21.мвд.рф сӑнӳкерчӗкӗ

Паян ирпе, ирхи 7 сехет те 20 минутра, Куславкка муниципаллӑ округӗнче пысӑк инкек пуса ирнӗ. Унта харӑсах тӑватӑ ҫын пурнӑҫӗ татӑлнӑ, пӗри суранланнӑ.

«М-7» федераци ҫулӗ ҫинче «Mitsubishi Outlander» тата «Scania» автомобильсем инкеке лекнӗ.

Йӗрке хуралҫисем малтанласа паӑртнӑ тӑрӑх, кроссовер хирӗҫ килекен ҫул ҫине сиксе тухнӑ та унта фурӑпа пырса ҫапӑннӑ. Инкекре ҫӑмӑл машина водителӗ тата салонти виҫӗ пассажир вилнӗ, йывӑр тиев турттаракан автомобиль водителӗ аманнӑ.

Вилнӗ ҫынсем — Хусанта пурӑнаканскерсем.

Чӳкӗн 4-мӗшӗнче Мускаври ВДНХра «Раҫҫей» курав-форум уҫӑлать. Вӑл ҫитес ҫулхи акан 12-мӗшӗччен ӗҫлӗ.

Пирӗн республика унта 6 метр ҫӳллӗш тухьяпа тӗлӗнтернӗ. Ӑна чӑваш ӑстисем темиҫе ҫӗр пайран, сутӑ элементӗнчен хатӗрленӗ. Ҫавӑн пекех курава килекенсен «Сувар» вӑрман, предприятисем тӑрӑх вип-ҫулҫӳреве кайма, Иван Яковлевӑн тата Василий Чапаевӑн 3D-голограммине курма пулать.

Стенда монтаж туса пӗтернӗпе пӗрех. Пирӗн стенд Мари Эсеннипе юнашар вырнаҫӗ.

Алёна Елизарова страницинчен илнӗ сӑнӳкерчӗк

Ултавҫӑсем тем те пӗр шухӑшласа кӑлараҫҫӗ. Вӗсем халӗ республикӑри икӗ министр ячӗпе суя ҫырусем яма пуҫласа кайнӑ. Ун пек ҫырусене хальлӗхе Чӑваш Енӗн ӗҫ тата социаллӑ хӳтлӗх министрӗн Алёна Елизарован тата вӗренӳ тата ҫамрӑксен политикин министрӗн Дмитрий Захаров ячӗпе янӑ.

Министрсен суя аккаунтӗнчен вӗсем йӗрке хуралҫисен тӗрӗслевӗ пирки систереҫҫӗ.

Министрсем ҫынсене ун пек ҫырусене ӗненмелле мар тесе асӑрхаттараҫҫӗ.

yur-gazeta.ru сайтри сӑн

Етӗрне муниципаллӑ округӗнчи Вӑрманкас Асламас ялӗнче пурӑнакан 35 ҫулти хӗрарӑм ачине хӗненӗ тесе шутлаҫҫӗ. 13-ри хӗрачана унран туртса илнӗ, кукамӑшне (е асламӑшне) панӑ.

Следстви шутланӑ тӑрӑх, кӑҫалхи ҫӗртме-ҫурла уйӑхӗсенче ҫак хӗрарӑм килӗнче ӳсӗр пулнӑ чухне хӗрне пӗрре мар хӗненӗ, ӑна тивӗҫлӗ воспитани паман. Ҫак ҫемье унччен те ӑнӑҫсӑррисен шутӗнче тӑнине палӑртмалла.

Халӗ следстви малалла пырать.

Прокуратура архивӗнчи сӑн

Елчӗк муниципаллӑ округӗнче Кӳлпуҫ ялӗнче унччен хытӑ сийлӗ ҫул пулман. Йӗпе-сапара унта пылчӑк ҫӑрӑлнӑ кӑна.

Вырӑнти влаҫ ҫула прокуратура тавӑҫ тӑратсан кӑна йӗркене кӗртнӗ. Ӗҫне вара кирлӗ хутсене приставсене парсан кӑна тунӑ - щебень сарса панӑ.

Халӗ ял ҫыннисем пылчӑк ӑшӗнче ҫӑрӑлмаҫҫӗ.

Пирӗн ҫӗршывра ӗҫлекен карас ҫыхӑнӑвӗн операторӗсем: «МегаФон», «Билайн» тата «Tele2» — Wi-Fi ҫыхӑнӑвӗпе ытти хатӗрсене ҫыхӑнтарнӑшӑн укҫа илме пӑрахнӑ.

Унччен вӗсене ҫавӑншӑн Федерацин монополипе кӗрешекен служби кун пирки асӑрхаттарнӑ. Асӑннӑ тытӑмра пӗлтернӗ тӑрӑх, «МегаФон» вай-файшӑн юпа уйӑхӗн 23-мӗшӗнченпе укҫа илме пӑрахнӑ.

«Tele2» чӳк уйӑхӗн 22-мӗшӗнчен ҫӗнӗ абонентсенчен укҫа ыйтмӗ, раштав уйӑхӗн 19-мӗшӗнчен ыттисене те тӳлеттермӗ. Интернет лимичӗ пӑхса хӑварнӑ абонентсене «Билайн» раштав уйӑхӗн 1-мӗшӗнчен тӳлеттерме чарӑнӗ.

«МТС» вара абонентсен правине хӗсӗрлемен тесе хушӑва пурнӑҫлама килӗшмен.

krasivoe-foto.ru сайтри сӑн

Президент пепкелӗх центрӗ пӗлтернӗ тӑрӑх, ҫулталӑк пуҫланнӑранпа ҫӑк пульницӑра 50 йӗкӗреш ҫуралнӑ. Ку пӗлтӗрхи ҫак тапхӑрпа танлаштарсан, 5 хут нумайрах.

Тӗрӗссипе, кӑҫал йӗкӗреш кӑна мар ытларах ҫуралнӑ. Кӑҫал пӗлтӗрхи ҫак тапхӑртинчен 228 ача ытларах кун ҫути курнӑ.

Ҫакӑ та кӑсӑклӑ: юлашки ҫулсенче арҫын ача ытларах ҫуралать. Пирӗн республикӑра тин ҫуралнӑ пепкесем вилессин кӑтартӑвӗ вара ҫӗршывра чи пӗчӗкки.

protumse.ru сайтри сӑн

Ҫӗнӗ Шупашкарти троллейбус управленине ҫитес ҫулхи пуш уйӑхӗн 31-мӗшӗччен пӗтермелле. Ҫапла каланӑ Ҫӗнӗ Шупашкар хула администрацийӗн пуҫлӑхӗн тивӗҫӗсене вӑхӑтлӑха пурнӑҫлакан Максим Семенов алӑ пуснӑ йышӑнӑва.

Анчах ку троллейбус ӗҫӗ-хӗлне пырса тивмелле мар. Мӗншӗн тесен кӑҫал ака уйӑхӗнче Чӑваш транспорт управленине хута янӑ. Вӑл Шупашкар тата Ҫӗнӗ Шупашкар троллейбус управленийӗсене тытса тарӗ. Шупашкарти управленине ҫуркуннех республика харпӑрлӑхне панӑ.

Чӑваш Ен Элтеперӗ Олег Николаев Китая ҫул тытӗ. Унта вӑл ӗҫпе кайӗ.

Чӑваш Ен делегацийӗ Китайра тӑватӑ кун пулӗ: чӳк уйӑӗн 6-9-мӗшӗсенче. Вӗсем Цзянси провинцири Нанчань хулинче иртекен «Волга–Янцзы» форматлӑ канашӑн лаӑвне хутшӑнӗҫ.

Чӑваш Ен делегацине Олег Николаевсӑр пуҫне тата кам кӗрессине асӑнман.

"Пятница!" телеканал архивӗнчи сӑн

Паян 22 сехетре «Пятница!» телеканала ҫутсан унта Чӑваш Ен ачине курма пултаратӑр. Шупашкарта пурӑнакан Анастасия Егорова «Умнее всех» (чӑв. «Пуринчен те ӑслӑрах») кӑларӑма хутшӑннӑ. Эфирӗ шӑпах паян пулӗ.

Настя – 13 ҫулта. Ҫак кӑларӑма хутшӑнакан 9-14 ҫулсенчи ачасем хӑйсен ӑсӗпе укҫа ӗҫлесе илеҫҫӗ. Настя вара робототехникӑпа, программӑлассипе, культурӑпа тата Кӑнтӑр Корея технологийӗсемпе кӑсӑкланать. Вӑл хӑйӗн роботне тума ӗмӗтленет.