Ольга Иванова страницинчен илнӗ сӑнӳкерчӗк

Чӑваш Енӗн Наци вулавӑшӗнче «Варкӑш» литература клубӗн раштав уйӑхӗнчи ларӑвӗнче Нина Артемьевӑн «Ӗмӗрхи кӗвӗ» сӑвӑ кӗнекине сӳтсе явассине эпир унччен пӗлтернӗччӗ-ха. Кӑҫал кӗркунне Чӑваш кӗнеке издательствинче кун ҫути курнӑ кӑларӑма автор тӗрлӗ ҫулта ҫырнӑ сӑвӑсем кӗнӗ.

Ларӑва пухӑннӑ поэтсемпе прозаиксем, литературоведсемпе журналистсем, вӗрентекенсемпе библиотекарьсем поэт пултарулӑхне ырласа калаҫнӑ.

Аса илтерер: автор Тутарстанри Аксу районӗнчи Ҫӗмӗртлӗ ялӗнче ҫуралнӑ, пӗр вӑхӑт Шупашкарти пир-авӑр комбинатӗнче ӗҫленӗ, И.Н. Ульянов ячӗллӗ Чӑваш патшалӑх университетӗнчен вӗренсе тухнӑ хыҫҫӑн 1977–2003 ҫулсенче «Хатӗр пул» (каярахпа – «Ҫилҫунат», «Самант») журнал редакцийӗнче тӑрӑшнӑ.

Чӑваш наци телерадиокомпанине ертсе пынӑ, юлашки вӑхӑтра ЧР Патшалӑх Канашӗн ертӳлӗхӗн секретариачӗн пуҫлӑхӗ пулнӑ Александр Магарин пурнӑҫран уйрӑлнӑ. Вӑл 55 ҫулта пулнӑ.

Александр Николаевич Тутарстанри Ҫӗпрел районӗнче Аслӑ Аксу ялӗнче 1970 ҫулхи ҫу уйӑхӗн 3-мӗшӗнче ҫуралнӑ, И.Н.Ульянов ячӗллӗ ЧПУн историпе филологи факультетӗнче вӗреннӗ. Чӑваш наци телерадиокомпанине вӑл 2014-2016 ҫулсенче ертсе пынӑ. Кайран унта директор ҫумӗ пулнӑ. 2021 ҫултанпа Патшалӑх Канашӗнче ӗҫленӗ.

Александр Магаринпа хӑҫан тата ӑҫта сывпуллашасси хальлӗхе паллӑ мар.

Ираида Вдовинӑна, чӑваш юррисене пухакана тата юрлакана, вулакансенчен чылайӑшӗ ҫак сӑнӳкерчӗкре палласа илчӗ пулӗ. Мускаври "Мелодия" фирма кӑларнӑ виҫӗ пластинкӑна иртнӗ ӗмӗрӗн 70-мӗш ҫулӗсенче кашни килте тенӗ пекех ҫавӑрттаратчӗҫ, юрӑҫ сасси Чӑвашрадиопа кун сиктерсе тенӗ пек янӑратчӗ. 1985 ҫулта вӑл пухнӑ 222 юрра уйрӑм кӗнекен те пичетлесе кӑларнӑччӗ.

Кӑшт маларах Чӑваш телевиденийӗ Ираида Вдовина пурнӑҫӗпе пултарулӑхӗ ҫинчен киноочерк ӳкерме пуҫланӑччӗ. Сценари авторӗ пулнӑ май Ҫӗрпӳ районӗнчи Иккӗмӗш Туҫа ялне ҫитсе килтӗм. Ку вӑхӑт тӗлнелле Ираида Григорьевна вырӑнти ӑстасенчен ҫырса илнӗ юрӑ тетрачӗсене    Шупашкарти архивсене панӑччӗ ӗнтӗ. Анчах халӑхра анлӑ сарӑлнӑ юрӑсемпе такмаксене хӑҫан тата камран ҫырса илнине лайӑх ас тӑватчӗ. Хӑй Сӗнтӗрвӑрри районӗнчи Кӗчкей салинче ҫуралса ӳснӗ май кунти ватӑ ҫынсенчен илтнӗ юрӑсене уйрӑмах хаклатчӗ, вӗсене мӗнле илемлетни пирки каласа пани пухнӑ материала самай пуянлатрӗ.

Киноушкӑнпа яла килсен хӗрарӑмсене пуҫтарса вӑл вӑйӑ карти туса кӑтартрӗ, "Чечек те татас килет ман", "Кумма, кумма, ӑсатса яр", "Чей ӗҫесчӗ пылпала" тата ытти юрӑсене кинокамера умӗнче шӑрантарчӗ, юрра-ташша пултарасси ӑратран-ӑрата куҫса пыни пирки каласа пачӗ.

Малалла...

Чӑваш академи драма театрӗн сӑнӳкерчӗкӗ

Ӗнер, раштав уйӑхӗн 21-мӗшӗнче. Чӑваш патшалӑх академи драма театрӗнче чӑваш халӑх артистне Иван Иванова 70 ҫулхи юбилейпе саламланӑ.

Артист ячӗпе театр директорӗ Елена Николаева ӑшӑ сӑмах чылай каланӑ. Салам хыҫҫӑн «Карчӑксем качча каяҫҫӗ» спектакле кӑтартнӑ. Унта юбиляр Юманкка сӑнарне калӑпланӑ.

Иван Иванов 1955 ҫулхи раштав уйӑхӗн 21-мӗшӗнче Сӗнтӗрвӑрри районӗнчи Карапаш ялӗнче ҫуралнӑ. Мускаври М.С. Щепкин ячӗллӗ Аслӑ театр училищинчен 1983 ҫулта вӗренсе тухнӑранпах Чӑваш академи драма театрӗнче ӗҫлет.

Владимир Михайловӑн халах тетелӗчи страницинчен илнӗ сӑнӳкерчӗк

Красноармейски тӑрӑхӗнчи чӑваш хастарӗсем Нестер Янкас музейне уҫма ӗмӗтленеҫҫӗ. Анчах ку енӗпе хӑш-пӗр чӑрмав пур иккен.

Красноармейскинчи культура ҫуртӗнче нумаях пулмасть Нестер Янкас ячӗллӗ культурӑпа искусство тата литература пӗрлӗхӗн пӗтӗмлетӳллӗ ларӑвӗ иртнӗ. Унта пӗрлӗх ертӳҫи Иван Прокопьев 2025 ҫулта туса ирттернӗ ӗҫсем ҫинчен каласа кӑтартнӑ.

Янкасри ача сачӗ пулнӑ ҫурт (халӗ унта вулавӑш иккен) ҫумӗнче Нестер Янкас поэтӑн музейне йӗркелесси пирки сӑмах хускатнӑ май вӑл поэт ҫуралнӑ кун тӗлне (вӑл 1909 ҫулхи нарӑс уйӑхӗн 20-мӗшӗнче ҫуралнӑ) ҫак музее уҫма ӗмӗтленнине пӗлтернӗ. Ӑна тума материалсем ҫитменни чарса тӑрать-мӗн.

Кирилл Степанов архивӗнчи сӑн

Элӗк округӗнчи блогер тата ҫамрӑк фермер Кирилл Степанов каллех ҫитӗнӳ тунӑ. Хальхинче вӑл «Время молодых» проектра «АгроЛидер» номинацире 2-мӗш вырӑн йышӑннӑ.

Ку проекта Мускаври «Раҫҫей» наци центрӗнче пӗтӗмлетнӗ. Чыслава Раҫҫейри тӗрлӗ кӗтесри 1600 ытла ҫамрӑка чӗннӗ. Вӗсен йышӗнче ҫамрӑксен юхӑмӗсен лидерӗсем, усламҫӑсем, регионсенче ҫамрӑксен политикине аталантаракан специалистсем пулнӑ.

Палӑртса хӑварар: хальхи вӑхӑтра Кирилл Таиландра канать. Кун пирки вӑл халӑх тетелӗнчи страницинче пӗлтернӗ. «Икӗ ҫул пӗр канмасӑр ӗҫленӗ, акӑ халӗ пӗрремӗш отпуск. Таиланд. Аннеҫӗм, тавах, хуҫалӑх санӑн шанчӑклӑ аллунта», — тесе ҫырнӑ Кирилл.

Виталий Михайлов страницинчен илнӗ сӑнӳкерчӗк

Нестер Янкас ячӗллӗ пӗрлӗх 2025 ҫулшӑн литературӑпа искусство тата культура аталанӑвӗнче палӑрнисене Красноармейски муниципалитет округӗн Нестер Янкас ячӗллӗ преми лауреачӗн ятне парассипе ҫыхӑннӑ сӗнӳсене йышӑнма тытӑнать. ҫакӑн пек пӗлтернӗ пӗрлӗх ертӳҫин ҫумӗ Виталий Михайлов халӑх тетелӗнчи хӑйӗн страницинче.

Ӗҫсене 2026 ҫулхи нарӑс уйӑхӗн 20-мӗшӗччен йышӑнӗҫ. Сӑмах май каласан, Нестер Янкас поэт ҫуралнӑранпа 117 ҫул ҫитет. Уяв ячӗпе Красноармейски Культура ҫуртӗнче лауреатсен пысӑк концерчӗ пулӗ тата ҫӗнӗ лауреатсене чыслӗҫ.

«Кашни ырӑ япала, пултарулӑх хӑйӗн хакне тивӗҫлех. Конкурса иртсе каякан ҫулта литературӑпа искусство тата культура шайӗнче Трак тӑрӑхӗшӗн ырми-канми ӗҫленӗ, вулакансемшӗн, куракансемшӗн уҫӑмлӑ, чун-чӗрене ҫывӑх та пысӑк пӗлтерӗшлӗ сцена ӗҫӗсемпе, юрӑ-кӗвӗсемпе, куравсемпе, кӗнекесемпе, ытти пултарулӑх ӗҫӗсемпе савӑнтарнӑ ентешӗмӗрсем хутшӑнасса шанатпӑр эпир», — тесе хыпарланӑ эпир маларах Виталий Михайлов.

culture.cap.ru сӑнӳкерчӗкӗ

Раштав уйӑхӗн 16-мӗшӗнче Чӑваш академи драма театрӗнче чӑваш театрӗн 6 ӑстин юбилейӗ ячӗпе пуҫтарӑннӑ.

Унта пуҫтарӑннисем Николай Айзман драматурга, куҫаруҫӑна, артиста; Чӑваш Енре театр ӗҫне йӗркеленӗ, театрта 1920-1935-мӗш тата 1937-1940-меш ҫулсенче ӗҫленӗ Кирилл Егорова; Михаил Акимов-Аруй писателе; Иван Илларионов (Иван Мучи) писатель-сатирика, актера; Георгий Зайцев (Тал-Мӑрса) поэт-тӑлмача тата Чӑваш Республикин тава тивӗҫлӗ артистне Игнатий Молодова аса илнӗ.

Чӑваш патшалах гуманитари ӑслӑлӑхӗсен халӑх тетелӗнчи пабликӗнчен илнӗ сӑнӳкерчӗк

Раштав уйӑхӗн 16-мӗшӗнче чӑваш сӑвӑҫи, прозаикӗ, журналисчӗ Любовь Мартьянова ҫуралнӑранпа 75 ҫул ҫитнӗ май Чӑваш Енен Наци вулавӑшӗнче асӑну каҫӗ иртессине эпир унччен пӗлтернӗччӗ-ха.

«Эп чӗртнӗ вучах» асӑну каҫне Сергей Павлов, Арсений Тарасов, Марина Карягина, Светлана Асамат, Улькка Эльмен, Василий Кервен, Ольга Австрийская-Иванова, Александр Ильин тата ытти ҫыравҫа, культурӑпа вӗренӳре ӗҫлекен Надежда Кириллова, Николай Осипов, Леонид Петров, Чӑваш патшалӑх гуманитари институчӗн ӑсчахӗсем Виталий Родионов, Альбина Мышкина, Вера Никифорова, Чӑваш патшалӑх педагогика университечӗн студенчӗсем тата Любовь Васильевнӑн ҫывӑх ҫыннисемпе Галина хӗрӗ хутшӑннӑ.

Асӑну каҫне пухӑннисем Любовь Мартьянова пирки ӑшшӑн аса илсе калаҫнӑ.

«Контактри» сӑн

Шупашкарти кинолог лавккана кайнӑ та ӑнсӑртран вӑрра тытса чарнӑ. Ку полици прапорщикӗпе, ШӖМӗн Кинологи службин инспектор-кинологӗпе Алексей Пятаковпа пулса иртнӗ.

Раштавӑн 15-мӗшӗнче каҫхине вӑл Эгер бульварӗнчи супермаркета кайнӑ. Ӑнсӑртран вӑл хӑйне темлерех тытакан арҫынна асӑрханӑ. Хайхискер ҫӳлӗксем ҫинчи тавара илнӗ те кӗсьене чикнӗ. Кассӑна пырсан вара пӗр ҫӑкӑршӑн кӑна тӳленӗ.

Алексей Пятаков кун пирки лавкка хуралҫине пӗлтернӗ. Вӑл патрульпе пост службин нарячӗ киличчен ҫав арҫынна ниҫта та яман, тытса тӑнӑ.