Ӗнерхипе танлаштарсан, паян республикӑра кӑшӑлвируспа чирлекенсен йышӗ 90 ҫын ытларах пулнӑ. Юлашки талӑкра 548 ҫын ҫак вируспа аптӑранине палӑртнӑ.

Юлашки талӑкра 143 ҫынн пульницӑна вырттарнӑ. 91 ҫын вара сывалнӑ. Вилекенсен йышӗ унчченхи пек нумай мар темелле: иртнӗ талӑкра 3 ҫын чире парӑнтараймасӑр пурнӑҫран уйрӑлнӑ.

Ку таранччен регионта 50437 ҫын инфекциленнӗ. Вӗсенчен 42564-шӗ сывалнӑ. Ку 84,4 процентпа танлашать.

Палӑртмалла: 600 пин ытла ҫын вакцинацие вӗҫленӗ. Республикӑр коллектив иммунитечӗ 52,4 процентпа танлашать.

barnaul.bezformata.com сайтри сӑн

Пӗлтӗр, 2021 ҫулта, Чӑваш Енре ялти пульницӑсене 74 «земство тухтӑрӗсене» ӗҫе вырнаҫтарнӑ. Вӗсен йышӗнче 49 тухтӑр, 25 медӗҫчен.

Ку енӗпе Шупашкар, Канаш, Патӑрьел районӗсем малти вырӑнта пыраҫҫӗ. «Земство фельдшерӗ» программӑпа килӗшӳллӗн 106 медӗҫчене ӗҫе вырнаҫтарнӑ.

Аса илтерер: ялти пульницӑна ӗҫлеме каякан тухтӑрсене – 1 миллион, фельдшерсене 500 тенкӗ параҫҫӗ. Пӗлтӗрхи кӑрлач уйӑхӗн 1-мӗшӗнченпе кӗрсе тухма йывӑр яла ӗҫлеме каякансене 1,5 миллион тенкӗ пама йышӑннӑ. Ку – тухтӑрсем валли. Фельдшерсен вара 750 пин тенкӗ илме май пур.

Каласа хӑварар: «Земство тухтӑрӗ» программа пирӗн республикӑра 2012 ҫултанпа ӗҫлет. Унтанпа 568 тухтӑр яла ӗҫлеме кайнӑ.

Чӑваш кӗнеке издательствинче Муркаш районӗнчи пултаруллӑ та ятлӑ-сумлӑ ҫынсем ҫинчен кӗнеке пичетленсе тухнӑ. «Почетные граждане Моргаушского района» ятлӑ кӑларӑма Муркаш районӗнчи тӗп библиотека тытӑмӗн коллективӗ пухса хатӗрленӗ.

«Муркаш районӗн хисеплӗ ҫынни» ята муниципалитетра 2001 ҫулта ҫирӗплетнӗ. Паянхи куна ҫитиччен ун пек ята 45 ҫынна панӑ. Асӑннӑ ҫынсен биографине кӗнекере хайхисене хисеплӗ ят хӑҫан пани тӑрӑх вырнаҫтарса тухнӑ. Сумлӑ йышра, сӑмахран, Николай Никольский историк, этнограф, фольклорист (2003), чӑвашсен пӗрремӗш писателӗ, этнограф тата критик Спиридон Михайлов-Яндуш (2007), Валентина Егорова спорстменка (2004).

Кӗнеке редакторӗ – В.В. Степанов, художникӗ – Д.В. Литаврин.

"Про Город" сайтран илнӗ сӑн

Паян, кӑрлач уйӑхӗн 28-мӗшӗнче, Шупашкарти пӗр ҫурт подъезчӗн тӑрринче хӗр виллине тупнӑ. Ҫакна РФ Следстви комитечӗн Чӑваш Енри следстви управленийӗн пресс-служби те ҫирӗплетнӗ.

Ку Ярмӑрккӑ урамӗнчи 19-мӗш ҫуртӑн 3-мӗш корпусӗнче пулнӑ. Ҫурт 25 хутлӑ. Кун пирки «Про Город» хаҫата халӑх корреспонденчӗ пӗлтернӗ.

Малтанлӑха пӗлтернӗ тӑрӑх, хӗр 10-мӗш хутри балкон ҫинчен ӳкнӗ. Вырӑнта полици ӗҫченӗсем, тухтӑрсем, следовательсем ӗҫленӗ. Хӗр 23 ҫулсенчи пек курӑнать.

vedomostiural.ru сайтри сӑн

Кӑшӑлвируса сарӑлма чарас енӗпе ӗҫлекен оперативлӑ штабӑн черетсӗр ларӑвӗ иртнӗ. Унта тунтикунран пуҫласа Ҫӗнӗ Шупашкарти шкул ачисене те дистанци мелӗпе вӗренме ямашкӑн йышӑннӑ.

Хальлӗхе ачасене нарӑс уйӑхӗн 6-мӗшӗччен ҫапла вӗренме янӑ. Лару-тӑрӑва сӑнасах тӑрӗҫ. Вӑл мӗнле пулнине кура кайран тивӗҫлӗ йышӑну тӑвӗҫ.

Аса илтерер: Шупашкарти шкул ачисем ӗнертенпе дистанци мелӗпе вӗренеҫҫӗ. Республикӑри хӑш-пӗр шкулсем те ҫапла вӗренме пултарасси пирки каланӑ.

волонетры-медики.рф сайтри сӑн

Паян ЧР Элтеперӗ Олег Николаев Патшалӑх Канашне янӑ Ҫырура Чӑваш Енре Ҫамрӑксен ҫуртне уҫасси пирки калаҫнӑ. Вӑл Шупашкарта пулмалла.

«Ҫамрӑксен ҫурчӗ», «Ҫамрӑсен аталанӑвӗн центрӗ»… Хальлӗхе вӑл мӗн ятлӑ пулассине палӑртман. Хӑш вӑхӑт валли хута ярасси пирки те тӗплӗн каламан.

Олег Николаев ку ыйтупа ЧР Вӗрентӳ министерствине тата Шупашкар хула администрацине ӗҫлеме хушнӑ.

cheb.ru сайтри сӑн

Шупашкарта онкологи диспансерӗн тепӗр корпусӗ пулӗ. Тӗп зданипе ӑна ятарлӑ каҫӑ ҫыхӑнтарӗ. Эппин, вӑл хальхи диспансер ҫывӑхӗнче пулӗ.

Кун пирки паян ЧР Элтеперӗ Паташлӑх Канашне янӑ Ҫырура каланӑ. Олег Николаев Республикӑри клиника пульницин инфекци корпусӗ пирки те аса илнӗ. Вӑл Шупашкарти «Солнечный» микрорайонта пулӗ.

Палӑртмалла: онкодиспансерӑн халӗ поликлиника пур ӗнтӗ. Ҫавӑн пекех хирурги, икӗ радиологи, диагностика корпусӗсем ӗҫлеҫҫӗ. Хирурги корпусне 2016 ҫулхи кӗркунне хута янӑ.

cap.ru сӑнӳкерчӗкӗ

Пултаруллӑ та пуҫаруллӑ ҫамрӑксем ҫулсерен ЧР Элетеперӗн стипендине тивӗҫеҫҫӗ. Кӑҫал та ӑна 1 пин ҫамрӑк илсе тӑрать.

Халӗ унӑн виҫи 1830 тенкӗпе танлашать. Стипенди виҫи 13 ҫул ӳсмен. Ӑна 2009 ҫултанпа индексацилемен. Паян ЧР Элтеперӗ Патшалӑх Канашне янӑ Ҫырура ӑна 670 тенкӗ таран ӳстересси пирки каланӑ. Ҫапла ҫитес ҫул стипенди 2500 тенкӗпе танлашӗ.

Аса илтерер: пӗлтӗр ку стипедие 35 ҫула ҫитмен ҫамрӑксем илме пултарасси пирки йышӑннӑ. Унччен ку ӳсӗм 30 ҫулпа танлашнӑ.

Мускавра Чӑваш Ен ҫынни вилнӗ. Тепӗр тесен пирӗн республика ҫынни тесе ҫирӗплетсех калаймӑпӑр, мӗншӗн тесен машинӑсен регион номерӗ тӗрлӗрен, ҫав вӑхӑтарх ҫынни урӑх ҫӗрте те пурӑнма пултарать.

Ҫӗнӗ Мускаври инкеке лекнӗ грузовик номерӗнче 21-мӗш регион тесе кӑтартнӑ. Груз турттаракан машина водителӗ инкек вырӑнӗнче пурнӑҫран уйӑлса кайнӑ.

Ҫул ҫинчи пӑтӑрмах кӑрлач уйӑхӗн 26-мӗшӗнче пулса иртнӗ. Мускаври ҫул ҫавринчи инкекре 6 грузовик пӗр-пӗринпе пырса ҫапӑннӑ. Ҫав шутра — 21 регионти «Валдай» машина та. Унӑн номерӗ — К480ОЕ 21. Ҫав машина икӗ автомобиль хушшине хӗсӗнсе ларнӑ.

Пӑтӑрмахра тата тепӗр ҫын шар курнӑ. Ӑна вертолётпа пульницӑна илсе кайнӑ.

О. Беспалов урамӗнчи 2а ҫуртра вырнаҫнӑ «Ровесник» (чӑв. Тантӑш) КК нарӑсӑн 25-мӗшӗнче «Когда поют солдаты» (чӑв. «Салтаксене юрланӑ чух») салтак юррин фестиваль-конкурсӗ иртӗ. Кун пирки Шупашкар хулин Мускав районӗн администраци пресс-служби пӗлтерет. Фестиваль 14:00 сехетре пуҫланать.

Фестивале ҫар тивӗҫне пурнӑҫланӑ вӑхӑтра Афганистанра пуҫ хунӑ Олег Беспалова асӑнса ирттерӗҫ. Культура мероприятийӗ Мухтавлӑ ентешсен ҫулталӑкне палӑртнӑ май иртӗ.

Фестивале хутшӑнма заявкӑсене солистсем, вокал ушкӑнӗсем, хорсем, ҫавӑн пекех автор юррине юрлакансем ярса пама пултараҫҫӗ. Хутшӑнакансен ӳсӗмӗ — 8 ҫултан пуҫласа.

Олег Беспалов — Шупашкар хулинче ҫуралса ӳснӗскер, вӑл Хӗрлӗ Ҫӑлтӑр орденӗн кавалерӗ (вилнӗ хыҫҫӑн чысланӑ). Унӑн ятне Шупашкарти пӗр урама, ҫавӑн пекех вӑл вӗреннӗ 7-мӗш вӑтам шкула панӑ. Ун ячӗпе унсӑр пуҫне спорт мероприятийӗсем иртеҫҫӗ.