Шупашкар хулинче шкул тума килӗшекен строительство организацине шыраҫҫӗ. Ӗҫе пуҫӑнас текенсем пур пулӗ-ха, анчах укҫана бюджетран тӳленӗ чух подрядчика конкурс ирттерсе палӑртмалла.

Конкурса хутшӑнас текенсен заявкисене ҫурла уйӑхӗн 5-мӗшӗччен йышӑнӗҫ. Кун пирки хула администрацийӗн пуҫлӑхӗ Алексей Лыдыков Инстаграмра пӗлтернӗ. Сӑмах «Садовӑй» микрорайонти вӗренӳ учрежденийӗ пирки пырать.

Шкул 1650 вырӑнлӑх пулмалла. Ӑна тусан асӑннӑ микрорайонта пурӑнакансен шкул ыйтӑвӗ татӑласса шанать сити-менеджер.

Контрактӑн малтанхи хакӗ — 1 миллиард та 92 миллион тенкӗ. Строительство ӗҫне кӑҫал пуҫӑнмалла, 2022 ҫулхи утӑ уйӑхӗнче вӗҫлемелле.

⠀

twitter.com сӑнӳкерчӗкӗ

Шупашкарти Ленин районӗнчи суд троллейбус водительне айӑплама йышӑннӑ.

Арҫын пӑтӑрмаха 2018 ҫулхи раштав уйӑхӗнче ҫакланнӑ. «Суту-илӳ ҫурчӗ» чарӑну патӗнче ҫулланнӑ пӗр хӗрарӑм ҫул урлӑ каҫнӑ. Светофор тӗлӗнче е ятарлӑ вырӑнта мар. Водитель хӗрарӑма ҫапса кайнӑ, лешӗ вилнӗ.

Чӑваш Ен прокуратурин пресс-службинче пӗлтернӗ тӑрӑх, 62-ри ҫулти водитель тӗлӗшпе РФ Пуҫиле кодексӗн 264-мӗш статйин 3-мӗш пайӗпе пуҫиле пуҫарнӑ. Арҫын хӑй айӑпне йышӑннине, чунтан ӳкӗннине, шар кураканни хӑй те ҫул-йӗр правилине пӑснине шута илсе троллейбус водительне тӗрмене хупса усрамасӑр 1 ҫулталӑклӑха айӑплама йышӑннӑ. Унӑн правине икӗ ҫуллӑха туртса илнӗ.

Ҫӗмӗрлери Зинаида Зуйкова фармацевт чун юратнӑ ӗҫре 43 ҫул ӗнтӗ тӑрӑшать. «Аптека — чун юратнӑ вырӑн манӑн», — тет вӑл. Малтан вӑл «Фармаци» предприятин Ҫӗмӗрлери район пульници ҫумӗнчи 126-мӗш аптекинче ӗҫленӗ, кайран 75-мӗшне куҫнӑ. Паян та унтах тӑрӑшать вӑл.

Ҫынсене ӑшӑ кулӑпа кӗтсе илекенскер патӗнчен халӑх татӑлмасть теҫҫӗ Чӑваш Ен Сывлӑх сыхлав министерствинче. Йӗри-тавра коммерци аптекисем йышлӑ пулин те Зинаида Зуйкова патне кӗреҫҫӗ.

Сӑмах май каласан, пирӗн ҫӗршывра ҫӗнӗ йышши аптека организацийӗсем пулӗҫ. Саккун проектне РФ Сывлӑх сыхлав министерстви сӗннӗ. «Парламентская газета» хаҫат пӗлтернӗ тӑрӑх, пӗрисем халӑха эмел тавраш сутакансем пулӗҫ, теприсем — медицина организацийӗсем ҫумӗнче, вӗсен структура подразделенийӗсем.

magis-sport.ru сӑнӳкерчӗкӗ

Кӑшӑлвирус алхаснине пула Чӑваш Ен чылай вӑхӑт чару мерисен саманинче пурӑнчӗ. Тинех пӗрремӗш тапхӑр вӗҫленчӗ. Иккӗмӗш тапхӑр ҫине куҫасси ҫинчен калакан хушӑва Чӑваш Ен Элтеперӗн тивӗҫӗсене вӑхӑтлӑх пурнӑҫлакан Олег Николаев паян алӑ пуснӑ.

Ку тапхӑрта 800 тӑваткал метртан пысӑк мар лаптӑклӑ суту-илӳ точкисем ӗҫлеме пуҫлӗҫ. Унсӑр пуҫне лицензиллӗ автошкулсем те вӗренекенсене йышӑнӗҫ. Раҫҫей Федерацийӗн тата Чӑваш Енӗн пӗрлештернӗ спорт командисен пайташӗсене тренировкӑсене пухӑнма ирӗк панӑ. Анчах пӳлӗмри 4 тӑваткал метр лаптӑк пуҫне 1 ҫын тивмелле.

Санаторипе курортсем те уҫӑлӗҫ. Вӗсем кӑшӑлвируспа чирленисене реабилитацилӗҫ.

А.Г. Николаев ячӗллӗ Шупашкарти аэропорт питех те ырӑ хыпар пӗлтернӗ. Турцире канма кӑмӑллакансем кӑҫал та ҫав ҫӗршыва ҫитсе курайӗҫ. Тӳрӗ рейс пулмӗ те, анчах авиакомпанисенчен пӗри Мускав урлӑ илсе кайма палӑртать.

Федераци шайӗнче Турци чиккине ҫурла уйӑхӗн 1-мӗшӗнчен уҫассине пӗлтерчӗҫ. Малтанласа самолетсем икӗ хулана: Стамбула тата Анкарана — вӗҫӗҫ. Ҫурла уйӑхӗн 10-мӗшӗ хыҫҫӑн Турцинчи тӗп курорт хулисене: Антальяна, Бодрума тата Даламана.

Шупашкартан Турцине хальлӗхе Мускав урлӑ ҫеҫ вӗҫме май килӗ. Ҫавна май «Северный ветер» компани Шупашкартан Турцине каякансене Мускавран Турцине вӗҫекен самолетпа ҫыхӑнтармалли рейссем уҫма палӑртнӑ.

Турцие Мускав урла каякан самолет Шупашкартан ҫурла уйӑхӗн 3, 10, 13, 20, 24, 31-мӗшӗсенче, авӑн уйӑхӗн 3, 10, 14, 21, 24-мӗшӗсенче, юпа уйӑхӗн 1, 5, 12, 15, 22-мӗшӗсенче 15 сехет те 50 минутра хускалмалла. Турцие 19 сехет те 50 минутра ҫитмелле. Шупашкартан Мускава «А-321» аэробус илсе кайӗ.

culture.ru сайтри сӑн

Ҫӗнӗ вӗренӳ ҫулӗнче ачасем мӗнле вӗренӗҫ? Ара, пандемие пула ҫуркунне дистанци мелӗпе ӑс пухма пуҫларӗҫ-ҫке-ха.

Хальлӗхе палӑртнӑ тӑрӑх, вӗренӳ ҫулӗнче шкул ачисем унчченхи пекех парта хушшине ларӗҫ. Кун пирки РФ вӗренӳ министрӗ Сергей Кравцов пӗлтернӗ.

Малтанах ведомство авӑнӑн 1-мӗшӗнче ачасене йӑлана кӗнӗ линейкӑна пухасшӑн пулман. Паллах, ку кӑшӑлвирус сарӑлнипе ҫыхӑннӑ. Халӗ вара урӑхларах палӑртнӑ: эпидемиологи лару-тӑрӑвӗ йӗркеллӗ пулсан линейка иртӗ.

Ачасем унчченхи пекех вӗренӗҫ, парта хушшине ларӗҫ.

06239.com.ua сайтри сӑн

Шупашкарти ача пахчисенче хальлӗхе дежурнӑй ушкӑнсем ҫеҫ ӗҫлӗҫ. Ачасене утӑн 27-мӗшӗнчен пуҫласа ҫурлан 3-мӗшӗччен йышӑнасси пирки ашшӗ-амӑшӗн чатӗсенче хыпар сарӑлнӑ. Анчах управлени пуҫлӑхӗ Дмитрий Захаров пӗлтернӗ тӑрӑх, ку суя хыпар.

Ача пахчисем чарусене пӑрахӑҫламалли виҫҫӗмӗш тапхӑра кӗрсен ҫеҫ уҫӑлӗҫ. Хальлӗхе республика иккӗмӗш тапхӑра кӗме хатӗрленет. Ҫавна май ача пахчисене дежурнӑй ушкӑнсем ҫеҫ ӗҫлӗҫ-ха. Ачасенчен кӑшӑлвируспа чирлеменнине кӑтартакан справка ыйтӗҫ-и е ҫук-и – паллӑ мар-ха, ҫакна Роспотребнадзор татса парӗ.

sochi-express.ru сайтри сӑн

Ку эрнере пирӗн пата шӑрӑх ҫанталӑк таврӑнӗ. Кун пирки «Чӑваш Енри ҫанталӑк» проект синоптикӗсем пӗлтереҫҫӗ.

Анчах шӑрӑх кунсем нумайлӑха тытӑнса тӑмӗҫ. Ҫанталӑк ӑшӑ тӑрӗ-ха, анчах ҫумӑрсем ҫукалӗҫ. Вӑл ӑҫта тата хӑҫан ҫӑвассине пӗлсе пӗтерме ҫук. Ҫавӑнпа синоптиксем сунчӑк йӑтса ҫӳреме сӗнеҫҫӗ.

Ытларикун Шупашкарта пӗр тӑваткал метр ҫине 15 литр шыв ӳкме пултарать. Эрне варринче термометр 25-30 градус кӑтартӗ. Пӑчӑ пулӗ, ҫумӑр ҫӑвӗ. Канмалли кунсем тӗлне ҫанталӑк каллех уҫӑлтарӗ.

Ан кулянӑр: шӑрӑх та пирӗнтен нумайлӑха каймасть, ҫитес эрнерех таврӑнӗ.

Ҫивӗч ыйту сиксе тухсан халӗ унчченхилле хаҫата пӗлтерме кирлех те мар. Тӗнче тетелӗнчи халӑх ушкӑнӗсенче ҫырсан тӳре-шара тӳрех асӑрхать, кӑлтӑка вӑхӑтра татса пама тӑрӑшать.

«Чувашская Республика» (чӑв. Чӑваш Республики) паблик тӗнче тетелӗнчи хӑйӗн страницисенче пӗлтернӗ тӑрӑх, халӑх ушкӑнӗсенче ҫынсен ыйтӑвӗсем татӑлаҫҫӗ. Республика влаҫӗ комментарисене вуланипе тата хуравланипех ҫырлахмасть, ыйтӑва татса пама тӑрӑшать.

Иртнӗ эрнере, тӗслӗхрен, Хӗрлӗ Чутай районӗнчи Туктамӑш ялӗнчи Завод урамӗнче пурӑнакансем йӑлари каяша турттарса кайманнине хыпарланӑ. Ҫӑхава Хӗрлӗ Чутай район администрацийӗ асӑрханӑ хыҫҫӑн контейнерсем самантрах пушаннӑ.

artfile.ru сайтри сӑн

Чӑваш Енре хальлӗхе вӑрмана кайма юрамасть. Ку чару ҫурла уйӑхӗн 13-мӗшӗччен вӑйра пулӗ-ха.

ЧР Ҫутҫанталӑк министерстви пӗлтернӗ тӑрӑх, ку чарусене Улатӑр, Вӑрнар, Йӗпреҫ, Канаш, Кире, Сӗнтӗрвӑрри, Сӑнав, Шупашкар, Шӑмаршӑ, Ҫӗмӗрле, Етӗрне лесничествисенче пӑхӑнмалла.

Вӑрмана кӗме юрамасть кӑна мар, унта массӑллӑ мероприятисем ирттерме, транспортпа пыма та юрамасть. Ку пурте усӑ куракан ҫулсене пырса тивмест.