"Урал сасси" хаҫат пабликӗнчен илнӗ сӑнӳкерчӗк

Пушкӑртстанри Юмаш ялӗнчи «Ҫеҫпӗл» халӑх ансамблӗ 30 ҫулхине уявланӑ.

Вырӑнти «Урал сасси» хаҫат пӗлтернӗ тӑрӑх, Пушкӑртстанра «халӑх» тата «тӗслӗхлӗ» ансамбль ята тивӗҫнӗ пултарулӑх коллективӗсен шучӗ 1200-тен ытла. Вӗсенчен 20-шӗ – чӑваш ушкӑнӗсем. «Сумлӑ ята тивӗҫнисен шутне Пишпӳлек, Кармаскалӑ, Федоровка, Авӑркас, Мияки, Пелепей, Ермеккей районӗсенчи, Ӗпхӳпе Ҫтерлӗ, Октябрьски хулисенчи ансамбльсене кӗртме пулать. Ҫавӑн пекех Чекмагуш районӗнчи Юмашри «Ҫеҫпӗл» пултарулӑх ушкӑнне те (ертӳҫи – Вера Фомина) палӑртмалла», — пӗлтернӗ хаҫатҫӑсем.

«Ҫеҫпӗл» ансамбль уявне Юмашри клуба халӑх йышлӑ пухӑннӑ. Уяв ҫавра сӗтелтен пуҫланнӑ. Ӑна район администраци пуҫлӑхӗн ҫумӗ Светлана Шакирова ертсе пынӑ. Пухӑннисем халӑх культурипе йӑли-йӗркин, тӑван чӗлхен пӗлтерӗшӗ, вӗсене упраса хӑварас тата аталантарас тата ытти ытти ыйтӑва сӳтсе явнӑ. Кайран юбилея концерт малалла тӑснӑ.

Мускавра «Незнайка» фильм ӳкерме тытӑннӑ. Унта пирӗн ентеш те, Владимир Тяптушкин, хутшӑнӗ.

Фильма Николай Носовӑн хайлавӗ тӑрӑх ӳкерӗҫ. Вӑл кинотеатрсенче 2028 ҫулхи кӑрлачӑн 1-мӗшӗнчен проката тухӗ. Режиссерӗ – Дмитрий Дьяченко.

Незнайка рольне Леонид Басов вылӗ. Шпунтик рольне вара Владимир Тяптушкина шанса панӑ.

Аса илтерер: Владимир Тяптушкин Елчӗк районӗнчи Аслӑ Таяпа ялӗнче ҫуралнӑ. Вӑл «Ландыши» тата ытти фильмра ӳкерӗннӗ.

afisha21.ru сайтран илнӗ сӑнӳкерчӗк

Етӗрне районӗнчи Совхознӑй поселокра агророк фестиваль иртӗ. Ӑна йӗркелекенни — Етӗрнери сӗт завочӗ. Мероприяти унти лаша заводӗнче иртӗ.

«Виҫӗ ангар — виҫӗ сцена — 8 сехет хушши татти-сыпписӗр рок янӑрӗ». Ҫапларах анонсласа ҫырнӑ ку хыпар пирки.

Программӑра Чӑваш Енри юратнӑ тата паллӑ ушкӑнсем, урӑх регионсенчи музыкантсем, «КОНЕЦ ФИЛЬМА», «ПИЛОТ», «7000$», «КУВАЛДА», «CASUAL», «БАХЫТ-КОМПОТ», «ВОЗДУХ», «БЕZ Б» ушкӑнсем.

Фестиваль программипе rockzerno.ru сайтра тӗплӗнрех паллашма пулать. Концерт 14 сехетре пуҫланӗ. Унта тӳлевсӗр кӗртӗҫ.

afisha21.ru сайтра вырнаҫтарнӑ сӑнӳкерчӗк

Етӗрнери сӗт завочӗ юбилея хатӗрленет. Ӑна предпряити сумлӑн иртетерсшӗн. Мӗн тесен те пӗчӗк дата мар, предприяти 95 ҫул тултарнине уявлать. Паян вӑл акционерсен уҫӑ обществи шутланать.

Уява сӗт завочӗ Натали юрӑҫа йыхравланӑ. Унсӑр пуҫне те уяв программи кӑсӑклӑ пулмалла: ача-пӑча валли тӗрлӗ мероприяти ирттерме палӑртса хунӑ, аттракционсем тӳлевсӗр ӗҫлӗҫ, юмах кӑтартӗҫ, «Наша Корова» (чӑв. Пирӗн ӗне) маркӑпа кӑларакан продукцие тӳлевсӗр астивсе пӑхма май килӗ.

Уявра вырӑнти коллективсен тата чӑваш эстрада юрӑҫӗсен, «Воздух» тата «Малов» ушкӑнсен колнцерчӗсем пулӗҫ. Программа хедлайнерӗ — Натали.

Уяв программи ҫӗртме уйӑхӗн 6-мӗшӗнче 17 сехетре пуҫланӗ. Унта тӳлевсӗр ҫитсе курма май килӗ.

pravdapfo.ru сайтран илнӗ сӑнӳкерчӗк

Шупашкарти Петӗр Хусанкай ячӗллӗ культура керменне юсама 258,3 миллион тенкӗ уйӑрӗҫ.

Юсав ӗҫне 2027 ҫулхи чӳк уйӑхӗн 1-мӗшӗччен туса пӗтермелле. Ҫав тӗллевпе республика хысничнен 258,3 миллион тенкӗ уйӑрма палӑртнӑ.

Подряд организацин ҫурт йӗри-тавра бетон ярса ҫирӗплетмелле, кирпӗчпе купаланин ҫӗввисене ҫӗнетмелле, нӳхрепе кӗмелли алӑксене юсамалла. Алӑксене ылмаштарма та палӑртнӑ, хӑш-пӗр ҫӗрте урая ҫӗнетӗҫ, инженер сечӗсене ылмаштарӗҫ тата ытти ӗҫе туса ирттерӗҫ.

Курмалли зала тата сценӑна та юсама палӑртнӑ.

culture.cap.ru сӑнӳкерчӗкӗ

Чӑваш патшалӑх юрӑпа ташӑ ансамблӗн ача-пӑча студийӗ концента йыхравлать. «Солнце единства» (чӑв. Пӗрлӗх хӗвелӗ) концерт программипе ушкӑн ҫӗртме уйӑхӗн 2-мӗшӗнче паллаштарӗ. Программа Раҫҫейри халӑхсен культурине кӑтартса парас тӗллевӗллӗскер.

Чӑваш Енри халӑхсен туслӑхӗн ҫулталӑкне халалланӑ концерта Юманпа Илемпи ҫершывӑмӑр тӑрӑх паллашса ҫӳрени евӗр йӗркелӗҫ. Хӗвел чӑвашсемшӗн мӗн авалтан пӗлтерӗшлӗ пулнӑ. Тӗрӗссипе, вӑл паян та, наука вӑйлӑ аталаннӑ саманара та, этем пурнӑҫӗнче питех те пӗлтерӗшлӗ.

Концерт Трактор тӑвакансен культура керменӗнче 18 сехет те 30 минутра пуҫланӗ.

«Контактри» сӑн

Уҫӑ тӳпе айӗнче кино курас килет-и? Тархасшӑн! Чӑваш Енре кӗҫех ятарлӑ проект старт илӗ.

Ҫӗртме уйӑхӗн 11-мӗшӗнчен пуҫласа округсенчи культура ҫурчӗсен умӗнче уҫӑ лапамра кино тӳлевсӗрех кӑтартма пуҫлӗҫ.

Пӗрремӗш фильм «Школа Бабы-Яги» ятлӑ пулӗ, ӑна ҫӗртме уйӑхӗн 11-мӗшӗнче кӑтартӗҫ: Шупашкарта — Ҫеҫпӗл Мишши ячӗллӗ Ҫамрӑксен театрӗ умӗнче, Ишлей салинче — культура керменӗ умӗнче. Ҫавӑн пекех кинона Канашра, Вӑрнарта, Сӗнтӗрвӑрринче, Етӗрнере тата Шӑмӑршӑра курма май пулӗ.

Палӑртса хӑварар: фильмсене ҫулла вӗҫлениччен кашни кӗҫнерникун кӑтартӗҫ.

cheb-centr.soc.cap.ru сӑнӳкерчӗкӗ

Шупашкарта пурӑнакан Виталий Илларионов пенсионер кӗнеке вуласа чунне уҫать. Виталий Ивановича паян Шупашкарти халӑхӑн социаллӑ ыйтӑвӗсене тивӗҫтерекен комплекслӑ центрӑн социаллӑ ӗҫченӗ пӑхса пулӑшать. Социаллӑ учрежденире пӗлтернӗ тӑрӑх, ватӑ ҫын алӑран кӗнеке ямасть.

«Пушӑ вӑхӑтра эпӗ ялан кӗнеке вулатӑп. Литература чун апачӗ ҫеҫ мар, вӑл чуна лӑплантарать, йывӑр шухӑшсене сирсе ярать», — тесе каласа кӑтартнӑ ватӑ ҫын.

Хӑй вӑхӑтӗнче инженер пулса ӗҫленӗскер ӑслӑлӑх статйисене те вулама кӑмӑллать. Унсӑр пуҫне вӑл детективпа та кӑсӑкланать.

Виталий Илларионов ӗнентернӗ тӑрӑх, кӗнеке чунри ыратӑва манӑҫтарать, савӑк кӑмӑл парнелет.

Сӑмах май каласан, паян — Пӗтӗм Раҫҫейри библиотека кунӗ.

morgau.cap.ru сӑнӳкерчӗкӗ

Муркаш районӗнче регионсен хушшинчи «Сурӑм ҫӑлтӑрӗсем» фестиваль иртнӗ. Мероприяти ҫу уйӑхӗн 21-мӗшӗнче пулнӑ. Фестивале Йӳҫкасси таврашӗнчи «Хуртан вар» вӑрман уҫланкинче пуҫтарӑннӑ. Вӑл кӑҫалхипе виҫҫӗмӗш хут иртнӗ. Анчах регионсен хушшинче ӑна кӑҫал пуҫласа йӗркеленӗ.

Унччен асӑннӑ уҫланкӑра Акатуя пуҫтарӑннӑ. Вӑл вӑхӑтра вырӑнти «Ударник» хуҫалӑха Платон Давыдов ертсе пынӑ. Халӗ унӑн ывӑлӗн, Александр Давыдовӑн (вӑл Депутатсен пухӑвӗн председателӗ) пуҫарӑвӗпе халӑх пултарулӑхӗн фестивальне ирттерме пуҫлас тенӗ.

Александр Платонович каланӑ тӑрӑх, ку тӑрӑхра унӑн, унӑн ашшӗ-амӑшӗн тата Йӳҫкасси тӑрӑхӗнче пурӑнакансен ачалӑхӗ иртнӗ. Апла пулсан ырӑ йӑла-йӗркене тытса пымалла. Вӑл иртнине хальхипе пӗрлештерекен кӗпер пулмалла.

Пысӑк пахалӑхлӑ хайлавсемшӗн тата ӑслӑлӑх, литература тата ӳнер енӗпе никӗс шайӗнчи тӗпчев ирттернӗшӗн республикӑри темиҫе ҫынна кӑҫал уйӑхсерен патшалӑх стипендине парса тӑрӗҫ. Кашнине — 7200-шер тенкӗ.

Сумлӑ йышра ҫаксем: Чӑваш патшалӑх юрӑпа ташӑ ансамблӗн илемлӗх ертӳҫи Алексей Тимошенко тата коллективӑн дирижёрӗ Александр Возяков, Чӑваш академи драма театрӗн артисчӗсем Александр Демидов тата Надежда Зубкова, Чӑваш патшалӑх драмӑн сӑнавлӑ театрӗн артисчӗ Евгений Евграфов, И.Я. Яковлев ячӗллӗ Чӑваш патшалӑх педагогика университечӗн истори кафедрин профессорӗ Лев Ефимов, Василий Кошкин ҫыравҫӑ, Чӑваш патшалӑх оперӑпа балет театрӗн артист-вокалисчӗ Сергей Кузнецов, Чӑваш патшалӑх гуманитари ӑслӑлӑхӗсен институчӗн аслӑ ӑслӑлӑх ӗҫченӗ Алексей Леонтьев, И.Н. Ульянов ячӗллӗ Чӑваш патшалӑх университечӗн анатоми кафедрин профессорӗ Лариса Меркулова, Валентина Милославская художник, И.Н. Ульянов ячӗллӗ Чӑваш патшалӑх университечӗн чӑваш филологийӗпе культурин кафедрин профессорӗ Виталий Родионов, Лолита Чекушкина композитор, Вырӑс драма театрӗн артисчӗ Диана Яковлева, Чӑваш Енри Театр ӗҫченӗсен союзӗн ертӳҫин ҫумӗ Зоя Яковлева.

Малалла...