Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗнче тӗрлӗ пултарулӑх ушкӑнӗ чылай. Хӑшӗсене юрлама ҫӳреҫҫӗ, теприсене — ташлама, виҫҫӗмӗшӗсене — алӑ ӗҫӗ тума. Асӑннӑ ушкӑнсене ҫӳрекенсем — тивӗҫлӗ канури хастар ватӑсем.
Центрӑн виҫӗ структура подразделенийӗнчен пӗри К. Иванов урамӗнче вырнаҫнӑ. Унта «Лайӑх кӑмӑл» ташӑ ушкӑнӗ пур. Ватӑсем ташлаҫҫӗ ҫеҫ мар, куракан умне тухмалли хитре сцена тумтирне те хӑйсемех ҫӗлеҫҫӗ.
Светлана Романова тата Галина Иванова нумаях пулмасть «Хурӑн» ташӑ валли тум ҫӗленӗ.
Машина тӑвакансен техникумӗнчен вӗренсе тухсан Светлана Романова Трактор заводӗнче ӗҫленӗ. Паян вӑл ал ӗҫӗпе аппаланать, салтаксене те пулӑшать.
Галина Иванова малтан ача пахчинче воспитательте ӗҫленӗ, кайран тиртен калпак ҫӗлеме хӑнӑхса вӗренсен ательере тӑрӑшнӑ.
Паян Шупашкар хулинче икӗ шкул ачи «Лада Гранта» машина айне лекнӗ. Ку Сӗнтӗрвӑрри ҫулӗ ҫинчи 21-мӗш ҫурт ҫывӑхӗнче 14 сехет те 15 минутра пулнӑ. Унта светофор та ларать. Анчах ачасем ӑна пӑхман – ҫул ҫине тухса чупнӑ.
Вӗсем – 6-мӗш тата 8-мӗш класра вӗренекенскерсем. Ачасем машина умнех сиксе тухнӑ – вӗсемшӗн вара светофор хӗрлӗ ҫутнӑ. Ачасем аманнӑ. Вырӑна ҫитнӗ тухтӑрсем вӗсене тӗрӗсленӗ те часрах пульницӑна илсе кайма йышӑннӑ. Вӗсен сывлӑхӗсене шурӑ халатлисем тӗрӗслеҫҫӗ.
Ҫакӑ паллӑ: «Лада Гранта» машина водителӗ ӳсӗр пулман. Вӑл медосвидетельствовани витӗр тухнӑ.
Йӗрке хуралҫисем ашшӗ-амӑшне ачасемпе ҫул-йӗр ҫинче хӑйсене мӗнле тытасси пирки тӑтӑшах калаҫмалли пирки аса илтереҫҫӗ.
Санитари вертолечӗ Улатӑр хулинчи арҫыннӑн пурнӑҫне ҫӑлса хӑварнӑ.
70 ҫултан иртнӗ арҫынна малтан васкавлӑ медпулӑшупа районти пульницӑна илсе пынӑ. Унӑн чӗре таппи 35 кӑна пулнӑ. Тухтӑрсем канашланӑ та пациента Шупашкар хулине ӑсатма йышӑннӑ, санитари вертолечӗ чӗнме заявка панӑ. Ҫапла вертолет арҫынна 180 ҫухрӑм аякри хулана 40 минутран илсе ҫитернӗ.
Юрать-ха, вертолет борчӗ ҫинче пациентӑн юн таппи кӑшт лайӑхланнӑ. Шупашкарти пульницӑра ӑна ЭКГ, УЗИ тунӑ, анализ илнӗ. Кайран тухтӑрсем операци туса кардиостимулятор вырнаҫтарнӑ. Кун хыҫҫӑн арҫын хӑйне аванрах туйма пуҫланӑ.
Шупашкар хулинче пурӑнакан Светлана Тетмукова – чан-чӑн хӑюллӑ паттӑр! Вӑл «За горизонт» марафона хутшӑннӑ, Иртыш юханшывӗнче 48 сехет ишнӗ.
Унпа пӗрле марафона Мускаври Роман Бажок, Екатеринбургри Анастасия Колпакова тата Санкт-Петербургри Дмитрий Егоров хутшӑннӑ. Вӗсем кашни сехетре пӗр-пӗрне улӑштарнӑ: кимме перӗнмен, ҫӗр ҫине тухса канман. Ҫавӑн пек эстафета вӑл: пӗр ҫеккунтлӑха та чарӑнмалла мар.
Шыв температури кӑнтӑрла аванах пулнӑ: 20 градус ӑшӑ. Анчах ҫӗрле сивӗннӗ: 12 градус кӑна ӑшӑ пулнӑ. Юхан шыв ҫийӗн вара ҫӑра тӗтра карса илнӗ. Ҫавна май GPS-па кӑна навигаци пулнӑ. Анчах спортсменсем ҫулран аташса кайман – малалла ишнӗ. Пӗр канмасӑр, ҫывӑрмасӑр... Ҫапла спортсменсем 260 ҫухрӑм ишнӗ.
Пирӗн ентеш тата унӑн команди пурнӑҫра йӑлтах тума пултарнине тепӗр хутчен ӗнентернӗ.
Раҫҫейри паллӑ юрӑҫ, Раҫҫей халӑх артисчӗ, 59 ҫулти Филипп Киркоров Шупашкарта ҫуралса ӳснӗ 20-ри хӗре, 2024 ҫулта «Раҫҫей мисӗ» пулса тӑнӑ Валентина Алексеевӑна юратнине пӗлтернӗ. Ҫакна вӑл халӑх умӗнчех каланӑ.
Ку ҫурла уйӑхӗн 23-мӗшӗнче «Ҫӗнӗ хум» конкурсра пулса иртнӗ. Киркоров «Луиза» юрра шӑрантарнӑ хыҫҫӑн Валентинӑна сцена ҫине илсе тухнӑ.
«Ҫакна кулиса хыҫӗнче шӑппӑн, хӑйне кӑна мар, пурин умӗнче те калас килет. Валентина, эпӗ сана юрататӑп! Сана манӑн пурнӑҫра пурришӗн, илемӳшӗн, вӑй-халушӑн тавах, санпа юнашар чухне тата лайӑхрах пулас, юрату пирки юрлас килет», – тенӗ Филипп Киркоров.
Валентина ку уншӑн кӗтменлӗх пулнин пӗлтернӗ. «Йӑлтах тӗлӗкри пек», – тенӗ вӑл.
Сӑмах май, «Луиза» юрӑпа нумаях пулмасть Турцире клип ӳкернӗ. Унта Валентина Алексеева хутшӑннӑ. Киркоров ӑна унта ӳкерӗнме хӑй сӗннӗ.
Кун пек те пулать-ши вара тесе тӗлӗнме ан васкӑр. Теплерен ун пекки те пулать иккен.
Шупашкартан Ҫӗнӗ Шупашкара ҫитме ҫул укҫи йӳнелнӗ. Малашне вара хак йӳнелмелле: аллӑн укҫа тӳлесен 41 тенкӗ пулӗ, карттӑпа чухне — 37 тенкӗ.
Республикӑн влаҫ органӗсен официаллӑ порталӗнче пӗлтернӗ тӑрӑх, Чӑваш транспорт управленийӗ республикӑн Конкурентлӑ политика тата тариф енӗпе ӗҫлекен службӑна хака пӑхса тухма ыйтса ҫыру янӑ иккен.
Пӗрлехи тариф пултӑр тесе республикӑн Министрсен Кабинечӗ хака ҫавӑн пек ҫирӗплетесси ҫинчен йышӑну проекчӗ хатӗрленӗ. Ку вӑл троллейбуспа кайнипе пӗр хак пулассине пӗлтерет. Пӗрлехи проездной хакӗ 2500 тенкӗ пулӗ.
Унччен пассажирсен аллӑн укҫан тӳлесен 60 тенкӗ, карттӑпа чухне 55 тенкӗ кӑларса хума тивет.
Ҫурла уйӑхӗн 27-мӗшӗнче Шупашкарта Халӑхсен туслӑхӗн ҫуртӗнче Мари Эл Республикинчи ӳнерҫӗсен куравӗ ӗҫлеме тытӑнӗ. Вӑл «Пӗрлӗх – тӗрлӗлӗхре» (выр. «Единство в многообразии») ятлӑ.
Экспозицире пӗтӗмпе 50 ӗҫ пулӗ. Вӗсене профессионал ӳнерҫӗсем кӑна мар, Мари Элти ӳнерҫӗсен пӗрлӗхӗнчи ҫамрӑк авторсем те ӳкернӗ. Курава килнисем классика живопиҫне тата графикине, иконопиҫе, наци тӗррин япалисене те курма пултарӗҫ.
Курав ҫурла уйӑхӗн 27-мӗшӗнче 14 сехетре официаллӑ лару-тӑрура уҫӑлӗ. «Киҫтӗк тата сӑрӑ пулӑшнипе пирӗн пӗрлехи ҫӗнӗ культура диалогӗ ҫуралать, регионсен тата нацисен хушшинчи ҫыхӑну ҫирӗпленет», – тенӗ Халӑхсен туслӑхӗн ҫурчӗн директорӗ Сергей Иванов.
Пурне те курава хапӑлласах кӗтеҫҫӗ!
Шупашкарти Пионерсен ҫурчӗ ишӗлсе ларни пирки хӑш-пӗр ҫӑлкуҫ ҫине-ҫинех пӗлтеркелерӗ-ха. Халӗ вара ку объекта юсама пуҫлас шанчӑк пур тесе калама май пур.
«ПРО Город» хаҫат МАХри хӑйӗн каналӗнче пӗлтернӗ тӑрӑх, Пионерсен ҫурчӗ пулнӑ ҫурта хаклас тата унта мӗн-мӗн туса ирттермеллине палӑртас ӗсе пуҫӑннӑ-мӗн.
2025 ҫулта суд ҫав ҫуртӑн хуҫине объекта реставраци проектне туса хатӗрлеме хушнӑ.
Революциччен ҫуртра Прокопий Ефремов купсан ҫӑкӑр пекарни тата склачӗ вырнаҫнӑ. Ҫурта хӑйне 1890 ҫулта хӑпартса лартнӑ.
Халӗ вара авалхи ҫуртӑн ҫӗнӗ хуҫисем ҫине тӑрсах ӑна юсаса ҫӗнетес, унчченхи сӑн кӗртес шанчӑк пур. Анчах документсене хатӗрлесе, ытти ӗҫ-пуҫа туса ирттерсе мӗн чухлӗ вӑхӑт иртесси хальлӗхе паллӑ мар-ха.
Ултавҫӑсенчен темле те шар курма пулать иккен. Кушак ҫухатсан та...
Шупашкар хулинче пурӑнакан хӗрарӑмӑн кушакӗ ҫухалнӑ. Кун пирки вӑл тӗнче тетелӗнче пӗлтерӳ вырнаҫтарнӑ. Кун хыҫҫӑн хӗрарӑм патне палламан ҫын шӑнкӑравласа кушака тупнине пӗлтернӗ, уншӑн укҫа ыйтнӑ. Памасан чӗрчуна ҫывратса ярса вӗлерессипе хӑратнӑ.
Хӑраса ӳкнӗ хӗрарӑм ҫав ҫын каланӑ счет ҫине виҫӗ хутчен укҫа куҫарнӑ. Пӗтӗмпе – 14 пин тенкӗ. Кун хыҫҫӑн «кушак ҫӑлавҫин» шӑрши-марши те юлман – вӑл ҫухалнӑ.
Ҫурӑк валашка умӗнче тӑрса юлнӑ хӗрарӑмӑн полицие каясси кӑна юлнӑ. Кушакне те тупайман вӑл, укҫине те ҫухатнӑ.
Полици асӑрхаттарать: ултавҫӑсем кун пек лару-тӑрура ҫын кӑмӑл-туйӑмӗпе усӑ кураҫҫӗ. Ҫавӑнпа асӑрханӑр, укҫа куҫарма ыйтсан сисчӗвленӗр!
Шупашкарти тирпейлӳҫӗ пуяс тенӗ пулмалла – инвестицисемпе ӗҫлесе илме ӗмӗтленнӗ. Анчах ҫурӑк валашка умӗнче тӑрса юлнӑ.
Ку кӑна мар-ха тӗлӗнмелли. Вӑл ултавҫӑсен аллине иккӗмӗш хут лекнӗ. Утӑ уйӑхӗн пуҫламӑшӗнче хулари пӗр предприятире тирпейлӳҫӗре ӗҫлекенскер тӗнче тетелӗнче хушма тупӑш пирки пӗлтерӳ асӑрханӑ. Кӗҫех «менеджерпа» калаҫма пуҫланӑ, лешӗ ӑна телефонӗ ҫине инвестици валли тесе сарӑм вырнаҫтарма хушнӑ. Ҫапла хӗрарӑм пӗр уйӑх палламан ҫынсем каланӑ счетсем ҫине укҫа куҫарса тӑнӑ. 2,2 миллион тенкӗ таранах хывнӑ вӑл. Вӗсенчен ҫурри ытларахӑшӗ – кредит тата заем илнӗскерсем.
Анчах шантарнӑ тупӑш пулманнине кура хӗрарӑмӑн полицие кайса заявлени ҫырма тивнӗ.
Палӑртмалла: пӗрремӗш хутчен вӑл 2023 ҫулхи хӗлле ултавҫӑсен серепине лекнӗ. Ун чухне хӗрарӑм такам ун ячӗпе кредит илнине ӗненсе 75 пин тенкӗ «хӑрушсӑр счет» ҫине куҫарнӑ. Паллах, кайран ку укҫана курман вӑл.
+17.3 °C