"Чеб.ру" сайтри сӑн

Чӑваш патшалӑх оперӑпа балет театрӗнче ваканси пур. Кун пирки ЧР Культура министерстви пӗлтерет.

Унта илемлӗх ертӳҫи кирлӗ. Унччен ку должноҫе театр директорӗ Андрей Попов йышӑннӑ.

Ҫак должноҫе йышӑнас тесен культурӑпа искусство енӗпе аслӑ пӗлӳ кирлӗ, тӗп режиссерта 3 ҫултан кая мар ӗҫлемелле. Е режиссерта, балетмейстерта - 5 ҫултан кая мар. Конкурса хутшӑнаканӑн документсемсӗр пуҫне ӗҫ-хӗл программи валли ҫырнӑ сӗнӳсене ҫыпӑҫтарнӑ конвертра памалла. Документсене чӳкӗн 28-мӗшӗччен йышӑнаҫҫӗ.

Канашра хӗрарӑм пӗр урамран теприне хӑвӑртрах ҫитес тенӗ те чукун ҫул урлӑ юраман ҫӗрте каҫма тӑнӑ. Рельссем ҫинче пуйӑс ларнӑ. Хӗрарӑм вакунсен айӗпе ҫул урлӑ каҫма пуҫланӑ. Ҫав вӑхӑтра пуйӑс тапраннӑ.

Чукун ҫул ҫинче ҫын виллине тупни пирки чӳк уйӑхӗн 12-мӗшӗнче 7 сехет те 55 минутра полицие пӗлтернӗ. Ҫав хӗрарӑм кам пулнине тӳрех палӑртайман.

cap.ru сӑнӳкерчӗкӗ

Паян Тӑвай муниципалитет округне ертсе пыма Владимир Михайлова шаннӑ. Ку хыпара Владимир Борисович «Контактра» тӗнче тетелӗнче пӗлтернӗ.

Асӑннӑ должноҫре Владимир Михайлов 2022 ҫулхи раштав уйӑхӗн 20-мӗшӗнчен ӗҫлеме тытӑнӗ.

Владимир Михайлов 1987 ҫулхи утӑ уйӑхӗн 20-мӗшӗнче асӑннӑ районти Вӑрманхӗрри ялӗнче ҫуралнӑ. 2009 ҫулта И. Я. Яковлев ячӗллӗ Чӑваш патшалӑх педагогика университетӗнчен вӗренсе тухнӑ.

Хальхи вӑхӑтра Тӑвай районне ертсе пырать. Унччен вӑл «ПКФ Электросбыт» предприятире директорӑн коммерци енӗпе ӗҫлекен заместителӗ пулса тӑрӑшнӑ. «Родина» парти членӗ пулнӑ, 2016 ҫулта ӑна партин регионти уйрӑмӗн канашне ертсе пыма шаннӑ.

chgtrk.ru видеовӗнчен илнӗ скриншот

Фербенкс хулинчи Америкӑпа Совет салтакӗсен туслӑхне халалланӑ палӑк умӗнче чӑваш юрри янӑранӑ, чӑваш ташшине ташланӑ. Унтан та ытларах — чӑваш ялавне ҫӗкленӗ.

«Чӑваш Ен» патшалӑх телерадиокомпанийӗн журналисчӗ Алексей Енейкин пӗлтернӗ тӑрӑх, Америкӑри чӑвашсен ассоциацийӗн ертӳҫи Надежда Сандркина тата пӗрлӗшӳ хастарӗ Людмила Петрова асӑннӑ материкӑн ҫурҫӗр енне пӗр эрнелӗх ҫулҫӳревпе кайнӑ, хӑйсемпе пӗрле чӑваш ялавне те илнӗ.

Ентешӗмӗрсене Аляскӑри хӑш-пӗр ял-хулара пурӑнакансем халӗ те вырӑсла калаҫни тӗлӗнтернӗ. Чӑвашсем унта эскимоссемпе те тӗл пулнӑ.

www.ntrk21.ru видеовӗнчен илнӗ сӑнӳкерчӗк

Чӑваш Республикинче ҫулталӑк пуҫланнӑранпа 674 килсӗр чӗрчун хуҫаланнӑ тӗслӗхе шута илнӗ.

Регион управленийӗн центрне ҫавнашкал хыпарсем ытларах Канашран, Шупашкартан, Ҫӗмӗрлерен, Ҫӗнӗ Шупашкартан, Сӗнтӗрвӑрри тата Йӗпреҫ районӗсенчен ытларах килнӗ.

Ҫынсем хуҫасӑр йытӑсем иртен-ҫӳрене тапӑнасран питӗ шикленеҫҫӗ. Вырӑнти хӑй тытӑмлӑх органӗсем ку ыйтупа ӗҫлесе ҫитереймеҫҫӗ.

Ҫак ыйтӑва ӗнер Правительство ҫуртӗнче Олег Николаев Элтепер ертсе пынипе иртнӗ ӗнерхи канашлура сӳтсе явнӑ.

Хуҫасӑр йытӑсене усракан приютсем тата тепӗр 3-4 та пулин йӗркелесен аван пулмалла тенӗ республика ертӳҫи.

chrio.rchuv.ru сӑнӳкерчӗкӗ

Чӑваш Республикин Вӗрентӳ институтӗнче «шкул ачисене хӑйсем пухнӑ пӗлӗвӗпе пурнӑҫра усӑ курма вӗрентес ӗҫре креативлӑ шухӑшлава аталантарасси пысӑк вырӑн йышӑнать» тесе шухӑшлаҫҫӗ. Креативлӑ шухӑшлава мӗнле тата мӗн тӗллевпе аталантармалла? Креативлӑ шухӑшлав чӑваш чӗлхине упраса хӑварма тата аталантарма пулӑшма пултарать-и? Ҫак ыйтусем тавра калаҫма чӑваш чӗлхипе литературине вӗрентекенсен меслетлӗх пӗрлешӗвӗсен ертӳҫисемпе хастар пайташӗсем чӳк уйӑхӗн 10-мӗшӗнче Вӗренӳ институтне митап сессие пуҫтарӑннӑ.

Митап сессире вӗрентекенсем креативлӑ шухӑшлакансемпе тӗл пулнӑ. Сӑмахран. паллӑ чӑваш блогерӗ, «Контактра» тетелте «Чӑваш ТВ» блога ертсе пыракан Константин Доброхотов тухса калаҫнӑ, чӑвашлӑха Интернет уҫлӑхне кӑларас, ҫамрӑксен креативлӑхне аталантарас вӑрттӑнлӑхсене уҫса панӑ.

www.ntrk21.ru видеовӗнчен илнӗ сӑнӳкерчӗк

Чӑваш патшалӑх ӳнер музейӗнче чӑвашсен хальхи искусствин биенналӗ уҫӑлнӑ. Куравра Мускав, Питӗр, Смоленск, Ижевск хулисенчи тата Чӑваш Енри 19 пултарулӑх пӗрлешӗвӗн 23 ӳнерҫин ӗҫӗпе паллашма пулать.

Шупашкарти ӳнер училищинче вӗренекенсем, акӑ, «Аслӑ юман» коллекци хатӗрленӗ. «Кӗпесемпе, капӑрлӑх-эрешӗсене те хӑйсемех ҫӗленӗ. Чӑвашсен наци тумне, юмах-халапри ӗҫ-пуҫа ҫӗнӗлле кӑтартма тӑрӑшнӑ. Пӗр енчен, йӑла-йӗрке те упранса юлать, тепринчен, ҫӗнӗлӗхсем те пурнӑҫа кӗреҫҫӗ», — пӗлтернӗ чӑвашсен хальхи искусствин биенналӗпе паллашнӑ «Чӑваш Ен» нацителекуравӗн журналисчӗсем.

Инкеклӗ лару-тӑру министерстви тунӑ сӑн

Инкеклӗ лару-тӑру министерстви пӗлтернӗ тӑрӑх, паян ҫӗрле, чӳк уйӑхӗн 15-мӗшӗнче, Муркаш районӗнче «Ҫеҫпӗл» савутра пушар пулнӑ. Ситуккасси ялӗнчи автомобильсен ятарлӑ техникин производствинче ҫулӑм алхаснӑ.

Цех тӑрри ҫуннӑ. Ҫулӑм 10 тӑваткал метр лаптӑка ярса илнӗ. Пушара сӳнтерме 13 ҫӑлавҫӑ, 5 техника ҫитнӗ. 8 минутран ҫулӑм ялкӑшма пӑрахнӑ.

Республикӑра ӗнер те вӑйлӑ ҫил алхасма чарӑнмарӗ-ха. Аса илтерер: ӑна пула 18 ял-сала ҫутӑсӑр юлнӑ. Красноармейски районӗнчи Кивӗ Йӗкӗт ялӗнче теплица кӳршисем патне вӗҫсе кайнӑ. Шӑмӑршӑра шыв башни ӳкнӗ.

Ӗнер, чӳк уйӑхӗн 14-мӗшӗнче, Ҫӗрпӳри 1-мӗш интернат шкулӑн тӑррине ҫил сӳнӗ. Юрать-ха, пӗр пайне кӑна. Патӑрьелте вара Мир урамӗнчи нумай хваттерлӗ ҫурт тӑррин пӗр пайӗ хӑйпӑннӑ.

Ҫуртсен тӑррисене тӳрех юсама тытӑннӑ.

Чӑваш Ен спортсменки Полина Андреева Тула хулинче чӳкӗн 12-20-мӗшӗсенче йывӑр атлетика енӗпе иртекен Раҫҫей первенствине хутшӑнать.

Пӗрремӗш кунхинех пирӗн спортсменка 49 килограмм тайманнисен виҫе категорийӗнче тупӑшса Раҫҫей рекордне ҫӗнетнӗ. Вӑл Раҫҫей первенствинче 3 ылтӑн медаль ҫӗнсе илнӗ. Тулӑрах иртнӗ пӗтӗм тӗнчери ӑмӑртура та вӑл малта пулнӑ: ылтӑн медале тивӗҫнӗ.

Палӑртмалла: Полина Олимп резервӗсен Ҫӗнӗ Шупашкарти 3-мӗш спорт шкулӗнче ӑсталӑхне туптать.