«Хыпар» хаҫат редакторӗ Валери Туркай Чӑваш Енӗн информаци политикин министрне Александр Иванова халалласа сӑвӑ ҫырнӑ. Анчах вӑл йӗркесем – мухтав юрри мар.

Сӑмахӗ мӗн ҫинчен пынине пӗлес тесен сӑвӑри темиҫе йӗркене илсе кӑтартар:

«Иванов министӑр мӗн кӑна курман-тӑр!..

Вӑл карьера тунӑ хура тар тӑкса.

Кирлӗ чух — пуҫ тайнӑ, кирлӗ чух — йӑл кулнӑ,

Кирлӗ чух — вӑл сутнӑ ӑшшӑн йӑл кулса».

Е тата ҫакӑн пек куплет пур унта:

«Иванов министӑр хӑй те пит тунмасть-тӑр —

Сахал мар вӑл хуҫнӑ ҫыннӑн кунҫулне.

Шеллеме пӗлмен вӑл, каҫарма пӗлмен вӑл.

Халь те аркатать вӑл ҫын ӑраскалне».

Республика хыснинчен укҫа илсе тӑракан хаҫат редакторне калем илсе ҫакӑн пек содержаниллӗ сӑвӑ ҫырма, ӑна Информаци политикин министерствинче тӗп редакторсемпе иртекен канашлура тыттарма мӗн хистенине министрпа редактор хӑйсем кӑна пӗлеҫҫӗ-тӗр.

Вӑрнарта «Химик» стадионта футболла вылямалли ҫӗнӗ уя хута яма тытӑннӑ. Унӑн сийӗ искусственнӑй пулӗ.

Ӑна ЧР Спорт министерстви тата район администрацийӗ тутарать. Строительство ӗҫӗсене Шупашкарти «Стройлогистик» фирма пурнӑҫлать.

Вӑрнар район администрацийӗн пресс-релизӗнче палӑртнӑ тӑрӑх, халӗ стадион пулмалли вырӑнта ҫӗре якатаҫҫӗ. Унтан футбол уйӗн тӗпне тӑвӗҫ. Ӑна хӑйӑртан, вӗтӗ чулран, искусственнӑй курӑкран тӑвӗҫ.

Футбол уйӗнче пысӑк шайлӑ ӑмӑртусене ирттерме май пулӗ. Ӑна тумашкӑн 35 миллион та 590 пин тенкӗ кирлӗ. Укҫана республика, муниципалитет тата федераци хыснисенчен уйӑрнӑ. Стадионта чупмалли ҫул, 400 метр таршшӗскер, пулӗ. Унӑн сийӗ синтетикӑран пулнӑран япӑх ҫанталӑкра та чупма май пулӗ.

Проектпа килӗшӳллӗн, футбол уйӗнче прожектор та пулмалла. Ҫапла вӑрнарсен футбол чемпионатне ирттерме те май пулӗ.

Иртнӗ ҫулшӑн ҫӗр, транспорт тата пурлӑх налукӗсене тӳлес ыйтусене уҫӑмлатма Федерацин налук службин инспекцийӗсенче Уҫӑ алӑксен кунне ирттереҫҫӗ. Ӑна хальхинче авӑнӑн 18, 19-мӗшӗсенче йӗркелеме палӑртнӑ.

Маларах каланӑ налуксене ҫитес уйӑхӑн 1-мӗшӗнчен кая юлмасӑр тӳлемелле.

Ыйтса пӗлес тесен специалистсем патне ҫитсе килме ан ӳркенӗр. Вӗсенчен вӑл е ку территорире мӗнле виҫепе тӳлеттерни тата ҫӑмӑллӑхсем пуррипе ҫукки пирки ыйтса пӗлме май килӗ.

Унсӑр пуҫне налук органӗсем ярса панӑ уведомленисенчи ҫӗр, транспорт, пурлӑх налукӗсен виҫисем тӗлӗшпе тӳрлетӳсем кӗртмешкӗн ыйтса ҫырма пулать.

Уҫӑ алӑксен кунӗсенче налук инспекцийӗсем ҫак графикпа ӗҫлӗҫ: авӑнӑн 18-мӗшӗнче — 8-тан пуҫласа 20 сехетчен, авӑнӑн 19-мӗшӗнче — 10-ран пуҫласа 15 сехетчен.

Авӑнӑн 11-мӗшӗнче Вӑрнар районӗнчи 11 тӑлӑх ҫӗнӗ хваттер уҫҫисене илнӗ. Сӑмах май, пӗлтӗр Вӑрнар поселокӗнче 30 тӑлӑх ҫӗнӗ ҫурта куҫнӑ.

Уява район администрацийӗн пуҫлӑхӗ Леонид Николаев тата ытти хӑна хутшӑннӑ. Леонид Николаев хваттер уҫҫисене панӑ май патшалӑх тӑлӑхсене пулӑшнине палӑртнӑ. Тӑлӑхсем Вӑрнарти Ленин урамӗнчи 45-мӗш ҫуртра пурӑнма пуҫлӗҫ.

Уява строительство организацийӗн ӗҫченӗсем те хутшӑннӑ. Вӗсем тӑрӑшнипе Вӑрнарта ҫулталӑкра виҫӗ хутлӑ ҫурт ҫӗкленнӗ. Строительсем хӑйсен ӗҫне тивӗҫлипе пурнӑҫланӑ.

Хваттерсенче йӑлтах пур: ҫутӑ, газ, ӑшӑ, шыв, сантехника, газ плити. Хӗрлӗ хӑйӑва кассан тӑлӑхсем хӑйсен хваттерӗсене кӗрсе курнӑ. Хваттерсене пайланӑ чухне тӑлӑхсен хушшинче пӗртӑвансем пуррине те шута илнӗ. Вӗсене кӳршӗллӗ панӑ.

Ҫӗнӗ ҫурта куҫнисем савӑнӑҫне пытарман. Оксана Павлова ку куна тахҫантанпах кӗтнӗ. Унӑн хваттерӗ 33 тӑваткал метрлӗ. Александра Солина ҫӗнӗ хваттерте ачипе пурӑнма ӗмӗтленнӗ. Тӑлӑхсен ӗмӗчӗсем тинех пурнӑҫланнӑ.

Сӑнсем (22)

Наркотикӑн саккунлӑ мар ҫаврӑнӑшӗпе кӗрешекенсем ҫак ҫуртра вырнаҫӗҫ-ши?

Наркотикпе кӗрешекенсем Шупашкарта ҫичӗ хутлӑ ҫуртра вырнаҫма пултарасси пирки Алексей Радченко блогер хӑйӗн чӗрӗ журналӗнче тӗлӗнсе пӗлтерет. Вӑл каланӑ тӑрӑх, асӑннӑ ведомствӑн Чӑваш Енри ӗҫченӗсем ҫичӗ хутлӑ ҫуртра вырнаҫма шухӑшлаҫҫӗ, халӗ ҫурта тӑвассипе тимлеҫҫӗ.

Алексей Радченко хӑйсем валли чаплӑ керменсем маларах Федераци казначействи, суд приставӗсем туса лартни пирки аса илет. Наркотиксен саккунлӑ мар ҫаврӑнӑшӗпе кӗрешекенсем пӗчӗкрех ҫурта нивушлӗ вырнаҫаймаҫҫӗ-ши вара тесе пуҫ ватать А. Радченко. Асӑннӑ органта миҫе ҫын ӗҫлени пирки статистика пур-ши е ку хыпар вӑрттӑнлӑх-ши тесе ыйту хускатать вӑл. Ҫӗнӗ ҫуртра кашни ҫынна миҫе тӑваткал метр тивесси пирки те пуҫ ватать блогер.

Наркотиксен саккунлӑ мар ҫаврӑнӑшӗпе кӗрешекенсен тытӑмӗнчи чи хӑватлӑ вӑй – спецназ. Ятарлӑ тӗллевлӗ ҫав отряда «Аслати» ят панӑ. Авӑнӑн 8-мӗшӗнче вӑл хӑйӗн професси кунне паллӑ тунӑ. Вӑл куна Наркотикӑн сккунлӑ мар ҫаврӑнӑшӗпе кӗрешекен федераци служби йышӑннӑ.

Спецназра вӑй-хал енчен ҫирӗп те тӗреклӗ, кӑмӑл-сипет пахалӑхӗ тӗлӗшпе лайӑх енсемлӗ ҫынсем ӗҫлени пирки пӗлтерет маларах асӑннӑ органӑн Чӑваш Енри Управленийӗн пресс-служби. Профилактика мероприятийӗсем ирттернӗ май отрядри пӑхаттирсем тӗрлӗ вӗренӳ учрежденийӗнче ӑс пухакан ҫамрӑксемпе тӗл пулаҫҫӗ, преступлени тумалли марри пирки каласа ӑнлантараҫҫӗ.

Професси кунӗнче спецназ ҫыннисем табель хӗҫ-пӑшалӗнчен пульӑпа перессипе тупӑшнӑ.

Сӑнсем (5)

ЧНКн «Чӑваш xӗpapӑмӗ» комитечӗн пайташӗсем

Паян Республикӑри хӗрарӑмсен канашӗн пӗрлешӗвӗн хастарӗсем, районсенчи уйрӑмӗсен пайташӗсем Шупашкарти 17-мӗш съезда пуҫтарӑннӑ. Мероприятие ЧНКн «Чӑваш xӗpapӑмӗ» комитет пайташӗсем те хутшӑннӑ.

Съезда Чӑваш хӗрарӑмӗсен Канашӗн ертӳҫи Ольга Зайцева ертсе пынӑ.

Чӑваш Ен Элтеперӗн тивӗҫӗсене вӑхӑтлӑх пурнӑҫлакан Михаил Игнатьев Хӗрарӑмсен канашӗ хӑйӗн ырми-канми тӑрӑшулӑхӗпе тахҫанах ырӑ сӑмаха тивӗҫнине палӑртнӑ. «Эпир сирӗн умра пapӑмpa, республикӑри арҫынсенчен тайма пyҫ сире», — тени пирки ЧНКн пресс-службин ертӳҫи Зоя Яковлева пӗлтерет.

Михаил Игнатьев ЧНК президиумӗн пайташне, «Чӑваш xӗpapӑмӗ» комитет ертӳҫине Нина Петровӑна Тав ҫырӑвӗпе чысланӑ.

Съездра Чӑваш хӗрарӑмӗсен канашне ытти халӑх пӗрлешӗвӗпе пӗрлех ЧНКн «Чӑваш xӗpapӑмӗ» комитечӗ те кӗнӗ. Ҫапла вара «Чӑваш хӗрарӑмӗсен республикӑри Пӗрлӗхӗ» туса хунӑ. Ку организацие ертсе пыма Ольга Зайцевӑна шаннӑ.

Нумаях пулмасть пичетрен Шупашкар районӗн энциклопедийӗ тухнӑ. Халӗ пур районӑн та тенӗ пекех таврапӗлӳ словарӗсем, справочниксем, кӗнекесем пур. Пӑрачкав, Сӗнтӗрвӑрри районӗсен, Улатӑр, Канаш, Шупашкар тата Ҫӗмӗрле хулисен ҫеҫ энциклопеди ҫук.

Патӑрьел районӗн тата Чӗмпӗр облаҫӗн энциклопедийӗсем икӗ томпа тухнӑ. Пур энциклопеди те тенӗ пекех Чӑваш халӑх академийӗн тата Чӑваш таврапӗлӳҫисен дипломӗсене тивӗҫнӗ. Элӗк район энциклопедийӗ вара Мускаври конкурсра та ҫӗнтернӗ.

Шупашкар район энциклопедине 1994–1995 ҫулсенче хатӗрленӗ. Ростислав Данилов пуҫлӑх пулнӑ чухне «Сторона моя Чебоксарская» кӗнеке тухнӑ. Анатолий Князев пулнӑ чухне вара районти таврапӗлӳҫӗсем ӗҫлеймен. Хальхи пуҫлӑх энциклопедишӗн савӑннӑ пек, анчах кайран хастарсен ӗҫ ушкӑнне салатнӑ.

Полиграфи тӗлӗшӗнчен кӗнеке хитре пулсан та вӑл тӗплӗ пулайман.

Малалла...

Хӗрлӗ Чутай районӗнчи Хурапыр ялӗнче ветспециалистсем килти выльӑх-чӗрлӗхе урнӑ чиртен прививка тунӑ. Ҫакна тума сӑлтавӗ пулнӑ.

Авӑн уйӑхӗн 3-мӗшӗнче Хурапырта пӗр ҫын ӗне кӗтӗвне пӑхнӑ. Унччен те пулман — кӗтӳҫӗ ӗнесем патне тилӗ ҫывхарнине курнӑ. Тискер чӗрчун хурарах ӗнене малти уринчен ҫыртнӑ. Теприсене вара хӑратнӑ ҫеҫ. Ҫавна пула ӗнесем тӗрлӗ енне чупса саланнӑ.

Кӗтӳҫӗ тилӗ ҫыртнӑ ӗнен хуҫипе пӗрле тискер чӗрчуна вӗлернӗ. Унтан вӗсем районти чӗрчун чирӗсемпе кӗрешекен станцие пӗлтернӗ.

Тилӗ виллине ветлабораторие ӑсатнӑ. Тепӗр кунхине паллӑ пулнӑ: тискер чӗрчун урнӑ чирпе аптӑранӑ. Россельхознадзор пӗлтернӗ тӑрӑх, ветспециалистсем Хурапырти выльӑх-чӗрлӗхе прививка тунӑ. Пӗтӗмпе 200 ытла выльӑха. Вӗсен йышне ӗне, сурӑх, кушак, йытӑ тата ытти чӗрчун кӗнӗ.

Ӗнер, авӑнӑн 9-мӗшӗнче, Михаил Игнатьев Хӗрлӗ Чутай районӗнчи Хурапыр ялӗнче карантин пулнине алӑ пусса ҫирӗплетнӗ.

Константин Ишутов блогер

Шупашкар хула администрацийӗн сити-менеждерӗ Алексей Ладыков республикӑри паллӑ блогерсенчен пӗрне, Константин Ишутова, хӑратни пирки ҫав каччӑ хӑйӗн блогӗнче вырнаҫтарнӑ. Хула администрацийӗн пуҫлӑхӗпе калаҫнине вӑл ҫырса тата ӳкерсе илнӗ, калаҫӑвӑн сыпӑкне тӗнче тетелӗнчи хӑйӗн страницине лартса хунӑ. Ҫырса илнине ӗненсен Алексей Ладыков ирӗклӗ блогера хӑратнӑ пек пулса тухать.

Ӗнер Шупашкарӑн сити-менеджерӗ «Ҫеҫпӗл» кинотеатр ҫуртӗнче хула ҫыннисемпе тӗл пулнӑ. Унта Юрий Пичугин ятлӑ ҫын (вӑл кимӗсене Шупашкарӑн Ҫӗнӗ-Хӗвеланӑҫ районӗнче Атӑл ҫыран хӗрринче ларттарассишӗн тавлашнипе юлашки вӑхӑтра палӑрчӗ) Алексей Ладыков Константин Ишутова чӑннипех хӑратнипе хӑратманни пирки кӑсӑкланнӑ.

– Уншӑн кулянатӑр-им? – ыйту ҫине ыйтупа хуравланӑ хула тӳре-шари.

– Эпӗ хамшӑн кулянатӑп-ха – вырӑнлӑ ыйтусем памасан нимӗн те пулмасть-ши тетӗп те, – ҫухалса кайман кимӗҫӗ.

– Пирӗн хушӑра шӳтлӗ калаҫу пулнӑ. Вӑл (Константин Ишутов. – В.С.) ӑна ҫавӑн пек мӗншӗн ҫавӑрттарса хунине пӗлместӗп. Уншӑн (Константин Ишутовшӑн. – В.С.) нимӗнле хӑрушлӑх та ҫук. Пире кирек епле, ҫав шутра вырӑнсӑр, ыйту паракансене нимӗн те шиклентермелле мар, – шантарса каланӑ Алексей Ладыков.

Малалла...