ЧР Культура министерствин сӑнӳкерчӗкӗ

Шупашкарти Патшалӑхӑн хальхи вӑхӑтри историйӗн архивӗнче чӑваш халӑх поэчӗн Юрий Сементерӗн 85 ҫулхи юбилейне халалланӑ курав уҫӑлнӑ. «Зеркало чувашской души» (чӑв. Чӑваш чунӗн тӗкӗрӗ) документлӑ куравра поэтӑн пирвайхи публикацийӗсенчен пуҫласа халӑхра ят-сум илнӗ хайлавӗсем таранах вырӑн тупнӑ. Унӑн алҫырӑвӗсем те пур.

Курава уҫма 85 ҫулти поэт хӑй те хутшӑннӑ.

«Контактри» сӑн

Муркаш округӗнчи Турай тӑрӑхӗнче пурӑнакан Ольга Краснова ҫак кунсенче 100 ҫулхи юбилейне паллӑ тунӑ.

Ольга Дмитриевна Уйкас ялӗнче ҫуралса ӳснӗ. Ҫамрӑклах колхоз ӗҫне кӳлӗннӗ, фронта кайнӑ арҫынсен вырӑнне тӑрӑшнӑ.

Вӑл – тыл ӗҫченӗ. Ҫӗнтерӗве ҫывхартма пулӑшнӑшӑн ӑна «1941-1945 ҫулсенчи Тӑван ҫӗршывӑн Аслӑ вӑрҫинче хастар ӗҫленӗшӗн» медальпе чысланӑ.

cheb-centr.soc.cap.ru сӑнӳкерчӗк

Шупашкарта пурӑнакан Ивенира Сапожникова ӗнер 80 ҫул тултарнӑ. Ҫав ятпа ӑна хулари халӑхӑн социаллӑ ыйтӑвӗсене тивӗҫтерекен комплекслӑ центрӑн ӗҫченӗсем: Александра Смирнова тата Наталия Митрофанова — саламланӑ.

Ивенира Николаевна 1946 ҫулхи кӑрлач уйӑхӗн 21-мӗшӗнче Етӗрне районӗнчи Кӑташ ялӗнче ҫуралнӑ. Пӗр вӑхӑт шкулта пионервожатӑй пулса тӑрӑшнӑ, унтан Шупашкара куҫса килнӗ. Пир-авӑр комбинатне вӑхӑтлӑха тесе вырнаҫнӑ та унта 35 ҫул ӗҫленӗ.

Вӑл мӑшӑрӗпе икӗ ывӑл пӑхса ӳстернӗ. Паян кинемейӗн мӑнуксемпе вӗсен ачи таранах пур. Ҫамрӑксем ватта ҫӑмӑлтарах пултӑр тесе социаллӑ ӗҫчен те тытнӑ. Наталия Митрофановӑна ватӑ ҫын хӑйӗн хӗрӗ вырӑннех хурать. Центрта пӗлтернӗ тӑрӑх, Наталия Станиславовна та ватта чунтан хисеплет.

Яндекс сӑнӳкерчӗкӗ

Паян Агриппина Янович вӑрҫӑ ветеранӗ пурнӑҫран уйрӑлса кайнӑ. Вӑл 100 ҫулта пулнӑ.

Ҫак йӗркесен авторӗ ун патӗнче ӗҫпе темиҫе те пулнӑччӗ. Иртнӗ кунҫулне туллин те кӑсӑклӑн аса илсе каланипе вӑл асра юлнӑ. Пӗр икӗ-виҫӗ ҫул каялла та ветеран дачӑра ӗҫленӗ, хулари хӑй пурӑнакан нумай хваттерлӗ ҫурт умне чечек лартса пӑхса тӑнӑ.

Агриппина Ивановнӑпа кӑрлач уйӑхӗн 23-мӗшӗнче сывпуллашӗҫ.

«Контактра» халӑх тетелӗнчи сӑн

Ҫӗрпӳ округӗнчи Сӑнав поселокӗнчи Нина Иванова 102-мӗш ҫуралнӑ кунне паллӑ тунӑ. Вӑл – тыл ӗҫченӗ, ӗҫ ветеранӗ, Тӑван ҫӗршывӑн Аслӑ вӑрҫи вӑхӑтӗнчи нушана курнӑ.

Нина Николаевна 1924 ҫулта Шупашкарта ҫуралнӑ. 1941 ҫулта унӑн ашшӗне элеклесе тӗрмене хупнӑ, вӑл унта вилнӗ. Ҫемье кил-ҫуртсӑр юлнӑ.

Вӑрҫӑ вӑхӑтӗнче Нина Иванова эвакуаципе килнӗ савутра фрезер станокӗпе ӗҫленӗ. Вӑрҫӑ пӗтсен Чӑваш ял хуҫалӑх институтӗнче вӗреннӗ, пулас упӑшкипе Николай Ивановичпа паллашнӑ. Вӗсем икӗ ача ҫуратса ӳстернӗ.

chuvdram.ru сӑнӳкерчӗкӗ

Чӑваш академи драма театрӗ ҫитес уйӑхра Чӑваш Республикин тава тивӗҫлӗ артисчӗн Николай Сергеевӑн юбилей каҫне ирттерет. Мероприяти нарӑс уйӑхӗн 6-мӗшӗнче, эрнекун, 18 сехетре, пуҫланӗ.

Николай Сергеев 1961 ҫулхи кӑрлач уйӑхӗн 31-мӗшӗнче Шӑмӑршӑ районӗнчи Асанкасси ялӗнче ҫуралнӑ. 1983 ҫулта Мускаври М.С. Щепкин ячӗллӗ Аслӑ театр училищинчен (институтӗнчен) вӗренсе тухнӑранпах чӑваш театрӗнче ӗҫлет.

Юбилее халалланӑ каҫ А.Н. Островскийӗн пьеси тӑрӑх лартнӑ «Юлашки парӑм» спектакле кӑтартӗҫ. Унта Шӑмӑршӑ ҫӗрӗн арӗ Флор Федулыч сӑнарне калӑплать.

forum.na-svyazi.ru сӑнӳкерчӗкӗ

Республикӑн стоматологи пульницин тӗп врачӗ пулма 51 ҫулти Роман Матвеева шаннӑ.

Вӑл хӑй вӑхӑтӗнче И.Н. Ульянов ячӗллӗ Чӑваш патшалӑх университетӗнчен вӗренсе тухнӑ. Питпе янах шӑммин хирургӗ, стоматолог, медицина наукисен докторӗ.

Республикӑн стоматологи пульницин тӗп врачӗнче тӑрӑшнӑ Николай Уруков Ҫӗнӗ Шупашкарти хула пульницинче тӗп врачра ӗҫлеме пуҫланӑ.

«Контактра» халӑх тетелӗнчи сӑн

Шупашкарта пурӑнакан Сергей Самбулаткин карҫинккасем, тӗрлӗ япала ҫыхма ӑста. Унӑн ӗҫӗсене ярмӑрккӑсемпе фестивальсенче курма пулать. Вӑл регион тулашӗнче иртекеннисене те хутшӑнать.

Ку ӗҫпе вӑл 20 ҫул ӗнтӗ аппаланать. Малтанах Сергей Петрович Чӑваш Енри ӑстасем патӗнче вӗреннӗ, халӗ хӑй те – профессионал: ку ӑсталӑха ҫамрӑксене те вӗрентет. Унӑн вӗренекенӗсен хушшинче хӑлха япӑх илтнипе аптӑракансем те пур.

«Про Город» телеграм-каналӗнчен илнӗ сӑн

Нумаях пулмасть Шупашкар хула администрацийӗ чи лайӑх дворниксене чысланӑ, ҫав йышра Тамара Тарасова та пулнӑ.

Тамара Львовна 65 ҫулта, вӑл Шупашкарта дворникре ӗҫлет. Ку профессире 17 ҫул тӑрӑшать. Тамара Львовна кашни ир ӗҫе Муркаш округӗнчи Мӑн Сӗнтӗртен килет.

«Мана килӗшет хамӑн ӗҫ. Эпӗ профессионал пуль ӗнтӗ. Эпӗ пӑхса тӑракан ҫуртсенче лайӑх ҫынсем пурӑнаҫҫӗ, мана хисеплеҫҫӗ», – тет вӑл.

«Контактри» сӑн

Паян Патӑрьел округӗнчи Шӑхач ялӗнче пурӑнакан Феоктист Васильев пӗр ӗмӗр хыҫа хӑварнине, 100 ҫул тултарнине, паллӑ тунӑ.

Феоктист Александрович Тӑван ҫӗршывӑн Аслӑ вӑрҫин хутшӑннӑ, десантник пулнӑ. Вӑрҫӑран таврӑнсан вӑл вӑрман хуҫалӑхӗнче чылай ҫул ӗҫленӗ. 1972 ҫулта вӑрмансенче пушар алхасма пуҫланӑ, ҫавӑн чухне Феоктист Александровчи эрни-эрнипе киле таврӑнман.

Ветерана саламлама Патӑрьел округӗн пуҫлӑхӗ Рудольф Селиванов та килнӗ.