Ирина Шоркина архивӗнчи сӑн

Республика кунӗнче Чӑваш Республикин тава тивӗҫлӗ артистки Ирина Шоркина та килнӗ. Вӑл хальхи вӑхӑтра Мускавра пурӑнать.

Артистка ятарласа Мускавран уява Етӗрне хулине килнӗ. Вӑл ҫак тӑрӑхра ҫуралса ӳснӗ.

«Республика кунӗ Шупашкарта кӑна мар, тӑван Етӗрнере те иртрӗ. Унта вӑрттӑн, никама систермесӗр кайрӑм. Ҫапах ҫынсем палласа сӑн ӳкерӗнме пычӗҫ», - ҫапла ҫырнӑ юрӑҫ халӑх тетелӗнчи хӑйӗн страницинче.

«Контактри» сӑн

Владимир Путин Чӑваш Енре пурӑнакан Надежда Цветковӑна награда пама йышӑннӑ. Ҫак кунсенче ӑна Олег Николаев чысланӑ.

Надежда — виҫӗ ача амӑшӗ. Вӑл путакан ҫамрӑксене ҫӑлнӑ. Ку пӗлтӗр ҫӗртмен 11-мӗшӗнче пулнӑ. Надежда пляжра уҫӑлса ҫӳренӗ, ҫав вӑхӑтра вӑл хӗр путнине асӑрханӑ. Хӗрарӑм часрах ӑна ҫӑлма васканӑ. Пике шокра пулнӑ пулин те унпа пӗрле каччӑ пулнине каланӑ. Надежда шыва чӑмса ӑна та туртса кӑларнӑ.

Ольга Иванова сӑнӳкерчӗкӗ

Нумаях пулмасть, ҫӗртме уйӑхӗн 18-мӗшӗнче, Чӑваш Енӗн Наци вулавӑшӗнче Сергей Павловӑн «Тертпе термен» кӗнекине хӑтланӑ.

Кӗнеке презентацине ҫыравҫӑ тата журналист 70 ҫул тултарнине халалланӑ. Чӑваш кӗнеке издательствин редакторӗ Ольга Иванова халах тетелӗнчи хӑйӗн страницинче пӗлтернӗ тӑрӑх, асӑннӑ роман – «Шӑпчӑк ҫӗрӗпех юрлать» хайлавӑн иккӗмӗш кӗнеки. Вӑл нумаях пулмасть Чӑваш кӗнеке издательствинче пичетленсе тухнӑ.

Пултарулӑх каҫне прозаиксемпе поэтсем, драматургсемпе литературоведсем, журналистсемпе вулавӑш ӗҫченӗсем пуҫтарӑннӑ.

"Контактри" сӑн

Шупашкарта пурӑнакан 13 ҫулти Макар Сниткин СТС каналпа пыракан «Суперниндзя. Дети» телешоуна хутшӑннӑ.

Вӑл пӗрремӗш йывӑр задание хӑвӑрт пурнӑҫланӑ. Иккӗмӗш тапхӑрта та маттур пулнӑ, ункӑна ярса илнӗ, анчах сикнӗ чухне тытӑнса тӑрайман – шыва ӳкнӗ.

Шел те, Макар ҫурмафинала ҫитеймен. Ҫапах маттур пулнӑ вӑл, хӑюлӑхӗпе чӑтӑмлӑхне кӑтартнӑ.

https://cheb-centr.soc.cap.ru/ сӑнӳкерчӗкӗ

Шупашкарта пурӑнакан Анна Петрова паян, ҫӗртме уйӑхӗн 24-мӗшӗнче, 100 ҫул тултарнӑ.

Ҫӗрпӳ районӗнчи Рынкӑ ялӗнче ҫуралнӑ Анна Михайловна 1941 ҫулта, вӑрҫӑ пуҫлансан, медицина сестрин курсӗнчен вӗренсе тухнӑ. 1945 ҫулхи кӑрлач уйӑхӗнче ӑна Хӗвелтухӑҫ Пруссине янӑ.

Вӑрҫӑ хыҫҫӑн Анна Петрова Ҫӗрпӳ районӗнчи колхозра ӗҫленӗ, кайран 1953 ҫулта упӑшкипе Хабаровск тӑрӑхӗнчи Амур ҫинчи Комсомольск хулине тухса кайнӑ. Тепӗр икӗ ҫултан тӑван тӑрӑха таврӑнсан Шупашкарти ВНИИРа вырнаҫнӑ. Унта намточик пулса ӗҫленӗ.

Анна Михайловна икӗ ача ҫуратса ӳстернӗ. Паян унӑн пилӗк мӑнук, мӑнукӗсен виҫӗ ачи пур, вӗсен икӗ ачи.

Анатолий Аксаков архивӗнчи сӑн

Ӗнер, ҫӗртмен 19-мӗшӗнче, Патшалӑх Думин депутатне Анатолий Аксакова Кремльте III степень «Тӑван ҫӗршыв умӗнчи тава тивӗҫлӗ ӗҫсемшӗн» орденпа чысланӑ.

Иртнӗ эрнере те наградӑна тивӗҫнӗ вӑл. Ун чухне Анатолий Аксакова Аслӑ Ҫӗнтерӳ пулнӑранпа 80 ҫул ҫитнине халалланӑ астӑвӑм медалӗпе чысланӑ. Нарӑс уйӑхӗнче ӑна Крым Патшалӑх Канашӗн медалӗпе наградӑланӑ.

Аса илтерер: пӗлтӗр Анатолий Аксаков Шупашкарӑн хисеплӗ ҫынни пулса тӑнӑ, ҫавӑн пекех РФ Спорт министерстви йӗркеленнӗренпе 100 ҫул ҫитнине халалланӑ юбилейлӑ медале тивӗҫнӗ.

«Контактри» сӑн

Татьяна Комендантова – спортсменка пулнӑ, халӗ стюардессӑра ӗҫлет. Нумаях пулмасть вӑл «Стюардессӑсен Топӗ» пӗтӗм тӗнчери конкурс ҫурма финалне тухнӑ.

Татьяна Чӑваш Енре ҫуралса ӳснӗ, Олимп резервӗсен шкулӗнче спорт енӗпе аталаннӑ. 9 ҫул каялла вара Мускава куҫса кайнӑ.

Спорт хыҫҫӑн вӑл патшалӑх тытӑмӗнче ӗҫленӗ, унта ӑнӑҫлӑ карьера тума пултарнӑ. Анчах унӑн чунӗнче урӑх ӗмӗт тӗвӗленнӗ: стюардесса пуласси. 32-е чухне Татьяна профессие улӑштарнӑ. Пиллӗкмӗш ҫул ӗнтӗ вӑл бортпроводницӑра ӗҫлет. Халӗ Татьяна Мароккӑра иртекен ҫӑмӑл атлетика чемпионатне хутшӑнма хатӗрленет.

Ҫӗмӗрле округӗнчи Тӑван ялӗнче Георгий Федоров бюстне вырнаҫтарасшӑн. Шӑпах ҫак ялта (ун чухне Питушкино пулнӑ) 1942 ҫулта ҫуралнӑ вӑл. Бюст ялти культура ҫурчӗ умӗнче пулӗ.

Ҫӗмӗрле округӗн администрацийӗ электронлӑ аукцион ирттерет. Бюстшӑн 1,3 миллион тенкӗ тӳлеме хатӗр. Ӑна кӑҫал авӑн уйӑхӗн 1-мӗшӗ тӗлне туса пӗтермелле.

Георгий Иосифович 1998 ҫултан пуҫласа мӗн виличчен И.Н.Ульянов ячӗллӗ ЧПУра ӗҫленӗ, профессор пулнӑ, стилистика тата библиотековеденипе культурологи кафедрисене ертсе пынӑ. Вӑл 2015 ҫулхи раштавӑн 9-мӗшӗнче пурнӑҫран уйралнӑ.

artmuseum.ru сӑнӳкерчӗкӗ

Чӑваш патшалӑх ӳнер музейӗн директорне, Чӑваш Енри художниксен союзӗн пайташне Геннадий Козлова «Чӑваш Республикин халӑх художникӗ» ят панӑ.

Геннадий Васильевич, - педагогика наукисен кандидачӗ, Пӗтӗм тӗнчери психологи наукисен академийӗн член-корреспонденчӗ.

Вӑл Тӑвай районӗнчи Вӑрманхӗрри ялӗнче 1962 ҫулта ҫуралнӑ. И.Я. Яковлев ячӗллӗ Чӑваш патшалӑх педагогика институтӗнчи (халӗ университет) ӳнерпе графика факультетӗнчен вӗренсе тухнӑ. 1992 ҫултанпа асӑннӑ аслӑ шкулта живопись кафедрин доценчӗ пулса ӗҫлеме тытӑннӑ. Шупашкарти ӳнер музейӗн директорӗ пулса 2003 ҫултанпа тӑрӑшать.

Паян, ҫӗртме уйӑхӗн 19-мӗшӗнче, поэзие юратакансем Иосиф Трерӑн поэзири пултарулӑхӗпе паллашӗҫ.

Мероприяти Чӑваш Енӗн Наци вулавӑшӗн «Хавхалану» поэзие юратакансен клубӗнче иртӗ. Клуб ларӑве 15 сехетре пуҫланӗ.

Клуб халӑх тетелӗнчи хӑйӗн пабликӗнче пӗлтерне тӑрӑх, хальхи сӑвӑҫсенчен ытларах юрӑ валли сӑвӑсем шӑрҫалакан Зоя Сывлӑмпие сӑмах парӗҫ.