«Контактри» сӑн

Чӑваш Енри ҫамрӑксем Пӗтӗм Раҫҫейри «Ял лидерӗсем» конкурс финалисчӗсен йышне лекнӗ. Палӑртмалла: ку конкурса ҫамрӑк ертӳҫӗсене тупас тӗллевпе йӗркелеҫҫӗ.

Чӑваш Енрен финала Канаш округӗн пуҫлӑхӗн ҫамрӑксемпе ӗҫлекен канашҫи Ольга Медведева тата Муркаш округӗн пуҫлӑхӗн ҫамрӑксемпе ӗҫлекен канашҫи Михаил Николаев тухнӑ.

Финал раштав уйӑхӗн 3-6-мӗшӗсенче Мускавра пулӗ.

cap.ru сайтри сӑн

Тӑвай округӗнчи Тӑрмӑш ялӗнчи Димитриевсем 70 ҫул пӗрле пурӑннине паллӑ тунӑ. Александр Димитриевичпа Ефросиния Степановна ҫавӑн чухлӗ ҫул пӗр сукмакпа килӗштерсе утаҫҫӗ.

Александр Димитриевич ялти клуб ертӳҫинче нумай ҫул ӗҫленӗ. Ефросиния Семеновна колхозра вӑй хунӑ, почтамт ертӳҫинче тӑрӑшнӑ. Димитриевсем 5 ача ҫуратса ӳстернӗ.

90 ҫултан иртнӗ пулсан та вӗсем халӗ те ӗне усраҫҫӗ, пахчара ӗҫлеме те ӳркенмеҫҫӗ.

mk.ru сайтри сӑн

Канашра пурӑнакан 29 ҫулти хӗрарӑм пӗлӗшӗн 500 пин тенкине вӑрланӑ та ултавҫӑсене куҫарса панӑ. Вӑл инвестицисемпе укҫа ӗҫлесе илес тенӗ-мӗн. Анчах тупӑш тӑвайман — парӑма кӗрсе кайнӑ, ун тӗлӗшпе пуҫиле ӗҫ те пуҫарнӑ.

Хӗрарӑм унчченех «инвест-проекта» 2 млн тенкӗ ытла хывнӑ иккен. Хайхи «менеджер» ӑна юлашки хутчен укҫа хывса пысӑк тупӑш илме сӗннӗ. Ҫапла вӑл хӗрарӑм пӗлӗшӗн телефонне илнӗ те унӑн кредит картти ҫинчен палламан ҫынна 500 пин тенкӗ ытла куҫарса панӑ.

Халӗ 29-ти хӗрарӑмӑн ют ҫын укҫине вӑрланӑшӑн явап тытма тивӗ.

cap.ru сайтри сӑн

Чӳк уйӑхӗн 30-мӗшӗнче «Географи диктанчӗ» акци иртӗ. Йӑлана кӗнӗ тӑрӑх ӑна лапама пырса та, онлайн майпа та ҫырма май пулӗ.

Онлайн-версие геодиктант сайтӗнче ҫырма пулать. Вӑл чӳкӗн 30-мӗшӗнчен пуҫласа раштавӑн 14-мӗшӗччен ӗҫлӗ. Диктанта ҫырсанах сертификат тата кӑтартусене пӑхмалли код параҫҫӗ.

Экстра-вариант та пур – кӑтартусене тӳрех пӗлме пулать. Ӑна чӳкӗн 30-мӗшӗнче 12:00 сехетрен пуҫласа раштавӑн 14-мӗшӗччен 12:00 сехетчен ҫырма пулать. Анчах кун пек чухне сертификат памаҫҫӗ.

Виҫҫӗмӗш вариант – лапама килсе ҫырни. Унта чӳкӗн 30-мӗшӗнче 12:00 сехетре пымалла. Хальлӗхе Чӑваш Енре диктант ҫырмалли 32 лапама регистрациленӗ.

tvsamara.ru сайтри сӑн

Республикӑра икӗ ача ашшӗ алимент тӳлемен, парӑм вара самай пухӑннӑ. 2023 ҫулхи юпан 6-мӗшӗнче ун тӗлӗшпе пуҫиле ӗҫ пуҫарнӑ, юпан 26-мӗшӗнче вара чарса лартнӑ – вӑл РФ Хӳтӗлев министерствипе контракт ҫырса ятарлӑ ҫар операцине кайнӑ.

Икӗ ҫултан вӑл парӑма татнӑ. Отпуска килсен арҫын суд приставӗсен депозит счечӗ ҫине 721 пин тенкӗ куҫарнӑ, ҫапла пӗтӗм парӑма татнӑ. Кун хыҫҫӑн арҫын тӗлӗшпе пуҫарнӑ пуҫиле ӗҫе хупнӑ.

dzen.ru сайтри сӑн

Республика правительстви ҫитес ҫул пӗр уйӑхра пурӑнма кирлӗ виҫе мӗн чухлӗ пулассине палӑртнӑ. Кӑҫалхипе танлаштарсан, вӑл 6,8 процент ӳсӗ, 1049 тенкӗ ытларах пулӗ.

Кӑҫал ку виҫе 15428 тенкӗпе танлашать. Ҫитес ҫултан вара 16477 тенкӗ пулӗ. Ӗҫлекен ҫынсем валли ку виҫе 17960 тенкӗ пулӗ, пенсионерсем валли – 14170 тенкӗ, ачасем валли – 15983 тенкӗ.

cap.ru сайтри сӑн

Канаш округӗнчи Чӑрӑшкасси ялӗнче пурӑнакан Николаевсем пӗр сукмакпа 55 ҫул утаҫҫӗ. Вӗсем ҫак уява паллӑ тунӑ.

Ҫамрӑксем Шупашкарта паллашнӑ. Фаина ун чухне Культура министерствинче методистра ӗҫленӗ, Анатолий Культура ҫуртӗнче илемлӗх ертӳҫи пулнӑ. Вӗсен хушшинче юрату ҫуралнӑ.

1970 ҫулхи чӳкӗн 8-мӗшӗнче 24-ри каччӑпа 21 ҫулти хӗр пӗрлешнӗ. Анатолий вырӑнти фабрикӑра столярта ӗҫленӗ, райсудра завхоз пулнӑ. Фаина Атнаш шкулӗнче малтан – пионервожатӑй, унтан вырӑс чӗлхипе литературин вӗрентекенӗ пулнӑ, тивӗҫлӗ канӑва тухиччен директор тивӗҫне пурнӑҫланӑ. Вӗсем икӗ ача ӳстернӗ, халӗ 3 мӑнук пур.

Кирилл Степанов архивӗнчи сӑн

Кӑҫал Элӗк округӗнчи ҫамрӑк фермер, блогер Кирилл Степанов тата «Чӑваш Енри мӗнпур ял» проект авторӗ Максим Соколов «Айда по деревням» (чӑв. «Атя ялсем тӑрӑх») пӗрлехи проект пуҫарнӑ. Халӗ лайӑх хыпар ҫитнӗ: вӗсен ӗҫӗ Пӗтӗм Раҫҫейри «Раҫҫейре тунӑ» премин шорт-листне кӗнӗ.

Ку – хӑйне евӗр интереслӗ проект: унта хутшӑнакансем Чӑваш Енри хитре вырӑнсемпе, ялти пурнӑҫпа ҫывӑхрах паллашаҫҫӗ, вырӑнти чӑвашсен апат-ҫимӗҫне тутанса кураҫҫӗ, экзотика чӗрчунӗсен фермине кайса кураҫҫӗ. Ку кӑна мар, сыр та пӗҫерме вӗренеҫҫӗ.

Пирӗн ентешсен проекчӗшӗн ҫакӑнта сасӑлама пулать: vk.cc/cR0V3j.

Ҫитес ҫултан коммуналлӑ тӑкаксемшӗн хак палӑрмаллах ӳсет. Шупашкарти депутатсем ҫакна ырласа йышӑннӑ.

Паян Шупашкар хула пухӑвӗн депутачӗсем черетлӗ мар сессире ЧР Элтеперӗн «коммуналка» хакӗсемпе ҫыхӑннӑ ыйтӑвне пӑхса тухнӑ. 24 депутат ҫакна ырланӑ, 9-шӗ хирӗҫ пулнӑ.

Ҫапла майпа 2026 ҫулхи юпан 1-мӗшӗнчен Шупашкарта пурӑнакансен пӗтӗмӗшле хак 31,9 процент ӳсӗ. Ҫӳп-ҫап илсе тухнӑшӑн тӳлев чи нумай ӳсӗ: 52,73 тенкӗрен 139,6 тенке ҫитӗ. Харпӑр ҫуртра пурӑнакансен хальхи пек 73,16 тенкӗ мар, 156,4 тенкӗ тӳлеме тивӗ. Сивӗ шыв та хакланӗ: 35,42 тенкӗрен 46,38 тенке ҫитӗ.

Ку хисепсем хыҫҫӑн газ питех хакланмӗ теме пулать: 8,16 тенкӗ мар, 9,09 тенкӗ пулӗ. Электроэнергишӗн 5,6 тенкӗ тӳлемелле пулӗ (халӗ 4,96 тенкӗ).

«Контактра» халӑх тетелӗнчи сӑн

Шупашкар округӗнчи Шӑмӑш ялӗнчи храм настоятельне Максим Курленкӑна кӗҫех телевизорпа курӑпӑр. Вӑл «Раҫҫей 1» телеканалпа пыракан, Андрей Малахов ертсе пыракан «Песни от всей души» кӑларӑма хутшӑннӑ.

Максим Курленко ытти священникпе пӗрле юрӑ-кӗвӗ номерне хутшӑннӑ. Хальлӗхе Максим атте кӑларӑм хӑҫан эфира тухассине пӗлтермен-ха. Мӗнех, кӑларӑм эфира тухасса кӗтӗпӗр.