Росгвардин Чӑваш Енри управленийӗн ҫӗнӗ пуҫлӑхне ҫирӗплетнӗ. Хушӑва РФ Президенчӗ Владимир Путин кӑрлачӑн 23-мӗшӗнче алӑ пуснӑ.

Ку должноҫе полици полковникне Михаил Енина шанса панӑ. Вӑл 2010 ҫулсен варринче Сочири ҫар чаҫӗн полици полкӗн командирӗ пулнӑ. Унтан Росгвардин тӗп аппаратӗнче ӗҫленӗ.

Палӑртса хӑварар: Росгвардин Чӑвша Енри управленине 2021 ҫулхи ака уйӑхӗнченпе Дмитрий Расчетов ертсе пынӑ. Унччен Алексей Ежеев ку постра 4,5 ҫул ӗҫленӗ.

Кӑрлач уйӑхӗн юлашки эрненче мӗнле ҫанталӑк пулӗ? Синоптиксем пӗлтернӗ тӑрӑх, эрнен пӗрремӗш ҫурринче тӗтре тӑрӗ, йӗпе юр е ҫумӑр ҫӑвӗ. Сывлӑш температури 1 градус сивӗрен пуҫласа 4 градус таран ӑшӑ пулӗ.

Ытларикун, ахӑртнех, 2002 ҫулхи рекорд ҫӗнелӗ: 1,2 градус ӑшӑ пулӗ. Ҫавна май юр хулӑнӑшӗ чакӗ. Хальхи вӑхӑтра Шупашкарта вӑл 11 сантиметр хулӑнӑш.

Телее, йӑлтах ирӗлсе пӗтмӗ. Канмалли кунсенче юр ҫӑвӗ. Ун хыҫҫӑн ҫитес эрнере арктика сывлӑшӗ килӗ. Эппин, хӗлле таврӑнӗ-ха.

cap.ru сӑнӳкерчӗкӗ

Шупашкарти Олимп резервӗн 2-мӗш спорт шкулӗнче вӗренекен Олег Яковлев Атӑлҫи федераци округӗнчи ӑмӑртура виҫҫӗмӗш вырӑн йышӑннӑ. Биатлон ӑмӑртӑвӗ Ӗпхӳре иртнӗ.

Вӑл 12.5 километра ӑмӑртса 17-18 ҫулсенчи яшсен хушшинче виҫҫӗмӗш вырӑна тухнӑ.

Шупашкарти ватӑсем иртне эрнекун пӗрле пуҫтарӑнса Чӑваш академи драма театрне спектакль курма кайнӑ. Хулари халӑхӑн социаллӑ ыйтӑвӗсене тивӗҫтерекен комплекслӑ центра ҫӳрекен хастар ватӑсем, кӗмӗл волонтёрсем, Никифор Мраньккан романӗ тӑрӑх лартнӑ «Ӗмӗр сакки сарлака» спектакле пӑхса савӑннӑ.

«Ку спектакле эпӗ виҫҫӗмӗш хут ӗнтӗ куртӑм. Маншӑн чӑваш чӗлхи тӑван чӗлхе мар пулин те спектакль тыткӑнламаллипех тыткӑнларӗ. Тӗлӗнсе каймалла! Пурне те пысӑк тав!», — хавхаланса калаҫнӑ, сӑмахран, Людмила Тимошкина ятлӑ хастар ватӑ.

Александр Степанов страницинчен илнӗ сӑнӳкерчӗк

И.Я. Яковлев ячӗллӗ Чӑваш патшалӑх педагогика университетӗнче археологипе истори музейӗ пур-мӗн. Кун пирки Шупашкарти шкулсенчен пӗринче чӑваш чӗлхи учителӗнче ӗслекен Александр Степанов халӑх тетелӗнчи хӑйӗн страницинче пӗлтернӗ.

«Чӑннипе каласан официаллӑ майпа ӑна уҫман-ха, анчах та уҫма пӗтӗмпех хатӗр. Экскурсие Николай Мясников, истори ӑслӑлӑхӗсен кандидачӗ ирттерчӗ — чӑн-чӑн специалист, чӑн-чӑн экскурсовод. Музей ҫав тери пуян. Тӗлӗнмелли япаласем те пур. Вӗсенчен пӗри гуннсен хуранӗ. Ӑна Тутарстанри пӗр чӑваш ялӗ ҫумӗнче тупнӑ», — хыпарланӑ вӑл.

cap.ru сайтран илне сӑнӳкерчӗк

Ҫамрӑк авторсен «Ҫӗнӗ ятсем уҫатпӑр» литература конкурсӗ иртӗ. Регионсем хушшинчи XIX конкурса 15 ҫултан пуҫласа 35 ҫулчченхи авторсем хутшӑнма пултараҫҫӗ.

Ӗҫсене виҫӗ номинацире тӑратмалла:

— «Проза»,

— «Поэзи»

— «Драматурги».

Ӗҫсене чӑвашла та, вырӑсла та ҫырма юрать. Хайлавсен калӑпӑшӗ А4 форматпа 20 страницӑран ытла пулмалла мар.

Ӗҫсене пуш уйӑхӗн 1-мӗшӗччен йышӑнӗҫ. Вӗсене kray@rdub21.ru электрон почтӑпа Республикӑри ача-пӑчапа ҫамрӑксен вулавӑшне ярса памалла.

Куславкка округӗнчи «Чӗмсӗр чикӗсен строителӗсене» мемориал ҫумӗнче ҫитес ҫулсенче «Ҫӗнтерӳ чиккисем» парк» мегапроект пурнӑҫа кӗрӗ. Кун пирки ЧР Элтеперӗ Олег Николаев пӗлтернӗ.

Ҫапла майпа, Олег Алексеевич пӗлтернӗ тӑрӑх, мемориал концепцине малалла аталантарӗҫ. Унта ҫӗнӗ экспозици тӑвӗҫ, часавай хӑпартӗҫ, усӑ курман ҫар техникине вырнаҫтарӗҫ.

Аса илтерер: «Чӗмсӗр чикӗсен строителӗсене» мемориала 2022 ҫулхи утӑ уйӑхӗн 1-мӗшӗнче уҫнӑ.

vzsar.ru сайтри сӑн

Ӗнер, кӑрлачӑн 25-мӗшӗнче, 17 сехетре Шупашкарти ГЭС ҫывӑхӗнче ҫӑлавҫӑсем ҫынсем инкек пулнине хунарпа ҫутатса пӗлтернине асӑрханӑ. Икӗ арҫын пулӑ тытнӑ чухне пӑр катӑлнӑ та ишме пуҫланӑ иккен.

Ҫӑлавҫӑсем пулӑҫсене пӑр ҫинчен илсе ҫыран хӗррине илсе ҫитернӗ. Арынсем – Ҫӗнӗ Шупашкартан тата Шупашкартан.

"Контактри" сӑн

Тӗнче класлӑ Раҫҫей спорт мастерӗ Вероника Чумикова Красноярскра ирӗклӗ кӗрешӳ енӗпе иртнӗ «Иван Ярыгин кубокӗ» пӗтӗм тӗнчери турнирта ҫӗнтернӗ. Вӑл финалта 57 килограмм таякан виҫе категорийӗнче Узбекистанри спортсменкӑна Лайлохон Сабировӑна парӑнтарнӑ.

Иккӗмӗш вырӑна – Севастопольти Кристина Михнева, виҫҫӗмӗш вырӑна Бурятири Эржема Жамсаранова йышӑннӑ.

Палӑртмалла: Вероника Чумикова Олимп резервӗсен 3-мӗш спорт шкулӗнче ӑсталӑхне туптать.

cap.ru сӑнӳкерчӗкӗ

Ҫӗнтерӳ пулнӑранпа 80 ҫул ҫитнӗ май Шупашкарта Тӑван ҫӗршывӑн Аслӑ вӑрҫине хутшӑннӑ паттӑрсене халалланӑ мӗнпур палӑка юсаса ҫӗнетме палӑртнӑ.

Хула пуҫлӑхӗ Владимир Доброхотов Атӑш леш енне ҫитсе палӑксем мӗнле лару-тӑрура пулнипе паллашнӑ. Вӑл вырӑнти пуҫлӑхпа тӗл пулса ку ыйӑва сӳтсе явнӑ. Палӑксене ҫанталӑк ӑшӑтсан ҫӗнетме тытӑнӗҫ те ҫу уйӑхӗччен вӗҫлӗҫ.

Коммуналлӑ хуҫалӑх ӗҫченӗсем палӑксен инвентаризацине тунӑ. Халӗ хула пуҫлӑхӗн хушӑвӗпе мӗн чухлӗ укҫа кирлине шутлаҫҫӗ.