t.me/nikamran сӑнӳкерчӗкӗ

К.В. Иванов ячӗллӗ Чӑваш патшалӑх академи драма театрӗнче СССР халӑх артисткине, «Ылтӑн маска» наци премийӗн лауреатне Вера Кузьминана асра тытса «Ҫулталӑк сансӑр» асӑну каҫӗ иртнӗ.

Пултаруллӑ ӑста ҫут тӗнчерен уйрӑлса кайнӑранпа юпа уйӑхӗн 22-мӗшӗнче ҫулталӑк ҫитрӗ. Вӑл 98 ҫула кайнӑччӗ. Тӑван театрта вара артистка 74 ҫул ӗҫленӗ.

Ӗҫтешне сума суса театр артисчӗсем унӑн вил тӑпри ҫине ҫитсе килнӗ, унта чечек хунӑ. Амӑшне асӑнма артистӑн ывӑлӗ Атнер Хусанкай та хутшӑннӑ.

Нумай функциллӗ центр директорӗнче ӗҫленӗ Михаил Анисимов ӗҫрен кайни пирки пӗлтернӗччӗ. Вӑл мӗнле должноҫе йышӑнни паллӑ.

Михаил Анисимов РФ Пенси фончӗн Чӑваш Енри управленийӗн ҫумӗнче вӑй хума пуҫланӑ. Аса илтерер: вӑл 2018-2021 ҫулсенче информаци политикин министрӗ пулнӑ. Нумай функциллӗ центрӗн директорӗнче кӑҫал юпа уйӑхӗн 14-мӗшӗччен ӗҫленӗ.

t.me/nikamran каналтан илнӗ сӑнӳкерчӗк

Етӗрне районӗнчи Лапракасси ялӗнчи «Вирьял» фольклор ансамблӗ Ненец автономи округӗнчи Нарьян-Мар хулине ҫитнӗ.

Юпа уйӑхӗн 21-23-мӗшӗсенче Нарьян-Мар хулинче «Енава мюд» ятпа халӑх пултарулӑхӗн регионсен хушшинчи фестивалӗ иртнӗ. Унта Раҫҫейӗн 11 регионӗнчи фольклор ушкӑнӗсемпе юрӑҫсем хутшӑннӑ. Фестивалӗн кӑҫалхи теми — «Йӑлана кӗнӗ культурӑри арҫын вырӑнӗ».

Фестивале хутшӑнакан «Вирьял» фольклор ансамбльне Лев Иванов ертсе пырать. Пултарулӑх ушкӑнне йӗркелени 30 ҫултан та иртнӗ. Асӑннӑ ушкӑна ҫӳрекенсем халӑх кӗвӗ инструменчӗсемпе анлӑ усӑ кураҫҫӗ: шӑпӑр, сӑрнай, каккӑр, кавал, шӑхличӗ, параппан.

vk.com/chnmuseum сӑнӳкерчӗкӗ

Ҫеҫпӗл Мишши ячӗллӗ Литература музейӗнче ҫӑм арлама вӗрентекен ӑсталӑх класӗсем иртеҫҫӗ. Унта эрнере икӗ хутчен пухӑнаҫҫӗ: эрнекунсерен тата шӑматкунсерен. Эрнекун ӑсталӑх лаҫҫи 16 сехетрен пуҫласа 20 сехетчен ӗҫлет, шӑматкун — 15 сехетрен 18 сехетчен.

Ҫавӑн пек ӑсталӑх сехетӗнче Ҫӗнӗ Шупашкари 18-мӗш лицейра ачасене литературӑна вӗрентекен Ольга Кузьминова ҫӑм арлама вӗреннӗ, халӗ вӑл ҫав ӑсталӑха ыттисене хӑнӑхтарать. «Эпир ҫавӑн пек вӗренекенсене питӗ юрататпӑр», — теҫҫӗ музейра.

t.me/chebcult21 сӑнӳкерчӗкӗ

Ӗнер, юпа уйӑхӗн 23-мӗшӗнче, Чӑваш Енри хастарсем Иван Яковлев вӗрентекенӗмӗре асӑнса унӑн Шупашкарти палӑкӗ умне чечек хума пуҫтарӑннӑ.

И.Я.Яковлев Тутар Республикинчи Кӑнна Кушки ялӗнче 1848 ҫулхи ака уйӑхӗн 25-мӗшӗнче ҫуралнӑ, ҫут тӗнчерен вӑл 1930 ҫулхи юпа уйӑхӗн 23-мӗшӗнче уйрӑлса кайнӑ. Чӑвашсене тата Атӑл тӑрӑхӗнчи ытти вак халӑха ҫутта кӑларассипе нумай тимленӗ Иван Яковлев Чӗмпӗрти гимназире тата Хусанти университетра вӗреннӗ. Пурнӑҫне чӑвашсемшӗн тӑрӑшса ирттернӗ.

ШӖМ тунӑ сӑн

Ӗнер, юпа уйӑхӗн 22-мӗшӗнче, кӑнтӑрла Шупашкарта «Контур» савут» чарӑну патӗнче машина ҫынсем ҫине пырса кӗнӗ. Юрать-ха, вилмеллех таптаман.

Ҫынсем ятарлӑ вырӑнтан ҫул урлӑ каҫма тӑнӑ. Вӗсем ҫине машина пырса кӗнӗ. Руль умӗнче 35 ҫулти водитель ларнӑ. Вӑл ӑнлантарнӑ тӑрӑх, ӑна янкӑр хӗвел ҫынсене асӑрхама чӑрмантарнӑ.

22ҫулти хӗре тухтӑрсем тӗрӗсленӗ. Тепӗр ҫын хӑйне лайӑх туйнӑран тухтӑрсен пулӑшӑвне илме хирӗҫленӗ.

ШӖМ тунӑ сӑн

Шупашкарта киле апат-ҫимӗҫ илсе ҫитерекен арҫын полицирен пулӑшу ыйтнӑ. Унӑн велосипедне вӑрланӑ.

Унччен маларах офиса пӗр арҫын кӗрсе чипс вӑрлама тӑнӑ. Анчах унти ӗҫчен ӑна ҫакна тума паман. Тепӗр икӗ сехетрен Павлов мичман урамӗнче ун евӗр арҫынна тытса чарнӑ. Хайхискер чипс вӑрлама тӑнӑ арҫыннах. Вӑл хайӗн айӑпне йышӑннӑ. Ун тӗлӗшпе пуҫиле ӗҫ пуҫарнӑ.

Вӑрнар районӗнче 49 ҫулти арҫын Мускава кайсан ҫухалнӑ. Вӑл килтен авӑн уйӑхӗн 15-мӗшӗнче кайнӑ.

Юпа уйӑхӗн 19-мӗшӗнче ирхи 5 сехетре Сергей Геннадиевич Васильев тӑванӗсем патне шӑнкӑравланӑ та Чӑваш Ене килме тухнӑ. Кун хыҫҫӑн вӑл телефонне метрора хӑварнӑ. Арҫын киле таврӑнманнине кура тӑванӗсем полицирен пулӑшу ыйтнӑ. Арҫын хура куртка, хура шӑлавар, хура кроссовка тӑхӑннӑ пулнӑ.

Хӑй шакла, 175 сантиметр ҫӳллӗш. Мӗн те пулин пӗлсен полицие пӗлтерме ыйтаҫҫӗ.

"На связи" форумри сӑн

Патӑрьелти ачасемпе спорт шкулӗн директорне 120 пин тенкӗлӗх штрафлама йышӑннӑ.

Следстви тата суд палӑртнӑ тӑрӑх, 2020 ҫулхи пуш-ака уйӑхӗсенче хӑйӗн машинине служба транспорчӗ валли уйӑрнӑ бензина янӑ. Ҫапла вӑл 425 литр бензин тӑкакланӑ. Патӑрьел районӗн администрацине пӗтӗмпе 17,5 пин тенкӗлӗх. Ҫав ҫулах кӗркунне директор ӑмӑртӑва хутшӑнакансене апатлантарма укҫа кирлӗ тесе ӗҫтешне каланӑ. Документсене хӑех хатӗрленӗ, алӑ пуснӑ - лешсем укҫа илнӗ имӗш. Чӑннипе вара илмен. Директор укҫана хӑйӗн тӗллевӗпе усӑ курнӑ.

Кӑҫал республикӑра 962 гектар ҫинче пахча ҫимӗҫ лартнӑ. Ку, пӗлтӗрхипе танлаштарсан, 9,9 процент ытларах.

Ҫанталӑк уяр тӑмасть пулсан та хуҫалӑхсенче пахча ҫимӗҫе пухса кӗртес ӗҫ пырать.

Ытларах купӑста, хӗрлӗ кӑшман, кишӗр лартнӑ. Юпа уйӑхӗн 20-мӗшӗ тӗлне пахча ҫимӗҫе 584 гектар ҫинчен пухса кӗртнӗ. Тепӗр 378 гектар ҫинче юлнӑ. Пахча ҫимӗҫе ытларах Муркаш, Куславкка, Етӗрне районӗсенче лартнӑ.