«Контактри» сӑн

Чӑваш Енре республика шайӗнче иртнӗ «Чи лайӑх вӑрман инспекторӗ» конкурса пӗтӗмлетнӗ.

Тӳрех палӑртса хӑварар: конкурс Шӑмӑршӑ лесничествинче иртнӗ. Унта 11 ҫын хутшӑннӑ.

Жюри пайташӗсем инспекторсем вӑрман саккунӗсене мӗнле пӗлнине тӗрӗсленӗ. Кунсӑр пуҫне конкурсҫӑсем вырӑна мӗнле палланине кӑтартнӑ, йывӑҫсен тӗсне уйӑрнӑ. Ҫавӑн пекех саккуна пӑсса йывӑҫ касни мӗн чухлӗ тӑкак кӳнине шутланӑ.

Кӑҫал «Чи лайӑх вӑрман инспекторӗ» ята Йӗпреҫ лесничествинче ӗҫлекен Александр Кондратьев тивӗҫнӗ. Ӑна кубок, диплом тата тӗп парне – бензопӑчкӑ – парса чысланӑ.

Иккӗмӗш вырӑна Вӑрнар лесничествинче ӗҫлекен Иван Кадыков йышӑннӑ. Виҫҫӗмӗш вырӑна Олег Афанасьев тата Алексей Кувайский пайланӑ. Мала тухнӑ пур ҫынна та укҫан преми парса хавхалантарнӑ.

#конкурссем, #Шӑмӑршӑ, #Йӗпреҫ