culture.cap.ru сайтран илнӗ сӑнӳкерчӗк

Ҫу уйӑхӗн 15-мӗшӗнче К.В. Иванов ячӗллӗ Чӑваш патшалӑх академи драма театрӗнче Раҫҫей тава тивӗҫлӗ артсичӗн, чӑваш халӑх артисчӗн Владимир Семёновӑн юбилей каҫӗ иртӗ. Ака уйӑхӗн 16-мӗшӗнче вӑл 75 ҫул тултарнӑ, ҫав шутран 52 ҫулне чӑваш театрӗнче ӗҫлет.

Владимир Валентинович Шупашкар районӗнчи Ҫӗньял-Покровски ялӗнче ҫуралнӑ. 1972 ҫулта Ленинградри театр, музыка тата кинематографи институтӗнчен вӗренсе тухнӑ. Ун хыҫҫӑ ӑна Чӑваш драма театрӗн туппине илнӗ.

Ентешӗмӗр ҫак ҫулсенче 170 ытла тӗрлӗ сӑнара калӑпланӑ. Юбилей каҫӗнче «Чунӑм, Лиза-Акулина» кӑтартӗҫ. Унта артист Григорий Муромский боярин ролӗнче пулӗ.

culture.cap.ru сайтран илнӗ сӑнӳкерчӗк

Вырӑс драма театрӗн артистки Лариса Родик паян, ҫу уйӑхӗн 8-мӗшӗнче, 65 ҫул тултарнӑ.

Лариса Родик 1959 ҫулхи ҫу уйӑхӗн 8-мӗшӗнче Хабаровск тӑрӑхӗнчи Вяземский хулинче ҫуралнӑ. 1983 ҫулта вӑл Инҫетхӗвелтухӑҫ ӳнер институтӗнчен «Драма театрӗн тата кино артисчӗ» специальноҫлӑ дипломпа вӗренсе тухнӑ. Дипломлӑ актер Амур ҫинчи Комсомольск, Кинешма, Иваново, Норильск, Хабаровск хулисенчи театрсен сцени ҫинче вылянӑ. Шупашкара Лариса Родик 1997 ҫулта куҫса килнӗ. Вӑл вӑхӑтра Родик сцена ӑсти ятне илнӗ актриса пулнӑ ӗнтӗ.

2020 ҫулта сцена ӑсти «Раҫҫей Федерацийӗн тава тивӗҫлӗ артистки» ята тивӗҫнӗ.

"Контактри" сӑн

Муркаш муниципаллӑ округӗнчи Оринин ялӗнче пурӑнакан Зина Саввова ал ӗҫӗпе питӗ аппаланма юратать. Унӑн килӗнче ҫыхнӑ япала нумай: минтерсем, чечексем, вырӑн ҫиттисем...

Вӑл - тыл ӗҫченӗ тата ӗҫ ветеранӗ. Малтан упӑшкипе колхозра вӑй хунӑ, кайран Туберкулезпа кӗрешекен диспансерта темиҫе ҫул санитарка пулнӑ. Тивӗҫлӗ канӑва тухсан Зина Саввова хӑйӗн юратнӑ алӑ ӗҫӗпе аппаланма тытӑннӑ. Ҫыхасси - унӑн чун киленӗҫе. Хӑй каланӑ тӑрӑх, вӑл унӑн кӑмӑлне ҫӗклет.

Халӗ Зина Саввова ачисемпе, мӑнукӗсемпе, вӗсен ачисемпе савӑнса пурӑнать.

"Контактри" сӑн

Кӗҫех «Раҫҫей мисӗ - 2024» илем конкурсӗ иртӗ. Кам хӳтӗлӗ-ха пирӗн республика чысне?

Нумаях пулмасть регион шайӗнче иртнӗ «Чӑваш Ен мисӗ» конкурса пӗтӗмлетнӗ. Унта Шупашкарта пурӑнакан Алла Кадеева ҫӗнтернӗ. Вӑл - 17 ҫулта. Шӑпах вӑл Раҫҫей шайӗнче иртекен илем конкурсне пирӗн республика чысне хӳтӗлеме кайӗ.

Чӑваш драма театрӗн сӑнӳкерчӗкӗ

Паян Чӑваш патшалӑх академи драма театрӗнче РСФСР халӑх артистне Николай Григорьева 85 ҫулхи юбилейпа саламланӑ.

Чӑваш Енри Театр ӗҫченӗсен союзӗн ертӳҫи Сергей Павлов Николай Даниловича пӗрлешӗвӗн чи пысӑк наградипе — «Чӑваш Енӗн театр ӳнерне аталантарма пысӑк тӳпе хывнӑшӑн» медальпе чысланӑ.

Театрта пӗлтернӗ тӑрӑх, унсӑр пуҫне юбиляра унӑн вӗренекенӗсем те саламларӗҫ, вӗсем хушшинче театрти ҫамрӑк артистсем те, культура тата ӳнерсен институчӗн студенчӗсем саламланӑ.

"Чӑваш Ен" ПТРК видеовӗнчен илнӗ сӑнӳкерчӗк

Елчӗксем хӑйсен сумлӑ ентешне Олег Мустаева асра тытса «Янра, хут купӑс!» фестиваль ирттернӗ.

Олег Мустаев тележурналист, Чӗмпӗр тӑрӑхӗнчи чӑвашсен наципе культура автономийӗн ертӳҫи пулнӑ. Унӑн ятне асра тытас тесе ентешӗсем регионсем хушшинчи фестиваль йӗркелеме йышӑннӑ. Унта Чӗмпӗр хулисӗр пуҫне Пенза, Челябинск, Хусан, Мускав, Питӗр хулисенчен, Тутарстанпа хамӑр республикӑри тӗрлӗ тӑрӑхран 50-а яхӑн купӑсҫӑ пырса ҫитнӗ.

Транспорт полицийӗ тунӑ сӑн

Чӑваш Енри 32 ҫулти арҫынна Толмачево аэропортӗнче тытса чарнӑ. Вӑл Забайкалье крайӗнчен вахтӑран таврӑннӑ.

Хайхи арҫын Читаран Новосибирска вӗҫекен самолетра туалетра пирус туртма шутланӑ. Бортпроводниксем шӑршӑ сиснӗ те Толмачево аэропортне ҫитсен кун пирки транспорт полицине пӗлтернӗ.

Самолетпа вӗҫнӗ чухне йӗркене пӑснӑшӑн арҫын тӗлӗшпе административлӑ протокол ҫырнӑ. Вӑл куншӑн 500-1500 тенкӗ штраф тӳлеме пултарӗ.

"Чӑваш Ен" ПТРК видеовӗнчен илнӗ сӑнӳкерчӗк

Шупашкар районӗнчи Самуккассинче чӑваш поэтне тата журналистне, Георгий Порфирьева (Ирхие), асра тытса асӑну хӑми уҫнӑ. Ӑна паллӑ ҫын пурӑннӑ ҫуртӑн тимӗр карти ҫине ҫакса хунӑ.

Поэта лайӑх пӗлекенсем каланӑ тӑрӑх, вӑл пиллӗкре чухне ялти библиотекӑна ҫырӑннӑ та ҫиччӗ тултарнӑ тӗле ҫӳлӗк ҫинче вуламан кӗнеке те хӑварман имӗш.

«Чӑваш Ен» ПТРК пӗлтернӗ тӑрӑх, пӗчӗкрен литературӑна чуншӑн ҫывӑх йышӑннӑ ача ҫитӗнсен хӑйне тӗрлӗ профессире шыранӑ. Чӑваш патшалӑх университетӗнче пӗлӳ илсен Пукане театрӗн сцени ҫинче вылянӑ, Чӑваш патшалӑх телерадиокомпанийӗнче 30 ҫул ытла редакторта тӑрӑшнӑ. Георгий Ирхи вырӑсла тата чӑвашла ҫырнӑ.

Авторӑн кӗнекисен шутӗнче: «Шыври хӗвел», «Тасалу», «Вӑтанчӑк аслати».

К.В. Иванов ячӗллӗ музей страницинчен илнӗ сӑнӳкерчӗк

Шупашкарти К.В. Иванов ячӗллӗ музейра чӑваш халӑх поэчӗ Ҫемен Элкер ҫуралнӑранпа 130 ҫул ҫитнине халалланӑ мероприяти иртнӗ.

Унта хутшӑннӑ педагогика наукисен кандидачӗ, профессор, Юлия Дмитриева Александр Васильев композитор Ҫемен Элкерӗн «Хӗн-хур айӗнче» поэми тӑрӑх опера хатӗрлессипе ӗҫлени ҫинчен пӗлтернӗ.

Пысӑк Упакассинчи тата Йӗпреҫри шкул ачисем поэтӑн сӑввисене вуланӑ. Нина Ерилеева тата Раиса Евграфова краеведсем тӑван тӑрӑхӗсенче поэта халалласа ирттерекен мероприятисем ҫинчен каласа кӑтартнӑ. Шупашкарти комплекслӑ социаллӑ центрӑн «Надежда» хорӗ юрӑсем шӑрантарнӑ.

Юбилярӑн мӑнукӗ Людмила Эльгер пуҫтарӑннисене хӑйӗн ҫывӑх ҫыннине асра тытнӑшӑн тав туса сӑмах каланӑ.

Энвер Аблякимов страницинчен илнӗ сӑнӳкерчӗк

Чӑваш Енри Мордва культура центрӗн председательне Владимир Седойкина «Чӑваш Республики умӗнчи тава тивӗҫлӗ ӗҫсемшӗн» орденпа чысланӑ. Чӑваш Енӗн Элтеперӗ алӑ пуснӑ документра «нацисем хушшинчи хутшӑнӑва ҫирӗплетессинче тата тивӗҫлӗ ӗҫсемшӗн тата обществӑри хастар ӗҫшӗн» тесе палӑртнӑ.

Владимир Павлович ака уйӑхӗн 22-мӗшӗнче 75 ҫул тултарнӑ. Владимир Седойкин – Чӑваш Республикин тава тивӗҫлӗ строителӗ, Чӑваш Патшалӑх Канашӗн иккӗмӗш созыври депутат, 2001-2005 ҫулсенче Пӑрачкав районӗн администрацийӗн пуҫлӑхӗ пулнӑ.