Ҫӑлкуҫ: culture.cap.ru

Умсӑмах

Тахҫанах нимӗнле статья та ҫукран мӗн те пулин ҫырас тесе пуҫ ватрӑм. Ялан пӗр япала пирки ҫырсан йӑлӑхтарса ҫитерме пулать. Ҫавна май урӑхларах тема суйлас терӗм.

ИИ-семпе юлашки вӑхӑтра нумай ӗҫленӗрен чи малтан вӗсенчен ыйтас терӗм. Пӗрре вӗсемпе усӑ курса самай кӑсӑклӑ хыпар тупма май килнӗччӗ те... ИИ мана ҫапла хуравларӗ: ҫырмалли темӑсем сахал мар терӗ, статья та ҫырса пама пултарӑп терӗ. Вӑл сӗнекен темӑсем ҫаплараххисем пулчӗҫ: Акатуй тата чӑваш тумӗ; Чӑваш чӗлхи цифра саманинче; Чӑваш эстради (паянхи вӑхӑтра хальхи эстрада ҫӑлтӑрӗсен пурнӑҫне тӗрӗс ҫырса хӑварасси пирки); Чӑваш тӗррипе паянхи тумтирте усӑ курни тата ытти те.

Нихӑшӗ те кӑмӑла каймарӗ. «Акатуй тата чӑваш тумӗ» пирки ҫырма пулатчӗ ӗнтӗ, чӑн та пит кӑсӑклӑ тематика. Чӑваш тумӗпе Акатуйсенче епле усӑ курни пирки. Анчах Акатуйӗсем иртмен, пулмалла кӑна... Кирлӗ темӑна тупайманран хам шыраса пӑхас терӗм. Культура пирки ҫырас кӑмӑл пурччӗ те хамӑрӑн сайтри хыпарсене пӑхса тухрӑм. Хайхи, «Культура» пайӗнчисене.

Малалла...

«Контактри» сӑн

Сӗнтӗрвӑрри тӑрӑхӗнче пурӑнакан Иван Веденеев 20 ытла ӗнтӗ ӗлӗкхи япалсене пуҫтарать. Ҫапла вӑл Сӗнтӗрвӑрри хулинче халӑх музейне йӗркеленӗ. Коллекци пуян, унта пин ытла экспонат упранать: сӑмаварсем, радиосем, тумтир, савӑт-сапа…

Музея килекенсен пӗтӗм экспоната алӑпа тытса курма юрать. Ку кӑна мар, патефон яма та, ҫӑпата сырма та, чӑвашсен пуҫ хатӗрӗсене тӑхӑнса пӑхма та, 1860 ҫулта туса кӑларнӑ сӑмавартан чей ӗҫме те ирӗк параҫҫӗ.

Иван Веденеева экспонатсене пухма тӑванӗсем пулӑшнӑ. Хӑш-пӗр япала вара ҫемье реликвийӗ: сӑмавар ав аслашшӗн (е кукашшӗн) пулнӑ, пуҫ хатӗрӗ вара – асламашӗн (е кукамӑшӗн).

Паллах, Иван Веденеевшӑн ку чун киленӗҫӗ. Ҫапла вӑл астӑвӑма упраса хӑварасшӑн, ӗлӗкхи ҫынсем мӗнле пурӑннине кӑтартасшӑн. Музея шкул ачисем, туристсем, вырӑнти ҫынсем килсе кураҫҫӗ. Иван Веденеев хӑй экскурси ирттерет.

К.В. Иванов ячӗллӗ Чӑваш патшалах академи драма театрӗн артисчӗсем ӗнер Крыма тухса кайнӑ. Тата тӗрӗсрех каласан, вӗсем унти Керчь хулинче пулӗҫ. Чӑваш артисчӗсем ҫула гастроль тӗллевӗпе тухнӑ.

Чӑваш сценин ӑстисем Крымри ҫав хулара халӑхсен хушшинче иртекен «Боспорские агоны» антика ӳнерӗн ХХVIII фестивальне хутшанӗҫ. Унта чӑвашсем «Хуркайӑк ҫулӗ» (Материнское поле) эпикӑллӑ драма кӑтартӗҫ. Чӑваш артисчӗсем Керчьри сцена ҫине ҫӗртме уйӑхӗн 11-мӗшӗнче тухӗҫ.

Аса илтерер: ку моноспектакль кашни киле кӗрсе инкек хӑварнӑ вӑрҫӑ ахрӑмӗ ҫинчен. Режиссёрӗ — Борис Манджиев. Ӑна Чингиз Айтматовӑн «Материнское поле» повеҫӗ тӑрӑх лартнӑ. Ӑна чӑвашла Марина Карягина куҫарнӑ.

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центр сӑнӳкерчӗкӗ

Чӑваш академи драма театрӗнче сцена ҫине «Ҫӑлӑнӑҫ – юратура (777 пирӗшти)» ҫӗнӗ спектакль кӑларнӑ. Ӑна, театрта пӗлтернӗ тӑрӑх, социаллӑ сферӑра ӗҫлекенсене халалланӑ.

Театрта спектакль умӗн иртнӗ тӗп репетицие Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрта пай заведующийӗсенче тӑрӑшакан Надежда Мастеровӑпа Надежда Шикарева кайса курнӑ. Социаллӑ учрежденире пӗлтернӗ тӑрӑх, вӗсене театрта ӗҫлекенсем ятарласа чӗннӗ.

Надежда Анатольевна каланӑ тӑрӑх, спектакль питех те килӗшнӗ. «Ку вӑл пирӗн сферӑра тӑрӑшакансем, ҫын ыратӑвне чӗре витӗр кӑларакансем пиркиех. Спектакле хатӗрлекенсене ку ӗҫшӗн пысӑк тав», — хавхаланса каласа кӑтартнӑ вӑл социаллӑ учрежденин пресс-службине.

«Контактри» сӑн

Италири телеертӳҫӗ Чӑваш Ене килнӗ. Вӑл кунта пирӗн регион пирки сюжет ӳкерет.

Сӑмах «Поедем, поедим!» кӑларӑм ертӳҫи Федерико Арнальди пирки пырать. Вӑл Рим хулинче ҫуралнӑ. Куракансене Чӑваш Ен культурипе, йӑли-йӗркипе тата апат-ҫимӗҫӗпе паллаштарас тӗллевпе Чӑваш Ене килнӗ.

Федерико Канаш округӗнчи Мӑкӑр кӗперӗ патӗнче пулнӑ, унта чӑваш юррипе ташласа савӑннӑ, чӑваш апат-ҫимӗҫне тутанса курнӑ. Кайран ӑна ҫынсем Шупашкарти кӳлмекре асӑрханӑ.

chgtrk.ru видеовӗнчен илнӗ сӑнӳкерчӗк

Чӑваш наци вулавӑшӗнче культура отраслӗнче ӗҫлекен ҫамрӑк специалистсен форумӗ иртнӗ. Ӑна кӑҫал пуҫласа йӗркеленӗ.

Чӑваш Енӗн патшалӑх телерадиокомпанийӗ пӗлтернӗ тӑрӑх, «калӑпӑшлӑ ӗҫ-пуҫӑн тӗп тӗллевӗ — тӗрлӗ муниципалитетри яш-кӗрӗмӗн шухӑшне, малашлӑха палӑртнисене, хумхантаракан ыйтӑвӗсене тӗпчесе пӗлсе малалла аталанма ҫул уҫасси». Форума республикӑри тӗрлӗ тӑрӑхри библиотекарьсене, культура ҫурчӗсенче ӗҫлекенсене пухнӑ. Пурӗ 60-а яхӑн специалиста.

Мероприятире «хальхи культура чӗлхи» пирки те сӑмах хускатнӑ. Ялти специалистсен авалхи юрӑсене ҫырса илес ӗҫе мӗнле йӗркелемелли пирки калаҫнӑ.

Ҫамрӑк специалистсем хӑйсене кӑсӑклантаракан самантсене Светлана Каликова министрпа сӳтсе явма пултарнӑ.

culture.cap.ru сӑнӳкерчӗкӗ

Чӑваш патшалӑх ҫамрӑксен театрӗнче «В мире сцены» (чӑв. Сцена тӗнчинче) театр уйлӑхӗ уҫӑлнӑ. Ӑна ҫӗртме уйӑхӗн 1-мӗшӗнче, Ачасене хӳтӗлемелли пӗтӗм тӗнчери кун ӗҫлеттерсе янӑ.

Уйлӑхӑн пӗрремӗш сменине «Узоры народов единства» (чӑв. Пӗрлехи халӑх эрешӗҫем) ят панӑ. Ун вӑхӑтӗнче ачасене тӗрӗ ӳнерӗпе паллаштарӗҫ. Унсӑр пуҫне вӗсем театрти специальноҫсем пирки пӗлӗҫ.

Уйлӑхӑн пӗрремӗш кунӗнчех ачасем пӗр-пӗринпе туслашма ҫеҫ мар, чаршав хыҫӗнчи пурнӑҫпа кӗскен паллашма ӗлкӗрнӗ. Вокал енӗпе Мария Благушина заняти ирттернӗ те ӗнтӗ. Алевтина Семенова артистка дикципе артилляци енӗпе ӑсталӑх лаҫҫи ирттернӗ. Актер ӑсталӑхне ачасене Чӑваш Республикин тава тивӗҫлӗ артисчӗ, театрӑн тӗп режиссёрӗ Дмитрий Михайлов хӑнӑхтарӗ.

Чӑваш Енӗн Культура минситерствин сӑнӳкерчӗкӗ

Чӑваш Енре кӑҫал та урамра кино тӳлевсӗр кӑтартӗҫ. «Кино под открытым небом» (чӑв. Уҫӑ тӳпе айӗнчи кино) проекта ҫӗртме уйӑхӗн 11-мӗшӗнче ӗҫлеттерсе ярӗҫ. Ҫавна май тӗрлӗ муниципалитетра кино кӑтартма тытӑнӗҫ.

«Школа Бабы-Яги» фильма ҫӗртме уйӑхӗн 11-мӗшӗнче курма май килӗ. Ӑна Шупашкарта Ҫеҫпӗл Мишши ячӗллӗ Чӑваш патшалӑх ҫамрӑксен театрӗ умӗнче, Ишлей салинчи культура керменӗ умӗнче. Ҫавӑн пекех Канашра, Вӑрнарта, Сӗнтӗрвӑрринче, Етӗрнере, Краснорамейскинче тата Шӑмӑршӑра курма май туса парӗҫ..

Кинона кӗҫнерникунсерен, 19 сехет те 30 минутра, кӑтартӗҫ.

Афишӑпа яркоелеточувашии.рф сайтра паллаштарма шантараҫҫӗ.

"Хыпар" издательство ҫурчӗн сӑнӳкерчӗкӗ

Трак енри 40 ҫынран тӑракан ушкӑн чӑваш халӑх поэчӗ Петӗр Хусанкай ҫуралса ӳснӗ яла — Тутарстанри Сиктӗрмене — кайса килнӗ. Унта Ҫуллахи Микула кунӗ ячӗпе православи юррисен «Шанчӑк. Ҫемье. Тӑван ҫӗршыв. Патриотлӑх» виҫҫӗмӗш фестивалӗ иртнӗ.

«Хыпар» издательство ҫурчӗ халӑх тетелӗнчи хӑйӗн пабликӗнче хыпарланӑ тӑрӑх, чӑваш делегацине Сиктӗрмери музей хуҫалӑхӗшӗн яваплӑ Эдуард Бахмисов кӗтсе илнӗ.

"Урал сасси" хаҫат пабликӗнчен илнӗ сӑнӳкерчӗк

Пушкӑртстанри Юмаш ялӗнчи «Ҫеҫпӗл» халӑх ансамблӗ 30 ҫулхине уявланӑ.

Вырӑнти «Урал сасси» хаҫат пӗлтернӗ тӑрӑх, Пушкӑртстанра «халӑх» тата «тӗслӗхлӗ» ансамбль ята тивӗҫнӗ пултарулӑх коллективӗсен шучӗ 1200-тен ытла. Вӗсенчен 20-шӗ – чӑваш ушкӑнӗсем. «Сумлӑ ята тивӗҫнисен шутне Пишпӳлек, Кармаскалӑ, Федоровка, Авӑркас, Мияки, Пелепей, Ермеккей районӗсенчи, Ӗпхӳпе Ҫтерлӗ, Октябрьски хулисенчи ансамбльсене кӗртме пулать. Ҫавӑн пекех Чекмагуш районӗнчи Юмашри «Ҫеҫпӗл» пултарулӑх ушкӑнне те (ертӳҫи – Вера Фомина) палӑртмалла», — пӗлтернӗ хаҫатҫӑсем.

«Ҫеҫпӗл» ансамбль уявне Юмашри клуба халӑх йышлӑ пухӑннӑ. Уяв ҫавра сӗтелтен пуҫланнӑ. Ӑна район администраци пуҫлӑхӗн ҫумӗ Светлана Шакирова ертсе пынӑ. Пухӑннисем халӑх культурипе йӑли-йӗркин, тӑван чӗлхен пӗлтерӗшӗ, вӗсене упраса хӑварас тата аталантарас тата ытти ытти ыйтӑва сӳтсе явнӑ. Кайран юбилея концерт малалла тӑснӑ.