cheb-centr.soc.cap.ru сӑнӳкерчӗкӗ

Шупашкарта пурӑнакан Иван Сельцов паян 90 ҫул тултарнӑ.

Шӑмӑршӑ районӗнчи Ҫӗнӗ Тӑрӑнта ҫуралнӑскер халӗ республика тӗп хулинче пурӑнать. Ӑна халӑхӑн социаллӑ ыйтӑвӗсене тивӗҫтерекен комплекслӑ центран социаллӑ ӗҫченӗ пӑхса пулӑшать. Мучин икӗ хӗрӗ, Ольгӑпа Евгения та, ашшӗшӗн чунтан тӑрӑшаҫҫӗ. Ватӑ ҫын чун киленӗҫне пахчара тӑрмашнинче тупнӑран ҫулла ӑна дачӑна илсе каяҫҫӗ.

Унсӑр пуҫне арҫын йывӑҫа касса чутлама юратать. Ку ӑсталӑха вӑл ача чухнех хӑнӑхнӑ.

Телеграмри t.me/nikamran каналтан илнӗ сӑнӳкерчӗк

Етӗрне районӗнчи Пӗрҫырлан ялӗнчи Юрий Илюшкин Камчаткӑра апат пӗҫерет. Чӑваш арҫынни «Берингия Авача» ӑмӑртура шеф-поварта ӗҫлет иккен. Телеграмри «Пуринчен малтан» каналта хыпарланӑ тӑрӑх, вӑл унта хутшӑнакансен тата каюрсен апатланӑвӗшӗн яваплӑ, унӑн команди вӗсене тутлӑхлӑ апат ҫитерет. Юрий Илюшкин шаркку, борщ та пӗҫерет.

cap.ru сайтри сӑн

Паян республикӑри чи аслӑ ҫынпа, 107 ҫула кайса пурнӑҫран уйрӑлнӑ вӑрҫӑ ветеранӗпе Иван Ермолаевпа сывпуллашнӑ.

Вӑл Етӗрне хулинче пурӑннӑ. Иртнӗ ҫул, 106 ҫул тултарсан, вӑл Раҫҫей ветеранӗсен Чӑваш Енри уйрӑмӗн пайташӗ пулса тӑнӑ. Ун чухне ветеран хаваспах наци тумне тӑхӑнса сӑн ӳкерӗнмелли акцие хутшӑннӑ.

Етӗрнен хисеплӗ ҫыннине Етӗрне масарӗнче пытарнӑ.

«Контактри» сӑн

Патӑрьел округӗнчи Тикеш ялӗнче пуранӑкан Елизавета Демьянова 101 ҫул тултарнӑ. Ҫак ҫула ҫитсен те вӑл вӑй-хал енчен аптӑрамасть, халӗ те алла тӑмра тытма юратать.

Елизавета Алексеева ача чухне мусӑкҫӑ пулма ӗмӗтленнӗ, ҫак тӗллевпе Шупашкарти училищӗне те вӗренме кӗнӗ. Анчах вӑрҫӑ пуҫланнӑ та унӑн ӗмӗчӗ пӑчланнӑ: Елизавета медицина енӗпе ӑс пухса ҫынсене сипленӗ. Вӑл 1948 ҫулта Тикеш ялӗнче трахома чирне парӑнтарас ҫӗре хутшӑннӑ.

Елизавета Алексеевна мӑшӑрӗпе 5 ача ҫуратса ӳстернӗ. Халӗ кинемейӗн — 6 мӑнук, 5 кӗҫӗн мӑнук.

http://nasledie.nbchr.ru/personalii/issledovateli-jazyka/sergeev-vitalijj-ivanovich/ сӑнӳкерчӗкӗ

Шупашкарта Виталий Сергеев профессора асра тытса нарӑс уйӑхӗн 5-мӗшӗнче 12 сехетре асӑну хӑми уҫаҫҫӗ. Вӑл хулари Университет урамӗнчи 20-мӗш ҫуртӑн 1-мӗш корпуcӗ ҫинче пулӗ. Митинга хутшӑнас кӑмаллисене хапӑл туса кӗтеҫҫӗ.

Виталий Сергеев — чӗлхе тӗпчевҫи, филологи наукисен докторӗ, профессор, Чӑваш Республикин наукӑн тава тивӗҫлӗ ӗҫченӗ, Н.И. Ашмарин ячӗллӗ преми лауреачӗ, Раҫҫейӗн аслӑ пӗлӗвӗн хисеплӗ ӗҫченӗ.

Виталий Иванович 1942 ҫулхи кӑрлачӑн 20-мӗшӗнче Элӗк районӗнчи Мартынкассинче ҫуралнӑ, 2018 ҫулхи юпа уйӑхӗн 16-мӗшӗнче пурнӑҫран уйрӑлса кайнӑ.

cap.ru сайтри сӑн

Йӗпреҫ округӗнчи Буинск поселокӗнче пурӑнакан Зифа Валлиулина 95 ҫулхи юбилейне паллӑ тунӑ.

Зифа Фарахатдиновна 1931 ҫулта ҫуралнӑ. Чылай йывӑрлӑха чӑтса ирттернӗ вӑл: вӑрҫӑ, выҫлӑх… Вӑрҫӑ вӗҫленсен те лӑпкӑ пурнӑҫ пулман: ял хуҫалӑхне ура ҫине тӑратма пулӑшнӑ.

Паянхи кун вӑл 6 ачипе, 10 мӑнукӗпе, 7 кӗҫӗн мӑнукӗпе савӑнса пурӑнать. Мӑшӑрӗ ир ҫӗре кӗни ҫеҫ кулянтарать ӑна.

vk.com/gov_cap_ru сӑнӳкерчӗкӗ

Ӗнер, нарӑс уйӑхӗн 2-мӗшӗнче, Чӑваш Республикин тава тивӗҫлӗ тренерӗ Геральд Салдимиров 70 ҫул тултарнӑ.

Геральд Прокопьевич биатлон енӗпе хӑй вӑхӑтӗнче Чӑваш Ен чемпионӗ ята тата Атӑлҫи тӑрӑхӗнчи регионсен хӗллехи спартакиадинче бронза медале тивӗҫнӗ.

Муркаш районӗнчи Мӑн Сӗнтӗрти вӑтам шкулта вӗреннӗ чухне йӗлтӗр секцине ҫӳренӗ. 1993 ҫулта Челябинскри физкультура институтӗнчен вӗренсе тухнӑ.

Халӗ вӑл Шупашкарти 2-мӗш Олимп резервӗн спорт шкулӗнче тӑрӑшать. Геральд Прокопьевич 10 ытла Раҫҫейӗн спорт мастерне вӗрентсе кӑларнӑ, вӗсен йышӗнче тӗнче, Европа чемпионӗсемпе Олимп вӑййисен ҫӗнтерӳҫисем пур.

vk.com/gov_cap_ru сӑнӳкерчӗкӗ

Муркаш районӗнчи Владимир Осетров водителе «Чӑваш Республикин ял хуҫалӑхӗн тава тивӗҫлӗ ӗҫченӗ» ята панӑ. Хушӑва республика Элтеперӗ алӑ пуснӑ.

Владимир Аркадиевич 40 ҫул ытла Муркаш районӗнчи кайӑк-кӗшӗк фабрикинче ӗҫлет. 1984 ҫулта вӑл унта слесарь пулса вырнаҫнӑ, кайран водительте тимлеме пуҫланӑ. Халӗ вӑл грузовиксемпе те ҫӳрет, кӑткӑс ял хуҫалӑх техникине те ҫӑмӑллӑнах итлеттерет. Хӑйӗн опычӗпе ҫамрӑк специалистсене те паллаштарать.

Литература музейӗн сӑнӳкерчӗкӗ

Чӑваш халӑх поэтне Юрий Сементере 85 ҫул тултарнӑ ятпа К.В. Иванов ячӗллӗ Литература музейӗнче те саламланӑ.

Паллӑ кун ячӗпе музей «Сӑввӑмсем – ҫӗр ҫитмӗл туйӑм кӗввисем» ятпа курав уҫнӑ. Унта поэтӑн докуменчӗсемпе, кӗнекисемпе, алҫырӑвӗсемпе, сӑнӳкерчӗкӗсемпе, Литература музейне Юрий Сементер парнеленӗ ытти япалапа паллашма пулать.

Пултарулӑх каҫне Улькка Эльмен, Анатолий Кибеч, Василий Захаров, Галина Матвеева тата ытти ҫыравҫӑ хутшӑннӑ. Саламлакансен йышӗнче «Трак Ен» ентешлехӗн председателӗ Иван Архипов та пулнӑ.

Виталий Михайлов страницинчен илнӗ сӑнӳкерчӗк

Красноармейскинчи вулавӑшра Владимир Константинов таврапӗлӳҫӗне 75 ҫул тултарнӑ ятпа саламланӑ.

Владимир Константинов Красноармейски районӗнчи Анат Типҫырма ялӗнче ҫуралнӑ. Вӑл - журналист, педагог, таврапӗлӳҫӗ, халӑх академикӗ, Раҫҫей журналисчӗсен пӗрлешӗвӗн членӗ, 10 кӗнеке авторӗ, М. Тинехпи тата Н. Янкас премийӗсен лауреачӗ.

Вырӑнти хастар, Виталий Михайлов халӑх тетелӗнчи хӑйӗн страницинче пӗлтернӗ тӑрӑх, юбилейпа ентешне «Ял пурнӑҫӗ» хаҫат редакцийӗн ӗҫченӗсем, Трак вӑтам шкул педагогӗсем, Трак енри шкулсенче чӑваш чӗлхипе литератури вӗрентекенсем, Нестер Янкас ячӗллӗ пӗрлӗх правленийӗн председателӗ Иван Прокопьев, ЧНКан Трак енри ӳйрӑмӗн ертӳҫи Зинаида Михайлова тата Нестер Янкас ячӗллӗ пӗрлӗх пайташӗсем саламланӑ.