culture.cap.ru сӑнӳкерчӗкӗ

Шупашкарти музыка училищи тӳлевсӗр концерта йыхравлать. Халӑх пӗрлӗхӗн кунне халалланӑ программӑпа чӳк уйӑхӗн 6-мӗшӗнче 13-сехетре паллашма май килӗ.

Концерта «Когда мы едины, мы непобедимы» (чӑв. Эпир пӗрле чухне пире ҫӗнтереймӗн) ят панӑ. Программӑна училищӗри преподавательсем, студентсем, унти пултарулӑх коллективӗсем йӗркеленӗ. Концерта музыка училищинче кӑтартӗҫ.

culture.cap.ru сӑнӳкерчӗкӗ

Республикӑн халӑх пултарулӑх центрӗ эстрада коллективӗсен, вокалпа инструментсен ансамблӗсен, эстрадӑпа вокал студийӗсен ертӳҫисем валли ӑсталӑх лаҫҫи йӗркеленӗ. Ӑна Чӑваш патшалӑх университечӗн ӳнер факультетӗнче юпа уйӑхӗн 30-мӗшӗнче ирттернӗ.

Семинар-практикума пухӑннисем валли ӑсталӑх класне паллӑ музыкант тата маларах асӑнса хӑварнӑ аслӑ шкулӑн вокал ӳнерӗн кафедрин аслӑ преподавателӗ, эстрадӑпа джаз вокал ӳнерӗн специалисчӗ Вероника Арисова ирттернӗ.

https://culture.cap.ru сӑнӳкерчӗкӗ

Чӑваш Енре пултарулӑх коллективӗсен «Наследники традиций» (чӑв. Йӑла-йӗркене малалла тӑсакансем) фестивальне 10 ҫул ӗнтӗ йӗркелеҫҫӗ. Шупашкарти культура колледжӗнчен вӗренсе тухнисем ун вӑхӑтӗнче хӑйсен пултарулӑхне кӑтартаҫҫӗ ҫеҫ мар, йӑла-йӗркене тытса пынипе те паллаштараҫҫӗ.

Ӗнер, юпа уйӑхӗн 30-мӗшӗнче, Чӑваш патшалӑх культурӑпа ӳнер институтӗнче юбилейлӑ тӗлпулу иртнӗ. Ӑна колледжӑн 80 ҫулхине, институтӑн 25 ҫулхине халалланӑ. Программӑна 29 коллектив хутшӑннӑ. Вӗсем юрласа ташланӑ, оркестрсемпе хорсем те пулнӑ, вокал ушкӑнӗсемпе театр студийӗсем те сцена ҫине тухнӑ. Асӑннӑ коллективсен ертӳҫисем пурте — унччен культура колледжӗнче вӗреннӗ ҫынсем.

2026 ҫулта К. В. Иванов ячӗллӗ Чӑваш патшалӑх академи драма театрӗнче «Паттӑрсем вилмеҫҫӗ» спектакль кӑтартӗҫ.

Вӑл ятарлӑ ҫар операцине хутшӑнакан салтаксене халалланӑскер пулӗ.

Театр РФ Культура министерствин грантне ҫӗнсе илнӗ. Пӗтӗмпе – 3,5 миллион тенкӗ.

Спектакле шӑпах ҫак грантпа сцена ҫине кӑларӗҫ.

culture.cap.ru сӑнӳкерчӗкӗ

Юпа уйӑхӗн 28-мӗшӗнче Шупашкарти трактор тӑвакансен культура кременӗнче «От сердца к сердцу» (чӑв. Чӗререн чӗре патне) уяв программи кӑтартнӑ. Ӑна кинемисемпе мучисен кунне халалланӑ.

Ҫав кун сцена ҫине вокалӑн «Бэби-шлягер» эстрада студине, «Этуаль» хореографи студине, эстрада ташшин «Солнцеклеш» коллективне, «Суварята» ташӑ ансамбльне ҫӳрекенсем вокал тата хореографи номерӗсемпе тухнӑ.

Унсӑр пуҫне Владимир Егоров, Валентина Телей, «Икӗ аккорд» дуэт, Зоя Кириллова тата Григорий Павлов, Анастасия Власихина, Шупашкар районӗнчи Тутаркассинчи «БеЛаРа» ташӑ ушкӑнӗ куракансене хӑйсен пултарулӑхӗпе савӑнтарнӑ.

culture.cap.ru сӑнӳкерчӗкӗ

Чӑваш академи драма театрӗнче «Карчӑксем качча каяҫҫӗ» камит курма чӗнеҫҫӗ. Пушкӑрт драматургӗн Флорид Буляковӑн пьесипе лартнӑ премьерӑна юпа уйӑхӗн 31-мӗшӗнче тата чӳк уйӑхӗн 1-мӗшӗнче кӑтартӗҫ.

Спектакле чӗнсе илнӗ режиссёр, Удмурт Республикин халӑх артисчӗ Алексей Ложкин лартнӑ. Спектакле илемлетекенни — Чӑваш Республикин тава тивӗҫлӗ художникӗ Валентин Федоров.

culture.cap.ru сӑнӳкерчӗкӗ

Чӑваш Енри «Янтал» ушкӑн Пензӑран лауреат ячӗпе таврӑннӑ. Асӑннӑ хулара «Песни родной стороны им. А.Г. Тархова» (чӑв. А.Г. Тархов ячӗллӗ тӑван тӑрӑх юррисем) регионсем хушшинчи фестиваль-конкурс иртнӗ.

Унта 800 ытла хӑнапа 100 ытла коллектив пуҫтарӑннӑ. Чӑваш Ен чысне унта Шупашкарти музыка училищин «Янтал» фольклор ушкӑнӗ хутшӑннӑ. Ушкӑна Чӑваш Енӗн тава тивӗҫлӗ культура ӗҫченӗ Людмила Петухова Григорий Салюков хормейстер ертсе пырать. Коллектив 1 степеньлӗ лауреат ятне тивӗҫнӗ. Никита Арсентьев вара конкурс дипломанчӗ пулса тӑнӑ.

chuvbook.ru сӑнӳкерчӗкӗ

Чӑваш кӗнеке издательствинче Тимӗр Алюш Валин «Нарпике ӑраскалӗ» романӗ 1 пин экземпляр тиражпа пичетленсе тухнӑ. Кӗнекери ӗҫсем 1900–2023 ҫулсенче пулса иртеҫҫӗ.

Издательствӑра пӗлтернӗ тӑрӑх, Тимӗр Алюш Вали — Валентина Кириллова. 2023 ҫулта Чӑваш кӗнеке издательствинче унӑн «Сас пачӗ ывӑлӑм» кӑларӑмӗ кун ҫути курнӑ.

Валентина Алексеевна 1963 ҫулхи авӑн уйӑхӗн 23-мӗшӗнче Комсомольски районӗнчи Нӗркеҫ ялӗнче ҫуралнӑ. 1982 ҫулта тӑван районӗнчи хаҫатра ӗҫлеме пуҫланӑ. И.Н. Ульянов ячӗллӗ Чӑваш патшалӑх университечӗн историпе филологи факультетӗнче вӗреннӗ. Кайран Елчӗк район хаҫатӗнче тивӗҫлӗ канӑва тухичченех тӑрӑшнӑ.

Альбина Юрату халӑх тетелӗнчи страницинчен, news.myseldon.com тата gov.cap.ru сайтран илнӗ сӑнӳкерчӗксемпе усӑ курса хатӗрленӗ Таисия Ташней коллаж

Ачасемпе ҫамрӑксем валли чӑвашла ҫыракан авторсене тупса палӑртма тата хавхалантарма пирӗн республикӑра ҫулсерен конкурс ирттереҫҫӗ. Халӗ кӑҫалхине пӗтӗмлетнӗ.

Шкул ҫулне ҫитмен тата кӗҫӗн классенче вӗренекен ачасем валли ҫырнӑ ӗҫсенчен Анна Тумаланован «Пӗчӗк Кулян пысӑк тӗллевӗсем» алҫырӑвне тӳресем пысӑк хак панӑ май ку ӗҫшӗн автора 50 пин тенкӗ преми тивӗҫӗ.

Вӑтам шкул ҫулӗнчи ачасем валли шӑрҫаланӑ «Ылтӑн ҫулҫӑ» ӗҫпе Сергей Павлов палӑрнӑ. Ӑна 75 пин тенкӗ преми парӗҫ. Аслӑ классенче вӗренекен ачасем валли хайланӑ ӗҫсенчен Ольга Фёдорован «Таврӑнсамччӗ каялла» алҫырӑвне ҫитекенни пулман. Ӑна та 75 пин тенкӗпе хавхалантарӗҫ.

Ҫӗнтерӳҫӗ-алҫырусене ҫитес ҫул кӗнекен пичетлесе кӑларӗҫ.

Чӑваш кӗнеке издательствин сӑнӳкерчӗкӗ

Чӑваш кӗнеке издательстви виҫӗ ҫул ӗнтӗ чӑвашла роман ҫыракансен конкурсне ирттерет. Унта суйласа илнӗ чи лайӑх ӗҫе кайран кун ҫути кӑтартаҫҫӗ.

Пӗлтӗрхи конкурсра Ангелина Павловскаян «Ҫутӑ ӗмӗт ҫунатлӑ» алҫырӑвӗ мала тухнӑ. Халӗ ӑна Чӑваш кӗнеке издательстви кун ҫути кӑтартнӑ.

Ангелина Павловская 1939 ҫулхи кӑрлач уйӑхӗн 31-мӗшӗнче Вӑрмар районӗнчи Пӗчӗк Енкасси ялӗнче ҫуралнӑ. Ҫӗрпӳри библиотекарьсем хатӗрлекен техникумра, И. Я. Яковлев ячӗллӗ Чӑваш патшалӑх педагогика институчӗн филологи факультетӗнче вӗреннӗ. Куславкка районӗнчи Карачри вӑтам шкулта вырӑс чӗлхи учителӗ, Куславккара комсомол райкомӗнче 1-мӗш секретарьте, унтан Шупашкарти Мускав районӗнчи ҫутӗҫ пайӗн инспекторӗнче ӗҫленӗ, Шупашкарти 45-мӗш шкулта, 1-мӗш гимназире ачасене вырӑс чӗлхипе литературине вӗрентнӗ.

Малтанхи тӗрленчӗкӗсем «Пионер сасси» хаҫатра, «Хатӗр пул» журналта пичетленнӗ, «Ярӑм-ярӑм явӑнать тӗтре» повеҫӗ 1983 ҫулта «Ялав» журналта кун ҫути курнӑ.