Паян Чӑваш Енри маттур ҫамрӑксене патшалӑх премийӗпе хавхалантарнӑ. 2020 ҫулшӑн ӑна 30 хӗрпе каччӑна панӑ.

Республика Элтеперӗ Олег Николаев хӑш-пӗр тӗслӗхе уйрӑммӑн палӑртса хӑварнӑ. Сӑмахран, Йӗпреҫ районӗнчи Кӗлӗмкассинчи культура ҫуртӗнче культорганизаторта тӑрӑшакан Мария Петрова лара-тӑра пӗлмест. Вӑл ялти пурнӑҫ кӑсӑклӑ та хаваслӑ пултӑр тесе тӑрӑшать.

«Эпир тӑвакан ҫӗнӗ культура ҫурчӗсем, ял клубӗсем каҫхине хупӑ тӑраҫҫӗ тенине муниципалитетсенче пулнӑ май час-часах илтетӗп. Ку вӑл йӗркеллӗ япала мар. Чӑваш Енӗн Культура министерствине культура ҫурчӗсене, ялти клубсене тытса тӑрассине ҫӗнӗлле йӗркелеме хушнӑччӗ», – тенӗ республика ертӳҫи.

yablor.ru сайтри сӑн

Чӑваш Енре кӑшӑлвируспа чирлекенсем нумайлансах пыраҫҫӗ. Юлашки талӑкра 61 ҫын инфекциленнӗ. Кунашкал кӑтарту нарӑс уйӑхӗнченпе пулман.

Юлашки талӑкра 57 ҫын сывалнӑ. Вилекенсем 5-ӗн пулнӑ. Пӗтӗмпе ку таранччен 1557 ҫын амака пула пурнӑҫран уйрӑлнӑ.

Паянхи кун тӗлне Чӑваш Енре 27415 ҫын кӑшӑлвируспа чирленӗ, вӗсенчен 25048-шӗ сывалнӑ. Хальхи вӑхӑтра стационарта тата килте амбулатори мелӗпе 810 ҫын амакран сипленет.

Ҫӗнӗ кӑшӑлвирус инфекцийӗ тӗнчере тата хамӑр ҫӗршывра сарӑлма тытӑнсанах унран вакцина хӑҫан та пулин шухӑшласа кӑларӗҫех теттӗмӗр. Халӗ вара прививка пур, анчах укол тутарма иккӗленекенсем йышлӑ. Кунта республикӑри паллӑ журналист Александр Белов Фейсбукра ҫырнипе килӗшмесӗр тӑма май ҫуках-тӑр: вакцинацие тӳлевлӗ ирттереҫҫӗ, халӑхӑн уйрӑм пайне ҫеҫ тӳлевсӗр тӑваҫҫӗ тесен, тен, ҫынсем тухтӑр патне васкатчӗҫ пулӗ.

Паянхи куна пирӗн республикӑра халӑхӑн 26 проценчӗ ҫеҫ ковидран прививка тутарнӑ. Тухтӑрсем вара ҫынсен 60 процентне вакцинацилесен ҫеҫ вирус сарӑлнине ҫӗнме пулать тесе шухӑшлаҫҫӗ.

Америкӑри Пӗрлешӳллӗ Штата кайса тӗпленнӗ чӑваш велоҫулҫӳревҫин Никита Тӗнчен пурнӑҫӗ ҫинчен эпир тӑтӑшах пӗлтерсе тӑратпӑр. АПШра чухне ҫемьере тепӗр ача, ывӑл, ҫуралнине те хыпарланӑччӗ.

Паян Никита ҫемье каллех йышланнине пӗлтернӗ. Анчах хальхинче сӑмах ачапа ҫыхӑнман. Кил хуҫи машина туяннӑ. Пилӗк метр тӑршшӗ «Toyota Avalon» седан. Вӑл виҫҫӗмӗш ӑрури машина шутланать. Машинӑн двигателӗ — 2GR FE 3,5 L. Автомобиле 2007 ҫулта туса кӑларнӑ. Пурӗ 211 000 милӗ чупнӑ. Никита пӗлтернӗ тӑрӑх, Америкӑри виҫепе ку вӑл питех те сахал.

«Машина шырама ман вӑхӑт пулман. Куҫ умне пулнӑ пӗрремӗш лайӑх варианта туянтӑм. Кузовӗ питӗ лайӑх — ҫавӑ маншӑн пӗлтерӗшлӗ», — тесе ҫырнӑ Тӗнче Фейсбукра.

Илья Ионочкин. gazetaingush.ru сӑнӳкерчӗкӗ

Паянтан Чӑваш Енӗн Правительствинче ҫӗнӗ ҫын ӗҫе кӳлӗнӗ. Республикӑн строительство, архитектура тата ҫурт-йӗрпе коммуналлӑ хуҫалӑх министрӗн ҫумӗ пулма Илья Ионочкина шаннӑ. Илья Олеговича министерствӑри пысӑк пукана шанса парасси ҫинчен калакан хушӑва утӑ уйӑхӗн 2-мӗшӗнче Олег Николаев Элтепер алӑ пуснӑ.

Илья Ионочкин камне пӗлес тесе тӗнче тетелӗнчи тӗрлӗ уҫӑ ҫӑлкуҫра хыпар шырарӑмӑр. Эпир асӑрханӑ ҫавӑн пек ятлӑ ҫын «Раҫҫей ертӳҫисем 2020» пӗтӗм Раҫсейри конкурсра ҫӗнтернине пӗлтӗмӗр. Вӑл «Россети Северный Кавказ» ятлӑ организацире ятарлӑ проектсен дирекцийӗн директорӗн ҫумӗнче ӗҫленӗ. Анчах вӑл министр ҫумӗ тесе ҫирӗплетсе калаймӑпӑр.

Ашшӗ-амӑш хӑйсен ывӑл-хӗрне сайра тӗл пулакан ят пама ӑнтӑлать. Ҫакӑн пек талпӑннине Шупашкар хулин загсӗнче ӗҫлекенсем асӑрханӑ.

Республикӑн тӗп хулинче пӗрисем хӑйсен хӗрне «Яра» тесе чӗнеҫҫӗ. Ку ят хӗвеллӗ, кӑра, ҫине тӑракан тенине пӗлтерет иккен. Ашшӗ-амӑшӗ шухӑшланӑ тӑрӑх, ята кура ҫын пурнӑҫӗ, унӑн шӑпи йӗркеленӗ.

Хула ҫыннисене халь ҫеҫ асӑннӑ Ярӑсӑр пуҫне Таисия, Майя, Маргарита, Эмилия, Надежда, Розалина, Мишель ятсем килӗшеҫҫӗ. Арҫын ачасем валли вӗсем Николай, Родион, Семен, Прохор, Леон, Гордей, Азаль.

Инкеклӗ ӗҫсен министерствин Чӑваш Енри управленийӗн ӗҫченӗ пулнӑ, асӑннӑ ведомствӑра ертсе пыракан должноҫсенчен пӗрне йышӑннӑ ҫынна улталанӑшӑн явап тытарнӑ.

48 ҫулти арҫына РФ Пуҫиле кодексӗн 159-мӗш статйин 3-мӗш пайӗпе айӑпланӑ. Ку статьяпа пысӑк суммӑлӑх улталакансене явап тыттараҫҫӗ.

Суд палӑртнӑ тӑрӑх, МЧС ӗҫченӗ пулнӑ этем ҫурт-йӗр туянма тӑкакланнӑ тесе Федерацин налук службине хутсем тӑратнӑ. Ҫавна май 2015-2016 ҫулсемшӗн вӑл 260 пин тенкӗ налук вычечӗ илнӗ. Ҫав вӑхӑтрах ҫурта арҫын ҫывӑх тӑванӗнчен пӗлӗшӗ урлӑ илнӗ. Туянса вӑл тӑкакланман.

МЧС ӗҫченӗ айӑпа йышӑннӑ, вычет шутӗпе илнӗ укҫана тавӑрса панӑ. Суд ӑна 200 пин тенкӗлӗх штраф хурса панӑ.

«Байконур» космодрома Чӑваш Ен делегацийӗ пулнӑ. Аса илтерер: ҫӗртме уйӑхӗн 30-мӗшӗнче унтан чӑваш элемӗллӗ тата Андриян Николаева ӳкерсе хунӑ ракета космоса вӗҫсе хӑпарнӑ. Ҫав кун

космодромра Чӑваш Ен делегацийӗ пулнӑ. Йыша тӳре-шарапа пӗрлех ача-пӑча та кӗнӗ.

Груз турттаракан карапа тӗнче уҫлӑхне хӑпартнине курма республикӑн пӗрремӗш вице-премьерӗ – финанс министрӗ Михаил Ноздряков, вице-премьер – экономика аталанӑвӗн тата пурлӑх хутшӑнӑвӗсен министрӗ Дмитрий Краснов, промышленность тата энергетика министрӗ Евгений Герасимов, Чӑваш Ен Элтеперӗн Администрацийӗн ертӳҫи Вячеслав Борисов, Чӑваш Енри Хӗрарӑмсен канашӗн ертӳҫи Наталья Николаева, Шупашкарти «Ҫеҫпӗл» предприятин директорӗ Владимир Бакшаев тата Сӗнтӗрвӑрри районӗнчи А.Г. Николаев ячӗллӗ мемориал комплексӗн директорӗ Александр Тукмаков тухса кайнӑ.

Физикӑпа, астрономипе, космоспа кӑсӑкланакан, тӗрлӗ конкурсра ӑмӑртура палӑрнӑ ачасене те инҫе ҫула илсе кайнӑ.

Владимир Филиппов телеоператор инсульта пула пульницӑна лекни пирки пӗлтернӗччӗ. Шел те, унӑн пурнӑҫӗ паян татӑлнӑ. Вӑл 72 ҫулта пулнӑ.

Владимир Анатольевич пурнӑҫӑн пысӑк пайне чӑваш телекуравне халалланӑ, «Чӑваш Ен» ПТРКра кино- тата видеоператор пулнӑ. 1997-2007 ҫулсенче «Химпром» пресс-службин фотографӗ, видеоператорӗ пулнӑ.

Владимир Филиппов «Хыпар» хаҫат премине «Ял ҫыннисем» сӑнӳкерчӗксен серийӗшӗн тивӗҫнӗ, Ҫемен Элкер ячӗллӗ преми лауреачӗ пулнӑ.

Владимир Анатольевичпа утӑ уйӑхӗн 3-мӗшӗнче 10 сехетре ҫак адреспа сыпуллашӗҫ: Шупашкар хули, Сӗнтӗрвӑрри ҫулӗ, 4/1 ҫурт.

Ҫӗмӗрлепе Красноармейски районӗсенче депутатсен пухӑвӗсене вӑхӑт ҫитичченех салатса ярӗҫ. Ҫакӑ ҫав районсенче муниципалитет округӗсем тӑвассипе ҫыхӑннӑ.

Кӗркунне парламент суйлавне ирттернӗ хыҫҫӑн ҫӗмӗрлесемпе красноармейскисем район тата ял тӑрӑхсен шайӗсенчи депутатсен пухӑвӗсене салатса ярӗҫ. Кун пирки «REGNUM» информаци агентстви Чӑваш Енӗн Тӗп суйлав комиссийӗн ертӳҫи Александр Цветков пӗлтернине кура хыпарланӑ.

«Парламент суйлавӗ хыҫҫӑн Ҫӗмӗрлепе Красноармейски районӗсенче муниципалитет округӗн депутачӗсем ҫеҫ юлӗҫ. Красноармейски районӗнче 15 депутат пулӗ, Ҫӗмӗрле районӗнче — 17», – пӑнлантарса панӑ Александр Цветков.