Чӑваш Ене Раҫҫей эстрадинчи паллӑ «ҫӑлтӑр» килнӗ. Анна Семенович Кӳкеҫ поселокӗнче концертра юрланӑ.

Авӑн уйӑхӗн 22-мӗшӗнче Кӳкеҫре «Скания» урапан дилер центрӗнче уҫӑ алӑксен кунӗ иртнӗ. Мероприятие савӑнӑҫлӑ лару-тӑрура йӗркеленӗ. Концертра тӗп номере «Блестящие» ушкӑнӑн экс-солистки Анна Семенович пурнӑҫланӑ.

Концертра Раҫҫей эстрада юрӑҫи юрланисӗр пуҫне ташӑсем, шоу пулнӑ. Мероприятие ЧР Пуҫлӑхӗ Михаил Игнатьев та ҫитнӗ. Вӑл департамент директорӗпе Зденек Петраспа килӗштерсе ӗҫлесси пирки калаҫнӑ.

Республикӑра Пӗтӗм Раҫҫейри ял хуҫалӑх ҫыравӗн хатӗрленӳ тапхӑрӗ авӑн уйӑхӗн 15-мӗшӗнче вӗҫленнӗ. Регистраторсем ҫыравӑн суйласа илнӗ обьекчӗсен списокӗсене тишкерсе пӗтернӗ.

Аса илтерер, ял хуҫалӑх ҫыравӗ килес ҫулхи утӑн 1 - ҫурлан 15-мӗшӗсенче иртӗ. Аякри вырӑнсенче ӑна каярах йӗркелӗҫ: ун пеккисенче ҫырав авӑнӑн 15 – чӳкӗн 15-мӗшӗсенче пулмалла.

Ятарласа суйласа илнӗ 107 ҫын хулара пурӑнакансен хуҫалӑхӗсенчи кӑтартусене тӗрӗсленӗ. Вӗсенчен ҫӗр лаптӑкӗ пурри, пур пулсна мӗн чухлӗ лаптӑк пирки, выльӑх-чӗрлӗх тытнипе тытманнине ыйтса пӗлнӗ. Ҫырса ҫӳрекенсем садсенче, пахчасенче, дачӑсенче те пулнӑ.

Ҫырав объекчӗсен регистраторсем хатӗрленӗ списокӗсене тӗпе хурса кашни муниципалитетра шутлав тата инструктор участокӗсен шутне палӑртӗҫ.

Авӑн уйӑхӗн 26-мӗшӗнче Елчӗк районӗнчи Аслӑ Елчӗкре Раҫҫейре тата ют ҫӗршывра палӑрнӑ ӑсчаха, педагога, этнопедагогика шкулне йӗркелекене, педагогика ӑслӑлӑхӗсен докторне, профессора, ҫыравҫа, куҫаруҫа, критика Геннадий Никандрович Волкова халалласа палӑк уҫма палӑртнӑ.

Унӑн бюстне шкул умне вырнаҫтарӗҫ. Аслӑ Елчӗк шкулӗ унӑн ячӗпе хисепленет. Скульптурӑна тумашкӑн халӑхран, районти ҫынсенчен укҫа пухнӑ. Палӑкӑн авторӗ — ЧР тава тивӗҫлӗ ӳнерҫи Вячеслав Немцев скульптор. Вӑл хӑй те Аслӑ Елчӗкре ҫуралса ӳснӗ.

Халӗ бюста вырнаҫтарма хатӗрленеҫҫӗ. Постамент лартаҫҫӗ, ҫывӑхри территорие хӑтлӑлатаҫҫӗ.

Авӑнӑн 26-мӗшӗнче, Аслӑ Елчӗк уявӗнче, бюста лартӗҫ. Палӑка уҫнӑ ҫӗре Геннадий Никандрович патӗнче вӗреннисем, Шупашкар хӑнисем, тӑванӗсем, ҫывӑх ҫыннисем килӗҫ. Пысӑк концерт йӗркелеме палӑртнӑ. Ҫав кунах Аслӑ Елчӗкре футбол енӗпе район турнирӗ иртӗ.

Сӑнсем (7)

Чӑваш Енре пӗр санатори тӗлӗшпе административлӑ ӗҫ пуҫарнӑ. Ӑна Шупашкарти шыв управне вараланӑшӑн явап тыттарасшӑн. Кун пирки ЧР прокуратурин сайтӗнче пӗлтереҫҫӗ.

Прокуратура тӗрӗслевӗ палӑртнӑ тӑрӑх, «Чӑваш Ен санаторийӗ» Атӑла сиенлӗ япаласемпе вараласран сыхланман.

2015 ҫулта санатори Шупашкарти шыв управне сиенлӗ япаласем кӑларнӑ. Вӑл йышра аммоний, нитрит-анион, фосфатсем пулнӑ. Ҫавна май «Чӑваш Ен санаторийӗ» акционерлӑ уҫӑ общество тӗлӗшпе административлӑ йӗркене пӑснӑ тесе ӗҫ пуҫарнӑ. Директор тӗлӗшпе представлени ҫырнӑ. Унӑн ҫак ҫитменлӗхе пӗтерме тивӗ.

Чӑваш Ен полицейскийӗсем 30 хӗрарӑма вӗлернӗ ҫынна шыраса тупма пулӑшу ыйтаҫҫӗ. Хӑрушӑ преступнике шырани пирки ЧР Следстви комитечӗ пӗлтерет.

Малтанлӑха палӑртнӑ тӑрӑх, ҫак арҫын Удмурт, Тутар, Чӑваш республикисенче тата ытти регионта 2011–2012 ҫулсенче хӗрарӑмсене вӗлернӗ. Икӗ тӗслӗхӗ Шупашкарта пулнӑ.

Преступник 75–90 ҫулсенчи ватӑсем патне ТСЖ е социаллӑ служба ӗҫченӗ евӗр пырса кӗнӗ те хӗрарӑмсене пӑвнӑ. Следстви шухӑшланӑ тӑрӑх, ҫак преступленисене пӗр ҫын тунӑ.

Ҫав арҫын 20–35 ҫулсенче, 170–175 сантиметр ҫӳллӗш. Ҫӳҫӗ ҫутӑрах, куҫӗ те ҫутӑ. Хура тӗслӗ куртка тӑхӑнма пултарнӑ, шӑлаварӗ хура, калпакӗ те ҫавӑн тӗслех.

Ун пирки пӗлекенсене 8 (8352) 66-24-31 е 66-24-88, 24-14-25 е 8 (831) 419-82-08 телефон номерӗсемпе шӑнкӑравлама ыйтаҫҫӗ.

Шупашкарта пациент операци хыҫҫӑн вилсе кайнӑ. Халӗ ку ӗҫ тӗлӗшпе операцие ирттернӗ тухтӑра айӑпласшӑн.

РФ Следстви комитечӗн Чӑваш Енри следстви управленийӗ пӗлтернӗ тӑрӑх, ку кӑҫал утӑ уйӑхӗн 13-мӗшӗнче пулнӑ. Медицина ӗҫченӗ уҫӑ трахеостомипе операци ирттернӗ. Анчах 48 ҫулти пациент операци хыҫҫӑн ҫур сехетрен чӗре япӑх ӗҫленипе тата пуҫ мими шыҫӑннипе вилнӗ.

Судпа медицина экспертизи палӑртнӑ тӑрӑх, пациент трахейӑна тӗрӗс мар интубаци тунӑшӑн пурнӑҫран уйрӑлнӑ. Халӗ ку ӗҫ тӗлӗшпе тӗрӗслев ирттереҫҫӗ, пуҫиле ӗҫе малалла тишкереҫҫӗ.

«Хыпар» хаҫат редакторӗ Валери Туркай Чӑваш Енӗн информаци политикин министрне Александр Иванова халалласа сӑвӑ ҫырнӑ. Анчах вӑл йӗркесем – мухтав юрри мар.

Сӑмахӗ мӗн ҫинчен пынине пӗлес тесен сӑвӑри темиҫе йӗркене илсе кӑтартар:

«Иванов министӑр мӗн кӑна курман-тӑр!..

Вӑл карьера тунӑ хура тар тӑкса.

Кирлӗ чух — пуҫ тайнӑ, кирлӗ чух — йӑл кулнӑ,

Кирлӗ чух — вӑл сутнӑ ӑшшӑн йӑл кулса».

Е тата ҫакӑн пек куплет пур унта:

«Иванов министӑр хӑй те пит тунмасть-тӑр —

Сахал мар вӑл хуҫнӑ ҫыннӑн кунҫулне.

Шеллеме пӗлмен вӑл, каҫарма пӗлмен вӑл.

Халь те аркатать вӑл ҫын ӑраскалне».

Республика хыснинчен укҫа илсе тӑракан хаҫат редакторне калем илсе ҫакӑн пек содержаниллӗ сӑвӑ ҫырма, ӑна Информаци политикин министерствинче тӗп редакторсемпе иртекен канашлура тыттарма мӗн хистенине министрпа редактор хӑйсем кӑна пӗлеҫҫӗ-тӗр.

Вӑрнарта «Химик» стадионта футболла вылямалли ҫӗнӗ уя хута яма тытӑннӑ. Унӑн сийӗ искусственнӑй пулӗ.

Ӑна ЧР Спорт министерстви тата район администрацийӗ тутарать. Строительство ӗҫӗсене Шупашкарти «Стройлогистик» фирма пурнӑҫлать.

Вӑрнар район администрацийӗн пресс-релизӗнче палӑртнӑ тӑрӑх, халӗ стадион пулмалли вырӑнта ҫӗре якатаҫҫӗ. Унтан футбол уйӗн тӗпне тӑвӗҫ. Ӑна хӑйӑртан, вӗтӗ чулран, искусственнӑй курӑкран тӑвӗҫ.

Футбол уйӗнче пысӑк шайлӑ ӑмӑртусене ирттерме май пулӗ. Ӑна тумашкӑн 35 миллион та 590 пин тенкӗ кирлӗ. Укҫана республика, муниципалитет тата федераци хыснисенчен уйӑрнӑ. Стадионта чупмалли ҫул, 400 метр таршшӗскер, пулӗ. Унӑн сийӗ синтетикӑран пулнӑран япӑх ҫанталӑкра та чупма май пулӗ.

Проектпа килӗшӳллӗн, футбол уйӗнче прожектор та пулмалла. Ҫапла вӑрнарсен футбол чемпионатне ирттерме те май пулӗ.

Иртнӗ ҫулшӑн ҫӗр, транспорт тата пурлӑх налукӗсене тӳлес ыйтусене уҫӑмлатма Федерацин налук службин инспекцийӗсенче Уҫӑ алӑксен кунне ирттереҫҫӗ. Ӑна хальхинче авӑнӑн 18, 19-мӗшӗсенче йӗркелеме палӑртнӑ.

Маларах каланӑ налуксене ҫитес уйӑхӑн 1-мӗшӗнчен кая юлмасӑр тӳлемелле.

Ыйтса пӗлес тесен специалистсем патне ҫитсе килме ан ӳркенӗр. Вӗсенчен вӑл е ку территорире мӗнле виҫепе тӳлеттерни тата ҫӑмӑллӑхсем пуррипе ҫукки пирки ыйтса пӗлме май килӗ.

Унсӑр пуҫне налук органӗсем ярса панӑ уведомленисенчи ҫӗр, транспорт, пурлӑх налукӗсен виҫисем тӗлӗшпе тӳрлетӳсем кӗртмешкӗн ыйтса ҫырма пулать.

Уҫӑ алӑксен кунӗсенче налук инспекцийӗсем ҫак графикпа ӗҫлӗҫ: авӑнӑн 18-мӗшӗнче — 8-тан пуҫласа 20 сехетчен, авӑнӑн 19-мӗшӗнче — 10-ран пуҫласа 15 сехетчен.

Авӑнӑн 11-мӗшӗнче Вӑрнар районӗнчи 11 тӑлӑх ҫӗнӗ хваттер уҫҫисене илнӗ. Сӑмах май, пӗлтӗр Вӑрнар поселокӗнче 30 тӑлӑх ҫӗнӗ ҫурта куҫнӑ.

Уява район администрацийӗн пуҫлӑхӗ Леонид Николаев тата ытти хӑна хутшӑннӑ. Леонид Николаев хваттер уҫҫисене панӑ май патшалӑх тӑлӑхсене пулӑшнине палӑртнӑ. Тӑлӑхсем Вӑрнарти Ленин урамӗнчи 45-мӗш ҫуртра пурӑнма пуҫлӗҫ.

Уява строительство организацийӗн ӗҫченӗсем те хутшӑннӑ. Вӗсем тӑрӑшнипе Вӑрнарта ҫулталӑкра виҫӗ хутлӑ ҫурт ҫӗкленнӗ. Строительсем хӑйсен ӗҫне тивӗҫлипе пурнӑҫланӑ.

Хваттерсенче йӑлтах пур: ҫутӑ, газ, ӑшӑ, шыв, сантехника, газ плити. Хӗрлӗ хӑйӑва кассан тӑлӑхсем хӑйсен хваттерӗсене кӗрсе курнӑ. Хваттерсене пайланӑ чухне тӑлӑхсен хушшинче пӗртӑвансем пуррине те шута илнӗ. Вӗсене кӳршӗллӗ панӑ.

Ҫӗнӗ ҫурта куҫнисем савӑнӑҫне пытарман. Оксана Павлова ку куна тахҫантанпах кӗтнӗ. Унӑн хваттерӗ 33 тӑваткал метрлӗ. Александра Солина ҫӗнӗ хваттерте ачипе пурӑнма ӗмӗтленнӗ. Тӑлӑхсен ӗмӗчӗсем тинех пурнӑҫланнӑ.

Сӑнсем (22)