Ҫӗмӗрлере пурӑнакан кинемей Анастасия Михайловна Федотова 100 ҫул тултарнӑ. Паянхи кун вӑл хӗрӗпе Валентина Ивановнӑпа пӗрле пурӑнать.
Анастасия Михайловна Чулхула облаҫӗнчи Княжиха ялӗнче ҫуралса ӳснӗ. Шкул хыҫҫӑн вӑл пилӗк ҫул ытла почтальонра ӗҫленӗ.
1947 ҫулта Анастасия качча кайнӑ. 1954 ҫулта мӑшӑрӗпе Ҫӗмӗрле хулинче тӗпленнӗ. Унта вӑл 20 ҫула яхӑн хула пульницинче сестра-хозяйкӑра ӗҫленӗ. Каярахпа автофургонсен комбинатӗнче травильщик пулнӑ. Ҫавӑнтанах тивӗҫлӗ канӑва тухнӑ.
Чӳк уйӑхӗн 21-мӗшӗнче Чӑваш наци ӑслӑлӑхпа ӳнер академи президенчӗ Евгений Ерагин 70 ҫул тултарнӑ.
Евгений Ефставьевич — педагог, краевед, Чӑваш Республикин тава тивӗҫлӗ учителӗ, Чӑваш Республикин культурӑн тава тивӗҫлӗ ӗҫченӗ, Чӑваш халӑх академикӗ.
Вӑл Муркаш районӗнчи Ярак ялӗнче ҫуралнӑ. Чӑваш патшалӑх ял хуҫалӑх институтӗнче, Чӑваш патшалӑх университетӗнче вӗреннӗ. Инженер-механикра, чӑваш чӗлхи учителӗнче, Чӑваш наци музейӗнче ӑслӑлӑх ӗҫченӗнче тарӑшнӑ.
Таврапӗлӳлӗхпе кӑсӑкланать, 20-е яхӑн кӗнеке авторӗ, «Виръял» юхӑма ертсе пырать.
Шӑмӑршӑ округӗнче пурӑнакан Мироновсем пӗрлешнӗренпе ҫур ӗмӗр ҫитнӗ. Вӗсем ылтӑн туйне паллӑ тунӑ.
Нина Михайловнӑпа Николай Александрович ҫур ӗмӗр каялла паллашнӑ та 1975 ҫулхи чӳк уйӑхӗнче туй тунӑ. Виҫӗ ача ӳстернӗ вӗсем. Халӗ пилӗк мӑнукӗпе савӑнса пурӑнаҫҫӗ.
Николай Александрович – ӗҫ ветеранӗ. Нина Михайловна вырӑнти хӑйтытӑмлӑхра тата почтӑра ӗҫлесе хисепе тивӗҫнӗ.
Ӗнер, чӳк уйӑхӗн 21-мӗшӗнче, Чӑваш патшалӑх ҫамрӑксен театрӗн артистки, Чӑваш Республикин культурӑн тава тивӗҫлӗ ӗҫченӗ Елизавета Шайдукова 90 ҫул тултарнӑ.
Асӑннӑ театрта Елизавета Федоровна 1959 ҫулта ӗҫлеме пуҫланӑ. Вӑл ҫулсене театрта йывӑр вӑхӑт тесе палӑртаҫҫӗ. Ун чухне учрежденири вырӑс труппине пӗтернӗ. Елизавета Шайдукова театрти 16 артистран пӗри пулнӑ.
Нумаях пулмасть Шупашкарта пурӑнакан Зинаида Котова 85 ҫул тултарнӑ. Ҫав ятпа ӑна хулари халӑхӑн социаллӑ ыйтӑвӗсене тивӗҫтеркен комплекслӑ центрӑн пай пуҫлӑхӗ Александра Смиирнова саламланӑ.
«Ватӑ ҫынна паян пирӗн центрӑн социаллӑ ӗҫченӗ пӑхса пулӑшать. Анчах вӑл ачи-пӑчин пархатарне те курать. Зинаида Макаровнӑпа юнашар — унӑн ачисем, мӑнукӗсемпе мӑнукӗсен ачисем. Ватта хисепленӗренех ӗнтӗ вӗсем социаллӑ ӗҫчен пулӑшӑвӗпе усӑ кураҫҫӗ, юратнӑ ҫыннин пурнӑҫне ҫӑмӑллатма тӑрӑшаҫҫӗ», — каласа кӑтартнӑ Александра Львовна социаллӗ центрӑн пресс-службине.
Зинаида Макаровна Дон ҫинчи Ростовра ҫуралнӑ, Шупашкара мӑшӑрӗпе 1977 ҫулта куҫса килнӗ.
Шӑмӑршӑ округӗнче пурӑнакан Мироновсем ылтӑн туйне паллӑ тунӑ. Вӗсем виҫӗ ача ӳстернӗ, халӗ пилӗк мӑнукӗпе савӑнса пурӑнаҫҫӗ.
Нина Михайловнӑпа Николай Александровичӑн историйӗ 1975 ҫулта пуҫланнӑ. Нина водительте ӗҫлекен Николайпа паллашнӑ. Икӗ ҫул туслӑ ҫӳресен ҫамрӑксем пӗрлешнӗ.
Николай Александрович районти пульницӑра 30 ҫул ытла водитель-механикре ӗҫленӗ, вӑл – ӗҫ ветеранӗ. Нина Михайловна ял хуҫалӑх управленийӗнче, ял канашӗнче тата почтӑра вӑй хунӑ.
Тӑвай округӗнчи Тӑрмӑш ялӗнчи Димитриевсем 70 ҫул пӗрле пурӑннине паллӑ тунӑ. Александр Димитриевичпа Ефросиния Степановна ҫавӑн чухлӗ ҫул пӗр сукмакпа килӗштерсе утаҫҫӗ.
Александр Димитриевич ялти клуб ертӳҫинче нумай ҫул ӗҫленӗ. Ефросиния Семеновна колхозра вӑй хунӑ, почтамт ертӳҫинче тӑрӑшнӑ. Димитриевсем 5 ача ҫуратса ӳстернӗ.
90 ҫултан иртнӗ пулсан та вӗсем халӗ те ӗне усраҫҫӗ, пахчара ӗҫлеме те ӳркенмеҫҫӗ.
Паян Чӑваш кӗнеке издательстви 105 ҫул тултарать. Юбилей тӗлне «С книгой по жизни. Кӗнекепе пурӑнатпӑр: Чувашскому книжному издательству — 105 лет» кӗнеке кун ҫути курнӑ. Ӑна Ольга Федорова тата Ольга Иванова хатӗрленӗ. Ӳнерҫи – Наталия Орлова, макет оригиналӗ – Екатерина Васильевӑн.
Чӑваш кӗнеке издательстви 1920 ҫулхи чӳк уйӑхӗн 12-мӗшӗнче йӗркеленнӗ. Ҫав кун Шупашкарта чӑвашсен хушшинчи II Пӗтӗм Раҫҫейри канашсен съезчӗ уҫӑлнӑ. Унта пӗлтерӗшлӗ ыйтӑва пӑхса тухнӑ – Чӑваш патшалӑх издательствине уҫма йышӑннӑ. Унӑн пӗрремӗш ертӳҫи Александр Иванов (Ванюшке, 1897-1942) пулнӑ.
Шупашкарта пурӑнакан Раиса Юманкина 100 ҫулхи юбилейне паллӑ тунӑ. Вӑл кунта 2018 ҫултанпа пурӑнать – хӗрӗпе пӗрле куҫса килнӗ.
Раиса Сергеевна Тутарстанри Кӑнна Кушки ялӗнче ҫуралса ӳснӗ. Вӑрҫӑ вӑхӑтӗнче колхозра ӗҫленӗ, хӗл валли вутӑ хатӗрленӗ. Вӑрҫӑ пӗтсен тӑван ялӗнче вулавӑшра тӑрӑшнӑ, фермӑра заведующи пулнӑ.
Кинемее юбилейпе саламлама тӑванӗсем, ҫывӑх ҫыннисем, Шупашкарти «Кӑнтӑр» культура ҫуртӗнчи фольклор ансамблӗн артисчӗсем килнӗ, вӗсем чӑвашла юрӑсем шӑрантарнӑ.
Халӗ Раиса Юманкина 9 мӑнукӗпе, 11 кӗҫӗн мӑнукӗпе савӑнса пурӑнать.
Софья Ульянова 100 ҫулхи юбилейне кӗтсе илнӗ. Ӑна саламлама тӳре-шара, ветерансен организацийӗн элчисем килнӗ.
Софья Николаевна Элӗк ялӗнче пурӑнать. Вӑл чухӑн ҫемьере ҫуралнӑ, ашшӗне ир ҫухатнӑ. Шкулта чи лайӑх вӗренекенсенчен пӗри пулнӑран ӑна учительте ӗҫлеме хӑварнӑ. Кайран вӑл педагогика пӗлӗвӗ илнӗ.
1946 ҫулта вӑл Николай Ульяновпа пӗрлешнӗ, вӗсем 7 ача ҫуратса ӳстернӗ. Ӑна III степень «Амӑшӗ героиня» ята панӑ.
Мӑшӑрне, аслӑ хӗрне пытарнӑ пулин те Софья Николаевна малалла пурӑнма вӑй тупнӑ. Унпа юнашар – ачисем, мӑнукӗсем, кӗҫӗн мӑнукӗсем, кӗҫӗн мӑнукӗн ачи.
-10.7 °C