтарӑннӑ. Унта писательсемпе журналистсем пухӑннӑ.

Пуҫтарӑннисем Мранькка халӑхран тухнӑ ҫыравҫӑ тата ялан халӑхпа пӗрле пулнине палӑртса хӑварнӑ. Кӑмӑлӗпе вӑл тӳрӗ те хӑюллӑ пулнӑ. Граждан тата Тӑваш ҫершывӑн аслӑ вӑрҫисем витӗр тухнӑ.

Мускаври киносценаристсен курсӗнчен вӗренсе тухсан «Союзкинохроника» чӑваш киностудийӗнче ӗҫлеме тытӑннӑ. Районсенчи парторганизацисене критикленӗшӗн ӑна репрессиленӗ, анчах кайран таса ятне тавӑрнӑ.

Чӑваш халӑх писателӗ, Раҫҫейри писательсен союзӗн Чӑваш Енри уйрӑмӗн ертӳҫи Сергей Павлов Никифор Мраньккан романне ялта краҫҫын ҫутипе вуланине аса илнӗ.

cap.ru сайтри сӑн

Республикӑра патшалӑх тата парти ӗҫченӗ Илья Прокопьев ҫуралнӑранпа 100 ҫул ҫитнине паллӑ тума хатӗрленеҫҫӗ. Тӗп мероприятисем утӑ уйӑхӗн 29-мӗшӗнче пулӗҫ.

Илья Павлович Чӑваш Ене 15 ҫула яхӑн ертсе пынӑ. Вӑл Вӑрнар районӗнчи Мӑчамӑш ялӗнче 1926 ҫулхи утӑ уйӑхӗн 29-мӗшӗнче ҫуралнӑ. Тӑван ҫӗршывӑн Аслӑ вӑрҫине тата совет-яппун вӑрҫине хутшӑннӑ. 1974-1988 ҫулсенче Илья Павлович КПСС Чӑваш обкомӗн пӗрремӗш секретарӗ пулнӑ. Унӑн ячӗпе Шупашкар ГЭСӗн, трактор савучӗн, «Куҫ микрохирургийӗн» строительствисем ҫыхӑннӑ. Илья Прокопьев 2017 ҫулхи нарӑсӑн 20-мӗшӗнче куҫне ӗмӗрлӗхех хупнӑ.

Утӑ уйӑхӗн 29-мӗшӗнче Шупашкарта Наци вулавӑшӗ умӗнче Илья Прокопьевӑн пурнӑҫӗпе ӗҫӗ-хӗлне халалланӑ ӑслӑлӑхпа практика конференцийӗ иртӗ. Ҫавӑнтах курав уҫӑлӗ. Богдан Хмельницкий урамӗнчи 1-мӗш масар ҫинче Илья Прокопьевӑн палӑкӗ патне чечексем хурӗҫ. Ҫавӑн пекех «Ҫӗнӗ хула» микрорайонта ун ячӗпе хисепленекен урамра мероприятисем иртӗҫ.

Анатолий Аксаков архивӗнчи сӑн

Раҫҫей Патшалӑх Думин депутачӗ Анатолий Аксаков тепӗр наградӑна тивӗҫнӗ. Ӑна вӑл Патшалӑх Думин председателӗн Вячеслав Володинӑн аллинчен илнӗ.

Анатолий Аксакова Раҫҫей президенчӗ Тав хутне панӑ. «Патшалӑх пуҫлӑхӗ пысӑка хурса хаклани пысӑк чыс кӑна мар, ку малалла ӗҫлеме те хавхалантарать. Пире малашне сахал мар ырӑ тата пӗлтерӗшлӗ ӗҫсем кӗтеҫҫӗ», - тесе ҫырнӑ депутат хӑйӗн страницинче.

Палӑртса хӑварар: Анатолий Аксаковӑн награда сахал мар. Вӑл 2015 ҫулта IV степень «Тӑван ҫӗршыв умӗнчи тава тивӗҫлӗ ӗҫсемшӗн» ордена, пӗлтӗр III степень «Тӑван ҫӗршыв умӗнчи тава тивӗҫлӗ ӗҫсемшӗн» ордена, 2020 ҫулта Александр Невский орденне, II степень П.А.Столыпин медальне, ҫавӑн пекех Раҫҫей правительствин тав хучӗсене тивӗҫнӗ. Кунсӑр пуҫне вӑл Чӑваш Республикин тата Шупашкар хулин хисеплӗ ҫынни.

forum.na-svyazi.ru порталтан илнӗ сӑнӳкерчӗк

РФ Перекет банкӗн Чӑваш Енри управленине ҫӗнӗ ҫын ертсе пыма тытӑннӑ. Кун пирки ҫак йӗркесен авторӗ асӑннӑ кредит учрежденийӗ электрон ҫырупа хыпарлани тӑрӑх пӗлчӗ.

«Перекет банкӗнче — пӗлтерӗшлӗ кадр улшӑнӑвӗ. Ҫӗртме уйӑхӗн 24-мӗшӗнче Перекет банкӗн Чӑваш Енри уйрӑмӗн управляющийӗнче Наталья Сахарова ӗҫлеме тытӑнчӗ», — тесе кӗскен хыпарланӑ унта.

Кунсӑр пуҫне тата Наталья Сахарова унччен Перекет банкӗн Мари Элти уйрӑмӗнче управляющи ҫумӗ пулса тӑрашнине пӗлтернӗ.

«Ҫыхӑнура» форумра ҫырнӑ тӑрӑх, ҫӗнӗ управляющи 2011 ҫулта Ивановӑри патшалӑхӑн химипе технологи университетӗнчен вӗренсе тухнӑ. Унта вӑл «Менеджмент» тата «Йывӑрлӑх вӑхӑтӗнче ертсе пырасси» специальноҫсене алла илнӗ. Тепӗр ҫулхине вӑл Перекет банкӗн Ивановӑри уйрӑмӗнче ӗҫе кӳлӗннӗ. Сакӑр ҫулта хӗрарӑм кредит инспекторӗнчен кредит управленийӗн пуҫлӑхӗ таран ҫитнӗ. 2023 ҫулта Мари Элта ӗҫлеме пуҫланӑ.

cheb-centr.soc.cap.ru сӑнӳкерчӗкӗ

Этем шӑпи, унӑн кун-ҫулӗ пирки шухӑшласан ватӑ кукамай: «Пасар пӗрле те телей уйрӑм», — тесе калани аса килет.

Ҫӗрпӳ районӗнчи Рынкӑ салинче ҫуралнӑ Анна Петрова паян 101 ҫул тултарнӑ. Унӑн яшлӑхӗ Тӑван ҫӗршывӑн аслӑ вӑрҫин хаяр ҫулӗсемпе пӗр килнӗ. 1941 ҫулта Патӑрьелте медицина сестрин курсӗнчен вӗренсе тухсан унти шкулта медицина сестринче тӑрӑшнӑ. 1945 ҫулта ӑна Хӗвелтухӑҫ Пруссине тухтӑр пулса ӗҫлеме яраҫҫӗ. Анчах вӑл ҫапӑҫу хирӗнче пулман, ҫапах та ҫынсене нумай пулӑшнӑ.

1946-1950 ҫулсенче Ҫӗрпу районӗнче колхозра ӗҫленӗ, 1953 ҫулта вӑл упӑшкипе Хабаровск тӑрӑхне, Амур ҫинчи Комсомольск хулине, тухса кайнӑ. Чӑваш Ене таврӑнсан ВНИИР завода вырнаҫнӑ, унта намотчик пулса ӗҫленӗ.

Кинемейӗн икӗ ачи вилнӗ, анчах унӑн пилӗк мӑнук, мӑнукӗсен виҫӗ ача, вӗсен икӗ ача пур. Кинемее паян мӑнукӗсенчен пӗри пӑхса пулӑшать: ун патне ир те, каҫ та пырса каять. Ватӑ ҫын хваттерте кӑштӑртса ҫӳрет, ӑспа-тӑнпа пурӑнать.

Зоя Яковлеван халӑх тетелӗнчи страницинчен илнӗ сӑнӳкерчӗк

Ку хыпара каярах юлса пӗлтӗмӗр пулин те хыпарласах килет. Ҫӗртме уйӑхӗн 17-мӗшӗнче Роза Деменцова журналист 65 ҫул тултарнӑ.

Вӑл Красноармейски районӗнчи Тусай ялӗнче ҫуралнӑ. Чӑваш патшалӑх университетӗнчи историпе филологи факультетӗнчен вӗренсе тухнӑ. Раҫҫей журналистсен союзӗн членӗ, Чӑваш Республикин культурӑн тава тивӗҫлӗ ӗҫченӗ, Ҫемен Элкер ячӗллӗ журналистсен премийӗн тата Нестер Янкас премийӗн лауреачӗ.

Пӗр вӑхӑт Красноармейски районӗнчи «Ял пурнӑҫӗ» хаҫатра корреспондентра, унта Шупашкарти 1-мӗш типографире корректорта, «Спецстроймеханизаци» организацин «Механизатор» хаҫатӗнче корреспондентра тӑрӑшнӑ. 1990-2008 ҫулсенче Чӑваш Енӗн патшалӑх телерадиокомитетӗнче ӗҫленӗ, каярах Чӑваш наци радиовӗнче, Чӑваш Енӗн епархийӗн пресс-службинче те тимленӗ.

cap.ru сӑнӳкерчӗкӗ

Чӑваш Енӗн Тӗрӗслевпе шутлав палатин председательне Светлана Аристовӑна «Раҫҫей Федерацийӗн хисеплӗ экономисчӗ» ят панӑ.

Светлана Аристова 1969-мӗш ҫулхи. 1998 ҫулта вӑл Мускаври патшалӑхӑн социаллӑ университетӗнчен вӗренсе тухнӑ, 2009 ҫулта — Мускаври гуманитарипе экономика институтӗнчен.

Ӗҫ карьерине 1987 ҫулта Улатӑрти хула канашӗнче финанс пайӗнчен пуҫӑннӑ. 1990 ҫултанпа налук органӗнче тӑрӑшнӑ. 2010 ҫулхи ака уйӑхӗнче ӑна Федерацин налук службин Чӑваш Енри управленийӗн ертӳҫин ҫумӗ пулма шаннӑ. 2016 ҫулхи чӳк уйӑхӗнче Чӑваш Енӗн Тӗрӗслевпе шутлав палатин председателӗнче тӑрӑшать.

Унӑн чылай награда пур. Ҫав шутра — «Чӑваш Республикин тава тивӗҫлӗ экономисчӗ» хисеплӗ ят та, ведомство медалӗ те.

Чӑваш Енӗн наци вулавӑшӗн сӑнӳкерчӗкӗ

Ыран, ҫӗртме уйӑхӗн 23-мӗшӗнче, Чӑваш Енӗн наци вулавӑшӗнче Никифор Мранькка ҫыравҫӑ ҫуралнӑранпа 125 ҫул ҫитнине асра тытса пуҫтарӑнӗҫ.

Паллӑ чӑваш прозаикӗ тата драматургӗ Куславкка районӗнчи Пилешкассинче ҫӗртме уйӑхӗн 9-мӗшӗнче ҫуралнӑ. Унӑн уйрӑмах паллӑ произведенийӗ — нумай томлӑ «Ӗмӗр сакки сарлака» роман. Шӑпах ҫав хайлава сӳтсе явӗҫ те вулавӑша пуҫтарӑннӑ писательсем, журналистсем, педагогсем, таврапӗлӳҫӗсем, вулавӑш ӗҫченӗсем тата кӗнеке вулама юратакансем.

Сӑмах май каласан, писателӗн пултарулӑхӗнче тарӑн йӗр хӑварнӑ хайлавсем татах пур: «Юншӑн юн», «Тӑван ҫӗршыв чӗнет», «Амӑшӗн ҫырӑвӗ», «Урӑхла калама пултарайман эпӗ», «Юратакан чӗресем».

Чӑваш Енӗн наци вулавӑшӗн сӑнӳкерчӗкӗ

Ҫӗртме уйӑхӗн 30-мӗшӗнче Чӑваш Енӗн наци вулавӑшӗнче «Драматургия и театральное искусство» (чӑв. Драматурги тата театр ӳнерӗ) ятпа ҫавра ҫӗтел иртӗ. Ӑна Арсений Тарасов ҫыравҫӑ-драматург, журналист 70 ҫул тултарнӑ май йӗркелӗҫ.

Арсений Тарасов — Чӑваш Енӗн искусствӑсен тава тивӗҫлӗ ӗҫченӗ. Унӑн хайлавӗсемпе Чӑваш академи драма театрӗнче спектакльсем лартаҫҫӗ.

«Ҫырма пурнӑҫ хӑех хавхалантарать», — тет иккен калем ӑсти. Чӑваш академи драма театрӗнче кӑтартакан «Хӗрлӗ кӗпеллӗ телей» спектакльти сюжет та, сӑмахран, пурнӑҫран тата тӗрӗсрех каласан, ҫыравҫӑн ашшӗ-амӑшӗн пурнӑҫӗнчен, илнӗскерех-мӗн.

Арсений Тарасовӑн юбилейне халалланӑ ҫавра сӗтел вулавӑшри концеренц-залра 14 сехетре пуҫланӗ.

«Контактри» сӑн

Шупашкар хулинче пурӑнакан 55 ҫулти Ивета Орендеева Мускавран харӑсах виҫӗ титулпа таврӑннӑ.

Вӑл «Раҫҫей Ҫут тӗнче мисӗ» коронӑна ҫӗнсе илнӗ. Жюри пайташӗсем унӑн ӑсне, пултарулӑхне те хакланӑ, «Интеллект мисӗ» тата «Ӗлккенлӗх мисӗ» ятарлӑ парнесемпе те чысланӑ.

Конкурс финалӗ ҫӗртме уйӑхӗн 14-мӗшӗнче Мускавра иртнӗ. Пирӗн ентеш 50 ҫултан аслӑрах хӗрарӑмсен хушшинче тӗп коронӑна ҫӗнсе илнӗ.

Иветӑшӑн ку – пиллӗкмӗш конкурс. Унччен вӑл Чӑваш Ене федераци тата регион шайӗнчи подиумсенче хӳтӗленӗ. Вӗсенче туслӑха кӑтартнӑшӑн тата хутшӑнма пӗлнӗшӗн ятсем ҫӗнсе илнӗ. Халӗ ав унӑн коллекцийӗнче тепӗр корона пур.

Палӑртса хӑварар: Ивета виҫӗ хӗр ӳстернӗ, халӗ икӗ мӑнукне пӑхма пулӑшать. Вӑл илем сферинче ӗҫлет, саккассем паракан пунктпа ҫыхӑннӑ услама аталантарать.