"Контактри" сӑн

Республикӑри «Автоледи» конкурс вӗҫленнӗ, ҫӗнтерӳҫӗсене палӑртнӑ.

Пӗрремӗш вырӑна Екатерина Матвеева йышӑннӑ, иккӗмӗш вырӑна – Марина Васильева, виҫҫӗмӗшӗне — Анастасия Чинаева тата Екатерина Ятрушева. Екатерина Матвеевӑпа Татьяна Петровӑна чи лайӑх пултарулӑх номерӗшӗн уйрӑммӑн палӑртнӑ.

Палӑртса хӑварар: кӑҫал конкурса 30 хӗр-хӗрарӑм хутшӑннӑ, анчах финала 12-шӗ ҫеҫ тухма пултарнӑ.

«Лиза Алерт» шыравпа ҫӑлав отрячӗн архивӗнчи сӑн

Элӗк округӗнче 76 ҫулти хӗрарӑм ҫухалнӑ. Ӑна «Лиза Алерт» шыравпа ҫӑлав отрячӗн хастарӗсем шыраҫҫӗ.

Димитриева (Дмитриева) Маргарита Петровна Шуркасси ялӗнче пурӑнать. Утӑ уйӑхӗн 21-мӗшӗнче вӑл килтен кайнӑ та таврӑнман. Тӑванӗсем вӑл ӑҫталла ҫул тытнине пӗлмеҫҫӗ. Вӑл ӑс-тӑн арпашӑннипе аптӑрама пултарать.

Ӑна куракансене ҫак номерсемпе шӑнкӑравлама ыйтаҫҫӗ: 8 800 700-54-52 (Раҫҫейре тӳлевсӗр) е 89876687081 (шырав инфоргӗ Виктория (Искрич).

Йӗпреҫ районӗнчи Хурамал ялӗнче пурӑнакан 41 ҫулти арҫын хӗрӗсене алимент тӳлесшӗн пулман. Ӑна РФ Пуҫиле кодексӗн 157-мӗш статйин 1-мӗш пайӗпе явап тыттарнӑ май ӑна 5 уйӑх ӗслесе юсантарма йышӑннӑ. Ҫав вӑхӑтра тупӑшӑн 10 процентне патшалӑх валли тытса юлӗҫ.

Ачисене алимент тӳлеменшӗн арҫынна унччен административлӑ майпа явап тытарнӑ-ха. Апла пулин те вӑл парӑма ҫур миллион тенкӗрен те ирттерсе янӑ.

cap.ru сайтри сӑн

Улатӑр округӗнче пурӑнакан Илюшинсем пӗр-пӗрне ӑнланса пурӑнаҫҫӗ. Вӗсем пӗрлешнӗренпе нумаях пулмасть 50 ҫул ҫитнӗ.

Ҫак тапхӑрта вӗсем ҫирӗп ҫемье йӗркеленӗ, икӗ ывӑл ӳстернӗ, халӗ вӗсен 3 мӑнук. Вӗсен йышӗнче спортсменсем те, ӳнерҫӗсем те пур.

Александр Алексеевич та, Людмила Александровна та чукун ҫул ҫинче ӗҫленӗ, пӗр-пӗрне пулӑшса пынӑ.

Малышевсем. «Контактри» сӑн

Ҫӗрпӳ округӗнчи Виҫикасси ялӗнче пурӑнакан Малышевсем туй тунӑранпа ҫур ӗмӗр ҫитнӗ – вӗсем ылтӑн туя паллӑ тунӑ.

Юбилярсем хӑйсем каланӑ тӑрӑх, вӑхӑт сисӗнмесӗрех иртнӗ. Ҫак ҫулсенче вӗсем йывӑрлӑхсене хыҫа хӑварса иртнине ӑшшӑн, йӑл кулса аса илеҫҫӗ.

Муркаш тӑрӑхӗнчи Ҫулав ялӗнчи Ершовсем те ылтӑн туя паллӑ тунӑ. Римма Трифоновнӑпа Юрий Николаевич шкулта паллашнӑ, 1975 ҫулта пӗрлешнӗ. Вӗсем иккӗшӗ те пурнӑҫне ачасене вӗрентессине халалланӑ.

Улатӑр районӗнче пурӑнакансене шывпа тивӗҫтерме Чӑваш Ен хыснинчен 3,2 миллион тенке укҫа уйӑрса панӑ. Кӗмӗле резерв фондӗнчен уйӑрма йышӑннӑ.

Укҫана уйӑрса парасси ҫинчен калакан документа республикӑн Министрсен Кабинечӗн ертӳҫи Сергей Артамонов алӑ пуснӑ.

Стемас яле патӗнче Сӑр юханшывӗнче шыв шайӗ чакнине пула инкеклӗ лару-тӑру сиксе тухма пултарнӑ. Резерв фондӗнчен уйӑрнӑ уксана шыва уҫласа илме икӗ насус туянма, хӑйӑр насуссне экскаватор-амфибипе тасатма усӑ курӗс. Унсӑр пуҫне укҫа ятарлӑ техникӑна арендӑна илсе вырӑна илсе ҫитернишӗн тӳлеме кайӗ.

vet.cap.ru сайтран илнӗ сӑнӳкерчӗк

Ҫӗрпу тӑрӑхӗнче урнӑ тилле пула карантин тесе йышӑннӑ. Чару мерисем пирки калакан хушӑва республика Элтеперӗ Олег Николаев алӑ пуснӑ. Карантин вӑхӑчӗ утӑ уйӑхӗн 16-мӗшӗнче пуҫланнӑ.

Урна тилӗ «Солнышко» пахча юлташлӑхне пырса кӗнӗ. Ветеринарсем анализ тунӑ та тилӗ чирлӗ пулнине палӑртнӑ.

Халӗ ветеринарсем чир вырӑнне сиенсӗрлетессипе ӗҫлеҫҫӗ.

cap.ru сайтри сӑн

Красноармейски округӗнчи Йӗпрем ялӗнчи пӗве патӗнче халӗ чӑннипех те лайӑх канма пулать. Унта пляж тунӑ.

Пляжа Йӗпремре пурӑнакансем пуҫаруллӑ бюджет программипе килӗшӳллӗн хута янӑ. Унта халӗ хывӑнса тӑхӑнмалли вырӑн, душ пур, ҫавӑн пекех шыв кӗрет, юхса тухать. Тавралла вара карта тытса ҫавӑрнӑ.

Ку кӑна мар. Пуласлӑхра унта шезлонгсем, катамарансем пулӗҫ, сулхӑнра выртма сунчӑксем вырнаҫтарӗҫ. Хӗлле вара пӗвене вӑйӑсем выляма тасатӗҫ.

«Контактри» сӑн

Санкт-Петербургри ӑста, Артиллери ҫарпа истори музейӗн тӗп ӳнерҫи Евгений Емельнов темиҫе кун Сӗнтӗрвӑрри хулинче пулнӑ. Ҫак тапхӑрта вӑл темиҫе картина ӳкернӗ: хулари урамсене, ҫуртсенче, хитре вырӑнсене…

Ӳкерчӗкӗсем илемлӗ пулса тухнӑ. Вӗсем Сӗнтӗрвӑррин илемне туйма май параҫҫӗ.

Инкеклӗ лару-тӑру министерстви тунӑ сӑн

Ҫӗнӗ Шупашкарта путакан икӗ ҫынна ҫӑлнӑ. Пӗр арҫын Атӑл урлӑ ишсе каҫма шухӑшланӑ. Анчах вӑл юраман вырӑна кӗрсе кайнӑ та путма тытӑннӑ. Телее, иртсе пыракан ҫынсем ӑна асӑрханӑ та часрах ҫӑлавҫӑсене чӗннӗ. Вӗсем ӑна пулӑшнӑ.

39 ҫулти хӗрарӑм вара шыва кӗме юраман ҫӗрте чӑмпӑлтатнӑ. Ӑнсӑртран путма пуҫланӑ, юрать-ха, ӑна Андрей Александров матрос-ҫӑлавҫӑ пулӑшнӑ. Вӑл ӑна шывран туртса кӑларнӑ та ӗҫтешӗ Михаил Даудов кимӗпе киличчен тытса тӑнӑ. Кайран тӑнне ҫухатнӑ хӗрарӑма тухтӑрсем патне илсе кайнӑ.