chgtrk.ru сайтри сӑн

Ҫитес ҫултан республикӑра тӗплӗ юсавшӑн тӳлемелли укҫа виҫи ӳсӗ. Хальлӗхе мӗн чухлӗ ӳсессине пӗлтермен. Строительство министрӗн пӗрремӗш ҫумӗ Владимир Максимов тӗплӗ юсав тума тивӗҫ ҫуртсен инвентаризацине пурнӑҫлӗҫ.

Аса илтерер: кӑҫал кӑрлач уйӑхӗн 1-мӗшӗнчен тӗплӗ юсавшӑн тӳлемелли виҫе 25 процент ӳснӗ. Ҫулталӑк каялла влаҫ инфляцие шута илсен ҫак тӳлевӗн чи пӗчӗк виҫи 13,83 тенкӗпе танлашмаллине пӗлтернӗччӗ.

Ӗҫ министерствин сӑнӳкерчӗкӗ

Ҫӗмӗрлере пурӑнакан Дмитрий Лукьянов патшалӑх пулӑшнипе ритуаллӑ пулӑшу кӳрессипе ӗҫлеме тытӑннӑ.

Арҫын социаллӑ контрактпа усӑ курнӑ. Ку вӑл уншӑн питӗ лайӑх тӗкӗ пулнине усламҫӑ хавхаланса пӗлтернӗ. Вӑл малашне те ҫав енӗпе тимлесшӗн.

Ритуаллӑ пулӑшу кӳрессипе Дмитрий ҫулталӑка яхӑн ӗҫлет.

Программа пирки вӑл ӗҫлӗх центрӗнче ыйтса пӗлнӗ. Унӑн ҫемйи социаллӑ контрактпа усӑ курма пултарнӑ. Хыснаран илнӗ 350 пин тенке кирлӗ ҫӗре ӑсатнӑ. Унсӑр пуҫне вӑл онлайн-мелпе вӗренсе тухнӑ.

cap.ru сайтри сӑн

Республикӑри амӑшӗн капиталне 200 пин тенкӗ таран ӳстерме палӑртнӑ. Саккун проектне ЧР Ӗҫлев министерстви хатӗрленӗ.

Халӗ амӑшӗн каиталӗ 150 пин тенкӗпе танлашать. Ҫӗнӗ ҫултан вара ӑна 50 пин тенкӗ хӑпартма палӑртнӑ. Капитала тивӗҫнӗ, анчах хальлӗхе унпа усӑ курман ҫемьесене те 50 пин тенкӗ хушса парӗҫ.

Ҫитес ҫул амӑшӗн капиталне пама республика хыснинчен 197,6 миллион тенкӗ пӑхса хунӑ. Ку укҫа 1317 ҫемье валли ҫитмелле.

t.me/mintrud_21 сӑнӳкерчӗкӗ

Пӑрачкавра пурӑнакан хӗре патшалӑх ӗҫе вырнаҫма пулӑшнӑ. Кун пирки республикӑн Ӗҫ министерстви пӗлтернӗ.

Анна Россейкина Улатӑрти чукун ҫул транспорчӗн техникумӗнче вӗреннӗ. Анчах вӑл специальноҫпа ӗҫ тупайман енне ӗҫлӗх центрне кайнӑ.

Унта вӑл ӗҫсӗрлӗх пособийӗ илсе тӑнӑ. Кӗҫех ӑна Пӑрачкав районӗн хаҫатӗнче ӗҫлеме сӗннӗ. Вӑл унта корреспондент пулса тӑрӑшӗ.

aleksandria-tour.ru сайтри сӑн

Кӑҫал республикӑра Ҫӗнӗ ҫула пысӑк та хаваслӑ мероприятисемсӗр, фейерверксӑр кӗтсе илӗҫ. Ҫапла пӗлтернӗ ЧР Элтеперӗ Олег Николаев.

Мероприятисем ытларах ачасем валли пулӗҫ. Вӗсемшӗн Ҫӗнӗ ҫул асамлӑ уяв пулмалла. Элтеперӗн елкине Запорожье облаҫӗнчи ачасене илсе килесшӗн. Шӑпӑрлансене парнесемпе савӑнтарӗҫ.

forum.na-svyazi.ru сайтри сӑн

Ҫӗмӗрле округӗнче Сӑр юханшывӗ урлӑ каҫмалли понтон кӗпере илнӗ. Вӑл Ҫӗмӗрле тӑрӑхне Чулхула облаҫӗнчи Пильна районӗпе ҫыхӑнтарнӑ. Халӗ унти ҫула пӳлнӗ, каҫса ҫӳреме май ҫук.

Кӗҫех ҫав вырӑнта хӗллехи кӗпер пулӗ. Ӑна тума тытӑнӗҫ. Хальлӗхе юханшыв парпа витӗнессе, вал хулӑнланасса кӗтеҫҫӗ.

Сӑмах май, ҫуллахи кӗпер ака уйӑхӗнченпе ӗҫленӗ. Унччен вӑл юсавра пулнӑ.

oren.mk.ru сайтри сӑн

Йӗпреҫ округӗнче 52 ҫулти хӗрарӑм кӳршӗ ялти туя ӗлкӗрес тесе велосипед вӑрланӑ. Анчах вӑл унта пурпӗрех ҫитеймен.

Ҫурлан 24-мӗшӗнче кӑнтӑрла вӑл Ленино поселокӗнчи пӗр ҫурт умӗнче тӑракан велосипеда вӑрланӑ. Хӑй каланӑ тӑрӑх, вӑл унпа кӳршӗ ялти туя кайма тухнӑ. Анчах ҫул ҫинче велосипед ҫӗмӗрӗлсе кайнӑ, хӗрарӑм ӑна ҫырмана пенӗ. Кайран кӑмӑлӗ хуҫӑлнӑран вӑл каялла таврӑннӑ.

Суд хӗрарӑма 5 пин тенкӗ штраф тӳлеттерме йышӑннӑ.

Чӑваш Енӗн Ӗҫ министерствин сӑнӳкерчӗкӗ

Муркаш районӗнчи Шуркасси ялӗнче пурӑнакан Анастасия Троицкая патшалӑх укҫипе усӑ курса чечек лавкки уҫнӑ.

Хайпӑр ӗҫне хутшӑнакансене патшалӑх укҫа парса пулӑшассине илтсен вӑл кӑҫалхи нарӑс уйӑхӗнче Социаллӑ пулӑшу паракан центра ҫул тытнӑ. Унта ӑна мӗн тумаллине ӑнлантарса панӑ.

Хӗрарӑм бизнес-план хатӗрленӗ. Патшалӑх тата ҫемйи пулӑшнипе чечек лавкки уҫнӑ.

"Лиза Алерт" сайтри сӑн

Чӳк, уйӑхӗн 1-мӗшӗнче Шупашкар округӗнчи Анаткас-Марги ялӗнче 86 ҫулти кинемей ҫухалнӑ. Христина Васильева килтен ҫӑмӑл тумпах тухса, кайнӑ. Вӑл ӑҫта ҫӳренине унччен хӑй те ӑнланманни паллӑ.

Кинемее тупнӑ. Шел те, вӑл чӗрӗ мар. Ӗнер унӑн виллине тупнине пӗлтернӗ. Кинемее Тутарстанри, Чӗмпӗр тата Чулхула облаҫӗсенчи нимеҫӗсем те шыранӑ.

cap.ru сӑнӳкерчӗкӗ

Чӑваш Ен Элтеперӗ Олег Николаев паянхи уявпа саламланӑ.

«Паян пирӗн ҫӗршывӑмӑр авалхи пысӑк пӗлтерӗшлӗ уява – Халӑх пӗрлӗхӗн кунне паллӑ тӑвать. Ҫак кунсенче 412 ҫул каялла халӑх ополченийӗ Мускава поляк интервенчӗсенчен ирӗке кӑларнӑ. Халӑхӑн хӑватлӑ вӑйӗ Раҫҫей пӗрлӗхне тавӑрнӑ тата унӑн никама пӑхӑнманлӑхне упраса хӑварнӑ.

Эпир хамӑрӑн йӑла-йӗркене ҫирӗп тытса пыратпӑр, паян та пирӗн ентешсем алла хӗҫ-пӑшал тытса Тӑван ҫӗршыв чиккисене паттӑррӑн хӳтӗлеҫҫӗ.

«Пурте пӗр ҫын пек – пурте пӗр шухӑшлӑ» – ҫакӑн пек пулнӑ 400 ҫул каярахри халӑх ополченийӗн йыхравӗ. «Эпир пӗрле», «Пӗрле» – тетпӗр эпир паян.

Хаклӑ ентешӗмӗрсем, сире пурнӑҫри хастарлӑхӑршӑн, яваплӑхӑршӑн тата Тӑван ҫӗршыва чунтан юратнӑшӑн тав тӑватӑп», – тенӗ саламра.