Инкеклӗ лару-тӑру министерстви тунӑ сӑн

Сӗнтӗрвӑрри районӗнчи Кайри Шӗнерпуҫ ялӗнче ӗнер 15 сехет хыҫҫӑн ҫурт ҫуннӑ. Ҫӑлавҫӑсем пушара 19 минутран сӳнтернӗ.

Анчах ҫулӑм кӳршӗ ҫуртӑн ҫиелти сийне те шар кӑтартнӑ. 63 ҫулти кил хуҫи пӳртне ҫулӑм ярса ан илтӗр тесе пушарнӑйсем киличчен хӑйех тӑрӑшнӑ. Ҫавӑн чухне вӑл пиҫсе кайнӑ.

Арҫынна пульницӑна илсе ҫитернӗ. Тухтӑрсем палӑртнӑ тӑрӑх, унӑн ӳчӗ самаях пиҫсе кайнӑ.

cheb-centr.soc.cap.ru сӑнӳкерчӗкӗ

Шупашкар хулинчи халӑхӑн социаллӑ ыйтӑвӗсене тивӗҫтерекен комплекслӑ центрӗнче «Магия чувашской вышивки бисером» (чӑв. Чӑваш тӗррине шӑрҫапа тӗрлессин асамлӑхӗ) ятпа ӑсталӑх сехечӗ иртнӗ.

Унта пуҫтарӑннӑ кинемейсене Светлана Кириллова ӗҫ инструкторӗ чӑваш тӗррине вӗтӗ шӑрҫапа та тӗрлеме май пуррине кӑтартса панӑ.

Тӗрӗссипе, ватӑсем ку ӑсталӑха унччентерех алла илнӗ. Вӗтӗ шӑрҫаран вӗсем тӗрлӗ япала ӑсталама пӗлеҫҫӗ. Халӗ вара унпа чӑваш тӗррине тӗрленӗ.

Шупашкарта пурӑнакан Алевтина Семёнова хӑйӗн илемлӗ япалисене хавхалантарса кӑтартнӑ. Ольга Усманова вара вӗтӗ шӑрҫаран тӗрлӗ илем хатӗрленӗ чух кӑмӑл та хавхаланнине палӑртса хӑварнӑ.

culture.cap.ru сӑнӳкерчӗкӗ

Ҫеҫпӗл Мишши ячӗллӗ Чӑваш патшалӑх ҫамрӑксен театрӗ патшалӑх премине тивӗҫнӗ. Хушӑва республика Элтеперӗ Олег Николаев алӑ пуснӑ. Театра 2022 ҫулшӑн литературӑпа ӳнер енӗпе преми панӑ.

Наградӑна культура учрежденийӗ Михаил Юхма повеҫӗ тӑрӑх лартнӑ «Куккук куҫҫулӗ» спектакльшӗн тивӗҫнӗ. Вӑл ӗҫе сцена ҫине 2022 ҫулхи пуш уйӑхӗн 15-мӗшӗнче кӑларнӑ.

Лауреат ятне пилӗк ҫынтан тӑракан коллектив тивӗҫнӗ. Ҫав йышра Борис Манджиев режиссёр, пьеса авторӗ Юхма Мишши, Дмитрий Михайлов, Венера Пайгильдина тата Леонид Яргейкин артистсем.

Светлана Васильева халӑх ушкӑнӗнчи страницинчен илнӗ сӑнӳкерчӗксем

Ҫӗртме уйӑхӗн 24-мӗшӗнче, Республика кунӗнче, Чакаҫ ялӗнчи «Ҫӑлкуҫ» пултарулӑх ушкӑнӗ туй йӑли-йӗркине кӑтартса панӑ.

Асӑннӑ тӑрӑхри Светлана Васильева халӑх тетелӗнчи хӑйӗн страницинче «ҫӗр пин юрӑллӑ, ҫӗр пин тӗрӗллӗ-эрешлӗ, юратнӑ Чӑваш Ене, Чӑваш Республикинче пурӑнипе мухтаннине» палӑртса хӑварнӑ. «Аваллӑхӑмӑрпа хавхаланса, наци-культура йӑли-йӗркине типтерлӗн сыхласа упраса тата малалла аталантарса, пурнӑҫӑн пысӑк пахалӑхӗпе палӑрса паянхи кун Чакаҫ ял культура ҫумӗнчи «Ҫӑлкуҫ» пултарулӑх ушкӑнӗ ӗлӗкрен пынӑ туй йӑла-йӗркине кӑтартса, юрӑ-ташӑпа ҫамрӑк мӑшӑрсене саламларӑмӑр», — пӗлтернӗ вӑл.

Паян ҫанталӑк самаях ӑшӑ. Кӑнтӑрла термометр 25 градус кӑтартать. Синоптиксем пӗлтернӗ тӑрӑх, кунашкал ҫанталӑк юнкунччен тӑрӗ.

Кӗҫнерникун ӑмӑрланӗ. Эрне вӗҫнелле, канмалли кунсенче ҫумӑр ҫӑвӗ. Ун чухне ҫанталӑк та уҫӑрах пулӗ. Кӑнтӑрласерен 20 градус ӑшӑ тӑрӗ. Ҫурҫӗр-хӗвеланӑҫ енчен вӗрекен ҫил вӑйланӗ

21.мвд.рф сӑнӳкерчӗкӗ

Тӑвай районӗнчи Мучар ялӗ тӗлӗнче инкек пулса иртнӗ.

Ҫӗртме уйӑхӗн 25-мӗшӗнче 17 сехет тӗлӗнче «ВАЗ-2111» автомобиль ҫултан тухса кайса ҫул айккинче ҫаврӑнса ӳкнӗ.

Машинӑра 4 ҫын пулнӑ. Вӗсем пурте — ҫамрӑксем. 16-19 ҫулсенчи ҫамрӑксем. Шар курнӑскерсене Канашри пульницӑна илсе кайнӑ.

Ҫаврӑнса ӳкнӗ машина рульне тытса пынӑ водитель инкек вырӑнӗнче ҫула май машинӑна ларса тарнӑ. Анчах водитель камне палӑртнӑ. Инкек сӑлтавне специалистсем тӗрӗслеҫҫӗ.

Чӑваш Енри дизайнерсен союзӗн халӑх тетелӗнчи страницинчен илнӗ сӑнӳкерчӗк

Чӑваш Енӗн Наци вулавӑшӗнче ҫӗртме уйӑхӗн 23-мӗшӗнче «Шупашкар тавраш» курав уҫӑлнӑ. Вӑл Шупашкар районӗнче ҫуралнӑ художниксен ӗҫӗсемпе паллаштарать.

Курав авторӗсен йышӗнче: Раҫҫейри дизайнерсен союзӗн пайташӗсем Александр Астраханцев, Геннадий Иванов-Орков, Александр Рахванов, Ирина Солянова (Астраханцева); Раҫҫейри художниксен союзӗн пайташӗсем Валерий Павлов, Ирина Рязнцева, Ирина Чипенко; Анатолий Доронин, Венегдит Лукшин.

Курава йӗркелекенӗсем — Александр Астраханцев тата Геннадий Иванов-Орков искусствовед. Сӑмах май каласан, кӑҫал вӗсем иккӗшӗ те 70 ҫул тултарӗҫ.

Курава уҫма вулавӑшри «Эткер» фольклор ансамблӗ (ертӳҫи – Земфира Яковлева) хутшӑннӑ.

Вулавӑшӑн халӑх тетелӗнчи страницинчен илнӗ сӑнӳкерчӗк

Чӑваш Енӗн Наци вулавӑшӗнче те «Паха тӗрӗ» фабрикӑн пӗр ӗмӗрхи юбилейне халалласа ятарлӑ эрне ирттерессине эпир пӗлтернӗччӗ-ха.

авна май вулавӑшра курав уҫӑлнӑ. Экспозицире фабрикӑн малтанхи художникӗсем Е.И. Ефремова, М.В. Симакова, Т.И. Петрова тата хальхи вӑхӑтра унта ӗҫлекен А.В. Андреева, О.А. Ландышева тӗрленӗ костюмсем, платьесем, ытти япаласем вырӑн тупнӑ. Унтах ал ӑҫтисен биографийӗпе паллашма пулать.

Курав утӑ уйӑхӗн 15-мӗшӗччен ӗҫлӗ.

«Паха тӗрӗ» эрни иртнӗ май ҫӗртме уйӑхӗн 28-мӗшӗнче 10 сехетре «Бренд «Паха тӗрӗ» в истории и национальной культуре Чувашии» (чӑв. Чӑваш Енӗн истрийӗпе наци культуринче «Паха тӗрӗ» бренд») ятпа ӑслӑлӑхпа практика конференцийӗ уҫӑлӗ.

Раҫҫейре «Марка» АУ «Тӑван ҫӗшывра утса кӑларнӑ строительство техники» маркӑсен серине кӑларнӑ. Унта Шупашкарти «Промтрактор» туса кӑларакан ЧЕТРА ПК12 погрузчике те сӑнланӑ.

Палӑртмалла: ЧЕТРА ПК12 погрузчик Раҫҫейре кустӑрмаллӑ погрузчиксен йышӗнче чи вӑйли шутланать.

Сӑмах май, «Промтрактор» продукцийӗ унччен те почта маркисем ҫине лекнӗ. 2021 ҫулхи кӗркунне ЧЕТРА Т40 бульдозера сӑнланӑ.

"Про Город" хаҫат архивӗнчи сӑн

Чӑваш Енре Кӗтне юханшывӗнче пулӑ вилнӗ. Кун пирки «Про Город» хаҫата халӑх корреспонденчӗ пӗлтернӗ. Редакцие Комсомольски районӗнчи Хырай Ӗнел ҫывӑхӗнче ӳкернӗ сӑнсене те ярса панӑ.

Халӑх корреспонденчӗ пӗлтернӗ тӑрӑх, пулӑсем темиҫе ҫул каялла вилнӗ, вӗсем шыв ҫийне тухнӑ. Ҫыран хӗрринче те пулӑ нумай выртать.

Хырай Ӗнел ҫывӑхӗнче кӑна мар кун пек лару-тӑру-мӗн. Кӗтне тӑршшӗпех пулӑсем вилнӗ. Росприроднадзор, Рыбнадзор, Ҫутҫанталӑк министерствин ӗҫченӗсем шыва тӗпчеме илнӗ.