ШӖМ тунӑ сӑн

Етӗрнере пурӑнакан 34 ҫулти арҫынна 5 ҫӑрттан тытнӑшӑн судпа айӑплӗҫ. Вӑл вӗсене саккуна пӑсса тытнӑ-мӗн.

Кӑҫал юпа уйӑхӗнче транспорт полицийӗн ӗҫченӗсем Сӑр юханшывӗнче рейд ирттернӗ. Вӗсем пӗр кимӗре ларакан пӗр арҫын сунчӑкапа усӑ курса пулӑ тытнине асӑрханӑ. Саккунпа килӗшӳллӗн, ку хатӗрпе пулӑ тытма юрамасть.

Ҫак арҫынран полицейскисем 5 ҫӑрттан туртса илнӗ. Вӑл патшалӑха 4 пин тенкӗлӗх сӑтӑр кӳнӗ. Пулӑҫ ӑна саплаштарнӑ. Халӗ ун килтен тухса ҫӳреме юрамасть. Арҫын суд пуласса кӗтет.

tvkrasnodar.ru сӑнӳкерчӗкӗ

Вӑрмар районӗнчи 7 ҫынна суд нумаях пулмасть водитель прависӗр хӑварнӑ. Ҫапла тума ыйтса суда вырӑнти прокуратура тавӑҫпа ҫитнӗ.

Надзор органӗ палӑртнӑ тӑрӑх, районти 7 ҫыннӑн тӗрлӗ сӑлтава пула (сывлӑхне кура, ҫав шутра эрех ӗҫме юратнӑран) руль умне ларма юрамасть. Вӗсем, пӗр енчен, хӑйсен умне хӑрушлӑх кӑларса тӑратаҫҫӗ; тепӗр енчен, вӗсене пула тепӗр водительсемпе пассажирсем тата ҫуран ҫӳрекенсем шар курма пултараҫҫӗ.

Суд прокуратура тавӑҫне тивӗҫтернӗ май 7 ҫыннӑн водитель удостоверенине туртса илмелле тунӑ.

bagra.ru сӑнӳкерчӗкӗ

Куславкка районӗнчи прокуратура вырӑнти ломбард саккуна пӑсса ӗҫленине тупса палӑртнӑ.

«ЛОМБАРД «ПОБЕДА» тулли мар яваплӑ общество тесе регистрациленнӗскере Раҫҫейӗн Тӗп банкӗ ломбардсен патшалӑх реестрне кӗртмесси пирки маларах систернӗ-мӗн-ха, апла пулин те Куславккари ҫав организаци каланине итлемен, ӗҫлеме пӑрахман. Ҫынсене кӗске вӑхӑтлӑха кивҫен укҫа панӑ, уншӑн тӗрлӗ пурлӑха салука илнӗ.

Прокуратура ломбард тӗлӗшпе суда тавӑҫ шӑрҫаланӑ май хайхин ӗҫне чарса лартма ыйтнӑ. Суд надзор органӗпе килӗшнӗ.

Синоптиксем 4 кунра 30 сантиметр хулӑнӑш юр ҫуса лартма пултарассине пӗлтереҫҫӗ. Юр эрнекун ҫума пуҫлать. 4 кунра пӗр уйӑхра ҫумалли юр ӳкме пултарать.

Ҫитменнине, ҫил вӑйланать. Ҫавна май кӗртсем самай пысӑк пулӗҫ. Юр ҫума пуҫласан ҫанталӑк та ӑшӑтать. Эрнекун 7 градус ҫеҫ сивӗ пулӗ, шӑматкун – 2 градус сивӗ. Вырсарникун термометр 0-рен те хӑпарӗ, ҫавна май юр йӗпе пулӗ.

phonoteka.org сӑнӳкерчӗкӗ

Ҫӗмӗрле районӗнче пурӑнакан пӗр ҫамрӑк энергетика предприятийӗн Хакас Республикинчи филиалне тапӑннӑ.

18 ҫулти яш компьютерти информацие хӳтӗлекен хатӗрсене ятарлӑ программӑпа усӑ курса тапӑннӑ.

Сиенлӗ компьютер программипе айкашнӑ каччӑ тӗлӗшпе Ҫӗмӗрлери прокуратура пуҫиле ӗҫ пуҫарнӑ. Ӑна РФ Пуҫиле кодексӗн 273-мӗш статйин 1-мӗш пайӗпе явап тыттарма йышӑннӑ. Сӑмах май каласан, каччӑ унччен те ҫавӑн пек хӑтланнӑ. Унччен ӑна пӗрре явап тыттарнӑ-ха. Хальхинче яша тӗрмене хупса хумасӑр ирӗкрен 1 ҫул та 6 уйӑхлӑха хӑтарма йышӑннӑ.

culture.cap.ru сӑнӳкерчӗкӗ

Ф.П. Павлов ячӗллӗ Шупашкарти музыка училищинче вӗренекен ҫамрӑксем фольклор экспедицийӗнче пулнӑ.

Асӑннӑ вӗренӳ заведенийӗнче халӑх юррисене пӗччен тата хорпа юрлама вӗрентекен уйрӑмра ӑс пухакан яшсемпе хӗрсем Елчӗк районӗнчи Вӑрӑмхӑва ялне ҫитсе килнӗ. Унта анатри чӑвашсем пурӑнаҫҫӗ.

«Музыка училищи — чӑвашсен фольклорне пухассипе, тӗпчессипе тата аталантарассипе ҫине тӑрса ӗҫлекен республикӑри пӗртен-пӗр вӗрентӳ учрежденийӗ. Ун пек тӗллевпе эпир час-часах тухса ҫӳреме тӑрӑшатпӑр», — тенӗ вӗрентӳ заведенийӗнче ӗҫлекен Людмила Петухова.

culture.cap.ru сӑнӳкерчӗкӗ

Раштав уйӑхӗн 13-мӗшӗнче Чӑваш Республикин ача-пӑчапа ҫамрӑксен вулавӑшӗнче «Ҫӗнӗ ятсем уҫатпӑр» республикӑри саккӑрмӗш конкурсӗнче ҫӗнтернисен хайлавӗсен пуххипе паллаштарӗҫ.

Кӗнекене кӑҫал «СВ-Пресс» издательствӑра 80 экземпляр тиражпа кун ҫути кӑтартнӑ. Унта конкурса хутшӑннӑ 44 автор ӗҫӗсене пухса пичетленӗ. Вулавӑшра хыпарланӑ тӑрӑх, конкурс ҫӗнтерӳҫисене уйрӑмах тимлӗх уйӑрнӑ.

Кӑларӑмра чӑвашла тата вырӑсла ҫырнӑ хайлавсем вырӑн тупнӑ: сӑвӑсемпе басньӑсем, калавсемпе очерксем, эссесемпе пьесӑсем.

tomsk.aif.ru сайтри сӑн

Коммерци банкӗнче ӗҫлекен, Ҫӗнӗ Шупашкарта пурӑнакан 31 ҫулти хӗрарӑм ултавҫӑсен аллине лекнӗ. Вӑл брокер сайтӗнче укҫа ӗҫлесе илме ӗмӗтленнӗ.

Хӗрарӑм авӑн уйӑхӗнчен пуҫласа чӳкчен брокер сайтне укҫа хывма шантарнӑ "специалиста" укҫа куҫарса тӑнӑ. Пӗтӗмпе - 150 пин тенке яхӑн. Кӗҫех лешӗ ҫыхӑнӑва тухма пӑрахнӑ. Ҫӗнӗ Шупашкар хӗрарӑмӗ хӑйне улталанине тинех ӑнланнӑ.

Шупашкарта пурӑнакан 42 ҫулти хӗрарӑм та ҫапла майпах улталаннӑ. Вӑл палламан ҫынна 700 ытла пин тенкӗ куҫарса панӑ. Хай вӑл ниҫта та ӗҫлемест.

"Ямал-Медиа" тунӑ сӑнӳкерчӗк

Ямал-Ненецк автономи округӗнче пӑртан скульптура тӑвакансем тупӑшнӑ. Унта "Ытама кӗреймен Ямал" конкурс-фестиваль иртнӗ.

Фестивальте Питӗрти, Курганти, Свердловск облаҫӗнчи, Шупашкарти ӑстасем тупӑшнӑ. Палӑртма кӑмӑллӑ: пирӗн ентеш Андрей Молоков ҫӗнтерӳҫӗ пулса тӑнӑ. Вӑл пӑртан "Ҫамрӑк пулӑҫ" композици хатӗрленӗ.

Сӑмах май, Андрей Молоков кунашкал конкурса пӗрре мар хутшӑннӑ. Икӗ ҫул каялла вӑл Мускав облаҫӗнче иртнӗ пӑр скульптурӑсен "Ҫӗр планета ҫинчи юмахсем" фестивальте призер пулнӑ. Ун чухне Андрей "Щелкунчик" композици хатӗрленӗ.

Инкеклӗ лару-тӑру министерстви тунӑ сӑн

Мускавра раштавӑн 3-мӗшӗнче 9 сехет те 48 минутра Перовская урамӗнче автобус ҫунса кайнӑ. Ҫулӑм ҫывӑхри пристрой ҫине те куҫнӑ, пушар 50 тӑваткал метр ҫинче алхаснӑ.

Пушара 40 минутран сӳнтернӗ. Ҫунса кайнӑ автобус – Чӑваш Енрен, «Попутчик» тесе ҫырнӑскер. Вӑл Шупашкартан Мускава тата каялла тӑтӑшах ҫӳренӗ-мӗн.

«Чеб.ру» «Попутчик» компанипе ҫыхӑннӑ. Лешсем ҫунса кайнӑ автобус вӗсен пулманнине каланӑ. Ҫав транспорт ирхине Шупашкартан Мускав килнӗ имӗш. Компани ҫакна та хирӗҫленӗ.