18-меш лицей сайтӗнчен илнӗ сӑнӳкерчӗк

Ҫӗнӗ Шупашкарти 18-мӗш лицейра ӗҫлекен Людмила Турковская «Чӑваш Республикин халӑх вӗрентекенӗ» ята тивӗҫнӗ.

Людмила Николаевна — физика учителӗ. Хӑй вӑл Ҫӗмӗрле хулинче 1960 ҫулта ҫуралнӑ. 1982 ҫулта И.Н. Ульянов ячӗллӗ Чӑваш патшалӑх университетӗнчен «физик, преподаватель» специальноҫа алла илни ҫинчен калакан дипломпа вӗренсе тухнӑ.

Ҫӗнӗ Шупашкарти 18-мӗш лицейра физика учителӗ пулса 1991 ҫултанпа ӗҫлет. Аслӑ квалификаци категориллӗ учитель. 1995 ҫултах ӑна «Халӑх вӗрентӗвӗн отличникӗ» паллӑпа чысланӑ. 2003 ҫулта хӗрарӑм Чӑваш Республикин Президенчӗн премине «чи лайӑх учитель» пулнӑ май тивӗҫнӗ. Тепӗр ҫулхине ӑна «Чӑваш Республикин тава тивӗҫлӗ учителӗ» ят панӑ.

Педагог тӗрлӗ шайри конкурсра та пӗрре ҫеҫ мар палӑрнӑ.

cap.ru сайтри сӑн

Чӑваш Республикинчи ҫӑлавҫӑсен катерпа йывӑрлӑха лекнӗ ҫынсемпе йытӑсене пулӑшма тивнӗ. Ку авӑн уйӑхӗн 27-мӗшӗнче пулнӑ.

Ултӑ ҫын, ҫав шутра икӗ ача, Амоксар утравӗсен ҫывӑхӗнче йывӑрлӑха лекнӗ. Вӗсен катерӗ шӑпах ҫавӑнта ҫӗмӗрӗлсе кайнӑ. Кун пек чухне, паллах, хӑрушлӑх та сиксе тухма пултарать. Вӗсем ҫӑлавҫӑсем патне шӑнкӑравласа пулӑшу ыйтнӑ.

Ҫӑлавҫӑсем вара вырӑна часах ҫитнӗ. Ҫак ҫынсемпе пӗрле икӗ йытӑ пулнӑ. Ҫӑлавҫӑсем ҫыннисене те, йытӑсене те ҫӗмрӗк катер ҫинчен эвакуациленӗ. Вӗсене ҫыран хӗррине илсе тухнӑ. Ҫапла вӗсен умне тухса тӑнӑ хӑрушлӑх сирӗлнӗ. Пурте килӗсене чипер-йӗркеллӗ таврӑннӑ.

«Контактра» халӑх тетелӗнчи сӑн

Вӑрнар округӗнчи Малти Ишек шкулӗнче Чӑваш халӑх ӳнерҫине Праски Виттине (Виталий Петрович Петров) халалласа асӑну хӑми уҫнӑ. Ҫак шкул ун ячӗпе хисепленсе тӑрать.

Хисеплӗ ентешне сума сумашкӑн сумлӑ хӑнасем, педагогсем, шкул ачисем тата ӳнерҫӗн мӑнукӗ Кирилл Коробков килнӗ. Шкулта ӑс пухакан ачасем хӑнасем валли пултарулӑх номерӗсем хатӗрленӗ.

Сӑмах май, шкул 2016 ҫултанпа Праски Витти ячӗпе хисепленет. Ку ята ӑна ӳнерҫӗ 80 ҫул тултарнӑ май панӑ. Виталий Петрович ҫак ялта ҫуралса ӳснӗ.

Аса илтерер: нумаях пулмасть Шупашкар хулинче Праски Виттин ӗҫӗсемпе панно хатӗрленӗ.

«Контактра» халӑх тетелӗнчи сӑн

Ыран, авӑн уйӑхӗн 26-мӗшӗнче, Шупашкар округӗнчи Хыркасси ялӗ патӗнчи «Ивушка» питомникре кабачок уявне ирттерӗҫ. Ку мероприяти – 6 ҫултан аслӑраххисем валли. Уяв 10 сехетре пуҫланӗ.

Шупашкар хулинчен ҫитме меллӗ пултӑр тесе тӳлевсӗр трансфер яраҫҫӗ. Анчах унта лекес тесен маларах 222-420 телефон номерӗпе шӑнкӑравласа ҫырӑнмалла.

Уява пахча-ҫимӗҫпе ылмашӑнас тӗллевпе йӗркелеҫҫӗ. Кӑҫал кабачок, кавӑн е панулми ӑнса пулчӗ тӗк пӗрле илсе пырӑр – питомник куншӑн бонуссем парӗ.

Уявра хӑнасем кабачок вӑлчине тутанса курма, ӑсталӑх класӗсене хутшӑнма пултараҫҫӗ. Ҫавӑн пекех ярмӑрккӑсем, халӑх вӑййисем пулӗҫ. Паллах, уяв юрӑ-ташӑсӑр та иртмӗ.

Аса илтерер: кӑҫал ҫулла ку питомникре Ҫырла фестивалӗ иртнӗ.

ШӖМ тунӑ сӑн

Ҫӗмӗрлери полици уйрӑмӗнче службӑра пулнӑ овчарка, Титан-Кронос ятлӑскер, авӑн уйӑхӗн 1-мӗшӗнче 8 ҫул тултарнӑ. Вӑл вӑрӑсене шыраса тупма пулӑшнӑ. Унӑн наставник-кинологӗ вӑраха тӑсӑлакан командировкӑна кайнӑ. Анчах овчарка ҫамрӑках пулманран ӑна пӗрле илеймен.

Вунӑ кун каялла ЧР ШӖМӗ ун валли ҫӗнӗ хуҫа шырани пирки пӗлтерӳ панӑ. Хуҫа тӳрех тупӑннӑ, Шупашкар округӗнчи Хыркасси ялӗнче пурӑнакан арҫын шӑнкӑравланӑ, вӗрентнӗ йытӑ пирки тахҫанах ӗмӗтленнине пӗлтернӗ. Вӑл мӑшӑрӗпе виҫӗ ача ӳстерет.

Ырӑ чунлӑ та итлекен овчарка ҫӗнӗ ҫемьене хӑвӑртах хӑнӑхнӑ.

Яндекс Карты сайтри сӑн

Республикӑри 18 шкулпа ача пахчи 500-шер пин тенкӗлӗх грант илнӗ

Правительство председателӗ Сергей Артамонов авӑн уйӑхӗн 23-мӗшӗнче хушӑва алӑ пуснӑ.

ЧР Министрсен Кабинечӗн пресс-служби пӗлтернӗ тӑрӑх, грантсен пӗтӗмӗшле виҫи — 9 млн тенкӗ. Вӗсене ҫӗнӗ методикӑсем, проектсем кӗртнӗ тата вӗренӳ ӗҫӗнче пысӑк кӑтартусемпе палӑрнӑ 18 учреждение параҫҫӗ.

4,5 млн тенке Шупашкар хули тивӗҫнӗ. Укҫана Ачасемпе ҫамрӑксен пултарулӑх керменӗ, 3-мӗш лицей, 4-мӗш гимнази, 6-мӗш, 49-мӗш, 78-мӗш, 125-мӗш, 204-мӗш, 208-мӗш ача пахчисен хушшинче валеҫӗҫ.

1 млн тенкӗ Ҫӗнӗ Шупашкара яраҫҫӗ: 5-мӗш ача пахчине тата 11-мӗш шкула.

Улатӑрти 6-мӗш гимназие, Элӗкри И.Я.Яковлев ячӗллӗ вӑтам шкула, Патӑрьел округӗнчи Шӑнкӑртамри 1-мӗш вӑтам шкула, Канашри 17-мӗш ача пахчине, Хӗрлӗ Чутай округӗнчи Атнар вӑтам шкулне, Ҫӗрпӳ округӗнчи 6-мӗш ача пахчине тата Ҫӗмӗрлери 1-мӗш ача пахчине 500 пиншер тенкӗ параҫҫӗ.

Малалла...

«Контактра» халӑх тетелӗнчи сӑн

Ҫак кунсенче Чӑваш Енре чи лайӑх таксиста палӑртнӑ. Ку ята кӑҫал кам тивӗҫнӗ-ха? Ҫӗнтерӳҫӗ Дмитрий Осипов пулса тӑнӑ.

«Раҫҫейри чи лайӑх таксист» конкурсӑн регионти тапхӑрӗ Шупашкар хулинче иртнӗ. Унта 22 ҫын хутшӑнма кӑмӑл тунӑ, вӗсенчен пӗри – хӗрарӑм.

Конкурса хутшӑнакансем ҫул-йӗр правилисене тата саккунсене мӗнле пӗлнине кӑтартнӑ. Унтан вӗсене 9 тӗрлӗ хӑнӑхтару пурнӑҫлама хушнӑ. Ҫак шутра таксистсем ача креслине тӗрӗс тата хӑвӑрт вырнаҫтарса кӑтартнӑ.

Ӑмӑртура мала тухнӑ Дмитрий Осипова 15 пин тенкӗлӗх сертификатпа чысланӑ. Унӑн ӑмӑртӑвӗ кунпа вӗҫленмен-ха, чи лайӑх таксистӑн республика чысне Раҫҫей шайӗнчи ӑмӑртура хӳтӗлеме тивӗ.

«Контактри» сӑн

Хӗрлӗ Чутай округӗнчи Элӗк ялӗнче пурӑнакан Ольга Логинова тахҫантанпах тӗрленӗ. Халӗ вара чун киленӗҫӗ тупӑш паракан ӗҫ пулса тӑнӑ.

2025 ҫулхи ҫӗртме уйӑхӗнче Ольга Логинова «Пир-авӑр пусма ҫинчи тӗрӗ» проект хатӗрлесе ӑна хӳтӗленӗ. Ҫапла вӑл социаллӑ контракт ҫырса ӗҫне аталантарма патшалӑхран 350 пин тенкӗ илнӗ. Ку укҫапа вӑл тӗрлемелли машина туяннӑ, мастерской уҫнӑ.

Ольга Логиновӑна наци тӗрри илӗртет: вӑл хӑйӗн аллипе наци костюмӗсем ҫине эрешсем тӑвать, «ҫинҫе пирпе» ӗҫлет.

Ольгӑн – виҫӗ ача. Социаллӑ контракт ӑна ҫемйине тӑрантармалли тупӑш тума май панӑ.

«Контактри» сӑн

Ипподром ҫӑлтӑрӗ хуҫине сасӑлав участокне илсе ҫитернӗ. Ҫапла, республикӑра паян участока лашапа пынӑ тӗслӗх те пулнӑ.

Александр Попов Патӑрьел округӗнчи 2413-мӗш суйлав участокне пынӑ. Пӗччен мар, ӑна унта тӑватӑ ураллӑ шанчӑклӑ тусӗ, Апогей ятлӑ лаша, илсе ҫитернӗ.

Апогей Ҫӗньял ялӗн ипподромӗн ҫӑлтӑрӗ шутланать. Вӑл 48 хутчен старта тухса 23 хутчен ҫӗнтернӗ.

Палӑртса хӑварар: унӑн хуҫи Александр Попов тӑтӑшах лаша турнирӗсем ирттерет: Питравра, Акатуйра.

ШӖМ тунӑ сӑн

Чӑваш Енре халӑх участковӑйне суйланӑ. Хальхинче ку ята кам илнине пӗлес килет-и? Хаваспах пӗлтеретпӗр: Ҫӗмӗрле округӗнчи Михаил Григорьев.

Вӑл Пӗтӗм Раҫҫейри «Халӑх участковӑйӗ» конкурсӑн иккӗмӗш тапхӑрӗнче мала тухнӑ. Уншӑн 7700 ҫын сасӑланӑ.

Мала тухнӑ полицейскипе ҫывӑхрах паллаштарар-ха. Михаил Григорьев Раҫҫей ШӖМӗн «Ҫӗмӗрле» уйрӑмӗнче участокри аслӑ уполномоченнӑйра ӗҫлет. Вӑл шалти ӗҫсен тытӑмӗнче 2014 ҫулта вӑй хума тытӑннӑ. Халӗ вӑл 4 пин ытла ҫын пурӑнакан участокшӑн яваплӑ. Кӑҫал участковӑй ҫынсенчен килнӗ 250 яхӑн хута пӑхса тухма ӗлкӗрнӗ. Михаил Григорьев карттӑсенчен укҫа вӑрлани пирки ял ҫыннисене ӑнлантарать, профилактика ирттерет.

Республика шайӗнче ҫӗнтернӗ участковӑй Чӑваш Ен чысне федераци шайӗнчи конкурсра хӳтӗлӗ. Аса илтерер: пӗлтӗр те республикӑра ку конкурсра Ҫӗмӗрле округӗнчи участковӑй ҫӗнтернӗ. Вӑл – полицин аслӑ лейтенанчӗ Михаил Обломов.