Мордва Республикин прокуратурин сайтӗнчен илнюе сӑнӳкерчӗк

Шупашкарта пурӑнакан 25 ҫулти каччӑ Саранск тӑрӑх ӳсӗр пуҫпа ҫӳренӗ. «Порше Кайен» автомобиле вырӑнти ҫул-йӗр хӑрушсӑрлӑхӗн инспекторӗсем хулари Володарский урамӗнче тытса чарнӑ. Ҫамрӑк водитель эрех ӗҫнипе ӗҫменнине тӗрӗсленме килӗшмен.

Ун тӗлӗшпе пакунлисем РФ Пуҫиле кодексӗн 264.1 статйин 1-мӗш пайӗпе пуҫиле ӗҫ пуҫарнӑ.

Пӑтӑрмах кӑҫалхи ака уйӑхӗн 2-мӗшӗнче пулса иртнӗ. Машини хӑйӗн пулман, каччӑ Саранскри пӗр фирмӑн автомобильне чӗртсе тухса ҫӗрлехи хулапа вӗҫтерсе пынӑ.

Сӑмах май каласан, ку каччӑна пакунлисем унччен те тытса чарнӑ иккен, ун чухне те вӑл хӑй эрех ӗҫнипе ӗҫменнине тӗрӗсленме килӗшмен.

Суд хальхинче ӑна 240 пин тенкӗ штраф хурса пама тата 2,5 ҫул умне ларма чарма йышӑннӑ.

#пӑтӑрмахсем, #ӳсӗрсем, #Шупашкар, #Саранск