cap.ru сайтри сӑн

Кӗҫех, ака уйӑхӗн 15-мӗшӗнче, Шупашкарта ял хуҫалӑх ярмӑрккисем ӗҫлеме пуҫлӗҫ. Экономика аталанӑвӗн министерстви пӗлтернӗ тӑрӑх, ун валли 20 лапам хатӗрленӗ.

«Ҫуркунне» ял хуҫалӑх ярмӑрккисем тӗп хулара виҫӗ ҫӗрте ӗҫлӗҫ: «Николаевски» суту-илӳ комплексӗ, «Ҫурҫӗр» суту-илӳ комплексӗ умӗнче, «Шупашкар» суту-илӳ комплексӗ умӗнче.

Ярмӑрккӑ пӗлтӗрхи тухӑҫа сутса пӗтерме май парать. Унта сухан, кишӗр, помидор, хӑяр, аш-какай, сӗт юр-варӗ, кӗрпе таврашӗ, пыл тата ыттине сутма пулать. Суту-илӳ вырӑнӗсемпе тӳлевсӗр тивӗҫтернӗрен продукци хакӗ те пӗчӗкрех пулӗ.

"Про Город" архивӗнчи сӑн

Паян 11 сехет те 20 минутра Шупашкарта «Ҫеҫпӗл» чарӑнуран пуҫласа «Афанасьев урамӗ» чарӑну таран троллейбус линийӗ ҫинче авари пулнӑ. Ҫавна май троллейбуссем вӑхӑтлӑха ҫӳреймен.

Вырӑна техпулӑшу машини килнӗ. Вӑл троллейбуссене куҫарма пулӑшнӑ. Пӗр троллейбуса вара, 18-мӗш маршрутпа ҫӳрекенскере, водитель тата пассажирсем тӗксе куҫарнӑ. Ку хыпара «Про Город» хаҫата халӑх корреспонденчӗ пӗлтернӗ.

Инкеклӗ лару-тӑру министерстви тунӑ сӑн

Ака уйӑхӗн 3-мӗшӗнче Канаш районӗнчи Ачча ялӗнче арҫын ҫӳп-ҫап ҫунтарас тенӗ те пӳртсӗр тӑрса юлнӑ.

Вӑл ҫӳп-ҫап ҫунтарма пуҫланӑ та ҫулӑм типӗ курӑ тӑрӑх кайса ҫурт патне ҫитнӗ. Ҫурчӗ кӑна мар, хуралтӑ таврашӗсем те ҫунса кӗлленнӗ.

Инкеклӗ лару-тӑру министерстви юлашки талӑкра республикӑра 8 пушар пулнине палӑртнӑ.

culture.cap.ru сӑнӳкерчӗкӗ

Ҫӗршывӑн тӗрлӗ регионӗ тӑрӑх гастрольпе ҫӳрекен Чӑваш патшалӑх юрӑпа ташӑ ансамбльне пур ҫӗрте те ӑшшӑн кӗтсе илеҫҫӗ. Кун пирки республикӑн Культура министерствин сайтӗнче хыпарланӑ.

Гастроле кайма коллектив «Гордимся Родиной своей» (чӑв. Тӑван ҫӗршывпа мӑнаҫланатпӑр) программа хатӗрленӗ. Унта ансамблӗн ылтӑн фондӗнчи вокалпа хореографи номерӗсем тата ҫӗнӗ постановкӑсем кӗнӗ.

Ӗнер пултарулӑх ушкӑнӗ Кироври П. Чайковский ячӗллӗ Вятка патшалӑх филармонийӗн сцени ҫинче концерт лартса панӑ. Паян артистсем Чистополь хулинчи куракансене хӑйсен пултарулӑхӗпе савӑнтарӗҫ.

Маргарита Красотина страницинчен илнӗ сӑнӳкерчӗк

Ҫак кунсенче Чӑваш Республикин тава тивӗҫлӗ художникне Евгения Вдовичевӑна юлашки ҫула ӑсатнӑ. Киҫтӗк ӑсти пуш уйӑхӗн юлашки кунӗнче куҫне ӗӗрлӗхе хупнӑ.

Сӗнтӗрвӑрри районӗнчи Кушник ялӗнче 1937 ҫулхи кӑрлачӑн 6-мӗшӗнче ҫуралнӑ Евгения Аркадьевна. Хӗр чухнехи унӑн хушамачӗ Воздвиженская пулнӑ. Унӑ ашшӗ вырӑнти чиркӳре ӗҫленӗ. 1939 ҫулта чиркӗве хупсан ҫемье Хусана тухса кайнӑ. Тӑвавн ҫӗршывӑн аслӑ вӑрҫи вӗҫленсен ҫемье тӑван тӑрӑхне таврӑннӑ.

Евгения Аркадьевна шӑпи ҫӑмӑл пулман. Упӑшкинчен вӑл 5 уйӑхри ывӑлӗпе ӑса юлнӑ. Ун хыҫҫӑн ҫамрӑк хӗрарӑм тек ҫемье ҫавӑрман. Пурнӑҫне вӑл ҫывӑх ҫыннисене тата пултарулӑха халалланӑ.

"На связи" форумри сӑн

Ҫӗрпӳ районӗнчи аптекӑсенче тӗрӗслев ирттернӗ те 18-мӗш аптекӑра амоксициллин антибиотик, суспензи евӗрри, пулманнине тупса палӑртнӑ. Ҫавна май прокуратура унӑн директорне дисциплинарлӑ майпа явап тыттарма йышӑннӑ.

Хальхи вӑхатра ҫав аптекӑна амоксициллин антибиотик сутлӑха килнӗ.

Яндекс.Дзенри "Авангард IT-индустрии" сӑнӳкерчӗкӗпе усӑ курса Таисия Ташней хатӗрленӗ коллаж

Чӑваш патшалӑх гуманитари ӑслӑлӑхӗсен институтӗнче чӑвашла пӗлекен программист кирлӗ.

Институтӑн сайтӗнче хыпарланӑ тӑрӑх, чӑваш чӗлхине (калаҫма тата ҫырма) тата программӑлас ӗҫе пӗлекен специалист кирлӗ. Ӗҫе официаллӑ майпа илӗҫ. Резюмене human2000@yandex.ru электрон почтӑпа ярса пама ыйтнӑ.

elhammusic.com сӑнӳкерчӗкӗ

Паян, ака уйӑхӗн 4-мӗшӗнче, Чӑваш Енре Композиторсен союзне йӗркелесе янӑранпа 80 ҫул ҫитнӗ.

Чӑваш АССРӗнчи совет композиторӗсен союзӗн йӗркелӳ комитетне 1940 ҫулта пуҫарнӑ. Ҫав пӗрлешӗвӗн тӗп тӗллевӗ чӑваш наци культурине, унӑн йӑли-йӗркине аталантарасси тата чӑваш композиторӗсен произведенийӗсене халӑхра сарасси пулнӑ. Хамӑр тӑрӑхра ҫеҫ мар, ют регионсенче те.

"Контактри" сӑн

Ейӳ вӑхӑтӗнче Элӗк районӗнчи Чӑваш Сурӑм ялӗнче пӗртен-пӗр кӗпер арканнӑ.

Ҫавна май ҫынсем ял масарӗ ҫине каяймаҫҫӗ, Янӑш ялне ҫитсе килеймеҫҫӗ, "Новый путь" ЯХПК уй-хирне каҫаймаҫҫӗ. Ӗнер ялти хастарсем арканнӑ кӗпер патне ҫитсе курнӑ. "Республикӑра ку инкек пирки илтмен ахӑртнех. Халӑх пулӑшасса кӗтет", - тенӗ хастарсем.

«Новостная барахолка» пабликран илнӗ сӑнӳкерчӗк

Етӗрнери пӗр ҫамрӑк палламан кинемее пулӑшнӑ. Ҫавӑн пирки ватӑ ҫын каччӑ вӗренекен заведение тав туса шӑнкӑравланӑ.

Пӗр кунхине кинемей хӑйӗн килӗ умӗнчи пӑра ватса шыв ҫулӗ уҫма хӑтланнӑ. Ҫав самантра пӗр яш урампа иртсе пынӑ. Ватӑ ҫын нушаланнине кура вӑл кинемее пулӑшас тенӗ.

Каччӑ Тимур Чернов ятлине плтернӗ, Етӗрнери агротехника техникумӗнче вӗренет иккен.

Каярах кинемей вӗренӳ заведенине шӑнкӑравласа сирӗн патра ҫавӑн пек каччӑ вӗренет-и тесе кӑсӑкланнӑ, вӑл ӑна тав туса шӑнкӑравланине пӗлтернӗ.