«Контактри» сӑн

Вӑрнарта пурӑнакан Борис Егорычев велосипед вӑррине ярса тытма пулӑшнӑ. Куншӑн вӑл полицейскисенчен Тав хутне тивӗҫнӗ.

Борис Ҫӗнӗ Шупашкарта ӑнсӑртран темиҫе велосипед вӑрланӑ арҫынна, шыравра пулнӑскере, Вӑрнарта асӑрханӑ. Вӑл хӑйне мӗнле тыткалани ӑна сисчӗвлентернӗ, ҫавӑнпа пӗр тӑхтамасӑр полици ӗҫченӗсене чӗннӗ.

Ҫапла Борис Егорычев пулӑшнипе йӗрке хуралҫисем судпа унччен те айӑпланнӑ 46 ҫулти арҫынна ярса тытнӑ.

forum.na-svyazi.ru сӑнӳкерчӗкӗ

Куславккара причал тума «Нептун» компание суйласа илнӗ. Причалсӑр пуҫне вӑл ҫав территорие те илемлетӗ.

Подряд организацин мӗнпур ӗҫе 2027 ҫулхи утӑ уйӑхӗн 7-мӗшӗччен пурнӑҫламалла.

«Нептун» (ИНН 2130189390) тулли мар яваплӑ обществӑна 2017 ҫулхи утӑ уйӑхӗн 14-мӗшӗнче регистрациленӗ. Унӑн учредителӗ тата директорӗ — Алексей Сухалов. Асӑннӑ общество ҫурт-йер тӑвассипе ӗҫлет.

Куславккари Аксинья Кудряшова, 7-мӗш класра вӗренекенскер, Раҫҫей ШӖМӗ йӗркеленӗ ача-пӑча ӳкерчӗкӗсен конкурсӗнче ҫӗнтернӗ. Унӑн ӗҫӗ 12-14 ҫулсенчи ачасен хушшинче палӑрнӑ.

Аксинья ашшӗ-амӑшне ӳкернӗ. Унӑн амӑшӗ Светлана Николаевна – полици капитанӗ. Ашшӗ Владимир Николаевич – отставкӑри майор. Вӗсем службӑра паллашнӑ. Халӗ 3 ача ӳстереҫҫӗ: Катя, Аксинья тата Андрей. Аппӑшӗ те хитре ӳкерет, вӑл та ку конкурса икӗ хут хутшӑннӑ.

cap.ru сайтри сӑн

Елчӗк округӗнчи Кивӗ Эйпеҫ ялӗнче пурӑнакан Кудряшовсем кевер туя паллӑ тунӑ. Вӗсем 5 ача ҫуратса ӳстернӗ. Халӗ 7 мӑнукпа тата вӗсен 6 ачипе савӑнса пурӑнаҫҫӗ.

Петр Михайлович тивӗҫлӗ канӑва тухиччен тӗрлӗ предприятире сварщикре ӗҫленӗ. Нина Зиноновна вара колхозра вӑй хунӑ. Тӑрӑшса ӗҫленӗшӗн Хисеп хӑми ҫине пӗрре мар лекнӗ. Вӑл вырӑнти тата районти депутата суйланнӑ. Нина Зиноновна — ӗҫ ветеранӗ. 1973 ҫулта ӑна «Хисеп палли» орденпа чысланӑ.

Мӑшӑр ҫирӗп ҫемье вӑрттӑнлӑхне уҫнӑ. «Пӗр-пӗрне итлеме тата илтме пӗлмелле», — теҫҫӗ Кудряшовсем.

vk.com/gov_cap_ru видеовӗнчен илнӗ скриншот

Чӑваш Енре 6 пин ытла водитель таксире ӗҫлет иккен. Кун пирки республикӑн Транспорт министерствинче пӗлтернӗ. Анчах асӑннӑ йышран йӗркене пурте пӑхӑнмаҫҫӗ-мӗн.

Таксистсене пула ҫул ҫинче инкексем те пулса иртеҫҫӗ. Кӑҫал ун пек пӑтӑрмах 10 хут пулнӑ, ҫав шутран виҫҫӗшӗнче пассажирсем шар курнӑ.

Республикӑн Транспорт министерстви 112 терӗслев ирттернӗ, йӗркене пӑснӑ 141 тӗслӗхе тупса палӑртса административлӑ майпа явап тыттарнӑ.

Вал е ку таксие суйланӑ чухне лицензи пуррине шута илме сӗнеҫҫӗ.

ЧПГӐИ сӑнӳкерчӗкӗ

Чӑваш патшалӑх гуманитари ӑслӑлӑхӗсен институчӗ «Халӑх ӑс-хакӑлӗн иксӗлми ҫӑлкуҫӗ: сӑмах мехелӗпе чӗлхе хавалӗ» республикӑри форум иртесси пирки пӗлтернӗ. Вӑл нарӑс уйӑхӗн 17-мӗшӗнче Шупашкарта пулӗ.

Форума паллӑ критик тата литературовед, филологи наукисен докторӗ, профессор, Юрий Артемьев 85 ҫул тултарнине халаллӗҫ.

«Контактра» халӑх тетелӗнчи сӑн

Шупашкарти Артем тата Даниил Михайловсем компьютерпа ӗҫлемелли сӗтел валли эко-подставка шухӑшласа кӑларса патент илнӗ. Вӑл сӗтел хушшинче нумай вӑхӑт ларнӑ чухне ҫӑмӑллӑх кӳрет.

Пӗррехинче 17-ри Даниил ашшӗне пӗчӗк сӗтел хушшинче ларма меллӗ мар пулнине каланӑ. Пӗрле вӗсем ансат та меллӗ япала шутласа кӑларнӑ: йывӑҫ подставкӑна кирлӗ пек вырнаҫтарма пулать.

Халӗ ку япалана вӗсем сутаҫҫӗ. Пӗрремӗш партие тусӗсемпе тата пӗлӗшӗсемпе кӑларнӑ. Вӗсене маркетплейссем урлӑ сутса пӗтернӗ.

Халӗ Михайловсем производство хута яма ӗмӗтленеҫҫӗ.

nta-pfo.ru сайтри сӑн

Паян кӑнтӑрла ҫитеспе, 11 сехетсенче, Улатӑрти 7-мӗш шкулта мина хунӑ тесе 112 пӗрлехи службӑна пӗлтернӗ.

Вырӑна оперативлӑ службӑсем, Инкеклӗ лару-тӑру министерствин, вырӑнти администраци ӗҫченӗсем, вӑй структуринчи ҫынсем килнӗ. Вӗренекенсене, вӗрентекенсене, шкулта ӗҫлекенсене эвакуациленӗ. Ун хыҫҫӑн шкула тӗрӗсленӗ. Сирпӗнекен хатӗр тупман.

Хальхи вӑхӑтра шкул яланхи режимпа ӗҫлет. Мина хуни пирки пӗлтернӗ ҫынна вара тупнӑ.

cap.ru сайтри сӑн

Чӑваш Ен Элтеперӗ Олег Николаев ҫитес ҫула республикӑра мӗне халалланине палӑртнӑ, хушӑва алӑ пуснӑ.

Ҫитес ҫул Чӑваш Енре Халӑхсен туслӑхӗн ҫулӗ пулӗ. Олег Алексеевич палӑртнӑ тӑрӑх, шӑпах уншӑн ҫынсем нумай сасӑланӑ.

Аса илтерер: пӗлтӗр республикӑра Ҫӗнтерӳ тата патриотизм ҫулталӑкӗ пулнӑ, 2024 ҫулта вара – Экологи культурипе ҫутҫанталӑкпа перекетлӗ усӑ курмалли ҫулталӑк.

dzen.ru сайтри сӑн

Йӗпреҫ округӗнчи медсестра ултавҫӑсене 3 млн ытла тенкӗ куҫарса панӑ. Ун патне «пульницӑн тӗп тухтӑрӗ» шӑнкӑравланӑ, кӗҫех унпа ФСБ ӗҫченӗ ҫыхӑнассине пӗлтернӗ.

Кӑштахран чӑнах та «ятарлӑ службӑран» шӑнкӑрав килнӗ. Хайхискер каланӑ тӑрӑх, хӗрарӑм ячӗпе такам Украина ҫарӗсене куҫарса пама кредит илнӗ. Ку ӗҫе чарса лартма часрах пӗтӗм укҫана «шанчӑклӑ» счет ҫине куҫарма хушнӑ.

Пухнӑ укҫине счет ҫинчен илнӗ, машинине сутнӑ, тӑванӗсемпе ӗҫтешӗсенчен кивҫен ыйтнӑ. Пӗтӗмпе 3 млн ытла тенкӗ куҫарса панӑ. Хӗрарӑм ултавҫӑ хушнипе ҫӗнӗ телефон туяннӑ, мӗн ҫырӑннине хуратнӑ, укҫа куҫарма кӳршӗ хулана кайнӑ. Хӑйне улталанине вӑл виҫҫӗмӗш кунхине кӑна ӑнланнӑ.