Шупашкар хулинчи хваттере аҫа ҫапнӑ. Ку инкек ӗнер Чернышевский урамӗнчи 3-мӗш ҫуртри 3 пӳлӗмлӗ хваттерте пулнӑ
Аҫа ҫапсан хветтерте пушар тухнӑ. Ҫав вӑхӑтра килте 1951 ҫулта ҫуралнӑ хӗрарӑм пулнӑ. Вӑл сӗрӗмпе наркӑмӑшланнӑ, ӑна Васкавлӑ медпулӑшу пульницине илсе ҫитернӗ.
Инкеклӗ лару-тӑру министерствин Чӑваш Енри Тӗп управленийӗ пӗлтернӗ тӑрӑх, юлашки талӑкра республикӑра ҫичӗ пушар пулнӑ.
Шупашкар хулинче ретротроллейбуспа пӗрремӗш хут экскурси ирттернӗ.
Nordtroll NTR-120MTr троллейбус пирвайхи хут 1997 ҫулхи ҫурла уйӑхӗн 26-мӗшӗнче Ҫӗнӗ Шупашкар хулинче ӗҫлеме пуҫланӑ. Кун пек экземпляр пирӗн кунччен пӗрре кӑна упранса юлнӑ. Халӗ ав вӑл Шупашкар хулинче экскурси маршручӗ ҫине тухнӑ. Троллейбус Чукун ҫул вокзалӗнчен ҫула тухса Ленин проспекчӗпе Модӑсен ҫуртне ҫитнӗ, малалла Мускав проспекчӗпе кайса «Раща» патӗнчен ҫаврӑннӑ та каялла «Мега Молл» таран ҫитнӗ. Унтан Гагарин урамне ҫаврӑнса вокзалта чарӑннӑ. Гид вырӑнӗнче Чӑваш транспорт управленийӗн кадрсен пайӗн пуҫлӑхӗ Елена Горбатина пулнӑ.
Палӑртмалла: троллейбуса ун чухне лайӑх туса кӑларнӑ, салонри ҫынсем хӗллехи шартлама сивӗсенче ан шӑнччӑр тесе вӑйлӑ кӑмакасем лартнӑ.
Чӑваш Енри велочупуҫӑсем тӗнче шайӗнчи ӑмӑртуран ылтӑн тата пӑхӑр медальсемпе килнӗ.
Маунтинбайк енӗпе пулнӑ тупӑшу Челепи облаҫӗнче иртнӗ. Унта спортсменсем «кросс-кантри» дисциплинӑра вӑй виҫнӗ. Старта ҫӗршывари чи вӑйлӑ спортсменсем тухнӑ. Пирӗн спортсменсем те лайӑх кӑтартусемпе палӑрнӑ.
Шупашкарти 7-мӗш спорт шкулӗнче ӑсталӑхне туптакан Элина Семенова 17-19 ҫулсенчи юниоркӑсемпе тупӑшнӑ, чи йывӑр трассӑна парӑнтарса финиша пӗрремӗш ҫитсе пьедесталӑн пӗрремӗш картлашки ҫине хӑпарнӑ. Алина Карлова вара хӗрарӑмсен хушшинче ӑмӑртнӑ, виҫҫӗмӗш пулнӑ. Ҫапла вӑл пӑхӑр медаль ҫӗнсе илнӗ.
Шупашкарта утӑ уйӑхӗн 21-мӗшӗнче ЧР Наци вулавӑшӗнче уҫӑ шахмат турнирӗ иртӗ. Ӑна Пӗтӗм тӗнчери шахмат кунне халалласа йӗркелеҫҫӗ.
Мероприяти «Чӑваш Енри ҫырласем» проект пулӑшнипе йӗркеленет. Унта пурте, сывлӑх енчен кӑлтӑксем ҫук тӑк, хутшӑнма пултараҫҫӗ.
Ҫӗнтерӳҫӗсемпе призерсене 10 категорире палӑртӗҫ. Вӗсене медальсемпе, дипломсемпе тата мероприяти партнерӗ тивӗҫтернӗ ҫӗр ҫырлипе чыслӗҫ. Тӗп парне – пӗр ещӗк ҫӗр ҫырли.
Палӑртса хӑварар: мероприяти партнерӗ – хресчен-фермер хуҫалӑхӗн пуҫлӑхӗ Валерий Егоров.
Вӗсем – хӑйсен ӗҫне пӗлекен чӑн-чӑн ӑстасем. Вӗсем арҫынна леш тӗнчерен пурнӑҫа тавӑрнӑ. Нумаях пулмасть Шупашкар хулинчи Ленин районӗнче васкавлӑ медпулӑшу бригади арҫын патне килнӗ.
Пациент кӑкӑр тӗлӗнчен хӗссе ыратнине каланӑ. Унӑн сивӗ тар тапса тухнӑ, вӑл йывӑррӑн сывланӑ.
Васкавлӑ медпулӑшу медикӗсем часрах ЭКГ тунӑ, арҫыннӑн инфаркт пулнине палӑртнӑ, хӑвӑртрах пульницӑна илсе кайма тухнӑ.
Анчах ҫул ҫинче арҫыннӑн чӗри чарӑнса ларнӑ. Тухтӑрсем ҫухалса кайман – машинӑрах экстреннӑй майпа дефибрилляци тунӑ. Пациентӑн чӗри тапма пуҫланӑ. Ӑна пульницӑна реанимацие чӗрӗ илсе ҫитернӗ.
Ҫав арҫыннӑн хӗрӗ ашшӗне ҫӑлнӑшӑн медиксене куҫҫуль витӗр тав тунӑ.
Шупашкар хулинчи ҫемьене «Ашшӗ-амӑшӗн мухтавӗ» орден медальне панӑ. Тӗрӗсрех каласан, вӗсене чысласси пирки малтанах хушу тухнӑ. Халӗ вара орден медальне утӑ уйӑхӗн 8-мӗшӗнче, Ҫемье тата юратупа шанчӑклӑх кунӗнче, алӑран тыттарнӑ.
Сӑмах – Терентьевсем пирки. Валерипе Анна пилӗк ачана воспитани параҫҫӗ: виҫӗ ывӑл та икӗ хӗр. Вӗсене «Ашшӗ-амӑшӗн мухтавӗ» орден медалӗпе чысласси пирки Раҫҫей президенчӗ пуш уйӑхӗн 30-мӗшӗнче хушӑва алӑ пуснӑ.
Палӑртса хӑварар: Валерий Николаевич «ЭКРА» предприятин ӑслӑлӑхпа производство департаментне ертсе пырать. Пушӑ вӑхӑтра спортпа кӑсӑкланать, юрӑ-кӗвве юратать, гитара калать. Анна Зафуровна – кил ӑшшин управҫи, ҫав вӑхӑтрах ӗҫлесе те ӗлкӗрет.
Шупашкар хулинче пурӑнакан Валентина Тихоновӑна «Анне» паллӑпа чысланӑ. Хушӑва ЧР Элтеперӗ Олег Николаев алӑ пуснӑ.
Валентина Евгеньевна мӑшӑрӗпе пилӗк ача ӳстерет. Виҫӗреш ҫуратнӑ хыҫҫӑн вӗсем ҫемье ача пахчи уҫнӑ. Кун пекки республикӑра пӗрремӗш хут пулнӑ. Ҫавӑн пекех унӑн «Ашшӗ-амӑшӗн мухтавӗ» орден медалӗ пур. 2025 ҫулта вара Тихоновсем «Ҫулаталӑкри ҫемье» конкурсра «Ылтӑн ҫемье» номинацире ҫӗнтернӗ.
Аса илтерер: «Анне» палла Чӑваш Енре 2017 ҫулта ҫирӗплетнӗ. Ӑна республикӑра 10 ҫулран сахалрах мар, пилӗк е ытларах ачана воспитани паракан хӗрарӑмсене параҫҫӗ.
Канаш округӗнчи Усман Эскеровпа Дарья Садовская Мускав хулинче пӗрлешнӗ.
Ӗнер, Ҫемье тата юратупа шанчӑклӑх куненче, тӗп хуламӑрти Наци центрӗнче «Раҫҫей. Чӗресене пӗрлештерсе» форум иртнӗ, унта тӗрлӗ регионти мӑшӑрсем пӗрлешнӗ. Пирӗн Чӑваш Енрен Усман Эскеровпа Дарья Садовская кайнӑ.
Усманпа Дарья — юристсем, вӗссем чӑваш культурине упрама тӑрӑшаҫҫӗ: чӑвашла юрлаҫҫӗ, ҫулсерен Акатуя хутшӑнаҫҫӗ, тетрсемпе музейсене ҫӳреҫҫӗ.
Сӑмах май, иртнӗ ҫулсенче Мускавра иртнӗ «Раҫҫей. Чӗресене пӗрлештерсе» форума Шупашкар хулинчи Максим тата Анастасия Горскисем, Елчӗк округӗнчи Александр тата Анна Кривововсем, Тӑвай округӗнчи Анна тата Алексей Андреевсем, Шупашкар хулинчи Алексей тата Юлия Комлевсем хутшӑннӑ.
Шупашкарта Чӑваш Енри чи вӑйлӑ биатлонистсен ӑмӑртӑвӗ иртӗ. Ӑмӑрту утӑ уйӑхӗн 20-22-мӗшӗсенче 2-мӗш Олимп резервӗн спорт шкулӗнче пулӗ. Вӑл хулари Станци ҫумӗнчи урамри 10-мӗш В ҫуртра вырнаҫнӑ.
Биатлон енӗпе Чӑваш Енӗн чемпионачӗпе ӑмӑртӑвне тӑватӑ категорири спортсменсем хутшӑнӗҫ:
— арҫынсемпе хӗрарӑмсем (2005 ҫулта тата унччен ҫуралнисем);
— 19-20 ҫулсенчи (2006–2007 ҫулсенче ҫуралнисем) юниор хӗрсемпе каччӑсем;
— 17-18 ҫулсенчи (2008–2009 ҫулсенче ҫуралнисем) яшсемпе пикесем;
— 15-16 ҫулсенчи (2010–2011 ҫулсенче ҫуралнисем) арҫын ачасемпе хӗрачасем.
Ӑмӑрту икӗ куна пырӗ. Утӑ уйӑхӗн 21-мӗшӗнче спортстменсен роллер-спринта тухмалла. Утӑ уйӑхӗн 22-мӗшӗнче кросс-спринтра ӑмӑртӗҫ.
Ӑмӑрту 10 сехетре пуҫланӗ.
Шупашкарти Екатерина Ворошилован тата тепӗр юрри тӗнчери паллӑ музыка лапамӗсене лекнӗ. Хальхинче, тата тӗрӗсрех каласан, ӗнер, унӑн «Сражение» юррине унта вырнаҫтарнӑ.
Екатерина Ворошилова Шупашкар хулинчи халӑхӑн социаллӑ ыйтӑвӗсене тивӗҫтеркен комплекслӑ центрта музыка ертӳҫи пулса ӗҫлет. Ачаранпах сусӑр хӗр тӗрле енлӗ пултаруллӑ. Унӑн чун киленӗҫӗнчен пӗри — юрӑ ҫырасси, кӗвӗлесси тата юрласси.
Катя пурнӑҫа каҫӑхса каясла юратать, кашни самантпа савӑнса пурӑнма пӗлет, хӑйӗн ӑшӑ та уҫӑ кӑмӑлӗпе ыттисене савӑнтарать.
«Сражение» юрра вӑл пӗлтӗр ҫырнӑ. Чуна витерекен ҫав сингл Яндекс Музыка, Apple Music, VK Музыка, Spotify тата ытти музыка лапамне лекнӗ. Унччен вӗсенче Екатеринӑн тӑватӑ юрри пулнӑ.
+9.3 °C